លោក គី ហាំង ជាម្ចាស់ចម្ការ «ល្មើ គីហាំង» ប្រាប់ កម្ពុជាថ្មី ថា ដំណាំលម៉ើនៅក្នុងចម្ការរបស់លោកកំពុងតែហុចផលបណ្ដើរៗហើយ ខណៈឆ្នាំនេះ លោករំពឹងថា ផ្លែលម៉ើក្រហម ​និងប្រភេទលម៉ើផ្សេងទៀតក្នុងចម្ការនឹងទទួលបានទិន្នផលខ្ពស់ និងមានទីផ្សារល្អ។

ម្ចាស់ចម្ការរូបនេះ បានឱ្យដឹងទៀតថា ជាទូទៅលម៉ើនៅក្នុងចម្ការលោកច្រើនតែប្រមូលផលនៅចុងខែ ៧ ឬដើមខែ៨ ជារៀងរាល់ឆ្នាំ។ ជាក់ស្ដែងនៅក្នុងខែមិថុនានេះ លោកសង្កេតឃើញថា លម៉ើពូជខ្លះកំពុងតែហុចផលបណ្ដើរៗ ប៉ុន្តែពុំទាន់អាចថាដល់ពេលប្រមូលផលនោះឡើយ។

លោក គី ហាំង បានបញ្ជាក់ដែរថា ផ្លែលម៉ើកំពុងតែជាទីពេញនិយមសម្រាប់ប្រជាជនកម្ពុជា ពិសេសគឺភ្ញៀវទេសចរ ដ្បិតអីបច្ចុប្បន្នក៏សម្បូរកសិករក្នុងស្រុករបស់យើងដាក់ដាំច្រើនផងដែរ។

យ៉ាងណាមិញ ទាក់ទងនឹងតម្លៃ លម៉ើក្រហម និងពូជប៉ាហ៊ី នៅចម្ការបស់លោកកាលពីឆ្នាំមុន អាចលក់ចេញទៅកាន់ទីផ្សារបានចន្លោះពី ១៥ដុល្លារ ទៅ ២០ដុល្លារ ក្នុង១គីឡូក្រាម។ ចំណែកអតិថិជនវិញ ភាគច្រើនពួកគាត់អញ្ជើញមកដើរកម្សាន្តទិញដល់ចម្ការផ្ទាល់ និងខ្លះទៀតក៏បានកុម្ម៉ង់ទិញតាមរយៈអនឡាញយ៉ាងច្រើនកុះករផងដែរ។

ផ្លែលម៉ើ គឺជាប្រភេទផ្លែឈើដ៏សម្បូរសារធាតុចិញ្ចឹម និងផ្ដល់អត្ថប្រយោជន៍ជាច្រើនចំពោះសុខភាព។ វាមិនត្រឹមតែជាប្រភពថាមពលដ៏រហ័សប៉ុណ្ណោះទេ ប៉ុន្តែថែមទាំងជួយសម្រួលដល់ការរំលាយអាហារ ការពារសុខភាពទូទៅ និងអាចជួយស្ត្រីមានផ្ទៃពោះបានយ៉ាងល្អទៀតផង។

គួរឱ្យដឹងថា ចម្ការលម៉ើរបស់លោក គី​ ហាំង ជាចម្ការលម៉ើមួយដែលមានទីតាំងស្ថិតនៅភូមិ កូនភ្នំខាងជើង ឃុំតាស្ដា ស្រុកសំពៅលូន ខេត្តបាត់ដំបង។ បច្ចុប្បន្នចម្ការលម៉ើរបស់កសិករូបនេះ មានដើមលម៉ើចំនួន ៤៥០ដើមក្នុងផ្ទៃដីសរុបជិត ២ហិកតា ដែលជាមធ្យម លម៉ើ១ដើម អាចប្រមូលផលបាន ៨០គីឡូក្រាម៕

អត្ថបទ ៖ សួស សិត

The post លម៉ើក្រហមកំពុងហុចផលបណ្ដើរៗ ខណៈកសិកររំពឹងថាមានទីផ្សារល្អ appeared first on Kampuchea Thmey Daily.

កិច្ចសហការនេះ មានគោលបំណងជួយគាំទ្រដល់សមត្ថភាពដឹកជញ្ជូនអន្តរជាតិថ្មីរបស់ក្រុមហ៊ុន វិរៈ ប៊ុនថាំ ព្រមទាំងជួយបើកផ្លូវឱ្យមានលំហូរខ្សែដឹកជញ្ជូនថ្មីៗជាបន្តបន្ទាប់ តាមរយៈការបំពេញបន្ថែមសមត្ថភាពប្រតិបត្តិការឱ្យគ្នាទៅវិញទៅមក ដើម្បីភ្ជាប់ផលិតផលកម្ពុជាទៅកាន់ទីផ្សារអន្តរជាតិសំខាន់ៗ រួមមាន សហរដ្ឋអាមេរិក ចក្រភពអង់គ្លេស អឺរ៉ុប និងបណ្តាប្រទេសគោលដៅជាច្រើនទៀត។

ស្របតាមទិសដៅនៃកិច្ចសហការនេះ ក្រុមហ៊ុន វិរៈ ប៊ុនថាំ នឹងគ្រប់គ្រងលើការទទួលបញ្ញើទំនិញ និងការដឹកជញ្ជូនក្នុងស្រុក ដោយប្រើប្រាស់បណ្តាញសាខាដ៏ទូលំទូលាយនៅកម្ពុជា ខណៈដែលក្រុមហ៊ុន Asendia Singapore នឹងទទួលបន្ទុកលើខ្សែដឹកជញ្ជូនពីកម្ពុជាទៅកាន់ប្រទេសគោលដៅតាមរយៈហេដ្ឋារចនាសម្ព័ន្ធឡូជីស្ទីកជុំវិញពិភពលោក ជំនាញបែបបទគយ និងប្រព័ន្ធពាណិជ្ជកម្មអេឡិចត្រូនិកឆ្លងដែនរបស់ខ្លួន។

