Mean Ratana, Author at Kampuchea Thmey Daily

ការសិក្សា ៖ រលាយទឹកកកនៅតំបន់ប៉ូល និងកត្តាប្រែប្រួលផ្សេងៗកំពុងដូររង្វិលជុំផែនដី

Mean Ratana — Sun, 31 Mar 2024 02:38:00 +0000

ឥទ្ធិពលនៃបម្រែបម្រួលធាតុអាកាស ក៏ដូចជាកំណើនកម្តៅផែនដី និងកម្រិតនីវ៉ូទឹកសមុទ្រ ស្របនឹងការសិក្សាថ្មីមួយបានលើកឡើងថា ឥទ្ធិពលប្រែប្រួលទាំងនេះ បានជំរុញឲ្យរង្វិលជុំផែនដីដែលវិលជុំវិញខ្លួនឯងផ្លាស់ប្តូរ ក៏ដូចជាមានឥទ្ធិពលប្រែប្រួលទៅលើរង្វាស់ពេលវេលា ២៤ ម៉ោងដែលមនុស្សប្រើប្រាស់បច្ចុប្បន្នផងដែរ ។

រង្វិលជុំផែនដីគឺជាអ្នកកំណត់នូវម៉ោង នាទី និងវិនាទីថ្ងៃយប់ទូទាំងពិភពលោក ដោយស្របទៅតាមស្តង់ដាម៉ោងពិភពលោក (UTC) ដែលគេបានកំណត់ចាប់តាំងពីឆ្នាំ ១៩៦០ មក ។ ទោះយ៉ាងណា ជាលើកដំបូងហើយដែលល្វែងម៉ោងស្តង់ដា UTC នឹងត្រូវបាត់បង់រយៈពេល ១ វិនាទី ដែលគេហៅក្នុងភាសាបច្ចេកទេសថា “គម្លាតអវិជ្ជមាននៃពេល” ។ នេះបើយោងតាមគេហទំព័រចំណេះដឹង Britannica ។

ចំណែកបើផ្អែកតាមការសិក្សាពីវិទ្យាស្ថានវិទ្យាសាស្រ្តនៃសាកលវិទ្យាល័យ California San Diego សហរដ្ឋអាមេរិកដែលចុះផ្សាយក្នុងព្រឹត្តិបត្រព័ត៌មានវិទ្យាសាស្រ្ត Nature ថ្មីៗនេះបានឲ្យដឹងថា ជាចំនួនសរុប មានរយៈពេលវេលា ២៧ វិនាទីដែលមានគម្លាតអវិជ្ជមានចេញពីស្តង់ដាម៉ោង UTC ។

ទន្ទឹមនោះ លោក Patrizia Tavella សមាជិកស្រាវជ្រាវវិទ្យាសាស្រ្តមួយរូបនៃមន្ទីរពិសោធវិទ្យាសាស្រ្តពេលវេលា និងទម្ងន់អន្តរជាតិនៃប្រទេសបារាំងបានឲ្យដឹងដែរថា ខណៈពេលដែលការបាត់បង់ពេលវេលាអាចជារឿងតូចតាចធម្មតាក៏ពិតមែន ប៉ុន្តែសម្រាប់អ្នកវិទ្យាសាស្រ្តគឺជាបញ្ហាប្រែប្រួលមួយក្នុងការគណនា និងកែសម្រួលទៅក្នុងប្រព័ន្ធកុំព្យូទ័រផ្សេងៗក្នុងការពិសោធវិទ្យាសាស្រ្តជាសកល ។

យ៉ាងណាមិញ ផ្អែកតាមការសិក្សាខាងលើរបស់អ្នកវិទ្យាសាស្រ្ត បានព្យាករឲ្យដឹងថា រយៈពេលវិនាទីគម្លាតអវិជ្ជមាន នឹងអាចកើតឡើងក្នុងចន្លោះចាប់ពីឆ្នាំ ២០២៦ ឡើងទៅ និងអាស្រ័យកត្តាមួយចំនួនដូចជាកំណើនកម្តៅផែនដី ហើយវាអាចកើតមានបន្តនៅចន្លោះទៅដល់ ២០៣៥ ខាងមុខ៕

ដោយ៖ មាន រតនា

The post ការសិក្សា ៖ រលាយទឹកកកនៅតំបន់ប៉ូល និងកត្តាប្រែប្រួលផ្សេងៗកំពុងដូររង្វិលជុំផែនដី appeared first on Kampuchea Thmey Daily.

