ថ្លែងក្នុងកិច្ចប្រជុំជាមួយមន្ត្រីរបស់ក្រសួងការពារជាតិស្តីពីវិសោធនកម្មលើសេចក្តីព្រាងច្បាប់សន្តិសុខជាតិនាពេលថ្មីៗនេះ, លោក Jumnong Chaimongkol អនុរដ្ឋមន្ត្រីក្រសួងការពារជាតិបាននិយាយថា ការកែប្រែវិសោធនកម្មលើច្បាប់អនុញ្ញាតឲ្យមានការនាំចេញអាវុធផលិតក្នុងស្រុក គឺមានគោលបំណងបន្ថែមតួនាទីថ្មីដល់ក្រសួងការពារជាតិក្នុងការជួយជំរុញឧស្សាហកម្មមួយនេះដើម្បីបង្កើតប្រាក់ចំណូលចូលរដ្ឋ ។

ក្នុងកិច្ចប្រជុំនោះទៀតសោត លោក Jumnong ​ក៏បានលើកឡើងពីបញ្ហា​ផ្លូវ​ច្បាប់ និង​ឧបសគ្គ​ផ្សេងៗសម្រាប់ការអនុម័តច្បាប់នាំចេញអាវុធនេះផងដែរ​ ។ លោកអនុរដ្ឋមន្ត្រីបញ្ជាក់ទៀត​ថា ច្បាប់មួយ​ចំនួន​ដូច​ជា ​ច្បាប់​រោងចក្រ​ផលិតអាវុធ​ឯកជនលេខ ​២៥៥០, ច្បាប់​គ្រប់គ្រង​អាវុធ​លេខ ​២៥៣០, ច្បាប់គ្រប់គ្រងការនាំចេញគ្រឿងសព្វាវុធធ្វើសឹកសង្គ្រាមលេខ ២៤៩៥ និង​ច្បាប់បច្ចេកវិទ្យា​ការពារ​ជាតិលេខ ​២៥៦២ សុទ្ធសឹងតែជាឫសគល់​រារាំង​ដល់​គោលនយោបាយនាំចេញអាវុធរបស់យើង ។

ទោះយ៉ាងណា ដើម្បីដោះស្រាយបញ្ហាទាំងនេះ ក្រុមការងារគ្រោងនឹងសហការជាមួយសហគ្រិនវិស័យឯកជន និងដៃគូនៃវិទ្យាស្ថានបច្ចេកវិទ្យាការពារជាតិ ខណៈកិច្ចខិតខំប្រឹងប្រែងរួមគ្នានេះមានគោលបំណងធ្វើទំនើបកម្មច្បាប់ដែលមានស្រាប់ ជាពិសេសដើម្បីធ្វើយ៉ាងណាឲ្យវាកាន់តែអំណោយផលដល់គោលនយោបាយរបស់ក្រសួង ។

ស្របពេលជាមួយគ្នានេះ ការជំរុញរបស់ក្រសួងការពារជាតិដើម្បីធ្វើវិសោធនកម្មច្បាប់ទាំងនេះ ក៏គូសបញ្ជាក់ពីការផ្លាស់ប្តូរយុទ្ធសាស្ត្រឆ្ពោះទៅរកការពង្រឹងសមត្ថភាពការពារជាតិរបស់ប្រទេសថៃ និងដាក់ប្រទេសចូលទៅក្នុងភាពជាដៃគូប្រកួតប្រជែងនៅក្នុងទីផ្សារអាវុធពិភពលោកផងដែរ ៕

ដោយ ៖ សុខ ជីវ័ន្ត

ចុចអាន ៖ កូនស្រីលោក ថាក់ស៊ីន ឲ្យសមាជិកសភាទុកចិត្តលើនាយករដ្ឋមន្ត្រីក្នុងការ​តែងតាំងគ្រប់មន្ត្រីថ្មីៗ

The post ថៃ ពិចារណានាំចេញអាវុធផលិតក្នុងស្រុកដើម្បីទាញចំណូលចូលរដ្ឋ appeared first on Kampuchea Thmey Daily.

ថ្លែងក្នុងសុន្ទរកថានៅឯទីក្រុង Honolulu កាលពីព្រហស្បតិ៍, លោក Rudd បានព្រមានថា “ក្នុងលក្ខខណ្ឌបើលោកប្រធានាធិបតីចិន ស៊ី ជីនពីង ដែលនឹងឈានចូលដល់វ័យ ៧១ ឆ្នាំក្នុងខែនេះ ចង់សម្រេចឲ្យបាននូវការបង្រួបបង្រួមជាមួយតៃវ៉ាន់សាជាថ្មីនោះ លោកទំនងជាអាចនឹងធ្វើសកម្មភាពបែបនេះនៅទសវត្សរ៍ក្រោយ ពោលមុនលោក ស៊ី នឹងចូលវ័យ ៨០ ឆ្នាំ ហើយពេលនោះ ពិភពលោកនឹងផ្លាស់ប្ដូរទាំងស្រុងទៅជាកន្លែងមួយផ្សេងទៀត” ។

