ផ្លូវមួយខ្សែប្រវែង ១៥ គីឡូម៉ែត្រ តភ្ជាប់ផ្លូវជាតិលេខ៦ ដល់តំបន់ទេសចរណ៍កំពង់ភ្លុក បឹងទន្លេសាប សាងសង់បាន ៧០%

ផ្លូវមួយខ្សែមានទទឹង ៨ម៉ែត្រ និងប្រវែង ១៥គីឡូម៉ែត្រ ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជូនប្រជាពលរដ្ឋដែលរស់នៅក្នុងឃុំកំពង់ភ្លុក ស្រុកប្រាសាទបាគង និងសហគមន៍ទេសចរណ៍ ដើម្បីបម្រើផលប្រយោជន៍ក្នុងការដឹកជញ្ជូនផលនេសាទ ក៏ដូចការដឹកជញ្ជូនភ្ញៀវទេសចរទៅកម្សាន្តតំបន់សក្ដានុពលទេសចរ ដ៏ទាក់ទាញនៅជាប់មាត់បឹងទន្លេសាបនឹងប្រែក្លាយពីផ្លូវដី តូចចង្អៀតទៅជាបេតុង និងផ្លូវកៅស៊ូ។

ផ្លូវនេះត្រូវបានតភ្ជាប់ពីផ្លូវជាតិលេខ៦ ទៅដល់តំបន់ទេសចរណ៍កំពង់ភ្លុក បឹងទន្លេសាប ក្នុងស្រុកប្រាសាទបាគង ត្រូវបានសាងសង់ដោយក្រុមការងារកងវិស្វកម្មតេជោ ហ៊ុន សែន សម្រេចបានប្រមាណ ៧០% គិតត្រឹមថ្ងៃទី២ ខែមិថុនា ដែលផ្លូវនេះ ត្រូវគ្រោងនឹងបញ្ចប់ក្នុងខែកក្កដា ឆ្នាំ២០២៥។

សូមបញ្ជាក់ផងដែរថា ផ្លូវនេះត្រូវបានសាងសង់ជាផ្លូវពីរប្រភេទ គឺបេតុង និងក្រាលកៅស៊ូ ក្នុងនោះ ផ្លូវបេតុងប្រវែង ៣,២៥គីឡូម៉ែត្រ សាងសង់ចាប់ពីផ្លូវជាតិលេខ៦ ដល់ភូមិតាប្រាក់ ឃុំមានជ័យ និងផ្លូវក្រាលកៅស៊ូប្រវែង ៩គីឡូម៉ែត្រចាប់ពីភូមិតាប្រាក់ ទៅដល់ចំណតទូកឃុំកំពង់ភ្លុក។ ទន្ទឹមនឹងនេះ នៅឆ្នាំក្រោយ ក៏មានគម្រោងសាងសង់បន្តពីចំណតទូកឃុំកំពង់ភ្លុកទៅសាលាឃុំកំពង់ភ្លុកផងដែរ។

ប្រជាពលរដ្ឋដែលរស់នៅតាមបណ្តោយផ្លូវមានចំនួន ៣ ឃុំ រួមមាន ឃុំរលួស ឃុំមានជ័យ និងឃុំកំពង់កំពង់ភ្លុក។ ពលរដ្ឋដែលបានរស់នៅតំបន់កំពង់ភ្លុកបានថ្លែងអំណរគុណយ៉ាងជ្រាលជ្រៅបំផុតចំពោះសម្តេចធិបតី នាយករដ្ឋមន្ត្រីដែលបានគិតគូខ្ពស់ក្នុងផ្តល់ផ្លូវមួយខ្សែនេះ ដើម្បីមានភាពងាយស្រួលក្នុងការដឹកផលនេសាទ កសិផលនានា ពិសេសបានលើកកម្ពស់ដល់វិស័យទេសចរណ៍កំពង់ភ្លុកឱ្យកាន់តែមានភាពប្រសើរឡើងថែមទៀត៕

ដោយ៖ គឿនវេត