ថៃ ត្រូវប៉ាន់នាំចេញ ទុរេន ដំឡូង និងសាច់មាន់ក្នុងកិច្ចព្រមព្រៀងពាណិជ្ជកម្មសេរី

Mean Ratana — Sat, 30 Mar 2024 07:26:43 +0000

ពាណិជ្ជកម្មផលិតផលកសិកម្មថៃទៅកាន់ប្រទេសនានាលើពិភពលោក គិតរយៈពេលត្រឹមឆ្នាំ ២០២៣ កន្លងទៅមានកំណើនគួរកត់សម្គាល់ ពោលប្រមាណ ៣.២៥% ឬស្មើនឹង ១.០១ លានលានបាត ប្រហែល ២៧.៧ ពាន់លានដុល្លារ បើធៀបនឹងឆ្នាំ ២០២២ ខណៈការនាំចេញកសិកម្មថៃមានផលលើសក្នុងទំហំទឹកប្រាក់ប្រមាណ ៥២៩ ពាន់លានបាត ឬស្មើ ១៤.៥ ពាន់លានដុល្លារ ។

ប្រភពព័ត៌មានពី Khaosod បានឲ្យដឹងថា ទីផ្សារនាំចេញសំខាន់ៗសម្រាប់ផលិតផលកសិកម្មរួមមាន ប្រទេសចិន ជប៉ុន កូរ៉េខាងត្បូង និងអូស្រ្តាលី ហើយទំនិញលំដាប់កំពូលទាំង ៥ របស់ថៃនាំចេញគឺមាន ទុរេន ក្នុងទំហំទឹកប្រាក់ ៣ពាន់លានដុល្លារ ផលិតផលសាច់មាន់សម្រេចទំហំ ១ ពាន់លានដុល្លារ ជ័រកៅស៊ូធម្មជាតិទំហំទឹកប្រាក់ ១ ពាន់លានដុល្លារ ដំឡូងក្នុងទំហំទឹកប្រាក់ ១ ពាន់លានដុល្លារ សាច់មាន់បង្កក និងគ្រឿងក្នុងមាន់ ទំហំទឹកប្រាក់ ៩០០ លានដុល្លារ ។

សម្រាប់តម្លៃទំហំពាណិជ្ជកម្ម និងអត្រាកំណើននៃដៃគូកិច្ចព្រមព្រៀងពាណិជ្ជកម្មសេរី FTA គឺប្រទេសចិនជាទីផ្សារនាំចេញរបស់ថៃនាំមុខគេ ភាគច្រើនជាផលិតផលកសិកម្ម ពិសេសការនាំចេញទុរេន ដំឡូង និងជ័រកៅស៊ូធម្មជាតិ ហើយរំពឹងថា នឹងបន្តកើនឡើងជាបន្តបន្ទាប់ក្នុងប្រតិបត្តិការពាណិជ្ជកម្មខាងមុខទៀត ។

គួររំឭកដែរថា ប្រទេសដែលបានចូលរួមកិច្ចព្រមព្រៀងពាណិជ្ជកម្មសេរីជាមួយប្រទេសថៃ លើកលែងតំបន់អាស៊ានចេញ រួមប្រទេសចិន ជប៉ុន កូរ៉េខាងត្បូង អូស្រ្តាលី នូវែលសេឡង់ ប៉េរូ ឈីលី ឥណ្ឌា និងហុងកុង ខណៈប្រទេសទាំងនេះ ជាដៃគូពាណិជ្ជកម្ម ក៏ដូចទីផ្សារសំខាន់ៗសម្រាប់ការនាំចេញរបស់ប្រទេសថៃ ៕

ដោយ៖ មាន រតនា

The post ថៃ ត្រូវប៉ាន់នាំចេញ ទុរេន ដំឡូង និងសាច់មាន់ក្នុងកិច្ចព្រមព្រៀងពាណិជ្ជកម្មសេរី appeared first on Kampuchea Thmey Daily.

ក្រុមហ៊ុនចិន Xiaomi បញ្ចេញរថយន្តអាគុយថាមពលអគ្គិសនី ត្រៀមដឹកជូនដល់ដៃអ្នកទិញចុងខែមេសា

Mean Ratana — Fri, 29 Mar 2024 09:15:19 +0000

ក្រុមហ៊ុនបច្ចេកវិទ្យាចិន Xiaomi កាលពីថ្ងៃព្រហស្បតិ៍ ទី២៨ ខែមីនា កន្លងទៅបានបញ្ចេញនូវរថយន្តស៊េរី SU7 របស់ខ្លួន ដែលជាការអភិវឌ្ឍបច្ចេកវិទ្យាអាគុយរបស់ក្រុមហ៊ុនផ្ទាល់តែម្ដងដើម្បីបង្ហាញជូនសាធារណជន ។ នេះបើតាមការចុះផ្សាយរបស់ទីភ្នាក់ងារសារព័ត៌មានចិន ស៊ីនហួរ ។

