ពេលដល់ភ្លើងស្តុបក្រហមគ្មានសញ្ញាព្រួញ អាច​បត់ស្តាំបាន ប្រសិនគ្មានឧបសគ្គចំពោះមុខ

នៅពេលភ្លើងចរាចរណ៍លោតដល់ភ្លើងក្រហមភ្លាម លោកអ្នកអាចធ្វើការបត់ស្តាំបាន ប្រសិនជាផ្លូវខាងមុខទំនេរ គ្មានឧបសគ្គ ហើយភ្លើងក្រហមនោះ មិនមែនជាភ្លើងសញ្ញាមានរូបព្រួយ។

ក្រសួងសាធារណការ និងដឹកជញ្ជូន បានចែករំលែកបន្ថែមទៅលើភ្លើងសញ្ញាចរាចរណ៍ ទៅដល់សាធារណជនថា ប្រសិនជាភ្លើងសញ្ញាគ្មានព្រួញ ហើយលោតពណ៌ក្រហម គឺមហាជនអាចបត់ទៅខាងស្តាំបាន។ មួយវិញទៀត ក្នុងករណីដែលលោតភ្លើងក្រហម អ្នកបើកបរឈប់នៅមុខគំនូសថ្មើរជើង ឬ ចំគំនូសថ្មើរជើង ឬ ឈប់នៅមុខខ្សែបន្ទាត់គំនូសជាប់ពណ៌សកាត់ទទឹងទ្រូងផ្លូវ អាចបត់ទៅស្តាំដៃបំផុតបាន ប្រសិនជាគ្មានឧបសគ្គ និងបត់ដោយភាពប្រុងប្រយ័ត្ន លើកលែងតែភ្លើងក្រហម មានសញ្ញាព្រួញតែប៉ុណ្ណោះ។

ចំណែក ភ្លើងសញ្ញាពណ៌លឿង ​គឺជាសញ្ញាដែលប្រាប់ឱ្យមានភាពប្រុងប្រយ័ត្ន ហើយត្រៀមឈប់។ រីឯ ភ្លើងសញ្ញាពណ៌បៃតង គឺជាសញ្ញាដែលអនុញ្ញាតឱ្យយានជំនិះចេញដំណើរ។ ឆ្លៀតក្នុងឱកាសនេះ ក្រសួងសាធារណការ និងដឹកជញ្ជូន ក៏បានផ្តាំផ្ញើឱ្យប្រជាពលរដ្ឋគ្រប់រូប បើកបរដោយសុវត្ថិភាព មានការទទួលខុសត្រូវខ្ពស់ និងគោរពច្បាប់ចរាចរណ៍ទាំងអស់គ្នា។ ការណែនាំនេះ នឹងជួយឱ្យប្រជាពលរដ្ឋយល់កាន់តែច្បាស់ពីច្បាប់ចរាចរណ៍ និងភ្លើងសញ្ញាចរាចរណ៍បន្ថែមទៀត ព្រមទាំងចូលរួមគោរពច្បាប់ចរាចរណ៍ទាំងអស់គ្នា ដើម្បីជាប្រយោជន៍រួមក្នុងសង្គម៕

ដោយ៖ អុន ស្រីមាន