Rann Reuy, Author at Kampuchea Thmey Daily

យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ

Rann Reuy — Tue, 30 Jun 2026 03:10:09 +0000

យោធាអ៊ីស្រាអែល យ៉ាងហោចណាស់ជិត១០០០នាក់ បានបាត់បង់ជីវិតក្នុងសង្គ្រាមរយៈពេល១០០០ថ្ងៃ ដែលអ៊ីស្រាអែលបានប្រកាសចាប់តាំងពីថ្ងៃទី៧ខែតុលាឆ្នាំ២០២៣ ពេលដែលក្រុមហាម៉ាស បានបើកការវាយឆ្មក់ចូលទៅក្នុងទឹកដីអ៊ីស្រាអែល ដោយសម្លាប់មនុស្សជាង១២០០នាក់ និងចាប់ពង្រត់មនុស្សជាង២៤០នាក់។

ក្រុមឧត្តមសេនីយ៍អ៊ីស្រាអែលបានជួបប្រជុំនៅថ្ងៃចន្ទប្រារព្ធពេលវេលាសង្គ្រាម១០០០ថ្ងៃ។ Israel Today

បណ្តាញសង្គមរបស់អ៊ីស្រាអែល ដែលមានឈ្មោះថា «Israel Today» បានបង្ហោះរូបភាពនៃការស្មិងស្មាធិ៍ របស់ក្រុមនៃឧត្តមសេនីយ៍ជាន់ខ្ពស់របស់អ៊ីស្រាអែល ក្នុងការជួបប្រជុំនៅថ្ងៃចន្ទ ដើម្បីរៀបចំសន្និសីទរយៈពេល១០០០ថ្ងៃនៃសង្គ្រាមចាប់តាំងពីការចាប់ផ្តើមវាយលុកចូលតំបន់ហ្គាហ្សាដើម្បីកម្ចាត់ក្រុមហាម៉ាស។

នៅក្នុងសារដែលត្រូវបានបង្ហោះតាមបណ្តាញសង្គមហ្វេសប៊ុកនោះ បានលើកឡើងថា កិច្ចប្រជុំបានបើកជាមួយការស្មិងស្មាធិ៍ (moment of silence) សម្រាប់ទាហាន៩៦៤នាក់ស្លាប់ ចាប់តាំងពីព្រឹកថ្ងៃទី៧ខែតុលាឆ្នាំ២០២៣។

នាយសេនាធិការចម្រុះនៃកងកម្លាំងការពារជាតិអ៊ីស្រាអែល Eyal Zamir ត្រូវបានស្រង់សម្តីប្រាប់ឧត្តមសេនីយ៍របស់ខ្លួន ដូចបាននិយាយថា៖« យើងបច្ចុប្បន្ននេះស្ថិតនៅចំណុចរបត់យុទ្ធសាស្រ្តដ៏សំខាន់ក្នុងយុទ្ធនាការ[យោធា] នេះ។ រយៈពេល១០០០ថ្ងៃនិង១០០០យប់ ដែលយើងបានប្រយុទ្ធនៅក្នុងយុទ្ធនាការដដ៏វែងបំផុត ស្មុគ្រស្មាញបំផុត និង ទាមទារបំផុត ដែលយើងមិនធ្លាប់ជួប»។

យោងបណ្តាញសង្គម Iran International English ក្នុងការអះអាងដាច់ដោយឡែក១ទៀត រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយនៅថ្ងៃចន្ទថា លោកបានបញ្ជាឱ្យយោធាអ៊ីស្រាអែលរៀបចំផែនការវាយប្រហារដោយឯករាជ្យប្រឆាំងនឹងអ៊ីរ៉ង់ ដោយព្រមានថា អ៊ីស្រាអែលអាចធ្វើសង្គ្រាមជាមួយទីក្រុងតេហេរ៉ង់ «ថ្ងៃស្អែក» ប្រសិនបើអ៊ីរ៉ង់បាញ់មីស៊ីលទៅលើទឹកដីអ៊ីស្រាអែល។

ការប្រកាសរបស់រដ្ឋមន្ត្រីការពារជាតិអ៊ីស្រាអែលនេះ កើតមានក្រោយសហរដ្ឋអាមេរិក និងអ៊ីរ៉ង់បានធ្លាក់ចូលទៅក្នុងការប្រយុទ្ធគ្នាជាថ្មី ស្របពេលនៃការចរចារកដំណោះស្រាយសន្តិភាពត្រូវជាប់គាំង ដោយសារតែអ៊ីរ៉ង់បដិសេធ ព្រោះតែវាយប្រហាររបស់អាមេរិកលើទីតាំងបាញ់មីស៊ីល ដ្រូន កាលពីចុងសប្តាហ៍៕

រ៉ាន់ រើយ

The post យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ appeared first on Kampuchea Thmey Daily.

ប្រធានាធិបតីស៊ែប៊ី ដែលស្និទ្ធ លោក ពូទីន ប្រកាសលាលែងពីតំណែង ប៉ុន្តែ អ្នកតវ៉ា ថាជា«ល្បិចនយោបាយ»

Rann Reuy — Mon, 29 Jun 2026 08:08:07 +0000

ប្រធានាធិបតីនៃប្រទេសស៊ែប៊ី ដែលជាសម្ព័ន្ធមិត្តដ៏សំខាន់នៅតំបន់សមុទ្របាល់កង់ របស់ប្រធានាធិបតីរុស្ស៊ី លោក វ៉្លាឌីមៀរ ពូទីន បានប្រកាសចុះចេញពីអំណាច មុនការបោះឆ្នោតសភា ប៉ុន្តែ ក្រុមបាតុកររាប់ពាន់នាក់ នៅតែចេញតវ៉ា ចំពោះការក្រាញអំណាច និង ការលេងល្បិចនយោបាយនៅមុនការបោះឆ្នោតប្រធានាធិបតីនឹងមកដល់នៅខែឧសភា២០២៧។

