អាវុធលោកខាងលិចផ្តល់ឲ្យអ៊ុយក្រែន ធ្លាយទៅដល់មជ្ឈិមបូព៌ា ធ្លាក់ចូលទីផ្សារងងឹត (មានវីដេអូ)

ប្រទេសរុស្ស៊ី បានអះអាងកាលពីថ្ងៃអង្គារទី០៥ខែកក្កដាថា អាវុធមួយចំនួនដែលលោកខាងលិចបញ្ជូនទៅឲ្យអ៊ុយក្រែន កំពុងធ្លាយទៅដល់ពាសពេញតំបន់មជ្ឈិមបូព៌ា និងធ្លាក់ចូលទៅក្នុងទីផ្សារងងឹត។

ថ្លែងនៅក្នុងសុន្ទរកថាតាមទូរទស្សន៍ រដ្ឋមន្ត្រីការពារជាតិលោក Sergei Shoigu បាននិយាយថា កន្លងមក អ៊ុយក្រែនបានទទួលទំនិញយោធាជាង ២៨ ០០០តោន ហើយសព្វាវុធរបស់លោកខាងលិចមួយចំនួន កំពុងលេចឡើងនៅមជ្ឈិមបូព៌ា។

ទោះបីជាយ៉ាងណាក៏ដោយ លោក​មិន​បាន​ផ្តល់​ព័ត៌មាន​លម្អិត​ណា​មួយ ​ដើម្បីគាំទ្រ​ការ​អះអាង​របស់ខ្លួន​ទេ។

លោក Shoigu ​និយាយ​ថា “​ក្នុងគោលបំណងឲ្យជម្លោះ​នៅ​អ៊ុយក្រែនបន្តអូសបន្លាយ​, ក្រុមប្រទេស​លោក​ខាង​លិច ​កំពុង​បន្ត​ការ​ផ្គត់ផ្គង់​សព្វាវុធ​ទ្រង់ទ្រាយ​ធំ​ដល់​ទីក្រុង កៀវ។ យោងតាមព័ត៌មានដែលយើងទទួលបាន អាវុធបរទេសមួយចំនួនដែលផ្គត់ផ្គង់ដោយលោកខាងលិចដល់អ៊ុយក្រែន កំពុងរីករាលដាលពាសពេញតំបន់មជ្ឈិមបូព៌ា ហើយកំពុងធ្លាក់ចូលទៅក្នុងទីផ្សារងងឹតផងដែរ”។

ដោយឡែក កាលពីថ្ងៃចន្ទ លោកប្រធានាធិបតី វ្ល៉ាឌីមៀរ ពូទីន បានបញ្ជាឲ្យកងទ័ពរុស្ស៊ី ជំរុញការវាយលុករបស់ពួកគេឲ្យកាន់តែជ្រៅចូលទៅក្នុង តំបន់ Donbas នៃភាគខាងកើតប្រទេសអ៊ុយក្រែន បន្ទាប់ពីកងកម្លាំងរបស់ទីក្រុងមូស្គូ ដណ្តើមបានទីក្រុងយុទ្ធសាស្ត្រ Lysychansk។

លោក Shoigu បានប្រាប់លោក ពូទីន ថា កងកម្លាំងរបស់ទីក្រុងមូស្គូ ឥឡូវនេះបានគ្រប់គ្រង តំបន់ Lugansk ទាំងស្រុងហើយ។

លោក Shoigu ក៏និយាយដែរថា ប្រទេសរុស្ស៊ីនឹងបន្តនូវអ្វីដែលវិមានក្រឹមឡាំង ហៅថា ជា“ប្រតិបត្តិការយោធាពិសេស” រហូតដល់ទីបញ្ចប់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Channels TV

ចុចអាន៖ អ៊ុយក្រែន ប្តេជ្ញាបន្តប្រយុទ្ធជាមួយរុស្ស៊ី ដរាបណានៅតែទទួលបាន ការគាំទ្រ