ការព្រមានរបស់ឯកអគ្គរដ្ឋទូតអូស្ត្រាលីវ័យ ៦៧ ឆ្នាំរូបនេះកើតមានឡើង ក្រោយមើលឃើញពីក្ដីភ័យព្រួយរបស់អាមេរិកពាក់ព័ន្ធនឹងទង្វើរបស់ចិននៅជិតតៃវ៉ាន់ បន្ទាប់ពីលោក Lai Ching-te ដែលទីក្រុងប៉េកាំងចាត់ទុកជាអ្នកនាំភ្លើងសង្គ្រាម ស្បថចូលកាន់តំណែងជាប្រធានាធិបតីរបស់ដែនកោះមួយនេះកាលពីខែមុន ខណៈចិនក៏បានព្រមានដែរថា អាមេរិកមិនគួរលូកដៃចូលក្នុងកិច្ចការរបស់ទីក្រុងប៉េកាំងជាមួយទីក្រុងតៃប៉ិឡើយ ។

លោក Rudd បានបញ្ជាក់ទៀតថា “សហរដ្ឋអាមេរិក ចិន និងតៃវ៉ាន់មានផលប្រយោជន៍រួមដើម្បីបញ្ចៀសការប្រឈមមុខដាក់គ្នាផ្នែកយោធាលើដែនកោះតៃវ៉ាន់ ព្រោះបើសង្គ្រាមផ្ទុះឡើងមែន តម្លៃសេដ្ឋកិច្ច ផលប៉ះពាល់នយោបាយក្នុងស្រុក និងផលវិបាកភូមិសាស្ត្រក៏អាចនឹងកើតឡើងផងដែរ ហើយនេះជាករណីថ្មីមួយទៀត ចាប់តាំងពីផសង្គ្រាមលោកលើកទី ២ មក” ។

ស្របពេលជាមួយគ្នានេះ សហរដ្ឋអាមេរិកក៏បានទទួលស្គាល់ដែរថា ប្រសិនបើប្រទេសចិនទទួលបានទង់ជ័យក្នុងការបញ្ចូលកោះតៃវ៉ាន់ នោះវានឹងបង្កប៉ះពាល់ដល់ភាពជឿជាក់ ក៏ដូចជាជះឥទ្ធិពលដល់ទាំងសហរដ្ឋអាមេរិក និងសម្ព័ន្ទមិត្តរបស់ទីក្រុងវ៉ាស៊ីនតោនទៅទូទាំងពិភពលោកតែម្ដង ។

គួរបញ្ជាក់ថា តៃវ៉ាន់ និងសហរដ្ឋអាមេរិកមិនមានទំនាក់ទំនងការទូតជាផ្លូវការនោះទេ ដោយសារតែទីក្រុងវ៉ាស៊ីនតោននៅតែគោរពលើគោលនយោបាយចិនតែមួយ ប៉ុន្តែបានព្យាយាមប្រើគ្រប់មធ្យោបាយពាំងការពារតៃវ៉ាន់ ក៏ដូចជាធ្វើជាខ្នងបង្អែកដ៏ធំមួយរបស់ដែនកោះមួយនេះ និងតែងតែប្រកាសផ្ដល់ជំនួយយោធា និងសន្តិសុខដល់រដ្ឋាភិបាលទីក្រុងតៃប៉ិជារឿយៗផងដែរ ៕

ដោយ ៖ សុខ ជីវ័ន្ត

ចុចអាន ៖ លោក Biden បញ្ជាក់ជាថ្មីថា អាមេរិក នឹងប្រើកម្លាំងយោធាពាំង តៃវ៉ាន់ បើ ចិន ហ៊ានលុកលុយ

The post ទូតអូស្ត្រាលីនៅអាមេរិកថា ពិភពលោកនឹងប្ដូរមុខមាត់ទាំងស្រុង បើសង្គ្រាម​នៅ តៃវ៉ាន់ ផ្ទុះឡើង appeared first on Kampuchea Thmey Daily.

ថ្លែងក្នុងកិច្ចប្រជុំជាមួយសមាជិកសភាបក្សភឿថៃនៅឯទីស្នាក់ការកណ្ដាលរបស់បក្សកាលពីថ្ងៃពុធ, លោកស្រី ផែថងថាន បានចេញការព្រមានថា ប្រសិនបើមានសមាជិករូបណាមួយជំទាស់នឹងការតែងតាំងនេះ នោះនឹងបង្កបញ្ហាដល់លោក សេដ្ឋា ហើយប្រសិនបើលោកនាយករដ្ឋមន្ត្រីត្រូវបានដកតំណែង រដ្ឋាភិបាលចម្រុះរបស់យើងនឹងបែកបាក់ ។