លោក Aleksandar Vucic (កណ្តាល)។ បណ្តាញសង្គមហ្វេសប៊ុករបស់លោក

លោក Aleksandar Vucic បានក្លាយជា ប្រធានាធិបតីនៃប្រទេសស៊ែប៊ីជិត២អាណត្តិចាប់តាំងពីឆ្នាំ២០១៧ និង រដ្ឋាភិបាលដឹកនាំដោយគណបក្សរបស់លោក បានដឹកនាំប្រទេសស៊ែប៊ីតាំងពីឆ្នាំ២០០០ ក្រោយការផ្តួលរំលំរដ្ឋាភិបាល របស់ អតីតប្រធានាធិបតី លោក Slobodan Milosevic។

អាណត្តិទីពីរ និងចុងក្រោយរបស់ប្រធានាធិបតី Aleksandar Vucic នឹងត្រូវបានកំណត់ឱ្យផុតកំណត់នៅពាក់កណ្តាលឆ្នាំ ២០២៧។ យោង Al Jazeera លោក Vucic បានរឹតបន្តឹងអំណាចរបស់គាត់បន្តិចម្តងៗ ចាប់តាំងពីគណបក្សប្រជានិយម (populist party) របស់គាត់បានឡើងកាន់អំណាចស៊ែប៊ីកាលពី ១៤ ឆ្នាំមុន។

ដំណឹងនៃការលាលែងពីតំណែងរបស់គាត់បានកើតឡើងប្រឆាំងនឹងដំណើររឿងរ៉ាវនៃការតវ៉ាប្រឆាំងរដ្ឋាភិបាលដ៏ធំដែលដឹកនាំដោយនិស្សិតអស់រយៈពេលជាច្រើនខែ ដែលបានធ្វើឱ្យប្រទេសនេះរង្គោះរង្គើយ៉ាងខ្លាំង បន្ទាប់ពីការបាក់រលំពិដានស្ថានីយរថភ្លើងបណ្តាលឲ្យស្លាប់ ១៦នាក់នៅ Novi Sad នៃប្រទេសស៊ែប៊ី កាលពីខែវិច្ឆិកាឆ្នាំ២០២៤។

មនុស្សរាប់ម៉ឺននាក់បានប្រមូលផ្តុំគ្នានៅទូទាំងប្រទេសស៊ែប៊ីចាប់តាំងពីពេលនោះ ហើយ ជាលទ្ធផល មនុស្សរាប់រយនាក់ត្រូវបានចាប់ឃុំខ្លួន ហើយប៉ូលីសស៊ែប៊ីត្រូវបានចោទប្រកាន់ពីបទប្រើកម្លាំងហួសហេតុ និងការចាប់ខ្លួនដោយបំពានដោយសហភាពអឺរ៉ុប។ ការតវ៉ានៅទីបំផុតបាននាំឱ្យមានការលាលែងពីតំណែងរបស់នាយករដ្ឋមន្ត្រីនៅពេលនោះ Milos Vucevic ក្នុងខែមករា ឆ្នាំ២០២៥ ។

ជារឿយៗ ប្រធានាធិបតី Aleksandar Vucic បានចោទប្រកាន់បស្ចឹមប្រទេសនៅពីក្រោយបាតុករទាំងនោះ ហើយ ក៏បានចោទប្រកាន់ថា ការធ្វើបាតុកម្មនោះជាផ្នែកនៃបដិវត្តន៍ពណ៍ដែលប៉ុនប៉ងផ្តួចរំលំរដ្ឋាភិបាលរបស់លោក។

យោងទីភ្នាក់ងារព័ត៌មានរ៉យទ័រ ក្រុមបាតុកររាប់ពាន់នាក់បានប្រមូលផ្តុំគ្នានៅ Kraljevo ប្រទេសស៊ែប៊ី នៅថ្ងៃអាទិត្យ ទី២៨ ខែមិថុនា មួយថ្ងៃបន្ទាប់ពីប្រធានាធិបតី Aleksandar Vucic បាននិយាយថា លោកនឹងចុះចេញពីតំណែង ដោយបើកផ្លូវសម្រាប់ការបោះឆ្នោតប្រធានាធិបតី និងសភាមុនកាលកំណត់។

ក្រុមបាតុករនៅក្នុងការតវ៉ានៅថ្ងៃអាទិត្យមានការសង្ស័យចំពោះការប្រកាសរបស់លោក Vucic។ អ្នកខ្លះបានលើកឡើងថា វាជា «ការលេងសើច» ហើយថា លោក Vucic នឹងកាន់អំណាច ខណៈពេលដែលអ្នកផ្សេងទៀតបាននិយាយថា ការផ្លាស់ប្តូរនឹងមិនកើតឡើងទេ លុះត្រាតែប្រព័ន្ធរដ្ឋាភិបាលទាំងមូលត្រូវបានផ្លាស់ប្តូរ៕

រ៉ាន់ រើយ

ការតវ៉ារបស់ប្រជាជនប្រឆាំងរូបលោក Vucic។ REUTERS

The post ប្រធានាធិបតីស៊ែប៊ី ដែលស្និទ្ធ លោក ពូទីន ប្រកាសលាលែងពីតំណែង ប៉ុន្តែ អ្នកតវ៉ា ថាជា«ល្បិចនយោបាយ» appeared first on Kampuchea Thmey Daily.