ម៉ូដែលរថយន្តទាំងបីស៊េរីរួមមាន SU7, SU7 Pro និង SU7 Max នឹងដាក់បញ្ចូលក្នុងទីផ្សារ ដែលមានហាងឆេងតម្លៃចាប់ពី ២១៥,៩០០ យ័ន ប្រហែលនឹង ៣០,៤៣១ ដុល្លារអាមេរិកទៅដល់ ២៩៩,៩០០ យ័ន ប្រហែលនឹង ៤១,៤៩៧ ដុល្លារអាមេរិក ។

ដោយឡែក រថយន្តថាមពលអគ្គិសនីដើរដោយអាគុយដែលបានបង្ហាញខាងលើ មានសមត្ថភាពចម្ងាយអតិប្បរមាពី៧០០ គីឡូម៉ែត្រឡើងទៅ ហើយរថយន្តស៊េរី SU7 និងSU7 Max នឹងផ្តើមដឹកជញ្ជូនដល់អតិថិជនកុម្ម៉ង់នាចុងខែមេសានេះ ខណៈប្រភេទ SU7 Pro នឹងត្រូវដឹកជូនអតិថិជននាចុងខែឧសភា ។

លោក Lei Jun ជាស្ថាបនិក និងជានាយកប្រតិបត្តិរបស់ Xiaomi បានថ្លែងក្នុងឱកាសសម្ពោធរថយន្តនោះថា ក្រុមហ៊ុនបានសម្រេចសមិទ្ធិផលនេះ តាមរយៈគន្លឹះសំខាន់ដូចជាការរៀបចំរចនាគំរូ ថ្ម និងប្រព័ន្ធបើកបរ ក៏ដូចជាកន្លែងអង្គុយអ្នកបើកបរបែបវៃឆ្លាតជាដើម ។

គួររំឭកផងដែរ Xiaomi បានចូលក្នុងវិស័យរថយន្តអគ្គិសនីដើរដោយថាមពលអាគុយកាលពីឆ្នាំ២០២១ និងចាប់ផ្តើមសង់រោងចក្រ ដែលមូលដ្ឋានដ៏ធំនៅក្នុងរដ្ឋធានីប៉េកាំងប្រទេសចិន ។

ទិន្នន័យពីសមាគមផលិតរថយន្តចិនបានបង្ហាញថា ចំនួនផលិតកម្ម និងការលក់រថយន្តអាគុយអគ្គិសនីនៅក្នុងប្រទេសចិន បានកើនដល់ចំនួន ១.២៥ លានគ្រឿង និង ១.២១ លានគ្រឿងក្នុង ២ ខែដំបូងនៃឆ្នាំ ២០២៤ ដែលកើនពី ២៨.២% ទៅដល់ ២៩.៤% ពីមួយឆ្នាំទៅមួយឆ្នាំ ៕

ដោយ៖ មាន រតនា

The post ក្រុមហ៊ុនចិន Xiaomi បញ្ចេញរថយន្តអាគុយថាមពលអគ្គិសនី ត្រៀមដឹកជូនដល់ដៃអ្នកទិញចុងខែមេសា appeared first on Kampuchea Thmey Daily.

វេទិកាបូអាវ ៖ សេដ្ឋកិច្ច អាស៊ី នឹងលូតលាស់ដល់ ៤.៥ ភាគរយក្នុងឆ្នាំនេះ

Mean Ratana — Thu, 28 Mar 2024 09:56:04 +0000

សេដ្ឋកិច្ចអាស៊ីរំពឹងថានឹងមានកំណើនលូតលាស់បាន ៤.៥ ភាគរយនៅក្នុងឆ្នាំ ២០២៤ នេះ ពោលលើសពីឆ្នាំ ២០២៣ និងបន្តរួមចំណែកដល់កំណើនលូតលាស់នៃសេដ្ឋកិច្ចពិភពលោកផងដែរ ។ នេះបើផ្អែកតាមរបាយការណ៍ដែលចេញផ្សាយដោយវេទិកាបូអាវសម្រាប់អាស៊ី (BFA) ដែលកំពុងធ្វើឡើងនៅក្រុងរមណីយដ្ឋានទេសចរបូអាវ ខេត្តហៃណាន ភាគខាងត្បូងប្រទេសចិន ។

ព័ត៌មានពីរបាយការណ៍ដដែលបានឲ្យដឹងថា បើទោះជាមានបញ្ហាប្រឈមមួយចំនួនក៏ដោយ ក៏សេដ្ឋកិច្ចអាស៊ីនឹងនៅរក្សាបានអត្រាកំណើនលូតលាស់បន្ត ដោយមានធាតុសកម្មមួយចំនួនចេញពីកត្តាប្រើប្រាស់ទំនិញ និងគោលនយោបាយពាក់ព័ន្ធផ្សេងៗ ។