កាលពីពេលថ្មីៗនេះ លោក សេដ្ឋា បានតែងតាំងលោក Wissanu ដែលធ្លាប់បម្រើការជាឧបនាយករដ្ឋមន្ត្រីក្នុងជួររដ្ឋាភិបាលដឹកនាំដោយលោកឧត្តមសេនីយ៍ ប្រាយុទ្ធ ចាន់អូចា ឲ្យធ្វើជាទីប្រឹក្សាផ្នែកច្បាប់របស់លោក ។ ការតែងតាំងនេះមានការមិនពេញចិត្តជាខ្លាំងពីសំណាក់សមាជិកព្រឹទ្ធសភា ស្របពេលដែលលោកនាយករដ្ឋមន្ត្រីក៏កំពុងត្រៀមខ្លួនការពារក្នុងសំណុំរឿងតែងតាំងលោក Pichit Chuenban ជារដ្ឋមន្ត្រីនៅទីស្តីការនាយករដ្ឋមន្ត្រី បើទោះជារូបលោកមានប្រវត្តិជាប់ពន្ធនាគារក៏ដោយ ។

ពាក់ព័ន្ធនឹងបញ្ហានេះ លោកស្រី ផែថងថាន បានទទួលស្គាល់ថា សមាជិកសភាបក្សភឿថៃមួយចំនួនអាចមានអារម្មណ៍មិនសប្បាយចិត្តក្នុងការតែងតាំងអ្នកដែលធ្លាប់ជាអតីត “សត្រូវ” របស់យើងដើម្បីផ្តល់យោបល់ដល់នាយករដ្ឋមន្ត្រី ។ សូមអ្នកទាំងអស់គ្នាបើកចិត្តឲ្យទូលាយ ព្រោះការចូលរួមរបស់លោក Wissanu នាពេលនេះគឺ​ក្នុង​បំណង​ល្អ​ដើម្បី​ជួយ​រដ្ឋាភិបាលរបស់តែប៉ុណ្ណោះ ។

កូនស្រីអតីតនាយករដ្ឋមន្ត្រីលោក ថាក់ស៊ីន រូបនេះបានបន្ថែមថា លោក Wissanu ក៏ធ្លាប់បម្រើការនៅក្រោមរដ្ឋាភិបាលរបស់គណបក្សថៃស្រឡាញ់ថៃដែលកាច់ចង្កូតនាវាដោយឪពុករបស់លោកស្រីផងដែរ ។ គាត់គឺជាមនុស្សមានសមត្ថភាព ដូច្នេះសូមទទួលយកគាត់ ដោយសារតែលោក សេដ្ឋា ត្រូវការទីប្រឹក្សាដ៏រឹងមាំ ដើម្បីធានាដល់រដ្ឋាភិបាលបន្តអនុវត្តគោលនយោបាយដ៏ត្រឹមត្រូវ ។

គួរបញ្ជាក់ថា ចាប់តាំងពីការរុះរើគណៈរដ្ឋមន្ត្រីថ្មីមក រដ្ឋាភិបាលថៃដែលកាច់ចង្កូតនាវាដោយលោកនាយករដ្ឋមន្ត្រី សេដ្ឋា ថាវីស៊ីន ហាក់ជួបបញ្ហាឈឺក្បាលជាច្រើន ជាពិសេសគឺសម្រេចចិត្តតែងតាំងអតីតមេធាវីដែលធ្លាប់មានប្រវត្តិជាប់ទោសទណ្ឌ និងមន្ត្រីមកពីបក្សប្រឆាំងឲ្យកាន់តួនាទីធំៗក្នុងជួររដ្ឋាភិបាលចម្រុះ ស្របពេលដែលឥស្សរជនជាច្រើនដែលធ្លាប់ជួយជ្រោមជ្រែងបក្សក៏បានលាលែងពីតំណែងជារដ្ឋមន្ត្រីផងដែរ ៕

ដោយ ៖ សុខ ជីវ័ន្ត

ចុចអាន ៖ លោក សេដ្ឋា ចេញស្រាយបំភ្លឺរឿងតំណែងនាយករដ្ឋមន្ត្រី ក្រោយបញ្ហា​អាស្រូវតែងតាំងមន្ត្រីមានទោសទណ្ឌ

The post កូនស្រីលោក ថាក់ស៊ីន ឲ្យសមាជិកសភាទុកចិត្តលើនាយករដ្ឋមន្ត្រីក្នុងការ​តែងតាំងគ្រប់មន្ត្រីថ្មីៗ appeared first on Kampuchea Thmey Daily.