ឯកឧត្តម អ្នកឧកញ៉ា បណ្ឌិត សួរ វីរ: ប្រធាន និងជានាយកប្រតិបត្តិនៃ ក្រុមហ៊ុន វិរៈ ប៊ុនថាំ បានមានប្រសាសន៍ថា «ប្រតិបត្តិការដឹកជញ្ជូនក្នុងស្រុករបស់ ក្រុមហ៊ុន វិរៈ ប៊ុនថាំ គឺមានគ្រឹះយ៉ាងរឹងមាំរួចទៅហើយ ប៉ុន្តែដើម្បីបំពេញតម្រូវការជាក់ស្តែងក្នុងវិស័យពាណិជ្ជកម្មអេឡិចត្រូនិកនាពេលបច្ចុប្បន្ន អ្វីដែលយើងត្រូវបំពេញបន្ថែម គឺដំណោះស្រាយដឹកជញ្ជូនទំនិញពីកម្ពុជាទៅកាន់ទីផ្សារអន្តរជាតិគួរឱ្យទុកចិត្តមួយ»។ 

ឯកឧត្តម អ្នកឧកញ៉ា បណ្ឌិត បានបន្ថែមថា «ការបូកផ្សំរវាងចំណុចខ្លាំងរបស់ ក្រុមហ៊ុន វិរៈ ប៊ុនថាំ ជាមួយនឹងបណ្តាញដឹកជញ្ជូនទូទាំងពិភពលោក ព្រមទាំងជំនាញផ្នែកបែបបទគយ និងប្រតិបត្តិការប្រកបដោយបទពិសោធន៍របស់ Asendia នឹងជួយពង្រឹងជំហររបស់យើងឱ្យក្លាយជាកម្លាំងចលករដ៏សំខាន់ ដើម្បីជួយអាជីវកម្មកម្ពុជាឱ្យចូលរួមប្រកួតប្រជែងនៅលើទីផ្សារអន្តរជាតិប្រកបដោយភាពជឿជាក់»។

គំនិតផ្ដួចផ្ដើមនេះដែរ មិនត្រឹមតែឆ្លុះបញ្ចាំងពីគោលដៅជាតិក្នុងការពង្រឹងខ្លួនក្នុងពាណិជ្ជកម្មសកល និងសេដ្ឋកិច្ចឌីជីថលប៉ុណ្ណោះទេ ប៉ុន្តែថែមទាំងជាទំព័រថ្មីមួយ ដែលបើកឱកាសឱ្យអាជីវកម្មក្នុងស្រុក អាចបង្ហាញវត្តមាននៅក្រៅប្រទេសផងដែរ។

លោក Senthil Kumar នាយកប្រតិបត្តិក្រុមហ៊ុន Asendia សិង្ហបុរី និងអាស៊ីខាងត្បូង បានមានប្រសាសន៍ថា «ក្រុមហ៊ុន Asendia បានប្រតិបត្តិការនៅក្នុងតំបន់អាស៊ីប៉ាស៊ីហ្វិកអស់រយៈពេលជាងមួយទសវត្សរ៍មកហើយ។ យើងមើលឃើញយ៉ាងច្បាស់ថា ប្រទេសកម្ពុជាគឺជាទីផ្សារមួយដែលកំពុងមានការរីកចម្រើនយ៉ាងរហ័ស ជាពិសេសលើតម្រូវការដឹកជញ្ជូនទំនិញទៅក្រៅប្រទេស សម្រាប់ពាណិជ្ជកម្មអេឡិចត្រូនិក»។

លោកបានបន្ថែមទៀតថា «កិច្ចសហការនេះនឹងផ្សារភ្ជាប់ឧត្តមភាពនៃប្រព័ន្ធដឹកជញ្ជូនក្នុងស្រុករបស់ក្រុមហ៊ុន វិរៈ ប៊ុនថាំ ទៅនឹងបណ្តាញសកលដ៏ទូលំទូលាយ និងជំនាញដឹកជញ្ជូនឆ្លងដែនរបស់ Asendia ដើម្បីបង្កើតបានជាបង្អែកដ៏រឹងមាំមួយរុញច្រានឱ្យអាជីវកម្មនៅកម្ពុជាអាចបង្ហាញខ្លួនទៅកាន់ឆាកអន្តរជាតិបានយ៉ាងងាយស្រួល»។ កិច្ចសហការនេះ ក៏ជាផ្នែកមួយនៃយុទ្ធសាស្ត្ររបស់ Asendia ក្នុងការពង្រីកវិសាលភាពអាជីវកម្មទៅកាន់ទីផ្សារកំពុងអភិវឌ្ឍទូទាំងតំបន់អាស៊ីប៉ាស៊ីហ្វិកផងដែរ។

គួរឱ្យដឹងថា កិច្ចសហការដ៏សំខាន់នេះអាចសម្រេចទៅបានក្រោមកិច្ចសម្របសម្រួលរបស់ក្រុមហ៊ុន Confluences ដែលបានដើរតួនាទីរៀបចំផ្សារភ្ជាប់ទំនាក់ទំនងរវាងដៃគូពាក់ព័ន្ធសំខាន់ៗនៅក្នុងវិស័យ ដែលជាផ្នែកមួយនៃបេសកកម្មស្នូលរបស់ក្រុមហ៊ុន Confluences ក្នុងការលើកកម្ពស់ប្រព័ន្ធដឹកជញ្ជូនអន្តរជាតិ និងគាំទ្រដល់ការចូលមកវិនិយោគ ក៏ដូចជាពង្រីកប្រតិបត្តិការនៅក្នុងទីផ្សារកម្ពុជារបស់ក្រុមហ៊ុនអន្តរជាតិផងដែរ។

