Din Thary, Author at Kampuchea Thmey Daily

CRF នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់

Din Thary — Thu, 19 Mar 2026 08:41:00 +0000

សហព័ន្ធស្រូវអង្ករកម្ពុជា (CRF) នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់ លើការនាំចេញអង្ករកម្ពុជា ១ ម៉ឺនតោន ក្នុងមួយឆ្នាំ សម្រាប់រយៈពេល ៥ ឆ្នាំ កាន់ទីផ្សារណូវែលហ្សេឡង់។ នេះបើតាមការឱ្យដឹងពីលោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ធនាគារអភិវឌ្ឍន៍ជនបទ និងកសិកម្ម (ARDB) នៅរសៀលថ្ងៃទី១៩ ខែមីនា ឆ្នាំ២០២៦ ។

ថ្លែងប្រាប់ «កម្ពុជាថ្មី» លោក កៅ ថាច បានគូសបញ្ជាក់ថា ក្រុមហ៊ុន Ecly Ltd ធ្លាប់នាំអង្ករពីកម្ពុជាប្រមាណ ៥ ពាន់តោនក្នុង ១ឆ្នាំ រួចទៅហើយទៅកាន់ទីផ្សារណូវែលហ្សេឡង់។ ជាក់ស្តែង ក្រុមហ៊ុនក៏នឹងបន្តបង្កើននូវការនាំចូលបន្ថែមទៀតបន្ទាប់ពីការចុះ MoU ជាមួយសហព័ន្ធស្រូវអង្ករកម្ពុជានៅថ្ងៃទី២០ ខែមីនា ឆ្នាំ២០២៦ ស្អែកនេះ ដែលធ្វើឱ្យការនាំចេញអង្កររបស់កម្ពុជា ទៅកាន់ណូវែលហ្សេឡង់ឈានទៅដល់ ១ ម៉ឺនតោនក្នុងមួយឆ្នាំ សម្រាប់រយៈពេល ៥ ឆ្នាំ។

បន្ថែមជាមួយគ្នានេះ លោក កៅ ថាច ក៏បានបញ្ជាក់ដែរថា «ក្រៅតែការនាំយកអង្ករកម្ពុជាទៅកាន់ទីផ្សារណូវែលហ្សេឡង់ហើយ បច្ចុប្បន្ន ក្រុមហ៊ុន Ecly Ltd ក៏មានបណ្តាញចែកចាយដ៏រឹងមាំ ហើយបាននិងកំពុងនាំចូលចែកចាយផលិតផលសក្តានុពលពីកម្ពុជា រួមមាន អង្ករខ្មែរ និង ស្រាបៀរហនុមាន (Hanuman Beer) បន្លែបង្កក ក៏ដូចជាប្រភេទត្រីបង្កកទឹកសាប ទៅក្នុងទីផ្សារណូវែលហ្សេឡង់បន្ថែមទៀតផងដែរ»។

តាមរយៈប្រធានការិយាល័យតំណាងសភាពាណិជ្ជកម្មកម្ពុជា ប្រចាំប្រទេសណូវែលហ្សេឡង់ និង MoU ជាមួយសហព័ន្ធស្រូវអង្ករកម្ពុជានេះ លោក កៅ ថាច៖«សង្ឃឹមថា ក្រុមហ៊ុន Ecly Ltd នឹងពង្រីកការនាំចូលនូវផលិតផលកសិកម្មរបស់ខ្មែរទៅកាន់ទីផ្សារណូវែលហ្សេឡង់ឱ្យបានកាន់តែច្រើនបន្ថែមទៀត»។

សូមជម្រាបថា ឃ្លាំងស្តុកទំនិញ(Warehouse) របស់ក្រុមហ៊ុន Ecly Ltd គឺមានទំហំធំដែលអាចស្តុកផលិតផលកសិកម្មបានដល់កម្ពស់ទៅលើជាង ១០ម៉ែត្រ និងមានផ្ទៃជាង ១ម៉ឺនការ៉េ ហើយបច្ចុប្បន្នបាននិងកំពុងពង្រីកបន្ថែម ២ ម៉ឺនការ៉េទៀតដើម្បីស្តុកទុកតែ ASEAM Food ។