អាមេរិកនិងអ៊ីរ៉ង់ បរាជ័យក្នុងការបង្កើតប្រព័ន្ធទំនាក់ទំនងផ្ទាល់ សម្រាប់ជូនដំណឹងនៅច្រកហ័រមូស ដូចបានឯកភាពនៅស្វីស

Rann Reuy — Sat, 27 Jun 2026 03:57:54 +0000

សហរដ្ឋអាមេរិក និង អ៊ីរ៉ង់នៅតែមិនទាន់អាច បង្កើតប្រព័ន្ធទំនាក់ទំនងគ្នាដោយផ្ទាល់ (direct communication channel) នៅឡើយទេ ដើម្បីផ្តល់ព័ត៌មានឲ្យគ្នានៅតំបន់ច្រកសមុទ្រហ័រមូស បើទោះបីជាភាគីទាំងពីរបានឯកភាពគ្នាបង្កើតប្រព័ន្ធទំនាក់ទំនងដោយផ្ទាល់ ក្នុងការចរចាលើកដំបូងកាលថ្ងៃទី២១ខែមិថុនា នៅឯប្រទេសស្វីស។

អនុប្រធានាធិបតីអាមេរិក លោក JD Vance ក្នុងពេលជួបជាមួយភាគីសម្របសម្រួល ប៉ាគីស្ថាននិងកាតា នៅប្រទេសស្វីស។

យោងសារព័ត៌មាន West Asia News Agency (WANA) អ្នកនាំពាក្យរបស់កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានច្រានចោលសេចក្កីរាយការណ៍របស់ប្រព័ន្ធផ្សព្វផ្សាយមួយចំនួន និងមន្ត្រីអាមេរិកដែលអះអាងថា បណ្តាញទំនាក់ទំនងផ្ទាល់មួយត្រូវបានបង្កើតឡើងរវាងអ៊ីរ៉ង់ និងសហរដ្ឋអាមេរិកទាក់ទងនឹងច្រកសមុទ្រហ័រមូស ដោយហៅការចុះផ្សាយទាំងនោះថា «មិនពិតទាំងស្រុង (completely false)»។

ឧត្តមសេនីយ៍ឯក ម៉ូសេនី (Mohseni) អ្នកនាំពាក្យរបស់ IRGC បានឆ្លើយតបទៅនឹងសេចក្តីរាយការណ៍ដែលចោទប្រកាន់ថា ទីក្រុងតេហេរ៉ង់ និងទីក្រុងវ៉ាស៊ីនតោន បានបង្កើតបណ្តាញទំនាក់ទំនងផ្ទាល់ដើម្បីគ្រប់គ្រងឧប្បត្តិហេតុដែលអាចកើតមាននៅក្នុងច្រកសមុទ្រហ័រមូស ដោយបញ្ជាក់ថា «ការអះអាងថា បណ្តាញទំនាក់ទំនងផ្ទាល់មួយត្រូវបានបង្កើតឡើងរវាងអ៊ីរ៉ង់ និងសហរដ្ឋអាមេរិកទាក់ទងនឹងច្រកសមុទ្រហ័រមូស គឺមិនពិតទាំងស្រុង ហើយត្រូវបានបដិសេធយ៉ាងដាច់អហង្ការ។ យន្តការបែបនេះមិនទាន់ត្រូវបានបង្កើតឡើង ហើយវាក៏នឹងមិនត្រូវបានបង្កើតឡើងដែរ»។

លោក ក៏បានសង្កត់ធ្ងន់លើអធិបតេយ្យភាពរបស់អ៊ីរ៉ង់លើផ្លូវទឹកយុទ្ធសាស្ត្រនេះ ដោយបន្ថែមថា «ច្រកសមុទ្រហ័រមូសគឺជាទឹកដីអ៊ីរ៉ង់ ហើយមិនមានអ្វីទាក់ទងនឹងសហរដ្ឋអាមេរិកទេ»។

សហរដ្ឋអាមេរិក បានបើកការវាយប្រហារលើអ៊ីរ៉ង់ជាថ្មីទៀតនៅថ្ងៃទី២៦ខែមិថុនា បន្ទាប់ពីចោទប្រកាន់អ៊ីរ៉ង់ប្រើប្រាស់យន្តហោះគ្មានមនុស្សបើកដើម្បីវាយប្រហារលើកប៉ាល់ដឹកទំនិញឆ្លងកាត់ច្រកហ័រមូសកាលថ្ងៃទី២៤ខែមិថុនា ។

ប្រព័ន្ធផ្សព្វផ្សាយបស្ចឹមប្រទេស បានរាយការណ៍ដោយដកស្រង់សេចក្តីថ្លែងការណ៍ចុងក្រោយនៃការចរចារវាងសហរដ្ឋអាមេរិក និង អ៊ីរ៉ង់ នៅប្រទេសស្វីស ដោយលើកឡើងថា បណ្តាញទំនាក់ទំនងមួយត្រូវបានបង្កើតឡើងរវាងអ៊ីរ៉ង់ និងសហរដ្ឋអាមេរិកតាមរយៈអ្នកសម្របសម្រួលពីរនាក់។

យន្តការនៃការបង្កើតបណ្តាញទំនាក់ទំនងផ្ទាល់នោះ មានបំណងទប់ស្កាត់ឧប្បត្តិហេតុនៅក្នុងច្រកសមុទ្រហ័រមូស ដែលអាចកើនឡើងដល់ការប្រឈមមុខដាក់គ្នាខាងយោធា និងដើម្បីអនុវត្តមាត្រាប្រាំនៃអនុស្សរណៈនៃការយោគយល់គ្នាអ៊ីស្លាម៉ាបាដ។

សេចក្តីរាយការណ៍របស់អ៊ីរ៉ង់ ក៏បានអះអាងផងដែរថា អ៊ីរ៉ង់បានបញ្ជាក់ជាថ្មីថា នាវាទាំងអស់ដែលឆ្លងកាត់ច្រកសមុទ្រហ័រមូស ត្រូវតែប្រើប្រាស់ផ្លូវដែលកំណត់ដោយអាជ្ញាធរអ៊ីរ៉ង់។ ទោះជាយ៉ាងណាក៏ដោយ សេចក្តីថ្លែងការណ៍ចុងក្រោយរបស់ IRGC បដិសេធយ៉ាងច្បាស់អំពីអត្ថិភាពនៃការរៀបចំទំនាក់ទំនងដោយផ្ទាល់បែបនេះរវាងទីក្រុងតេអេរ៉ង់ និងទីក្រុងវ៉ាស៊ីនតោន៕

រ៉ាន់ រើយ

The post អាមេរិកនិងអ៊ីរ៉ង់ បរាជ័យក្នុងការបង្កើតប្រព័ន្ធទំនាក់ទំនងផ្ទាល់ សម្រាប់ជូនដំណឹងនៅច្រកហ័រមូស ដូចបានឯកភាពនៅស្វីស appeared first on Kampuchea Thmey Daily.