របាយការណ៍ដដែលនេះក៏បានចង្អុលបង្ហាញឡើងដែរថា ប្រទេសចិនដែលជាមហាអំណាចសេដ្ឋកិច្ចបច្ចុប្បន្ននេះ នឹងបន្តឋានៈជាអ្នករួមចំណែកដ៏សំខាន់ទៅដល់កំណើនលូតលាស់សេដ្ឋកិច្ចសកល ក៏ដូចជាទីផ្សារដ៏ធំរបស់ខ្លួន ហើយក៏នឹងនាំមកនូវភាគចំណេញទៅកាន់ពាសពេញពិភពលោកផងដែរ ។

នៅក្នុងបរិបទជំនួញ និងវិនិយោគវិញ អាស៊ីរំពឹងថា នឹងផ្លាស់ប្តូររបត់ធ្លាក់ចុះនៃសេដ្ឋកិច្ចពីឆ្នាំ ២០២៣ ដោយបង្កើនការអភិវឌ្ឍ និងពាណិជ្ជកម្មក្នុងបរិបទឌីជីថល ក៏ដូចជាការស្តារសេដ្ឋកិច្ចឡើងវិញតាមរយៈវិស័យទេសចរនៅអាស៊ី ក៏ដូចកិច្ចសហការភាពជាដៃគូជាបណ្តាញជាច្រើនក្នុងតំបន់អាស៊ី ។

គួររំឭកដែរថា សន្និសីទប្រចាំនៃវេទិកាបូអាវសម្រាប់អាស៊ី (BFA) កំពុងធ្វើឡើងនៅទីក្រុងបូអាវ ខេត្តហៃណាន នៃសាធារណរដ្ឋប្រជាមានិតចិន ចាប់ពីថ្ងៃទី២៦ ដល់ថ្ងៃទី២៩ ខែមីនា ដោយមានការចូលរួមពីថ្នាក់ដឹកនាំរដ្ឋាភិបាល បញ្ញាវ័ន្ត អ្នកធុរកិច្ច ស្ថាប័នសិក្សាស្រារជ្រាវ អង្គការអន្តរជាតិ និងអង្គការក្នុងតំបន់នានា ដើម្បីពិភាក្សាអំពីបញ្ហាសំខាន់ៗនានាដែលកំពុងប្រឈម និងជំរុញកិច្ចសហការជាអន្តរជាតិផងដែរ ៕

ដោយ៖ មាន រតនា

The post វេទិកាបូអាវ ៖ សេដ្ឋកិច្ច អាស៊ី នឹងលូតលាស់ដល់ ៤.៥ ភាគរយក្នុងឆ្នាំនេះ appeared first on Kampuchea Thmey Daily.

ឡាវ ចេញសេចក្ដីណែនាំសម្រាប់បុណ្យចូលឆ្នាំថ្មី អ្នកល្មើសនឹងរងទោសទណ្ឌ

Mean Ratana — Thu, 28 Mar 2024 08:33:03 +0000

រដ្ឋបាលរដ្ឋធានីវៀងចន្ទន៍ប្រទេសឡាវ បានចេញសេចក្តីណែនាំសម្រាប់ប្រជាពលរដ្ឋមូលដ្ឋានរបស់ខ្លួន ចូលរួមសហការអនុវត្តនាឱកាសបុណ្យចូលឆ្នាំថ្មីប្រពៃណីឡាវខាងមុខនេះ ។ ថ្ងៃចូលឆ្នាំប្រពៃណីឡាវ ក៏ដូចនឹងថ្ងៃចូលឆ្នាំប្រពៃណីខ្មែរផងដែរ ពោលគឺចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខាងមុខ ។

តាមសារព័ត៌មានក្នុងស្រុកឡាវ Laotian Times បានឲ្យដឹងថា សេចក្តីណែនាំសម្រាប់ឆ្នាំថ្មីដាក់ចេញនោះ គឺដើម្បីធានាសុវត្ថិភាព និងការគោរពដល់ទំនៀមទម្លាប់ប្រពៃណីផង ។

នៅក្នុងខ្លឹមសារសេចក្តីណែនាំ គឺបានបម្រាមលើផ្លូវ និងទីតាំងសាធារណៈ ។ ក្នុងនោះមានការហាមប្រាមការលេងទឹកក្នុងរូបភាពមួយចំនួន ដូចជាមិនឲ្យប្រើប្រាស់ទឹកកខ្វក់ ទឹកកក ស៊ីទែនទឹកធំៗ ហាមឃាត់ការស្លៀកសម្លៀកបំពាក់មិនសមរម្យ ក៏ដូចជាការបង្កសំឡេងកងរំពងរំខាន ដោយគ្មានការអនុញ្ញាតពីអាជ្ញាធរ និងហាមប្រាមលើការដុតផាវ ឬគ្រឿងផ្ទុះមួយចំនួនផងដែរ ។