លោក Soreasmey Ke Bin នាយកប្រតិបត្តិក្រុមហ៊ុន Confluences បានលើកឡើងថា «កិច្ចសហការពាណិជ្ជកម្មនេះ ប្រៀបបានជាស្ពានយុទ្ធសាស្ត្រដ៏សំខាន់មួយ ដែលនាំកម្ពុជាឆ្ពោះទៅកាន់ការពង្រឹងជំហររបស់ខ្លួននៅលើឆាកពាណិជ្ជកម្មអន្តរជាតិ និងពាណិជ្ជកម្មអេឡិចត្រូនិក» ។

កិច្ចសហការនេះ ស្របតាមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពង្រឹងប្រព័ន្ធអេកូឡូស៊ីនៃវិស័យដឹកជញ្ជូន និងឡូជីស្ទីក ព្រមទាំងគាំទ្រដល់ការអភិវឌ្ឍពាណិជ្ជកម្មតាមប្រព័ន្ធអេឡិចត្រូនិក ការធ្វើអន្តរជាតូបនីយកម្មសហគ្រាសធុនតូច និងមធ្យម និងការសម្របសម្រួលពាណិជ្ជកម្មផងដែរ។ ជាក់ស្តែង រាជរដ្ឋាភិបាលកម្ពុជា បានដាក់ចេញនូវគោលនយោបាយសំខាន់ៗ ដើម្បីគាំទ្រការអភិវឌ្ឍពាណិជ្ជកម្មឌីជីថល រួមមាន ច្បាប់ស្តីពីពាណិជ្ជកម្មអេឡិចត្រូនិក និងក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១–២០៣៥ សំដៅជំរុញការធ្វើសមាហរណកម្មរបស់កម្ពុជាក្នុងផ្សារឌីជីថល ទាំងក្នុងតំបន់ និងលើសកលលោក។

បច្ចុប្បន្ន ក្រុមហ៊ុន វិរៈ ប៊ុនថាំ និង Asendia កំពុងស្ថិតក្នុងដំណាក់កាលអនុវត្តគម្រោង និងសាកល្បងប្រតិបត្តិការលើផ្លូវដឹកជញ្ជូនទៅកាន់គោលដៅនានាជាបន្តបន្ទាប់ក្នុងរយៈពេលប៉ុន្មានខែខាងមុខនេះ មុននឹងឈានទៅដល់ការដាក់ឱ្យដំណើរការពេញលេញ និងជាផ្លូវការនៃសេវាកម្មដឹកជញ្ជូនអន្តរជាតិទាំងស្រុង៕

អត្ថបទពាណិជ្ជកម្ម

The post ក្រុមហ៊ុន វិរៈ ប៊ុនថាំ ជួយអាជីវកម្មកម្ពុជាពង្រីកវត្តមានទៅទីផ្សារពិភពលោក តាមរយៈសេវាកម្មដឹកជញ្ជូនសម្រាប់ពាណិជ្ជកម្មអេឡិចត្រូនិក appeared first on Kampuchea Thmey Daily.

លោក លាងយី បានឱ្យដឹងថា ក្នុងនាមជាអាជ្ញាធរ មានការសប្បាយរីករាយសាទរដែលទទួលបានសមិទ្ធិផលនេះ ហើយសមិទ្ធិផលនេះ មិនមែនកើតឡើងដោយចៃដន្យនោះទេ ដែលមានការខិតខំប្រឹងប្រែងទាំងអស់គ្នា រវាងថ្នាក់ជាតិ រហូតដល់ថ្នាក់ខេត្ត។

យ៉ាងណាមិញ អាជីវករ នៅក្នុងផ្សារសាមគ្គីក្រុងក្រចេះ និងប្រជាពលរដ្ឋ រស់នៅក្នុងភូមិដូនជ្រាំ ដែលតែង​តែ​លិចលង់ជោគជាំនារដូវវស្សា ប៉ុន្តែឆ្នាំនេះ គឺបានជៀសផុតហើយ ពីព្រោះស្ថានីយបូមទឹកនេះ នឹងចាប់ផ្ដើមដំណើរការទៅតាមគម្រោងដាក់មករួចហើយ ចំណែកទឹកបានហូរចេញមកគ្រប់ប្រពន្ធ័ទាំងអស់ដែលបានតភ្ជាប់មកប្រព័ន្ធលូមេនេះ ហើយសង្ឃឹមថា ក្នុងរដូវវស្សានេះ អាជីវករ និងពលរដ្ឋក្នុងទីប្រជុំជនបានសម្រាក់ស្រួល ទោះបីជាទឹកឡើង ឬមានភ្លៀងធ្លាក់ពី ២ ទៅ ៣ម៉ោងក៏លែងលិចលែងលង់ រីឯទ្រព្យសម្បត្តិវិញ ក៏មិនមានការខូចខាត ឬខាតបង់ទៀតដែរ។