ប្រធានាធិបតីអ៊ីរ៉ង់ ស្នើឲ្យប្រទេសមូស្លីមរួបរួមគ្នា ទប់ស្កាត់សម្ពាធពីខាងក្រៅ

Rann Reuy — Wed, 24 Jun 2026 03:07:27 +0000

ក្រោយការសម្របសម្រួលក្នុងការចរចារវាងអាមេរិកនិងអ៊ីរ៉ង់នៅប្រទេសស្វីសរបស់ នាយករដ្ឋមន្ត្រិប៉ាគីស្ថាន លោក សែបាហ្ស សារីហ្វ (Shehbaz Sharif) ប្រធានាធិបតីអ៊ីរ៉ង់ លោក ម៉ាស៊ូដ ប៉េហ្សេសគីយ៉ាន (Masoud Pezeshkian) បានធ្វើដំណើរទៅជួបពិភាក្សាទ្វេភាគីនៅក្នុងទីក្រុងអ៊ីស្លាម៉ាបាដ ប្រទេសប៉ាគីស្ថាន ដោយ លើកឡើងពីទំនាក់ទំនងទ្វេភាគី និង «ការរួបរួមគ្នារបស់ប្រទេសមូស្លីម» ដើមុ្បីទប់ស្កាត់ឥទ្ធិពលពីក្រៅតំបន់។

ប្រធានាធិបតីអ៊ីរ៉ង់ (ឆ្វេង) និង នាយករដ្ឋមន្ត្រីប៉ាគីស្ថាន។ FB/Mian Shehbaz Sharif

នៅក្នុងសារបង្ហោះតាមបណ្តាញសង្គម លោក លោក ម៉ាស៊ូដ ប៉េហ្សេសគីយ៉ាន បានលើកឡើងពីការពិភាក្សាដែលប្រមុខដឹកនាំទាំងពីរ បានផ្តោត គឺ ការពិនិត្យមើលនូវស្ថានវិវត្តន៍នៃតំបន់និងអន្តរជាតិ ដោយនៅក្នុងនោះ ប្រធានាធិបតិអ៊ីរ៉ង់ បានបញ្ជាក់ជំហរថា ខ្លួនប្រឆាំងចំពោះឥទ្ធិពលពីខាងក្រៅ។

ប្រធានាធិបតីអ៊ីរ៉ង់ សរសេរថា៖«ខ្ញុំបានសម្តែងយ៉ាងមុតមាំថា ប្រជាជាតិអ៊ីរ៉ង់បានឈរដោយសិទ្ធិអំណាចដាច់ខាតប្រឆាំងនឹងសម្ពាធ និងការគំរាមកំហែងពីខាងក្រៅ ហើយបានសង្កត់ធ្ងន់ថា ឯកភាពនៃប្រជាជាតិអ៊ីស្លាមនៅតែជាខែលដ៏មានប្រសិទ្ធភាពបំផុតប្រឆាំងនឹងការឃុបឃិតគ្នាដែលបែកបាក់»។

យោងតាម Al Jazeera នេះជាទស្សនកិច្ចលើកទីពីររបស់ប្រធានាធិបតីអ៊ីរ៉ង់ ទៅកាន់ប្រទេសប៉ាគីស្ថានក្នុងនាមជាប្រធានាធិបតី។ លើកដំបូងរបស់លោកនៅក្នុងខែសីហា ឆ្នាំ២០២៥ បានកើតឡើងប៉ុន្មានថ្ងៃបន្ទាប់ពីសង្គ្រាមអ៊ីរ៉ង់-អ៊ីស្រាអែលរយៈពេល ១២ថ្ងៃ ហើយក៏ជាដំណើរទស្សនកិច្ចទៅក្រៅប្រទេសលើកដំបូងរបស់លោកបន្ទាប់ពីជម្លោះនោះ។

តាមខ្លឹមសារដែលបានបង្ហោះលើទំព័រផ្លូវការរបស់ប្រធានាធិបតីអ៊ីរ៉ង់ លោកនាយករដ្ឋមន្ត្រី សារីហ្វ បានកត់សម្គាល់ថា ដំណើរទស្សនកិច្ចនេះផ្ញើសារសកលដ៏មានឥទ្ធិពលនៃការជឿទុកចិត្តគ្នាទៅវិញទៅមករវាងទីក្រុងតេអេរ៉ង់ និងអ៊ីស្លាម៉ាបាដ។

នៅក្នុងដំណើរទស្សនកិច្ចរបស់ប្រមុខដឹកនាំអ៊ីរ៉ង់ ក្នុងពេលដែលមន្ត្រីអ៊ីរ៉ង់ កំពុងចរចាជាមួយសហរដ្ឋអាមេរិក ដើម្បីស្វែងរកដំណោះស្រាយបញ្ចប់សង្គ្រាម ភាគីអ៊ីរ៉ង់និងប៉ាគីស្ថាន បានប្តេជ្ញារួមគ្នាក្នុងការលើកកម្ពស់បរិមាណពាណិជ្ជកម្មសេដ្ឋកិច្ចដល់គោលដៅប្រវត្តិសាស្ត្រចំនួន ៣០ ពាន់លានដុល្លារ។