ដោយឡែក អ្នកបើកបរយានជំនិះទាំងឡាយ នឹងត្រូវហាមឃាត់ពីការប្រើប្រាស់គ្រឿងស្រវឹង នៅតំបន់មួយចំនួន ចំណែកតម្លៃទំនិញតាមហាងលក់ តម្រូវមិនឲ្យឡើងថ្លៃនៅឱកាសបុណ្យចូលឆ្នាំ ។

សម្រាប់ការបំពានសេចក្តីណែនាំនេះ ក៏មានទោសបញ្ញត្តិផងដែរ មិនថាជនជាតិឡាវ ឬអន្តរជាតិ នឹងត្រូវពិន័យ ដូចជាការហៅណែនាំ ការពិន័យទឹកប្រាក់ ឃាត់ខ្លួន អាស្រ័យកម្រិតល្មើស ហើយសមត្ថកិច្ចប៉ូលិស និងដាក់ពង្រាយនៅតាមតំបន់គោលដៅសំខាន់ៗដើម្បីត្រៀមបង្ការហានិភ័យបទល្មើស ក៏ដូចជាគ្រោះថ្នាក់ផ្សេងៗ ។ តាមរយៈការអនុវត្តនេះ សាធារណជនដែលប្រារព្ធពិធីចូលឆ្នាំថ្មីឡាវ នឹងរីករាយ ព្រមទាំងរក្សាបាននូវសុខសុវត្ថិភាព និងសណ្តាប់ធ្នាប់ក្នុងក្រុងវៀងចន្ទន៍ ៕

ដោយ៖ មាន រតនា

The post ឡាវ ចេញសេចក្ដីណែនាំសម្រាប់បុណ្យចូលឆ្នាំថ្មី អ្នកល្មើសនឹងរងទោសទណ្ឌ appeared first on Kampuchea Thmey Daily.

វៀតណាម ជំរុញឲ្យប្រើវេជ្ជបញ្ជាអេឡិចត្រូនិកលក្ខណៈប្រព័ន្ធ ងាយស្រួលគ្រប់គ្រងថ្នាំមានប្រសិទ្ធភាព

Mean Ratana — Wed, 27 Mar 2024 10:16:18 +0000

ក្រសួងសុខាភិបាលវៀតណាមថ្មីៗនេះបានប្រកាសឲ្យប្រើវេជ្ជបញ្ជាប្រភេទអេឡិចត្រូនិក ក៏ដូចជាណែនាំអំពីប្រព័ន្ធព័ត៌មានជាតិសម្រាប់ការគ្រប់គ្រងវេជ្ជបញ្ជាថ្នាំ និងវេជ្ជបញ្ជាទិញថ្នាំព្យាបាល ។ នេះបើតាមការចុះផ្សាយរបស់សារព័ត៌មាន Vietnam News។

តាមប្រភពព័ត៌មានខាងលើ សម្រាប់ការចាប់ផ្តើមអនុវត្តនេះ គឺដើម្បីធ្វើឲ្យមានប្រសិទ្ធិភាពឡើងសម្រាប់វេជ្ជបញ្ជាដែលប្រើប្រាស់ទូទាំងឱសថស្ថានក្នុងប្រទេស ក៏ដូចជាបញ្ជាក់ភាពត្រឹមត្រូវ និងបច្ចុប្បន្នភាពសុពលភាពនៃវេជ្ជបញ្ជា ។

ពាក់ព័ន្ធនឹងការចេញនូវវេជ្ជបញ្ជាអេឡិចត្រូនិកនេះ រដ្ឋាភិបាលវៀតណាមធ្វើឡើងក្នុងទិសដៅប្រឆាំងនឹងការប្រើថ្នាំផ្សះ Antibiotic ក៏ដូចជាអនុវត្ត គ្រប់គ្រងការប្រើប្រាស់ថ្នាំព្យាបាលឲ្យមានប្រសិទ្ធិភាព ស្របទៅតាមទិសដៅក្នុងពិភពលោក ។

ទន្ទឹមនោះ ប្រព័ន្ធព័ត៌មានជាតិអំពីវេជ្ជបញ្ជាថ្នាំ ក៏ដូចជាព័ត៌មានពាក់ព័ន្ធ នឹងធានានូវតម្លាភាពក្នុងការប្រើប្រាស់ថ្នាំព្យាបាលនៅវៀតណាម ពិសេសគឺភាពងាយស្រួល និងការគ្រប់គ្រងនៅតាមបណ្តាឱសថស្ថាន ក្នុងទិសដៅជារួមគឺសម្រាប់សេវាសុខភាពសាធារណៈ ។

តាមរយៈវេជ្ជបញ្ជាអេឡិចត្រូនិកនេះផងដែរ តាមបណ្តាឱសថស្ថានក៏អាចអនុវត្តការលក់ថ្នាំព្យាបាលបានលឿន និងប្រសិទ្ធិភាព ហើយខាងរដ្ឋាភិបាលក៏មានភាពងាយស្រួលក្នុងការធ្វើអធិការកិច្ច ជាប្រយោជន៍ជារួមប្រកបដោយប្រសិទ្ធិភាពដល់ប្រទេស ។