លោក ល្មុត សុខដុម ជាទីប្រឹក្សាបច្ចេកទេស នៃក្រសួងសាធារណការ និងដឹកជញ្ជូន បានឱ្យដឹងដែរថា សម្រាប់​​គម្រោងអភិវឌ្ឍន៍ក្រុងរបៀង៤ ខេត្តក្រចេះ គិតត្រឹមខែមិថុនា ឆ្នាំ២០២៦នេះ សម្រេចបានលទ្ធផលប្រមាណជា ៩៦ភាគរយ ហើយសម្រាប់រចនាសម្ពន្ធ័ក្នុងគម្រោងអភិវឌ្ឍន៍ក្រុងរបៀង៤ គឺមានស្ថានីយបូមទឹកមួយកន្លែង ដែលមានបំពាក់ម៉ាស៊ីនបូមទឹកចំនួន៣ ដែលមានសមត្ថភាពបូម ១,៣៨០ ម៉ែត្រគូប ក្នុង១ម៉ោង សាងសង់ប្រព័ន្ធលូមេមួយខ្សែប្រវែង ១,១២៣ ម៉ែត្រ និងប្រពន្ធ័លូមូល តភ្ជាប់ជាមួយប្រព័ន្ធលូចាស់មួយខ្សែដែលមានប្រវែង ២៦៩ ម៉ែត្រ និងមួយខ្សែរទៀត ជាលូប្រអប់ មានប្រវែង ២២៧ ម៉ែត្រ។

សំណង់នេះ សាងសង់លើផ្ទៃដីទំហំ ៨៥ ម៉ែត្រ x ១០៥ ម៉ែត្រ ក្នុងនោះរួមមាន៖ ស្ថានីយបូមទឹកមួយ មានទំហំ ១៦.៧ ម៉ែត្រ x ៣០ ម៉ែត្រ និងមាត់ឈ្នាងបង្ហូរទឹកចេញពីស្ថានីយ ទំហំ ១៣.៤ ម៉ែត្រ x ១៨.៥ ម៉ែត្រ។

សមិទ្ធិផលទាំងនេះ គឺជាគោលនយោបាយរបស់រាជរដ្ឋាភិបាល ក្នុងការលើកកម្ពស់អនាម័យ សុខភាព សោភ័ណភាព និងជីវភាពរបស់ប្រជាពលលរដ្ឋ ដែលរស់នៅក្នុងក្រុងក្រចេះនេះផងដែរ៕

អត្ថបទ ៖ ប្រុញ វិធិន

The post ពលរដ្ឋក្នុងក្រុងក្រចេះ រីករាយក្រោយមានប្រព័ន្ធលូរំដោះទឹកបញ្ចៀសការលិចលង់ appeared first on Kampuchea Thmey Daily.

ចំណីសត្វគោដែលផលិតបាន គឺសម្បូរទៅដោយសារធាតុចិញ្ចឹម និងជីវជាតិគ្រប់គ្រាន់ ជួយឱ្យគោស៊ីបានល្អ ឆាប់ធំ និងមានសុខភាពរឹងមាំ ផលិតពីវត្ថុធាតុដើមមានគុណភាព ក្រោមស្តង់ដាផលិតកម្មខ្ពស់។

លោក ឆាយ ឌួងសុវណ្ណារ៉ា ជាម្ចាស់សហគ្រាសផលិតចំណីសត្វគោ ដង្ខៅប៉ាង បានបញ្ជាក់ឱ្យដឹងថា ដំបូងឡើយការកែច្នៃផលិតចំណីសត្វនេះ គឺផលិតសម្រាប់ការផ្គត់ផ្គង់ចំណីឱ្យសត្វគោនៅក្នុងកសិដ្ឋានរបស់លោកតែប៉ុណ្ណោះ។ ប៉ុន្តែក្រោយមក ដោយសារមានការគាំទ្រពីម្ចាស់កសិដ្ឋាននៅតាមបណ្ដាលស្រុក ខេត្ត ផ្សេងទៀត ទើបលោកសម្រេចពង្រីកខ្លួនរហូតបង្កើតក្លាយទៅជាសហគ្រាសមួយដែលមានការចុះបញ្ជីការត្រឹមត្រូវទទួលស្គាល់ពីក្រសួងជំនាញពាក់ព័ន្ធទាំងអស់ ដើម្បីដំណើរការកែច្នៃ និងផលិតចំណីសត្វរហូតមកដល់សព្វថ្ងៃនេះ គឺមានការគាំទ្រពីអតិថិជនភាគច្រើន ដែលជាម្ចាស់កសិដ្ឋានចិញ្ចឹមគោ ឬក៏ដេប៉ូលក់ដុំរាយជាដើម។

ម្ចាស់កសិដ្ឋានរូបនេះ បញ្ជាក់បន្ថែមទៀតថា សម្រាប់ការកែច្នៃចំណីសត្វ នៅក្នុងសហគ្រាសផលិតចំណីសត្វ ដង្ខៅប៉ាង លោកបានធ្វើការប្រមូលទិញវត្ថុធាតុដើមពីកសិករផ្ទាល់នៅក្នុងមូលដ្ឋាន ដែលមានដូចជា ពោត សណ្ដែក ដំឡូងមី កន្ទក់ និងស្ករអំពៅជាដើម ដើម្បីយកមកផលិតកែច្នៃទៅជាចំណីសត្វគោ ដង្ខៅប៉ាង។

យោងតាមបទពិសោធន៍ដែលម្ចាស់សហគ្រាសខាងលើនេះ ធ្លាប់មានកសិដ្ឋានចិញ្ចឹមគោទទួលបានលទ្ធផលល្អ លោកថា ជាទូទៅគោ គឺចិញ្ចឹមឱ្យស្មៅនិងចម្បើង ប៉ុន្តែដើម្បីបំប៉នរយៈពេលខ្លីឱ្យសាច់មានគុណភាព គឺត្រូវតែប្រើចំណីសម្រេចបន្ថែម ក្នុងរយៈពេល ៣ ទៅ ៤ខែ ធ្វើឱ្យសត្វគោឆាប់រីកធំធាត់ញាត់សាច់ល្អ និងមិនធ្វើឱ្យប៉ះពាល់ទៅដល់សុខភាពសត្វ និងមនុស្សឡើយ។