ប្រទេសអ៊ីរ៉ង់បានធ្លាក់ចូលទៅក្នុងសង្គ្រាមដ៏ខ្លាំងក្លាជាមួយមហាអំណាចសហរដ្ឋអាមេរិក ចាប់តាំងពីចុងខែកុម្ភៈ ២០២៦នេះ ដោយសហរដ្ឋអាមេរិកបានចោទប្រកាន់ អ៊ីរ៉ង់ចំពោះការផលិតអាវុធនុយក្លេអ៊ែរ ដែលអាចបង្កអសន្តិសុខដល់តំបន់និងពិភពលោក ប៉ុន្តែអ៊ីរ៉ង់តែងតែបដិសេធការចោទប្រកាន់នោះ ថាគ្មានមូលដ្ឋាន។

ទស្សនកិច្ចនេះត្រូវបានគេមើលឃើញយ៉ាងទូលំទូលាយថាជាការបង្ហាញពីការដឹងគុណចំពោះតួនាទីរបស់ប្រទេសប៉ាគីស្ថានក្នុងការសម្របសម្រួលអនុស្សរណៈយោគយល់គ្នាអ៊ីស្លាម៉ាបាដ ដែលបានចុះហត្ថលេខានៅថ្ងៃទី១៨ ខែមិថុនា ដោយប្រធានាធិបតីអាមេរិក ដូណាល់ ត្រាំ និងលោក Pezeshkian ដោយមានលោកនាយករដ្ឋមន្ត្រី សារីហ្វ ចុះហត្ថលេខាលើឯកសារនេះជាអ្នកសម្របសម្រួល៕

រ៉ាន់ រើយ

The post ប្រធានាធិបតីអ៊ីរ៉ង់ ស្នើឲ្យប្រទេសមូស្លីមរួបរួមគ្នា ទប់ស្កាត់សម្ពាធពីខាងក្រៅ appeared first on Kampuchea Thmey Daily.

អ៊ីរ៉ង់ លក់ប្រេងឆៅបញ្ចុះថ្លៃច្រើនសម្រាប់ផ្គត់ផ្គង់ទៅឲ្យចិន ក្រោយច្រកហ័រមូសបើកវិញ

Rann Reuy — Mon, 22 Jun 2026 07:28:59 +0000

អ្នកលក់ប្រេងឆៅអ៊ីរ៉ង់ទៅកាន់ប្រទេសចិន បានទម្លាក់តម្លៃប្រេងឆៅ បន្ទាប់ពីប្រទេសអ៊ីរ៉ង់បានចាប់ផ្តើមដឹកជញ្ជូនប្រេងរាប់លានបារ៉ែលចេញពីច្រកសមុទ្រ Hormuz បន្ទាប់ពីកិច្ចព្រមព្រៀងសន្តិភាពបណ្តោះអាសន្នជាមួយសហរដ្ឋអាមេរិក។ នេះបើយោងតាមការចុះផ្សាយរបស់ Bloomberg កាលពីថ្ងៃចន្ទ។

កប៉ាល់ដឹកប្រេងអ៊ីរ៉ង់តាមច្រកហ័រមូស។ Reuters

សេចក្តីរាយការណ៍នោះ បានលើកឡើងថា ទំនិញប្រេងឆៅប្រភេទស្រាលរបស់អ៊ីរ៉ង់សម្រាប់ផ្គត់ផ្គង់នៅក្នុងខែកក្កដាត្រូវបានលក់ក្នុងបញ្ចុះតម្លៃពី ២.៥០ ដុល្លារទៅ ៥ដុល្លារក្នុងមួយបារ៉ែលធៀបនឹងតម្លៃប្រេងស្តង់ដារ ប្រភេទ Brent ដែលត្រូវបានលក់ចែកចាយនៅទីផ្សារអឺរ៉ុប។ នេះបើយោងតាមការដកស្រង់សម្តីរបស់មនុស្សដែលពាក់ព័ន្ធដោយផ្ទាល់នៅក្នុងពាណិជ្ជកម្ម ដែល Bloomberg បានដកស្រង់។

ក្រៅពីការលក់បញ្ចុះថ្លៃនោះហើយ តាមសេចក្តីរាយការណ៍ អ៊ីរ៉ង់នៅលក់បញ្ចុះតម្លៃពិសេសប្រហែល ១ ដុល្លារទៀតក្នុងមួយបារ៉ែលមុនពេលកិច្ចព្រមព្រៀង។

ទីភ្នាក់ងារព័ត៌មាន Bloomberg បាននិយាយនៅក្នុងសេចក្តីរាយការណ៍ដាច់ដោយឡែកមួយថា អ៊ីរ៉ង់បានបង្កើនបរិមាណបូមប្រេងឆៅដែលខ្លួនផ្ញើដោយបើកចំហតាមរយៈច្រកសមុទ្រ Hormuz ដល់កម្រិតខ្ពស់បំផុតចាប់តាំងពីសង្គ្រាមបានចាប់ផ្តើម ខណៈដែលសកម្មភាពដឹកជញ្ជូនក្នុងតំបន់បានកើនឡើង ខណៈពេលដែលទីក្រុងតេអេរ៉ង់ និងទីក្រុងវ៉ាស៊ីនតោនបានខិតខំឆ្ពោះទៅរកកិច្ចព្រមព្រៀងសន្តិភាពយូរអង្វែង។

ប្រេងឆៅអ៊ីរ៉ង់ប្រហែលប្រាំមួយលានបារ៉ែលស្ថិតនៅលើនាវាដឹកប្រេងធំបីគ្រឿងដែលត្រូវបានអនុម័តដោយសហរដ្ឋអាមេរិកគឺ Elva, Virgo និង Vigor ដែលបានចូលទៅក្នុងចំណុចស្ទះនៅព្រឹកថ្ងៃចន្ទ ដោយដកស្រង់ទិន្នន័យតាមដានកប៉ាល់៕

រ៉ាន់ រើយ

The post អ៊ីរ៉ង់ លក់ប្រេងឆៅបញ្ចុះថ្លៃច្រើនសម្រាប់ផ្គត់ផ្គង់ទៅឲ្យចិន ក្រោយច្រកហ័រមូសបើកវិញ appeared first on Kampuchea Thmey Daily.