ថ្លែងប្រាប់អ្នកសារព័ត៌មានក្នុងសន្និសីទតាមអនឡាញកាលពីថ្ងៃពុធ, លោក Kirby បាននិយាយថា “ចាប់តាំងពីលោក Zelensky ដាក់ចេញរូបមន្តសន្តិភាព ១០ ចំណុចមក គ្មានប្រទេសណាចេញមុខជំរុញ ក៏ដូចជាសម្របសម្រួលឲ្យវាដំណើរការខ្លាំងជាងអាមេរិកនោះទេ ដូច្នេះយើងនៅពីក្រោយគ្រប់ជំហានមួយៗទាំងអស់នៃរូបមន្តសន្តិភាពរបស់រដ្ឋាភិបាលទីក្រុងកៀវ” ។

ទោះយ៉ាងណា លោកប្រធានាធិបតី Joe Biden នឹងមិនអញ្ជើញចូលរួមក្នុងកិច្ចប្រជុំកំពូលស្ដីពីសន្តិភាពអ៊ុយក្រែនដែលរៀបចំឡើងនៅប្រទេសស្វីសនាថ្ងៃទី១៥ ដល់ថ្ងៃទី១៦ ខែមិថុនាខាងមុខនេះនោះទេ ប៉ុន្តែនឹងបញ្ជូនលោកស្រីអនុប្រធានាធិបតី Kamala Harris និងទីប្រឹក្សាសន្តិសុខជាតិលោក Jake Sullivan ធ្វើជាអ្នកតំណាងឲ្យសហរដ្ឋអាមេរិកនៅក្នុងព្រឹត្តិការណ៍មួយនេះ ។

កិច្ចប្រជុំកំពូលស្ដីពីសន្តិភាពអ៊ុយក្រែនដែលនឹងរៀបចំឡើងនៅរមណីយដ្ឋាន Burgenstock ក្នុងប្រទេសស្វីសបានអញ្ជើញគណៈប្រតិភូជាង ១៦០ ប្រទេសឲ្យចូលរួមអង្គុយចរចារកពន្លឺនៃការពន្លត់ភ្លើងសង្គ្រាមនៅអ៊ុយក្រែន ហើយក្នុងនោះក៏មានរួមទាំងក្រុមប្រទេស G7, G20 និង BRICS ផងដែរ ។ យ៉ាង​ណា​មិញ អាជ្ញាធរ​ស្វីស​មិនបានហារមាត់ហៅប្រទេសរុស្ស៊ីឲ្យចូលរួមនោះ​ទេ ។

ពាក់ព័ន្ធនឹងបញ្ហានេះដែរ លោកប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយថា រុស្ស៊ីនឹងមិនស្នើសុំឲ្យគេអញ្ជើញចូលរួមក្នុងព្រឹត្តិការណ៍នេះទេ ប្រសិនបើទីក្រុងមូស្គូមិនចង់នៅទីនោះ ។ ទន្ទឹមនោះ រដ្ឋមន្ត្រីការបរទេសរុស្ស៊ីលោក Sergey Lavrov ក៏បានកត់សម្គាល់ដែរថា កិច្ចប្រជុំនេះគឺគ្មានន័យ ហើយទីក្រុងមូស្គូមិនបានឃើញការត្រៀមខ្លួនរបស់បស្ចិមប្រទេសសម្រាប់កិច្ចសន្ទនាដោយស្មោះត្រង់នោះទេ ។ ទោះយ៉ាងណា រុស្ស៊ីមិនដែលបដិសេធគំនិតនៃការចរចាដោះស្រាយជម្លោះជាមួយទីក្រុងកៀវឡើយ ។

គួរបញ្ជាក់ថា កិច្ចប្រជុំកំពូលស្ដីពីសន្តិភាពអ៊ុយក្រែនដែលស្នើរៀបចំឡើងដោយលោកប្រធានាធិបតី Volodymyr Zelensky នៅប្រទេសស្វីសមានគោលបំណងកសាងរូបមន្តសន្តិភាពសម្រាប់អ៊ុយក្រែនដូចជា ការដកទ័ពរុស្ស៊ីចេញពីទឹកដីរបស់អ៊ុយក្រែន ការ​ដោះដូរ​អ្នកទោស​ជាមួយ​រុស្ស៊ី បញ្ហាថាមពល និង​សន្តិសុខ​នុយក្លេអ៊ែរ ក៏ដូចជាការ​បញ្ជូន​កុមារ​ទៅកាន់ប្រទេស​រុស្ស៊ី​វិញជាដើម ខណៈកិច្ចប្រជុំនោះទៀតសោតក៏រួមមានសំណើផ្សេងៗផ្អែកលើធម្មនុញ្ញអង្គការសហប្រជាជាតិ និងគោលការណ៍សំខាន់ៗនៃច្បាប់អន្តរជាតិផងដែរ ៕

ដោយ ៖ សុខ ជីវ័ន្ត

ចុចអាន ៖ តើមហាមិត្ត រុស្ស៊ី ណាខ្លះប្រកាសមិនចូលរួមកិច្ចប្រជុំកំពូលស្ដីពីសន្តិភាព អ៊ុយក្រែន?

The post អាមេរិក តែងតែឈរពីក្រោយខ្នងលោក Zelensky លើគ្រប់ជំហានទាំងអស់​នៃរូបមន្តសន្តិភាព អ៊ុយក្រែន appeared first on Kampuchea Thmey Daily.