ម្ចាស់កសិដ្ឋានខាងលើ ក៏បានថ្លែងអំណរគុណទៅដល់អតិថិជនទាំងអស់ ដែលមានការគាំទ្រច្រើន ទាំងនៅតាមកសិដ្ឋានចិញ្ចឹមសត្វគោ និងការកុម្ម៉ង់លក់នៅតាមទីផ្សារតាមបណ្ដាខេត្តផ្សេងទៀត។ ជាពិសេស បានបង្កើតឱកាសការងារយ៉ាងច្រើនដល់ប្រជាពលរដ្ឋនៅក្នុងមូលដ្ឋាន និងបង្កើនប្រាក់ចំណូលសេដ្ឋកិច្ច ដើម្បីចូលរួមចំណែកកាត់បន្ថយភាពក្រីក្រជាមួយរាជរដ្ឋាភិបាលផងដែរ៕

អត្ថបទ៖ ប្រុញ វិធិន

The post កសិករខ្មែរមុនដំបូងគេនៅខេត្តក្រចេះ អាចផលិតចំណីគោប្រមាណជាង២០តោន ក្នុងមួយថ្ងៃ appeared first on Kampuchea Thmey Daily.

អ្នកនាង ឈីង ជាម្ចាស់កសិដ្ឋានបណ្ដុះផ្សិតប៊ីចេង ប្រាប់ កម្ពុជាថ្មី ថា ទាក់ទងជាមួយការងារបណ្ដុះផ្សិតនេះ កសិដ្ឋានរបស់អ្នកនាងបានចាប់ផ្ដើមធ្វើវាយូរមកហើយ។​​ ដោយឡែកចំពោះផ្សិតប៊ីចេង កសិដ្ឋានទើបតែបានសាកល្បងបណ្ដុះវាឡើងមកនៅឆ្នាំ ២០២៦នេះ តែប៉ុណ្ណោះ។

ម្ចាស់កសិដ្ឋានរូបនេះ បានឱ្យដឹងទៀតថា មូលហេតុដែលកសិដ្ឋានដាក់ឈ្មោះប្រភេទនេះថា «ផ្សិតប៊ីចេង» ដោយសារតែរសជាតិវាស្រដៀងទៅនឹងផ្សិតអំបោះដែលយើងធ្លាប់បរិភោគកន្លងមក។ មួយវិញទៀត ការដាក់ឈ្មោះបែបនេះដោយសារតែប្រភពដើមរបស់ផ្សិតមានឈ្មោះជាភាសាចិន ដែលពិបាកក្នុងការហៅទើបកសិដ្ឋានសម្រេចហៅថា «ផ្សិតប៊ីចេង» តែម្ដងទៅ។

ដ្បិតផ្សិតប៊ីចេង ទើបតែមានវត្តមាននៅក្នុងទឹកដីប្រទេសកម្ពុជា និងកំពុងទទួលការគាំទ្រក៏ពិតមែន ប៉ុន្ដែម្ចាស់កសិដ្ឋានខាងរូបនេះ នៅតែទូទូចស្នើចិត្តប្រជាជនខ្មែរសូមបន្តជួយគាំទ្រផលិតផលក្នុងស្រុកឱ្យកាន់តែច្រើនជាងមុន ខណៈកន្លងមកគ្រាន់តែផ្សិតក៏យើងនាំចូលពីប្រទេសថៃដែរ ប៉ុន្ដែពេលនេះកសិដ្ឋានក្នុងស្រុករបស់យើងអាចផលិតបាន និងអាចផ្គត់ផ្គង់គ្រប់គ្រាន់ទៅតម្រូវការទីផ្សារប្រចាំថ្ងៃ ហេតុនេះសូមជួយគាំទ្រឱ្យបានផុសផុលជាងនេះផងចុះ។

យ៉ាងណាមិញ ចំពោះទីផ្សារបច្ចុប្បន្ន ផ្សិតប៊ីចេង កំពុងទទួលបានការគាំទ្រយ៉ាងច្រើនគួរសម ខណៈកសិដ្ឋានបានធ្វើការបោះដុំ និងលក់រាយទៅកាន់ផ្សារទំនើបមួយចំនួននៅក្នុងរាជធានីភ្នំពេញផងដែរ។

គួរឱ្យដឹងថា ក្រៅពីកាបណ្ដុះផ្សិតប៊ីចេងសម្រាប់ផ្គត់ផ្គង់ទីផ្សារក្នុងស្រុក កសិដ្ឋានចែឈីង ក៏មានប្រភេទពូជផ្សិតជាច្រើនមុខទៀតរួមមាន៖ ផ្សិតប៊ូតុង ផ្សិតត្រចៀកកណ្ដុរ ផ្សិតលិនជឺ និងផ្សិតជាច្រើនមុខទៀត ដែលប្រភេទផ្សិតទាំងនេះសុទ្ធសឹងតែសម្បូរទៅដោយសារធាតុចិញ្ចឹមខ្ពស់ ជាតិសរសៃ វីតាមីន និងសារធាតុប្រឆាំងអុកស៊ីតកម្ម ដែលផ្តល់អត្ថប្រយោជន៍យ៉ាងច្រើនដល់សុខភាពរាងកាយរបស់មនុស្សទូទៅ៕

អត្ថបទ ៖ សួស សិត

The post អ្នកសៀមរាប​បណ្ដុះផ្សិតប៊ីចេង និងផ្សិតច្រើនប្រភេទ ជំនួសឱ្យការនាំចូលពីប្រទេសថៃ appeared first on Kampuchea Thmey Daily.