ការអាក់អន់ស្រពន់ចិត្ត រវាងថ្នាក់ដឹកនាំប៉ូឡូញ និង អ៊ុយក្រែន បានផ្ទុះកក្រើកយ៉ាងខ្លាំង

Rann Reuy — Sat, 20 Jun 2026 11:16:30 +0000

ជម្លោះពាក្យសម្តីរវាងថ្នាក់ដឹកនាំប៉ូឡូញ និងអ៊ុយក្រែនបានផ្ទុះឡើងយ៉ាងកក្រើកក្នុងរយៈពេលចុងក្រោយនេះ បន្ទាប់ពីប្រធានាធិបតីប៉ូឡូញ លោក Karol Nawrocki បានប្រកាសនៅថ្ងៃទី១៩ខែមិថុនាពីការដកហូតគ្រឿងឥស្សរិយយសថ្នាក់រដ្ឋខ្ពស់បំផុតរបស់ប្រទេសប៉ូឡូញ គឺគ្រឿងឥស្សរិយយសឥន្ទ្រីស (Order of the White Eagle) ដែលពីមុនត្រូវបានប្រគល់ជូនប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ក្នុងឆ្នាំ២០២៣។

ការសម្រេចចិត្តដកហូតគ្រឿងឥស្សរិយយសថ្នាក់ខ្ពស់បំផុតនេះ ដោយសារតែការសម្រេចចិត្តរបស់រដ្ឋបាលរបស់លោក វ៉ូឡូឌីមៀរ ហ្សេលេនស្គី ក្នុងការដាក់ឈ្មោះអង្គភាពកងកម្លាំងប្រដាប់អាវុធពិសេសរបស់អ៊ុយក្រែនតាមឈ្មោះ «វីរបុរស UPA» (ដែលជាកងទ័ពឈ្លាបព្រៃរបស់អ៊ុយក្រែន) ដែលមានភាពចម្រូងចម្រាស់ក្នុងប្រវត្តិសាស្រ្តសង្គ្រាមលោកលើកទី២ ដែលកាលនោះស្ថិតនៅក្រោមសហភាពសូវៀត និងបានសម្លាប់ជនជាតិប៉ូឡូញប្រមាណ១០ម៉ឺននាក់។

ក្នុងការបង្ហោះតាមបណ្តាញសង្គម X ប្រធានាធិបតីប៉ូឡូញបានដកហូតគ្រឿងឥស្សរិយយសឥន្ទ្រីសពីលោក Zelensky ដែលជាគ្រឿងឥស្សរិយយសខ្ពស់បំផុតរបស់ប្រទេសប៉ូឡូញនោះថា នឹងមិនប៉ះពាល់ដល់ទំនាក់អ៊ុយក្រែនជាទូទៅនោះទេ។

លោក Nawrocki បាននិយាយថា «ខ្ញុំចង់សង្កត់ធ្ងន់ថា ការសម្រេចចិត្តនេះមិនមែនសំដៅលើប្រជាជនអ៊ុយក្រែនទេ។ វាមិនផ្លាស់ប្តូរទិសដៅយុទ្ធសាស្ត្រនៃគោលនយោបាយសន្តិសុខរបស់ប្រទេសប៉ូឡូញទេ។ យើងបានគាំទ្រ និងបន្តគាំទ្រអ៊ុយក្រែន»។

នៅប្រទេសប៉ូឡូញ អ្នកប្រយុទ្ធ UPA ត្រូវបានចោទប្រកាន់ពីបទសម្អាតជនជាតិប៉ូឡូញ និងឧក្រិដ្ឋកម្មសង្គ្រាម។

លោក ហ្សេលេនស្គី បានទទួលគ្រឿងឥស្សរិយយសឥន្ទ្រីសក្នុងឆ្នាំ ២០២៣ ពីអតីតប្រធានាធិបតីប៉ូឡូញ លោក Andrzej Duda «ដើម្បីទទួលស្គាល់គុណសម្បត្តិរបស់លោកក្នុងការពង្រឹងទំនាក់ទំនងរវាងប៉ូឡូញ និងអ៊ុយក្រែន ក៏ដូចជាកិច្ចខិតខំប្រឹងប្រែងរបស់លោកក្នុងសន្តិសុខ និងភាពធន់ក្នុងការការពារសិទ្ធិមនុស្ស»។

ទន្ទឹមនឹងការប្រកាសដកហូតគ្រឿងឥស្សរិយយសនេះ ថ្នាក់ដឹកនាំជាន់ខ្ពស់ជាច្រើនរូបរបស់អ៊ុយក្រែន បានអះអាងថា ពួកគេនឹងប្រគល់ពានរង្វាន់រដ្ឋប៉ូឡូញវិញ ដែលឆ្លើយតបចំពោះការដកហូតពីប្រធានាធិបតី អ៊ុយក្រែននូវកិត្តិយសរដ្ឋខ្ពស់បំផុតរបស់ប្រទេស។

រដ្ឋមន្ត្រីការបរទេសអ៊ុយក្រែន លោក Andrii Sybiha ប្រធានសេនាធិការចម្រុះរបស់លោក Zelensky គឺលោក Kyrylo Budanov និង ឯកអគ្គរដ្ឋទូតអ៊ុយក្រែនប្រចាំប្រទេសប៉ូឡូញ លោក Vasyl Bodnar បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមដាច់ដោយឡែកពីគ្នាថា ពួកគេនឹងប្រគល់ពានរង្វាន់ដែលពួកគេធ្លាប់ទទួលបានពីមុន។ យោងតាមរ៉យទ័រ។