លោក Orban បាននិយាយថា “ប្រសិនបើលោក Trump និង EU ពិតជាចង់ពន្លត់ភ្លើងសង្គ្រាមនៅអ៊ុយក្រែនមែននោះ គឺអាចធ្វើវាបានត្រឹមតែក្នុងរយៈពេល ២៤ ម៉ោងប៉ុណ្ណោះ ។ ខ្ញុំគិតថា ប្រសិនបើលោក Trump ឈ្នះឆ្នោតក្លាយជាប្រធានាធិបតី គាត់នឹងអាចសម្រេចបានបទឈប់បាញ់នៅអ៊ុយក្រែនត្រឹមក្នុងមួយថ្ងៃ ហើយបន្ទាប់មកនឹងមានការចាប់ផ្ដើមកិច្ចចរចាតែម្ដង” ។

លោកនាយករដ្ឋមន្ត្រីវ័យ ៦១ រូបនេះបានប្រាប់កាសែតអ៊ីតាលី Il Giornale ថា EU នឹងរៀបចំការបោះឆ្នោតនៅថ្ងៃទី៨ ដល់ថ្ងៃទី៩ ខែមិថុនាខាងមុខ ដូច្នេះយើងសង្ឃឹមថា ការបោះឆ្នោតនាពេលនេះនឹងជួយពាំនាំជោគជ័យណាមួយសម្រាប់ជម្លោះនៅអ៊ុយក្រែន ដោយសារតែពលរដ្ឋរបស់យើងចង់បានសុខសន្តិភាព មិនមែនជាសង្គ្រាម ក៏ដូចជាល្បែងនយោបាយរបស់មហាអំណាចនោះទេ ។

ពិតណាស់ វោហារសាស្ត្ររបស់លោក Orban នៅពេលនេះ គឺមិនខុសពីអ្វីដែលលោក Trump ធ្លាប់លើកឡើងពីមុនមកនោះទេ ។ កាលពីឆ្នាំមុន អតីតប្រធានាធិបតីទី ៤៥ របស់អាមេរិករូបនេះបានអួតអាងថា លោកនឹងចរចាបញ្ចប់ភ្នក់ភ្លើងសង្គ្រាមរវាងរុស្ស៊ី និងអ៊ុយក្រែនដោយប្រើពេលត្រឹមតែ ២៤ ម៉ោងប៉ុណ្ណោះ ជាពិសេសជម្លោះមួយនេះនឹងមិនលេចរូបរាងឡើយ ប្រសិនបើលោកឈ្នះការបោះឆ្នោតកាលពីឆ្នាំ ២០២០ កន្លងទៅ ។

ចំណែកសម្រាប់ការបោះឆ្នោតប្រធានាធិបតីអាមេរិកនាខែវិច្ឆិកាខាងមុខនេះ លោក Trump ក៏មានផែនការយុទ្ធសាស្ត្រដោះស្រាយចំពោះជម្លោះនៅអ៊ុយក្រែនដោយសន្តិវិធីផងដែរ ។ អតីតប្រធានាធិបតីវ័យ ៧៨ ឆ្នាំរូបនេះបានលើកឡើងកាលពីដើមខែឧសភាថា លោកមានសារដ៏សាមញ្ញមួយ ប៉ុន្តែមានខ្លឹមសារគ្រប់គ្រាន់ដែលនឹងឈានដល់ការពន្លត់ភ្លើងសង្គ្រាមមួយនេះ ។

គិតត្រឹមពេលនេះ ភ្លើងសង្គ្រាមរវាងរុស្ស៊ី និងអ៊ុយក្រែនបានចាយពេល ២ ឆ្នាំហើយ បន្ទាប់ពីកងកម្លាំងរដ្ឋាភិបាលទីក្រុងមូស្គូលើកទ័ពចូលទីក្រុងកៀវកាលពីថ្ងៃទី២៤ ខែកុម្ភៈ ឆ្នាំ២០២២ ខណៈបច្ចុប្បន្នលោកប្រធានាធិបតី Volodymyr Zelensky នៅតែបន្តដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ដោយ ៖ សុខ ជីវ័ន្ត

ចុចអាន ៖ លោក Biden បញ្ជាក់ជាថ្មីថា អាមេរិក នឹងប្រើកម្លាំងយោធាពាំង តៃវ៉ាន់ បើ ចិន ហ៊ានលុកលុយ

The post ប្រទេសសមាជិកណាតូជឿថា លោក Trump ពិតជាអាចពន្លត់ភ្លើងសង្គ្រាម​នៅ អ៊ុយក្រែន ក្នុងពេល ២៤ ម៉ោង appeared first on Kampuchea Thmey Daily.