លោក​ Dilan Huang អនុប្រធាន Huawei SEAMC បានមានប្រសាសន៍ថា ពិធីចុះហត្ថលេខាលើ អនុ ស្សរណៈនៃការយោគយល់គ្នានៅថ្ងៃនេះ គឺជាព្រឹត្តិការណ៍សំខាន់មួយទៀតនៅក្នុងភាពជាដៃគូដ៏រឹងមាំរវាងក្រុមហ៊ុន Huawei កម្ពុជា និងក្រសួងអប់រំ យុវជន និងកីឡា ក្នុងការជំរុញដំណើរអប់រំឌីជីថលរបស់កម្ពុជា។ ជាក់ស្ដែង កម្ពុជាគឺជាប្រទេសមួយដែលមានប្រវត្តិសាស្ត្រដ៏គួរឱ្យមោទនភាព វប្បធម៌ដ៏សម្បូរបែប និងសក្តានុពលមនុស្សដ៏រឹងមាំ។

នៅពីក្រោយការរីកចម្រើន និងការផ្លាស់ប្តូររបស់ប្រទេសនីមួយៗ ការអប់រំតែងតែជាមូលដ្ឋានគ្រឹះ។ នៅក្រុមហ៊ុន Huawei យើងជឿជាក់យ៉ាងមុតមាំថា បច្ចេកវិទ្យាអាចពន្លឿនការអភិវឌ្ឍ ប៉ុន្តែមនុស្ស និងទេពកោសល្យនៅតែជាកម្លាំងចលករពិតប្រាកដនៅពីក្រោយវឌ្ឍនភាពប្រកបដោយចីរភាព។ ដូចដែលស្ថាបនិករបស់យើងលោក Ren Zhengfei ធ្លាប់បាននិយាយថា “ការអប់រំគឺជាការបណ្តុះមនុស្សល្អបំផុតជាមួយមនុស្សល្អបំផុត”។

សព្វថ្ងៃនេះ ក្រោមយុទ្ធសាស្ត្រ Pentagonal របស់កម្ពុជា និងចក្ខុវិស័យរបស់ខ្លួនសម្រាប់ការផ្លាស់ប្តូរឌីជីថល ប្រទេសកំពុងផ្តោតការយកចិត្តទុកដាក់យ៉ាងខ្លាំងលើការអភិវឌ្ឍមនុស្ស នវានុវត្តន៍ និងហេដ្ឋារចនាសម្ព័ន្ធឌីជីថល។ នេះស្របនឹងចក្ខុវិស័យរយៈពេលវែងរបស់ក្រុមហ៊ុន Huawei ក្នុងការគាំទ្រកំណើនឌីជីថលប្រកបដោយការរួមបញ្ចូល។ នៅពេលដែលពិភពលោកកំពុងឈានចូលដល់យុគសម័យនៃបញ្ញាសិប្បនិម្មិត ការគណនាលើពពក ទិន្នន័យធំ និងការតភ្ជាប់ឌីជីថល ប្រទេសនីមួយៗកំពុងវិនិយោគយ៉ាងច្រើនលើហេដ្ឋារចនាសម្ព័ន្ធ ICT ដើម្បីកសាងសេដ្ឋកិច្ចឌីជីថល រដ្ឋាភិបាលឌីជីថល និងសង្គមឌីជីថលឱ្យកាន់តែរឹងមាំផងដែរ។

ទោះជាយ៉ាងណាក៏ដោយ បច្ចេកវិទ្យាតែមួយមុខមិនគ្រប់គ្រាន់ទេ។ ដើម្បីទាញយកអត្ថប្រយោជន៍ពេញលេញពីការផ្លាស់ប្តូរឌីជីថល យើងត្រូវតែវិនិយោគលើទេពកោសល្យឌីជីថល សមត្ថភាពគ្រូបង្រៀន និងប្រព័ន្ធអប់រំ ដែលអាចរៀបចំមនុស្សជំនាន់ក្រោយសម្រាប់ឱកាសនាពេលអនាគត។ នោះហើយជាមូលហេតុដែលកិច្ចសហប្រតិបត្តិការរវាងភាពជាដៃគូរវាងរដ្ឋ និងឯកជនមានសារៈសំខាន់ជាងពេលណាៗទាំងអស់។

យ៉ាងណាមិញ អនុស្សរណៈនៃការយោគយល់គ្នានៅថ្ងៃនេះ គឺស្តីពីយុទ្ធសាស្ត្រអប់រំឌីជីថលសម្រាប់សាលារៀនឆ្លុះបញ្ចាំងពីការប្តេជ្ញាចិត្តរួមគ្នារបស់យើងជាមួយក្រសួងអប់រំ យុវជន និងកីឡា ដើម្បីពង្រឹងបរិយាកាសសិក្សាឌីជីថល កែលម្អការទទួលបានបច្ចេកវិទ្យា និងគាំទ្រសាលារៀននៅក្នុងប្រទេសកម្ពុជាតាមរយៈដំណោះស្រាយអប់រំដែលជំរុញដោយនវានុវត្តន៍។

ឯកឧត្តមបណ្ឌិត អ៊ុម រម្យណី រដ្ឋលេខាធិការ នៃក្រសួងអប់រំ យុវជន និងកីឡា បានមានប្រសាសន៍ថា ការចុះហត្ថលេខាលើអនុស្សរណៈនៃការយោគយល់គ្នានេះ រវាងក្រសួងអប់រំ យុវជន និងកីឡា និងក្រុមហ៊ុន Huawei Technologies ឆ្លុះបញ្ចាំងពីការប្តេជ្ញាចិត្តរួមគ្នារបស់យើង ក្នុងការកសាងប្រព័ន្ធអប់រំដែលរឹងមាំ និងបំពាក់បច្ចេកវិទ្យាឌីជីថលបន្ថែមទៀត សម្រាប់សិស្ស និងគ្រូបង្រៀនរបស់យើង។