ទន្ទឹមនេះ លោក កៅ ថាច ក៏បានសាទរចំពោះ ក្រុមហ៊ុន Ecly Ltd ដែលបានដើរតួនាទីជាស្ពានសេដ្ឋកិច្ចយ៉ាងសំខាន់ ក្នុងការនាំយកផលិតផលខ្មែរមកកាន់ទីផ្សារអន្តរជាតិតាមរយៈហេដ្ឋារចនាសម្ព័ន្ធឃ្លាំងទំនិញ និងបទពិសោធន៍ចែកចាយផលិតផលចំណីអាហារប្រកបដោយវិជ្ជាជីវៈ៕

The post CRF នឹងចុះ MoU ជាមួយការិយាល័យតំណាងសភាពាណិជ្ជកម្មកម្ពុជាប្រចាំប្រទេសនូវែលហ្សេឡង់ appeared first on Kampuchea Thmey Daily.

លោក ឱក តារារិទ្ធិ៖ ការបង្ហាញយីហោខ្មែរក្នុងការប្រកួតសិល្បៈឡាតេអាតជើងឯក កម្ពុជា-ចិន នឹងជំរុញឱ្យតម្លៃកាហ្វេលេចធ្លោ

Din Thary — Thu, 19 Mar 2026 02:50:20 +0000

ថ្លែងក្នុងសន្និសីទសារព័ត៌មាននារសៀលថ្ងៃទី១៨ ខែមីនា ឆ្នាំ២០២៦ លោក ឱក តារារិទ្ធិ រដ្ឋលេខាធិការក្រសួងទេសចរណ៍ បានគូសបញ្ជាក់ថា ការចូលរួមឧបត្ថម្ភកាហ្វេពី គិរីកាហ្វេ នៅក្នុងការប្រកួតសិល្បៈឡាតេអាតជើងឯក កម្ពុជា-ចិន ឆ្នាំ ២០២៦ គឺជាសក្ខីភាពនៃការគាំទ្រផលិតកម្មកាហ្វេក្នុងស្រុក និងការជំរុញឱ្យតម្លៃកាហ្វេខ្មែរលេចធ្លោ ក្នុងព្រឹត្តិការណ៍កម្រិតអន្តរជាតិនេះ។

ក្រោមកិច្ចសហការរវាងអង្គការ Cambodia International Chamber of Commerce (CICC) ជាមួយក្រសួងទេសចរណ៍ និងក្រសួងអប់រំ យុវជន និងកីឡា និងទទួលបានការគាំទ្រពីធនាគារអភិវឌ្ឍន៍ជនបទ និងកសិកម្ម (ARDB) និងភាគីចិន កម្ពុជានឹងរៀបចំការប្រកួតសិល្បៈឡាតេអាតជើងឯក កម្ពុជា-ចិន ឆ្នាំ២០២៦ រយៈពេល ២ថ្ងៃពេញ (២៨ -២៩) ដើម្បីលើកកម្ពស់សមត្ថភាពជំនាញផ្នែកឆុងកាហ្វេនៅកម្ពុជា នៅសណ្ឋាគារ Oakwood Premier Phnom Penh, One park រាជធានីភ្នំពេញ។

ថ្លែងនៅក្នុងឱកាសនោះ លោក ឱក តារារិទ្ធិ បានបញ្ជាក់ថា គោលបំណងនៃការប្រកួតនេះ គឺដើម្បីលើកកម្ពស់ស្តង់ដាវិជ្ជាជីវៈទេសចរណ៍ និងពង្រឹងសេវាកម្មម្ហូបអាហារ និងភេសជ្ជៈនៅកម្ពុជា។