រំឭកផងដែរថា នៅប្រទេសវៀតណាម បញ្ហាមួយចំនួនក្នុងវិស័យសុខាភិបាលកំពុងកើតមាន ដូចជាការទិញលក់ថ្នាំពេទ្យព្យាបាលជំងឺដោយគ្មានវេជ្ជបញ្ជាត្រឹមត្រូវច្បាស់លាស់ ក៏ដូចជាអ្នកជំងឺទៅឱសថស្ថានវិនិច្ឆ័យអាការៈជំងឺ និងទិញថ្នាំដោយខ្លួនឯង ក៏ដូចជាយន្តការបញ្ជាក់ភាពត្រឹមត្រូវលើវេជ្ជបញ្ជាមួយចំនួនក្នុងការអនុវត្តលើឱសថស្ថានទូទាំងប្រទេសពុំមានប្រសិទ្ធិភាព កំពុងនៅចោទជាបញ្ហា ហើយការអនុវត្តជាយុទ្ធសាស្រ្តសុខាភិបាលរបស់រដ្ឋាភិបាលវៀតណាមខាងលើ ដើម្បីស្របទៅតាមរបត់បច្ចេកវិទ្យាដែលរីកលូតលាស់ក្នុងស្ថានភាពបច្ចុប្បន្នផងដែរ ៕

ដោយ៖ មាន រតនា

The post វៀតណាម ជំរុញឲ្យប្រើវេជ្ជបញ្ជាអេឡិចត្រូនិកលក្ខណៈប្រព័ន្ធ ងាយស្រួលគ្រប់គ្រងថ្នាំមានប្រសិទ្ធភាព appeared first on Kampuchea Thmey Daily.

២ ខែទៀត ក្រុមហ៊ុន VinFast វៀតណាម ផ្ដើមលក់រថយន្តអគ្គិសនីក្នុងទីផ្សារ ថៃ

Mean Ratana — Wed, 27 Mar 2024 09:29:03 +0000

ក្រុមហ៊ុនផលិតរថយន្តវៀតណាម VinFast បានប្រកាសកាលថ្ងៃអង្គារអំពីផែនការរបស់ខ្លួន នឹងលក់រថយន្តដើរដោយថាមពលអគ្គិសនីទៅក្នុងទីផ្សារប្រទេសថៃ ក្រោយពេលដែលបានសហការរួចរាល់ក្នុងការបើកទីតាំងបង្ហាញជាច្រើនកន្លែងទូទាំងប្រទេសថៃ ។ នេះបើយោងតាមប្រភពព័ត៌មាន AP ។

បើតាមប្រធានប្រតិបត្តិនៃក្រុមហ៊ុន VinFast ប្រចាំនៅប្រទេសថៃ លោកស្រី Vu Dang Yen Hang បានលើកឡើងប្រាប់សារព័ត៌មាន AP ថា VinFast នឹងចាប់ផ្តើមលក់ទាំងប្រភេទរថយន្ត Sport ដើរដោយថាមពលអគ្គិសនី ក៏ដូចជា ប្រភេទម៉ូតូ Scooter ដើរថាមពលអគ្គិសនីនៅក្នុងប្រទេសថៃរយៈពេល ២ ខែខាងមុខនេះ ហើយសម្រាប់តម្លៃ និងរបៀបទិញប្រភេទមធ្យោបាយធ្វើដំណើរដោយអគ្គិសនីខាងលើនេះ នឹងប្រកាសផ្សាយនាពេលក្រោយ ។

សម្រាប់ VinFast គឺជាក្រុមហ៊ុនវៀតណាមដែលទើបចាប់ផ្តើមនាំចេញរថយន្តអគ្គិសនីរបស់ខ្លួនចេញកាលពីឆ្នាំ២០២៣កន្លងទៅ ដោយត្រូវជួបនឹងគូប្រជែងស្វិតស្វាញគឺ ក្រុមហ៊ុនផលិតរថយន្តពីប្រទេសចិន តួយ៉ាង ក្រុមហ៊ុន BYD ជាដើម ។ ដោយឡែក ក្រុមហ៊ុនធំពីអាមេរិក Tesla ក៏មានវត្តមានថ្មីៗនេះនៅលើទីផ្សារប្រទេសថៃក្នុងនាមជាគូប្រកួតប្រជែងមួយផងដែរនៅក្នុងពិព័ណ៌បង្ហាញរថយន្ត និងម៉ូតូធំ Bangkok International Motor Show ស្របពេលដែល VinFast ក៏ដាក់គោលដៅលក់រថយន្តអគ្គិសនីរបស់ខ្លួនក្នុងទីផ្សារពិភពលោកឲ្យបាន ៥០ ទីផ្សារនៅត្រឹមចុងឆ្នាំ២០២៤នេះ ។