ថ្លែងក្នុងបទសម្ភាសន៍ផ្ដាច់មុខជាមួយទស្សនាវដ្ដី Time នៅឯសេតវិមានកាលពីពេលថ្មីៗនេះ, លោក Biden បានលើកឡើងថា លោក​បាន​បញ្ជាក់ច្បាស់ៗ​ទៅ​កាន់លោក​ប្រធានាធិបតី​ចិន Xi Jinping រួចហើយ សហរដ្ឋ​អាមេរិក​មិន​បាន​ស្វែង​រក​ឯករាជ្យ​ភាព​សម្រាប់​កោះ​តៃវ៉ាន់​នោះ​ទេ ប៉ុន្តែលោកក៏មិនបោះបង់ការប្រើកម្លាំងយោធាអាមេរិកក្នុងករណីមានការលុកលុយណាមួយនោះដែរ ។

លោកប្រធានាធិបតីវ័យ ៨២ ឆ្នាំរូបនេះ​បាន​កត់​សម្គាល់​ថា ការមិនស្វែងរកឯករាជ្យភាពតៃវ៉ាន់ គឺជាគោលនយោបាយរបស់អាមេរិកជាយូរយារណាស់មកហើយ ហើយវាក៏អាចទៅរួចផងដែរដែលថា យោធាអាមេរិកនឹងធ្វើជាខ្នងបង្អែកការពារតៃវ៉ាន់ ប្រសិនបើទីក្រុងប៉េកាំងព្យាយាមបង្រួបបង្រួមជាមួយដែនកោះមួយនេះដោយការប្រើកម្លាំងបាយ ។

វោហារសាស្ត្ររបស់លោកប្រធានាធិបតីទី ៤៦ របស់អាមេរិករូបនេះកើតមានឡើង បន្ទាប់ពីសុន្ទរកថាដ៏ក្ដៅគគុករបស់ប្រមុខការពារជាតិចិនលោក Dong Jun នៅឯកិច្ចប្រជុំសន្តិសុខ Shangri-La ពាក់ព័ន្ធនឹងការប្រើកម្លាំងបាយទៅលើការទាមទារឯករាជ្យភាពតៃវ៉ាន់ ហើយក្នុងនោះលោកបានបញ្ជាក់ថា យោធាចិនបានរៀបជើងព្រួលរួចជាស្រេចដើម្បីប្រើកម្លាំងយោធាបញ្ឈប់ការចិញ្ចឹមចិត្តទាមទារឯករាជ្យភាពរបស់តៃវ៉ាន់ ។

ទន្ទឹមនោះ ចិននៅតែចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន ហើយរដ្ឋាភិបាលទីក្រុងប៉េកាំងបានព្រមានម្តងហើយម្តងទៀតថា ទីក្រុងវ៉ាស៊ីនតោនមិនគួរជ្រៀតជ្រែកចូលកិច្ចការផ្ទៃក្នុងរបស់តៃវ៉ាន់នោះទេ ព្រោះវាជាផលប្រយោជន៍ស្នូល រួមទាំងជាបញ្ហាអធិបតេយ្យភាព និងបូរណភាពទឹកដីរបស់ចិន ហើយចាត់ទុកការគាំទ្ររបស់ទីក្រុងវ៉ាស៊ីនតោនចំពោះតៃវ៉ាន់ជាការបង្កហេតុ ។

ពាក់ព័ន្ធនឹងបញ្ហានេះដែរ រដ្ឋាភិបាលតៃវ៉ាន់ក្រោមការកាច់ចង្កូតនាវាដោយប្រធានាធិបតីថ្មីគឺលោក Lai Ching-te ក៏បានចេញការឆ្លើយតបចំពោះការប្រកាសឥតញញើតមាត់របស់ប្រមុខការពារចិនរូបនេះផងដែរ ។ យោងតាមការចេញផ្សាយរបស់ទីភ្នាក់ងារព័ត៌មាន Reuters បានឲ្យដឹងដែរថា តៃវ៉ាន់ពិតជាមានការសោកស្ដាយជាពន់ពេកចំពោះការលើកឡើងដែលមានលក្ខណៈបង្ករឿង និងមិនសមហេតុផលយ៉ាងដូច្នេះ ។

គួរបញ្ជាក់ថា លោក Lai Ching-te បានស្បថចូលកាន់តំណែងជំនួសប្រធានាធិបតីផុតអាណត្តិគឺលោកស្រី Tsai Ing-wen កាលពីថ្ងៃទី២០ ខែឧសភា ខណៈមេដឹកនាំមកពីគណបក្សវឌ្ឍនភាពប្រជាធិបតេយ្យតៃវ៉ាន់ (DPP) រូបនេះត្រូវចិនចាត់ទុកជាអ្នកបំផ្លាញសន្តិភាព និងជាមនុស្សគ្រោះថ្នាក់ ដោយសារតែគោលនយោបាយយកអាមេរិកជាខ្នងបង្អែកការពារច្រកសមុទ្រតៃវ៉ាន់ដែលកំពុងមានជម្លោះ ៕

ដោយ ៖ សុខ ជីវ័ន្ត

ចុចអាន ៖ យន្តហោះយោធា មីយ៉ាន់ម៉ា ទម្លាក់គ្រាប់បែកទម្ងន់ជាង ២២០ គីឡូក្រាម​លើរោងការ សម្លាប់មនុស្ស ២៧ នាក់

The post លោក Biden បញ្ជាក់ជាថ្មីថា អាមេរិក នឹងប្រើកម្លាំងយោធាពាំង តៃវ៉ាន់ បើ ចិន ហ៊ានលុកលុយ appeared first on Kampuchea Thmey Daily.