យុទ្ធសាស្ត្រអប់រំឌីជីថលសម្រាប់សាលារៀនរបស់ប្រទេសកម្ពុជា (២០២៤-២០៣០) គឺច្បាស់លាស់នៅក្នុងមហិច្ឆតារបស់ខ្លួន ដើម្បីធានាថា អ្នករៀនគ្រប់រូប ដោយមិនគិតពីកន្លែងដែលពួកគេរស់នៅ មានសិទ្ធិទទួលបានការអប់រំឌីជីថលដែលមានគុណភាព។ ដើម្បីសម្រេចបាននូវគោលដៅនេះ យើងត្រូវការដៃគូដែលមិនត្រឹមតែនាំមកនូវបច្ចេកវិទ្យាប៉ុណ្ណោះទេ ប៉ុន្តែថែមទាំងការលះបង់ពិតប្រាកដចំពោះការអភិវឌ្ឍរបស់ប្រទេស កម្ពុជាផងដែរ។ ក្រុមហ៊ុន Huawei គឺជាដៃគូមួយក្នុងចំណោមដៃគូទាំងនោះ។

តាមរយៈភាពជាដៃគូនេះ យើងនឹងធ្វើការរួមគ្នាដើម្បីពង្រឹងហេដ្ឋារចនាសម្ព័ន្ធ ICT នៅក្នុងសាលារៀន អភិវឌ្ឍជំនាញឌីជីថលសម្រាប់គ្រូបង្រៀន និងសិស្សានុសិស្ស និងកែលម្អវិធីដែលសាលារៀនរបស់យើងត្រូវបានគ្រប់គ្រង និងគ្រប់គ្រង។ ទាំងនេះមិនមែនគ្រាន់តែជាការប្តេជ្ញាចិត្តនៅលើក្រដាសដែលក្រសួងអប់រំនឹងធានាថាពួកគេត្រូវបានអនុវត្តដោយមានការទទួលខុសត្រូវពេញលេញនោះទេ។

ទោះជាយ៉ាងណា ឯកឧត្តម អ៊ុម រម្យណី ក៏សូមថ្លែងអំណរគុណដល់លោក Dilan Huang និងក្រុមការងារ Huawei កម្ពុជាទាំងមូលចំពោះការជឿទុកចិត្ត និងកិច្ចសហការរបស់ពួកគេ។ ឯកឧត្តមសូមថ្លែងអំណរគុណដល់មន្ត្រី និងដៃគូទាំងអស់របស់ក្រសួងអប់រំ យុវជន និងកីឡា ដែលបានខិតខំប្រឹងប្រែងដើម្បីធ្វើឱ្យថ្ងៃនេះអាចធ្វើទៅបានផងដែរ៕

អត្ថបទពាណិជ្ជកម្ម

The post ក្រុមហ៊ុន Huawei ចុះMoU ជាមួយក្រសួងអប់រំ ដើម្បីជុំរុញការអប់រំឌីជីថលនៅកម្ពុជាកាន់តែប្រសើរឡើង appeared first on Kampuchea Thmey Daily.

ការជម្រុញណែនាំពីលោក អ៊ួង សម្បត្តិ អភិបាលរងស្រុកឆ្លូងនេះ ធ្វើឡើងក្នុងពិធីបើកសំណើដេញថ្លៃគម្រោងសាងសង់ផ្លូវបេតុងអាមេ ប្រវែងជិត ១ គីឡូម៉ែត្រ ទទឹង ៦ម៉ែត្រ និងកម្រាស់ ១៥០មីលីម៉ែត្រ ក្នុងឃុំដំរីផុង ស្រុកឆ្លូង ខេត្តក្រចេះ នាថ្ងៃទី៥ ខែមិថុនា ឆ្នាំ២០២៦។

គម្រោងអភិវឌ្ឍន៍ហេដ្ឋារចនាសម្ព័ន្ធមូលដ្ឋានឃុំមួយនេះ មានតម្លៃប៉ាន់ស្មានសរុបចំនួន ៥៧៦,៩៨៣,៦២៩​រៀល។

ជាលទ្ធផលនៃការបើកកញ្ចប់សំណើ គឺមានក្រុមហ៊ុនចំនួន ៣ បានចូលរួមដាក់ពាក្យដេញថ្លៃប្រកួតប្រជែងយ៉ាងស្វិតស្វាញ និងប្រកបដោយតម្លាភាព។

ដោយផ្អែកលើតម្លៃដែលបានបង្ហាញនៅលើក្តារខៀន ក្នុងនោះរួមមាន៖ ក្រុមហ៊ុនទី១៖ អ៉ឹង ចាន់ឡា តម្លៃដេញថ្លៃ៖ ៤៥៦,០០០,០០០ រៀល ក្រុមហ៊ុនទី២៖ ម៉ៅ សាវ៉េត តម្លៃដេញថ្លៃដំបូង៖ ២៧៣ ០៦០ ០០០ រៀល និងក្រុមហ៊ុនទី៣៖ ចាំង ម៉ានីមិច តម្លៃដេញថ្លៃ៖ ៣៩៨ ០៥០ ០០០ រៀល។ ប៉ុន្តែក្រោយពីមន្ត្រីជំនាញនៃទីចាត់ការផែនការ និងវិនិយោគខេត្ត បើកកិច្ចប្រជុំជាមួយលោកស្រីមេឃុំដំរីផុង និងក្រុមប្រឹក្សាឃុំរួចមក ស្រាប់តែមានការប្រែប្រួលកែតួរលេខថវិការរបស់ក្រុមហ៊ុន ម៉ៅ សាវ៉េត តម្លៃដេញថ្លៃដំបូង៖ ២៧៣ ០៦០ ០០០ រៀល កែដំឡើងទៅជា ៥១៣ ០០០ ០០០ រៀល។