ទោះយ៉ាងណា ទីផ្សាររថយន្តអគ្គិសនីនៅថៃ គឺមានទំហំតូចនៅឡើយ ប៉ុន្តែកំពុងរីកធំធាត់យ៉ាងឆាប់រហ័ស ដោយមានការឧបត្ថម្ភ និងលើកទឹកចិត្តផ្សេងៗពីរដ្ឋាភិបាលថៃ ។ ប្រទេសក្បែរខាងកម្ពុជាមួយនេះ ក៏មានផែនការជាច្រើនដើម្បីបម្លែងចំនួនមធ្យោបាយធ្វើដំណើរប្រមាណ ៣០% ក្នុងប្រទេសទៅជាប្រភេទមធ្យោបាយដែលដើរដោយថាមពលអគ្គិសនីត្រឹមឆ្នាំ២០៣០ ។

រំឭកផងដែរថា សម្រាប់ការលក់រថយន្តអគ្គិសនីនៅប្រទេសថៃ មានតម្លៃស្មើប្រមាណ ៥៨% នៃការលក់ទាំងអស់ក្នុងតំបន់អាស៊ីអាគ្នេយ៍ក្នុងឆ្នាំ ២០២២ ដោយនាំមុខវៀតណាម និងឥណ្ឌូណេស៊ី ហើយពេលបច្ចុប្បន្ននេះ ប្រទេសថៃក៏កំពុងព្យាយាមបន្ថយពន្ធនាំចូល ក៏ដូចជាឧបត្ថម្ភធនដើម្បីឲ្យមានទីផ្សារកាន់តែប្រកួតប្រជែងក្នុងប្រទេសខ្លួន ពិសេសការផ្សព្វផ្សាយការផលិត និងលក់រថយន្តដើរដោយថាមពលអគ្គិសនី ៕

លោកស្រី Vu Dang Yen Hang ប្រធានប្រតិបត្តិនៃក្រុមហ៊ុន VinFast ប្រចាំនៅប្រទេសថៃ

ដោយ៖ មាន រតនា

The post ២ ខែទៀត ក្រុមហ៊ុន VinFast វៀតណាម ផ្ដើមលក់រថយន្តអគ្គិសនីក្នុងទីផ្សារ ថៃ appeared first on Kampuchea Thmey Daily.

សមត្ថកិច្ចថៃឃាត់អ្នកដំណើរនីហ្សេរីយ៉ាម្នាក់ ក្រោយរកឃើញកូកាអ៊ីន ៦៩ ដុំក្នុងខ្លួន

Mean Ratana — Wed, 27 Mar 2024 09:08:18 +0000

មន្រ្តីគយសហការជាមួយប៉ូលិសប្រុងជើងការនៅព្រលានយន្តហោះថៃកាលពីពេលថ្មីៗនេះបានឃាត់ខ្លួនបុរសអ្នកដំណើរជនជាតិនីហ្សេរីយ៉ាម្នាក់ ដែលធ្វើដំណើរចេញមកពីក្រុងដូហាប្រទេសកាតា នៅពេលឆ្លងកាត់ការត្រួតពិនិត្យនៅឯព្រលានយន្តហោះសុវណ្ណភូមិប្រទេសថៃ ។ នេះបើតាមការចុះផ្សាយរបស់សារព័ត៌មាន Khaosod ។

ប្រភពព័ត៌មានដដែលបានឲ្យដឹងថា ពេលមកដល់ព្រលានយន្តហោះសុវណ្ណភូមិប្រទេសថៃ ជនសង្ស័យជាអ្នកដំណើរខាងលើបានចេញអាកប្បកិរិយាប្លែកគួរសង្ស័យ នៅពេលត្រូវឆ្លងការម៉ាស៊ីនត្រួតពិនិត្យ ។ ដូចការសង្ស័យ គ្រឿងញៀនប្រភេទកូកាអ៊ីនចំនួន ៦៩ ដុំ ទម្ងន់សរុប ១,៣៩០ ក្រាម ជាតម្លៃទឹកប្រាក់ស្មើ ៤,១៧០,០០០ បាត បានពិនិត្យឃើញមាននៅក្នុងខ្លួនរបស់ជននោះ ។ ពិនិត្យឃើញដូចនេះ ភ្លាមៗមន្រ្តីនៅព្រលានក៏បានរៀបចំកំណត់ហេតុឯកសារ និងបញ្ជូនបុរសសង្ស័យទៅកាន់ប៉ុស្តិ៍ប៉ូលិសប្រចាំនៅព្រលានយន្តហោះដើម្បីសួរនាំ និងធ្វើតាមនីតិវិធីបន្ថែម ។