បន្ទាប់ពីទម្លាក់គ្រាប់បែកទម្ងន់រាប់រយគីឡូហើយ កងកម្លាំងរបស់រដ្ឋាភិបាលយោធាថែមទាំងបាញ់កាំភ្លើងធំជាច្រើនគ្រាប់ទៅលើភូមិប្រជាពលរដ្ឋនៅក្រុង Mingin ផងដែរ បណ្តាលឲ្យអ្នកភូមិជាង ២,០០០ នាក់មកពីភូមិចំនួន ៦ នៅក្បែរនោះ បង្ខំចិត្តរត់ភៀសខ្លួនចេញពីលំនៅដ្ឋានរបស់ពួកគេ ។

យោងតាម​អ្នក​ភូមិនៅក្នុង​តំបន់បាននិយាយថា ហេតុការណ៍ទម្លាក់គ្រាប់បែកក្នុង​ពិធី​មង្គលការនេះ​បានកើតឡើងនៅ​វេលា​ម៉ោង ៨ និង ​១៥ ​នាទី​ព្រឹកថ្ងៃទី៤ ខែមិថុនា ប៉ុន្តែ​​សំណាងល្អនៅ​ពេល​នោះ​កូនកំលោះ និងកូនក្រមុំ​កំពុង​ធ្វើ​ដំណើរ​ទៅ​វត្តក្នុង​ភូមិ ពុំបណ្តាលឲ្យរងរបួសឡើយ ។

ពាក់ព័ន្ធនឹងបញ្ហានេះដែរ លោក Aung Myo Min រដ្ឋមន្ត្រីសិទ្ធិមនុស្សរបស់រដ្ឋាភិបាលស្រមោលមីយ៉ាន់ម៉ាបាននិយាយថា ការទម្លាក់គ្រាប់បែកនេះ គឺជាឧក្រិដ្ឋកម្មសង្គ្រាម ។ លោកបន្តថា នេះ​ជា​ការទម្លាក់គ្រាប់បែក​ដោយ​ចេតនាក្នុងពិធី​មង្គលការ​របស់ជនស៊ីវិល មិនមែនជាប្រតិបត្តិការយោធាអ្វីនោះទេ ។

គួរបញ្ជាក់ថា ក្នុងរយៈពេល ៤ ខែដំបូងនៃឆ្នាំ ២០២៤ នេះ រដ្ឋាភិបាលយោធាមីយ៉ាន់ម៉ាបានបើកការវាយប្រហារតាមអាកាសជាច្រើនលើកច្រើនសារ ហើយក៏បានសម្លាប់ជនស៊ីវិលជាង ៣៥៩ នាក់ផងដែរ ក្នុងនោះមានកុមារ ៦១ នាក់ និង ៧៥៦ នាក់ផ្សេងទៀតបានរងរបួស ៕

ដោយ ៖ គង់ សំអាន

The post យន្តហោះយោធា មីយ៉ាន់ម៉ា ទម្លាក់គ្រាប់បែកទម្ងន់ជាង ២២០ គីឡូក្រាម​លើរោងការ សម្លាប់មនុស្ស ២៧ នាក់ appeared first on Kampuchea Thmey Daily.

ថ្លែងក្នុងកិច្ចសម្ភាសន៍ផ្ដាច់មុខជាមួយទូរទស្សន៍ Nation TV កាលពីពេលថ្មីៗនេះ, លោក សេដ្ឋា បានប្រាប់ថា លោកមិនបានប្រព្រឹត្តទោសខុសអ្វីនោះទេក្នុងការតែងតាំងលោក Pichit Chuenban ធ្វើជារដ្ឋមន្ត្រីនៅទីស្តីការនាយករដ្ឋមន្រ្តី ហើយលោកក៏រំពឹងនឹងពន្យល់ឲ្យអស់សេចក្ដីលើសំណុំរឿងនេះទៅកាន់តុលាការធម្មនុញ្ញកាន់តែជ្រាបច្បាស់ផងដែរ ។

