មន្ត្រីជំនាញជំរុញទីផ្សារផលិតផលខ្មែរ តាមរយៈការលើកកម្ពស់ចលនាភូមិ ១ ផលិតផល ១

នៅ​ថ្ងៃទី ២២ ខែកញ្ញា ឆ្នាំ២០២៣ លោក​ សួង ណយ អគ្គលេខាធិការរងគណៈកម្មាធិការជាតិជំរុញ​ចលនាភូមិ ១ ផលិតផល១ នៃទីស្តីការគណៈរដ្ឋមន្ត្រី បានជំរុញលើកទឹកចិត្ត​ដល់ថ្នាក់ដឹកនាំនិង​មន្ត្រីជំនាញពាក់ព័ន្ធ អាជីវករ និងប្រជាពលរដ្ឋគាំទ្រផលិតផលក្នុងស្រុកឲ្យបានកាន់តែច្រើន ព្រោះបើគ្មានការគាំទ្រប្រើប្រាស់ផលិតខ្មែរនៅក្នុងស្រុកទេ ក៏មិនអាចឈានទៅដល់ការនាំចេញផលិតផលខ្មែរ​ទៅក្រៅប្រទេសបានដែរ។

ថ្លែងក្នុងវេទិកាផ្គូរផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុកក្នុងខេត្តកំពត​កាលពី​ថ្ងៃទី ២២ ខែកញ្ញា លោក សួង ណយ លើកឡើងថា ភូមិ ១ ផលិតផល ១ ជាគោលនយោបាយ​មួយរបស់រាជរដ្ឋាភិបាលដើម្បីប្រមូលផ្តុំជំរុញកសិករ ឬអ្នកផលិតឲ្យខិតខំផលិតឲ្យបានច្រើនប្រកបដោយគុណភាព មានអនាម័យ ចេះវេចខ្ចប់ និងស្វែងរកទីផ្សារ ដើម្បីកាត់បន្ថយភាពក្រីក្រ ការធ្វើចំណាកស្រុក និងជំរុញចលនាគាំទ្រផលិតផលក្នុងស្រុក ឈានទៅដល់ការនាំចេញទៅក្រៅប្រទេស។

ជាក់ស្តែងការផ្គូរផ្គងរវាងអ្នកផលិត និងអ្នកទិញនៅ​ថ្ងៃ​នេះ ដើម្បីបង្កភាពងាយស្រួលដល់ពួកគាត់និងដើម្បីស្វែងយល់អំពីតម្រូវការផ្សេងៗរវាងអ្នកផលិត និងអ្នកទិញ ធ្វើយ៉ាងណាដើម្បីជំរុញទីផ្សារផលិតផលក្រុងស្រុកឲ្យប្រសើរ តាមយន្តការធ្វើការនាំចេញនៅនឹងកន្លែង។

លោកលើកទឹកចិត្ត​ដល់​មន្ត្រីជំនាញពាក់ព័ន្ធ អាជីវករ និងប្រជាពលរដ្ឋ​ចូលរួម​ជួយគាំទ្រ ផលិតផលក្នុងស្រុកឲ្យបានកាន់តែច្រើន ព្រោះបើគ្មានការគាំទ្រប្រើប្រាស់ផលិតខ្មែរនៅក្នុងស្រុកទេ ក៏មិនអាចឈានទៅដល់ការនាំចេញផលិតផលខ្មែរ ទៅក្រៅប្រទេសបានដែរ។

ម្ចាស់សិប្បកម្មផលិតប្រេងដូងនៅស្រុកឈូក លោក ឆាយ ស៊ីនឿន យល់ឃើញថា វេទិការផ្គូរផ្គងរវាងអ្នកផលិត និងអ្នកទិញ ពិតជាសំខាន់សម្រាប់កសិករ អ្នកផលិតស្វែងរកទីផ្សារលក់។

ម្ចាស់ផ្សារគ្រួសារធម្មជាតិ អ្នកស្រី សួន សិរីរ័ត្ន បានបង្ហាញការយល់ឃើញរបស់ខ្លួន​ថា កម្មវិធីនេះល្អធ្វើឲ្យអ្នកទិញបានដឹងនៅក្នុងខេត្តមានផលិតផលអ្វីខ្លះ ដែលខ្លួនអាចទិញយកទៅលក់បន្តបាន។

លោក ពេញ ធារម្យ អភិបាលរងខេត្តកំពតបានឲ្យដឹងថា ផលិតផលរបស់ខេត្តដែលបានដាក់ស្នើសុំចុះបញ្ជីក្នុងចលនាភូមិមួយផលិតផលមួយ​ចាប់ពីឆ្នាំ២០២០ ដល់២០២២ មានចំនួន ៥១ មុខ ក្នុងនោះមានផលិតកសិកម្ម ឧស្សាហកម្មសិប្បកម្ម ម្ហូបអាហារ ផលិតផលវត្ថុអនុស្សាវរីយ៍សីល្បៈ វត្ថុប្រើប្រាស់ និងវិស័យសេវាកម្មជាច្រើនទៀត។

អត្ថបទ៖ សឹង រ៉ាត់