ប្រភពព័ត៌មានពុំបានបញ្ជាក់ថាតើបុរសមកពីទ្វីបអាហ្វ្រិកខាងលើនេះ លេប ឬធ្វើយ៉ាងណាដែលដុំគ្រឿងញៀនមាននៅខាងក្នុងខ្លួនបុរសខាងលើនោះទេ ។ ទោះជាយ៉ាងណាក្តី អគ្គនាយកផ្នែកគយថៃ លោក Thirach Attanawanich បានលើកឡើងថា ស្របតាមគោលនយោបាយប្រឆាំងគ្រឿងញៀនរបស់រដ្ឋាភិបាលថៃ លោកបានបញ្ជាឲ្យមន្រ្តីក្រោមឱវាទរបស់លោក មិនឲ្យធ្វេសប្រហែសឡើយចំពោះការត្រួតពិនិត្យរាល់ប្រភព និងទម្រង់ ឬបណ្តាញផ្សេងៗដែលពាក់ព័ន្ធនឹងការជួញដូរគ្រឿងញៀនទាំងអស់ ។

ជាលទ្ធផលឆ្លុះបញ្ចាំងពីបទបញ្ជាខាងលើ គិតចាប់ពីខែតុលា ឆ្នាំ២០២៣ ដល់ថ្ងៃទី២៥ ខែមីនា ឆ្នាំ ២០២៤ នាយកដ្ឋានគយថៃ បានរឹបអូសគ្រឿងបាន ៧៤ ករណី សរុបជាទំហំទឹកប្រាក់ ស្មើ ៤១២.៨៦ លានបាត ប្រមាណជាង ១១ លានដុល្លារអាមេរិក ហើយចំនួននេះបើធៀបនឹងឆ្នាំ ២០២៣ គឺថយចុះ ខណៈឆ្នាំ ២០២៣ មានការរឹបអូសបាន ១៨៥ ករណី ៕

ដោយ៖ មាន រតនា

The post សមត្ថកិច្ចថៃឃាត់អ្នកដំណើរនីហ្សេរីយ៉ាម្នាក់ ក្រោយរកឃើញកូកាអ៊ីន ៦៩ ដុំក្នុងខ្លួន appeared first on Kampuchea Thmey Daily.

Mean Ratana, Author at Kampuchea Thmey Daily

ការសិក្សា ៖ រលាយទឹកកកនៅតំបន់ប៉ូល និងកត្តាប្រែប្រួលផ្សេងៗកំពុងដូរ​រង្វិលជុំផែនដី

ថៃ ត្រូវប៉ាន់នាំចេញ ទុរេន ដំឡូង និងសាច់មាន់ក្នុងកិច្ចព្រមព្រៀងពាណិជ្ជ​កម្មសេរី

ក្រុមហ៊ុនចិន Xiaomi បញ្ចេញរថយន្តអាគុយថាមពលអគ្គិសនី ត្រៀមដឹក​ជូនដល់ដៃអ្នកទិញចុងខែមេសា

វេទិកាបូអាវ ៖ សេដ្ឋកិច្ច អាស៊ី នឹងលូតលាស់ដល់ ៤.៥ ភាគរយក្នុងឆ្នាំនេះ

ឡាវ ចេញសេចក្ដីណែនាំសម្រាប់បុណ្យចូលឆ្នាំថ្មី អ្នកល្មើសនឹងរងទោសទណ្ឌ

វៀតណាម ជំរុញឲ្យប្រើវេជ្ជបញ្ជាអេឡិចត្រូនិកលក្ខណៈប្រព័ន្ធ ងាយស្រួលគ្រប់គ្រងថ្នាំមានប្រសិទ្ធភាព

២ ខែទៀត ក្រុមហ៊ុន VinFast វៀតណាម ផ្ដើមលក់រថយន្តអគ្គិសនីក្នុងទីផ្សារ ថៃ

សមត្ថកិច្ចថៃឃាត់អ្នកដំណើរនីហ្សេរីយ៉ាម្នាក់ ក្រោយរកឃើញកូកាអ៊ីន ៦៩ ដុំក្នុងខ្លួន

ការសិក្សា ៖ រលាយទឹកកកនៅតំបន់ប៉ូល និងកត្តាប្រែប្រួលផ្សេងៗកំពុងដូររង្វិលជុំផែនដី

ថៃ ត្រូវប៉ាន់នាំចេញ ទុរេន ដំឡូង និងសាច់មាន់ក្នុងកិច្ចព្រមព្រៀងពាណិជ្ជកម្មសេរី

ក្រុមហ៊ុនចិន Xiaomi បញ្ចេញរថយន្តអាគុយថាមពលអគ្គិសនី ត្រៀមដឹកជូនដល់ដៃអ្នកទិញចុងខែមេសា