លោកនាយករដ្ឋមន្ត្រីបញ្ជាក់ច្បាស់ៗថា នៅពេលដែលមានករណីបែបនេះកើតឡើង យើងត្រូវតែពន្យល់ដោយតម្លាភាព និងតាមនីតិវិធីទៅកាន់តុលាការ ហើយការតែងតាំងលោក Pichit ដែលជាអតីតមេធាវីឲ្យមានតួនាទីក្នុងជួររដ្ឋាភិបាលរបស់លោកធ្វើឡើងដោយយុត្តិធម៌ ហើយលោកសង្ឃឹមថា នឹងមិនប៉ះពាល់ទៅដល់ការរង្គោះរង្គើតំណែងរបស់លោកនោះទេ ។ ទោះយ៉ាងណា លោកក៏ត្រូវត្រៀមឆ្លើយគ្រប់សំណួរក្ដៅទាំងអស់ផងដែរ” ។

អតីតមហាសេដ្ឋីអចលនទ្រព្យវ័យ ៦២ ឆ្នាំរូបនេះទទួលស្គាល់ថា “មានភាគីជាច្រើនមិនពេញចិត្តចំពោះការតែងតាំងនេះ ប៉ុន្តែវាជាកាតព្វកិច្ចរបស់រដ្ឋាភិបាលដែលត្រូវតែចេញការពន្យល់ ។ ដូច្នេះថាតើមានការពេញចិត្ត ឬក៏អត់ ទុកឲ្យតុលាការជាអ្នកកាត់ក្ដីទៅចុះ ប៉ុន្តែចំពោះលោកនេះគឺជាភាពត្រឹមត្រូវ និងជាភាពស្មោះត្រង់ក្នុងនាមជាអ្នកដឹកនាំ” ។

តុលាការធម្មនុញ្ញរបស់ប្រទេសថៃកាលពីសប្ដាហ៍មុនបានទទួលយកបណ្តឹងរបស់សមាជិកព្រឹទ្ធសភាចំនួន ៤០ រូបដែលទាមទារឲ្យដកលោក សេដ្ឋា ចេញពីតំណែងជានាយករដ្ឋមន្ត្រី ដោយសារតែបំពានរដ្ឋធម្មនុញ្ញ ក្រោយរឿងតែងតាំងលោក Pichit ធ្វើជារដ្ឋមន្ត្រីនៅទីស្តីការនាយករដ្ឋមន្ត្រី ព្រោះអតីតមេធាវីរូបនេះខ្វះសុចរិតភាព និងបទដ្ឋានសីលធម៌ដែលតម្រូវដោយរដ្ឋធម្មនុញ្ញ ជាពិសេសលោកជាប់ពាក់ព័ន្ធទោសព្រហ្មទណ្ឌ ។

លោក Pichit ត្រូវបានផ្តន្ទាទោសឲ្យជាប់ពន្ធនាគាររយៈពេល ៦ ខែកាលពីឆ្នាំ ២០០៨ ពីបទមិនគោរពតុលាការ ក្រោយមានការចោទប្រកាន់ថា បានប៉ុនប៉ងសូកប៉ាន់មន្ត្រីតុលាការចំនួន ២ លានបាត (៥៥,២១៨ ដុល្លារ) ដោយលាក់លុយនៅក្នុងថង់គ្រឿងទេសមួយ ខណៈអាជ្ញាប័ណ្ណច្បាប់របស់លោកត្រូវបានក្រុមប្រឹក្សាមេធាវីនៃប្រទេសថៃព្យួររយៈពេល ៥ ឆ្នាំ បន្ទាប់ពីមានករណីនេះ ។

គួរបញ្ជាក់ថា បច្ចុប្បន្នរដ្ឋាភិបាលថៃដែលកាច់ចង្កូតនាវាដោយលោកនាយករដ្ឋមន្ត្រី សេដ្ឋា ថាវីស៊ីន កំពុងស្ថិតក្នុងភាពវឹកវរ ខណៈក៏មានការលាលែងពីតំណែងរបស់រដ្ឋមន្ត្រី ៣ រូបរួចទៅហើយផងដែរក្នុងរយៈពេលប៉ុន្មានសប្ដាហ៍ថ្មីៗនេះ ក្រោយការរុះរើគណៈរដ្ឋមន្ត្រី ស្របពេលដែលបច្ចុប្បន្នសេដ្ឋកិច្ចថៃក៏មិនទាន់ដំណើរការល្អនៅឡើយនោះដែរ ជាពិសេសពាក់ព័ន្ធនឹងកិច្ចសន្យាផ្ដល់សាច់ប្រាក់ដល់ប្រជាជនប្រមាណ ៥០ លាននាក់ ៕

ដោយ ៖ សុខ ជីវ័ន្ត

ចុចអាន ៖ អតីតមេបក្សឈ្នះឆ្នោត ថៃ ត្រៀមខ្លួនធ្វើជានាយករដ្ឋមន្ត្រី បើលោក សេដ្ឋា ត្រូវដកតំណែង

The post លោក សេដ្ឋា ចេញស្រាយបំភ្លឺរឿងតំណែងនាយករដ្ឋមន្ត្រី ក្រោយបញ្ហា​អាស្រូវតែងតាំងមន្ត្រីមានទោសទណ្ឌ appeared first on Kampuchea Thmey Daily.