ជាង ៣០ថ្ងៃទៀត Elon Musk នឹងក្លាយជាបុគ្គលមានឥទ្ធិពលលេខ១ នៅលើ Twitter

នៅសល់ពេលប្រមាណជាងមួយខែទៀត ពោលគឺនៅថ្ងៃអង្គារ ទី១៧ ខែមករា ឆ្នាំ២០២៣ ខាងមុខនេះ មហាសេដ្ឋីបច្ចេកវិទ្យា Elon Musk នឹងក្លាយជាអ្នកមានឥទ្ធិពលលេខមួយ នៅលើ Twitter ។ នេះបើយោងតាមទិន្នន័យរបស់​​Social Blade ដែលជាការព្យាករណ៍របស់អ្នកវិភាគប្រព័ន្ធផ្សព្វផ្សាយសង្គម។

ដោយមានអ្នកតាមដានជាង ១២០លាននាក់ គណនីរបស់ Elon Musk បានឡើងតំណែងលំដាប់ទីពីរមានអ្នកតាមដានច្រើនជាងគេលើពិភពលោក បន្ទាប់ពីគណនីរបស់អតីតប្រធានាធិបតីអាមេរិក Barack Obama ដែលមានអ្នកតាមដានជាង ១៣០លាននាក់។

យោងតាមការវិភាគ បន្ទាប់ពីទិញយក Twitter កំលុងខែតុលា ស្ថិតិ Follower របស់លោក Elon Musk នឹងវ៉ាដាច់ Barack Obama ដោយចៀសសមិនរួច ខណៈមួយថ្ងៃមហាសេដ្ឋីវ័យ ៥១ឆ្នាំរូបនេះ ទទួលបានអ្នកតាមដានរហូតដល់ ២៧ម៉ឺននាក់ឯណោះ។

ទោះបីជាមានភាពចម្រូងចម្រាសនាពេលថ្មីៗនេះក៏ដោយ ប៉ុន្តែប្រជាប្រិយភាពរបស់លោក Musk នៅលើ Twitter នៅតែកើនឡើងមិនអាចប្រកែកបាន។

អ្នកអត្ថាធិប្បាយប្រព័ន្ធផ្សព្វផ្សាយសង្គម Matt Navarra មានប្រសាសន៍ថា “ឥឡូវនេះ Elon Musk គឺជាតួអង្គសំខាន់នៅលើ Twitter” ។ ដោយសារលោកជា CEO នៃបណ្ដាញនេះផង និងដោយសារគុណសម្បត្តិមួយចំនួន ដូច្នេះលោកក្លាយជាបុគ្គលមានឥទ្ធិពលជាជាងគេនៅលើវេទិកា មិនមែនជារឿងចម្លែកនោះទេ ហើយនេះក៏ជាប្រវត្តិសាស្ត្រថ្មីសម្រាប់បណ្ដាញទំនាក់ទំនងសង្គមផងដែរ ព្រោះកម្រមានណាស់ដែលនាយកប្រតិបត្តិប្រព័ន្ធផ្សព្វផ្សាយសង្គមក្លាយជាជាអ្នកមានឥទ្ធិពលលើគេហទំព័រផ្ទាល់ខ្លួនរបស់ពួកគេ៕

ប្រែសម្រួល៖ សន្យា

ប្រភព៖ BBC

ចុចអាន៖ Elon Musk មិនយក ៨ ដុល្លារទេចំពោះអ្នកប្រើ Twitter ដែលមានធីកពណ៌ខៀវលើ IPhone

ចុចអាន៖ មកដឹងពីពាក្យដែលគេស្វែងរកច្រើនបំផុត​លើ Google ក្នុងឆ្នាំនេះ