ជម្លោះនេះ ដែលប្រឈមនឹងការជំរុញទំនាក់ទំនងរវាងសម្ព័ន្ធមិត្តឱ្យធ្លាក់ចុះយ៉ាងខ្លាំង បានចាប់ផ្តើមនៅក្នុងខែឧសភា នៅពេលដែលលោក ហ្សេលេនស្គី បានដាក់ឈ្មោះអង្គភាពយោធាមួយតាមឈ្មោះកងទ័ពឧទ្ទាមឈ្លបអ៊ុយក្រែន (UPA) ដែលជាយុទ្ធជនជាតិនិយម ដែលទីក្រុងគៀវសរសើរចំពោះសង្គ្រាមឯករាជ្យទ័ពព្រៃរបស់ពួកគេក្នុងអំឡុងពេល និងក្រោយសង្គ្រាមលោកលើកទីពីរ។

UPA នៅតែជាប្រភពនៃភាពតានតឹងយូរអង្វែងជាមួយប្រទេសប៉ូឡូញ ចំពោះការសម្លាប់រង្គាលក្នុងឆ្នាំ ១៩៤១-១៩៤៥ នៅក្នុងតំបន់ Volhynia។ ជនជាតិប៉ូឡូញប្រមាណ ១០០ ០០០នាក់ត្រូវបានសម្លាប់ ដោយកងទ័ពនេះ រួមទាំងស្ត្រី និងកុមារផងដែរ៕

រ៉ាន់ រើយ

The post ការអាក់អន់ស្រពន់ចិត្ត រវាងថ្នាក់ដឹកនាំប៉ូឡូញ និង អ៊ុយក្រែន បានផ្ទុះកក្រើកយ៉ាងខ្លាំង appeared first on Kampuchea Thmey Daily.

អនុប្រធានាធិបតីអ៊ីរ៉ង់៖ ទ្រព្យសម្បត្តិអ៊ីរ៉ង់ដែលបង្កក នឹងត្រូវលើកលែងបណ្តើរៗពេញលេញ

Rann Reuy — Sat, 20 Jun 2026 09:41:42 +0000

អនុប្រធានាធិបតីអ៊ីរ៉ង់ទទួលបន្ទុកកិច្ចការប្រតិបត្តិរបស់ប្រទេសអ៊ីរ៉ង់ បានប្រកាសថា ទ្រព្យសម្បត្តិអ៊ីរ៉ង់ដែលបង្កកនៅបរទេសប្រមាណ ២៥ ពាន់លានដុល្លារ នឹងត្រូវដោះលើកលែងទាំងស្រុង និងយកមកប្រើសម្រាប់ការអភិវឌ្ឍវិស័យសាធារណៈ និងហេដ្ឋរចនាសម្ព័ន្ធ។

យោងសេចក្តីរាយការណ៍របស់ទីភ្នាក់ងារព័ត៌មាន WANA (West Asia News Ageny) អនុប្រធានាធិបតីអ៊ីរ៉ង់ លោក Mohammad Jafar Ghaempanah បានថ្លែងថា ដំណើរទស្សនកិច្ចថ្មីៗនេះរបស់លោក Mohammad Bagher Ghalibaf ប្រធានសភាទៅកាន់ប្រទេសកាតា រួមជាមួយក្រុមចរចាការទូតរបស់អ៊ីរ៉ង់ មានគោលបំណងជាក់លាក់ក្នុងការបញ្ចប់យន្តការ និងក្របខ័ណ្ឌសម្រាប់ការរំដោះទ្រព្យសម្បត្តិទាំងនេះ។

អនុប្រធានាធិបតី បានអះអាងថា ការលុបបំបាត់ស្រមោលនៃសង្គ្រាមចេញពីប្រទេសនេះបានបន្ធូរបន្ថយផ្នែកមួយនៃសម្ពាធសេដ្ឋកិច្ចដែលសាធារណជនកំពុងប្រឈមមុខរួចហើយ។

លោក បានកត់សម្គាល់ថា ធនធានហិរញ្ញវត្ថុដែលទើបនឹងអាចចូលដំណើរការបាននឹងត្រូវបានដឹកនាំយ៉ាងខ្លាំងឆ្ពោះទៅរកការពង្រីកហេដ្ឋារចនាសម្ព័ន្ធសំខាន់ៗ ដូចជាច្រករបៀងដឹកជញ្ជូន ផ្លូវហាយវេ និងអាកាសយានដ្ឋាន ដើម្បីកែលម្អសុខុមាលភាពសាធារណៈ និងភាពងាយស្រួល។

លោក Ghaempanah បានសន្និដ្ឋាន ដោយបញ្ជាក់ថា ការធានាដើមទុនគ្រប់គ្រាន់នឹងអនុញ្ញាតឱ្យរដ្ឋាភិបាលផ្តល់មូលនិធិដល់គម្រោងសាងសង់ប្រកបដោយប្រសិទ្ធភាព និងជំរុញវឌ្ឍនភាពសេដ្ឋកិច្ចនៅទូទាំងគ្រប់តំបន់នៃប្រទេស៕

ប្រែសម្រួល

The post អនុប្រធានាធិបតីអ៊ីរ៉ង់៖ ទ្រព្យសម្បត្តិអ៊ីរ៉ង់ដែលបង្កក នឹងត្រូវលើកលែងបណ្តើរៗពេញលេញ appeared first on Kampuchea Thmey Daily.