ពាក់ព័ន្ធជុំវិញការកែឯកសារដេញថ្លៃគម្រោង និងភាពមិនប្រក្រតីខាងលើនេះផងដែរ លោកស្រី សឹម ស្រីពុំ មេឃុំដំរីផុង បានបញ្ជាក់ឲ្យកម្ពុជាថ្មី ដឹងនៅថ្ងៃទី៦ ខែឧសភា ឆ្នាំ២០២៦នេះថា ជាលទ្ធផលនៃដំណើរការបើកកញ្ចប់សំណើរ គឺមានក្រុមហ៊ុនចំនួន ៣ បានចូលរួមដាក់ពាក្យដេញថ្លៃប្រកួតប្រជែង នៃការបើកសំណើដេញថ្លៃនេះ បានប្រព្រឹត្តទៅដោយជោគជ័យ និងស្របតាមនីតិវិធីច្បាប់ ដើម្បីធានាបាននូវតម្លាភាព និងគុណភាពខ្ពស់ក្នុងការស្ថាបនាផ្លូវបេតុងអាមេនេះ សម្រាប់បម្រើដល់ផលប្រយោជន៍ និងការធ្វើដំណើររបស់បងប្អូនប្រជាពលរដ្ឋនៅក្នុងឃុំដំរីផុងទាំងមូល។

ទោះជាយ៉ាណាក្តី អភិបាលរងស្រុកឆ្លូង ក៏បានសង្កត់ធ្ងន់ឱ្យក្រុមហ៊ុនគោរពតាមកិច្ចសន្យា និងពេលវេលាកំណត់នៃការសាងសង់ឱ្យបានត្រឹមត្រូវ ព្រមទាំងសហការជិតស្និទ្ធជាមួយអាជ្ញាធរមូលដ្ឋាន និងគណៈកម្មការត្រួតពិនិត្យបច្ចេកទេសផងដែរ៕

អត្ថបទ ៖ ប្រុញ វិធិន

The post គម្រោងផ្លូវបេតុងអាមេប្រវែងជិត ១ គីឡូម៉ែត្រ អាជ្ញាធរ​​ណែនាំ​​ក្រុមហ៊ុនដេញថ្លៃ​បាន​ សាងសង់​ឲ្យមាន​គុណភាព​ appeared first on Kampuchea Thmey Daily.

ស្ថិតនៅក្នុងវ័យ ៣៦ឆ្នាំ លោក នី តាំងហ៊ី ជាម្ចាស់កសិដ្ឋាន អិលស៊ីឌីស៊ី អេកូហ្គ្រីន ប្រាប់ កម្ពុជាថ្មី ថា កសិដ្ឋានរបស់លោក ក្រៅពីការចិញ្ចឹមទាយកពង បច្ចុប្បន្នកសិដ្ឋានក៏បាននឹងកំពុងកែច្នៃពងទាស្រស់ឱ្យទៅជាផលិតផលជាច្រើនមុខដាក់លក់លើទីផ្សារផងដែរ។​

លោក នី តាំងហ៊ី បន្ថែមថា ដោយមើលឃើញពីកសិករតែងតែមានបញ្ហាប្រឈមនៃទីផ្សារពងទាស្រស់កន្លងទៅ កសិដ្ឋានរបស់លោកក៏មានគំនិតមួយដោយចង់ឱ្យប្រទេសកម្ពុជាសម្បូរទៅដោយផលិតកែច្នៃដូចនឹងបណ្ដាប្រទេសជិតខាង។ ភាគច្រើនប្រទេសទាំងនោះមានសមត្ថភាពខ្ពស់ក្នុងការច្នៃពងទាស្រស់ឱ្យទៅជាផលិតផលសម្រេចមិនក្រោមពី៥០មុខនោះឡើយ។

សហគ្រិនរូបនេះ បានបញ្ជាក់ទៀតថា កសិដ្ឋានរបស់លោកសព្វថ្ងៃក៏បានច្នៃពងទាស្រស់ៗឱ្យទៅជាផលិតប្រមាណជាង៤មុខ មានដូចជា៖ ពងទាស្រស់វេចខ្ចាប់ ពងទាប្រៃ ពងទាខ​ និងស្នូលស៊ុតទាប្រៃ សម្រាប់ដាក់លក់លើម៉ាត និងផ្សារទំនើបមួយចំនួនក្នុងប្រទេសកម្ពុជាផងដែរ។

ក្រៅពីការចិញ្ចឹមទា និងកែច្នៃពងទា កសិដ្ឋានរបស់លោក នី តាំងហ៊ី បច្ចុប្បន្នក៏បានប្រមូលទិញពងទាពីកសិករចិញ្ចឹមទាយកពងដើម្បីផ្គត់ផ្គង់មកកាន់ទីផ្សាររាជធានីភ្នំពេញផងដែរ។

គួរឱ្យដឹងថា កសិដ្ឋានរបស់លោក នី តាំងហ៊ី បានបើកដំណើរការឡើងមកតាំងពីឆ្នាំ ២០០០មកម្ល៉េះ។ បច្ចុប្បន្នមានទីតាំងស្ថិតនៅភូមិស្ដុកស្តម្ភ ឃុំជ្រាប់ ស្រុកសន្ទុក ខេត្តកំពង់ធំ៕

អត្ថបទ ៖ សួស សិត

The post សហគ្រិនក្នុងស្រុកគ្រោងច្នៃពងទាចេញជាផលិតជាង៥០មុខ ដាក់លក់លើទីផ្សារ appeared first on Kampuchea Thmey Daily.