បេសកជនរបស់ លោក ត្រាំ ចេញទៅស្វីសសម្រាប់បើកការចរចាជាមួយអ៊ីរ៉ង់ ក្រោយលុបចោលភ្លាមៗ

Rann Reuy — Sat, 20 Jun 2026 07:23:19 +0000

មានសេចក្តីរាយការណ៍ថា បេសកជនអាមេរិក បានធ្វើដំណើរទៅកាន់ប្រទេសស្វីសសម្រាប់ការចរចាជាមួយអ៊ីរ៉ង់ដើម្បីបញ្ចប់សង្គ្រាមជាស្ថាពរ ក្រោយពីការលុបចោលភ្លាមៗពីដំណើរការចរចាដែលបានគ្រោងទុករវាងសហរដ្ឋអាមេរិក និង អ៊ីរ៉ង់ នៅប្រទេសស្វីសនៅថ្ងៃទី១៩ខែមិថុនានេះ បន្ទាប់ពីការចុះហត្ថលេខារបស់ ប្រធានាធិបតីសហរដ្ឋអាមេរិក លោក ដូណាល់ ត្រាំ និង សមភាគីអ៊ីរ៉ង់ លោក Masoud Pezeshkian ។

លោក Steve Witkoff ដែលជាបេសកជនពិសេសរបស់ប្រធានាធិបតីអាមេរិក កំពុងធ្វើដំណើរទៅកាន់ប្រទេសស្វីស ដើម្បីពិភាក្សាជាមួយគណៈប្រតិភូអ៊ីរ៉ង់ ខណៈដែលអ្នកចរចាម្នាក់ទៀត គឺលោក Jared Kushner ដែលជាកូនប្រសាររបស់ លោក ត្រាំ បានទៅដល់ទីនោះរួចហើយ។ នេះជាការបញ្ជាក់របស់អ្នកយកព័ត៌មានអាមេរិក Axios ។

យោងទីភ្នាក់ងារព័ត៌រុស្ស៊ី TASS អ្នកឆ្លើយឆ្លងព័ត៌មាន Axios លោក Barak Ravid បានសរសេរនៅលើបណ្តាញសង្គម X ថា «បេសកជនសេតវិមាន លោក Steve Witkoff កំពុងធ្វើដំណើរទៅកាន់ប្រទេសស្វីស ជាកន្លែងដែលការចរចាជុំទីមួយជាមួយអ៊ីរ៉ង់លើកិច្ចព្រមព្រៀងនុយក្លេអ៊ែរដែលអាចកើតមានត្រូវបានគេរំពឹងថានឹងកើតឡើង មន្ត្រីអាមេរិកម្នាក់បានប្រាប់ខ្ញុំ»។

លោកបានបន្ថែមថា «លោក Jared Kushner កំពុងស្ថិតនៅប្រទេសស្វីសរួចហើយ»។

ប្រតិភូសហរដ្ឋអាមេរិកដែលគ្រោងដឹកនាំដោយអនុប្រធានាធិបតីសហរដ្ឋអាមេរិក លោក JD Vance និង ប្រតិភូអ៊ីរ៉ង់ បានលុបចោលដំណើរទៅចរចានៅប្រទេសស្វីសនៅថ្ងៃសុក្រ បន្ទាប់ពីការផ្ទុះអាវុធរវាងអ៊ីស្រាអែលនិងក្រុមហេសបូឡានៅប្រទេសលីបង់ ដែលធ្វើឲ្យប៉ះពាល់ដល់កិច្ចព្រមព្រៀងដែលចុះហត្ថលេខាដោយលោក ត្រាំ និង ប្រធានាធិបតីអ៊ីរ៉ង់។

ទោះបីយ៉ាងណា ប្រទេសអាមេរិក និង អ៊ីរ៉ង់មានពេល៦០ថ្ងៃដើម្បីចរចាលម្អិតសម្រាប់បិទបញ្ចប់សង្គ្រាមរវាងប្រទេសទាំងពីរ ដោយការពិភាក្សាផ្តោតលើកម្មវិធីនុយក្លេអ៊ែរអ៊ីរ៉ង់ និង ផែនការស្តារប្រទេសអ៊ិរ៉ង់ឡើងវិញ៕

រ៉ាន់ រើយ

The post បេសកជនរបស់ លោក ត្រាំ ចេញទៅស្វីសសម្រាប់បើកការចរចាជាមួយអ៊ីរ៉ង់ ក្រោយលុបចោលភ្លាមៗ appeared first on Kampuchea Thmey Daily.

Rann Reuy, Author at Kampuchea Thmey Daily

​យោធាអ៊ីស្រាអែល ​ជិត១០០០នាក់​បាត់​បង់ជីវិត ក្នុងសង្ក្រាម​​១០០០ថ្ងៃ​

ប្រធានាធិបតី​អ៊ីរ៉ង់​ ស្នើ​ឲ្យ​ប្រទេសមូស្លីម​​រួប​រួម​គ្នា​​ ទប់ស្កាត់​សម្ពាធ​ពីខាងក្រៅ​

​ការ​អាក់​អន់​ស្រពន់​ចិត្ត រវាង​ថ្នាក់​ដឹកនាំ​ប៉ូឡូញ និង អ៊ុយក្រែន​ បាន​ផ្ទុះ​កក្រើក​យ៉ាងខ្លាំង​​

​​​​​បេសកជន​របស់ លោក ត្រាំ ​ចេញ​ទៅស្វីស​សម្រាប់​បើក​ការ​ចរចាជាមួយអ៊ីរ៉ង់​ ក្រោយ​លុបចោល​ភ្លាមៗ​​

យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ

ប្រធានាធិបតីអ៊ីរ៉ង់ ស្នើឲ្យប្រទេសមូស្លីមរួបរួមគ្នា ទប់ស្កាត់សម្ពាធពីខាងក្រៅ

ការអាក់អន់ស្រពន់ចិត្ត រវាងថ្នាក់ដឹកនាំប៉ូឡូញ និង អ៊ុយក្រែន បានផ្ទុះកក្រើកយ៉ាងខ្លាំង

បេសកជនរបស់ លោក ត្រាំ ចេញទៅស្វីសសម្រាប់បើកការចរចាជាមួយអ៊ីរ៉ង់ ក្រោយលុបចោលភ្លាមៗ