លោកបានសង្កត់ធ្ងន់លើការតភ្ជាប់ខ្សែច្រវាក់ផ្គត់ផ្គង់ “ពីគ្រាប់កាហ្វេ ដល់ពែងកាហ្វេ” (From Bean to Cup) ដើម្បីបង្កើនភាពទាក់ទាញវិនិយោគិន។ ស្របជាមួយគ្នានេះ ការចូលរួមឧបត្ថម្ភពី គិរីកាហ្វេ (Kiri Coffee) ដែលជាម៉ាកយីហោកាហ្វេខ្មែរឈានមុខគេមួយ គឺជាសក្ខីភាពនៃការគាំទ្រដល់ផលិតកម្មកាហ្វេក្នុងស្រុក និងការជំរុញតម្លៃគ្រាប់កាហ្វេខ្មែរឱ្យមានភាពលេចធ្លោក្នុងព្រឹត្តិការណ៍កម្រិតអន្តរជាតិនេះ។

ជាមួយគ្នានោះ លោក ប៉ិច សានី អគ្គនាយករងធនាគារ ARDB ក៏បានបន្ថែមថា កម្មវិធីនេះជាវេទិកាសម្រាប់ចែករំលែកបទពិសោធ និងបង្កើតបណ្តាញទំនាក់ទំនង។ លោកក៏បានវាយតម្លៃខ្ពស់ចំពោះការចូលរួមរបស់ គិរីកាហ្វេ (Kiri Coffee) ដែលមិនត្រឹមតែផ្តល់ការឧបត្ថម្ភជាកញ្ចប់ថវិកា និងសម្ភារៈប៉ុណ្ណោះទេ ប៉ុន្តែថែមទាំងបានចូលរួមចំណែកយ៉ាងសកម្មក្នុងការលើកកម្ពស់គុណភាព និងសក្តានុពលកាហ្វេកម្ពុជា ឱ្យកាន់តែទទួលបានការចាប់អារម្មណ៍ពីសាធារណជន និងទីផ្សារអន្តរជាតិ។

សូមបញ្ជាក់ថា ការប្រកួតសិល្បៈឡាតេអាតជើងឯក កម្ពុជា-ចិន ឆ្នាំ២០២៦ ជាព្រឹត្តិការណ៍សិល្បៈឡាតេអាតជើងឯកអន្តរជាតិលើកទី១ (1st International Championships Latte Art – ICLA) ដែលមានការទទួលស្គាល់ជាអន្តរជាតិពីស្ថាប័ន ICLA របស់ប្រទេសចិន។ ការចូលរួមរបស់បណ្តាក្រុមហ៊ុនក្នុងស្រុកដូចជា គិរីកាហ្វេ ត្រូវបានគេមើលឃើញថាជាកម្លាំងចលករយ៉ាងសំខាន់ ក្នុងការរុញច្រានឱ្យកម្ពុជាក្លាយជាប្រទេសដំបូងគេក្នុងតំបន់ ដែលបានទទួលជោគជ័យក្នុងការរៀបចំកម្មវិធីខ្នាតអន្តរជាតិនេះ៕

The post លោក ឱក តារារិទ្ធិ៖ ការបង្ហាញយីហោខ្មែរក្នុងការប្រកួតសិល្បៈឡាតេអាតជើងឯក កម្ពុជា-ចិន នឹងជំរុញឱ្យតម្លៃកាហ្វេលេចធ្លោ appeared first on Kampuchea Thmey Daily.

លោកស្រី សុវណ្ណ វណ្ណារតន៍៖ កុមារ ជាធនធានមិនអាចខ្វះបានសម្រាប់ការអភិវឌ្ឍប្រទេសជាតិ

Din Thary — Wed, 18 Mar 2026 10:19:33 +0000

លោកស្រី សុវណ្ណ វណ្ណារតន៍ រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ បានអះអាងថា កុមារ គឺជាធនធានដែលមិនអាចខ្វះបានសម្រាប់ការអភិវឌ្ឍប្រទេសជាតិ។ លោកស្រីថ្លែងដូច្នេះ នៅក្នុងយុទ្ធនាការផ្សព្វផ្សាយការបង្ការ និងទប់ស្កាត់ការប្រើប្រាស់ពលកម្មកុមារ នៅស្រុកស្នួល ខេត្តក្រចេះ នាថ្ងៃទី១៨ ខែមិនា ឆ្នាំ២០២៦ នេះ។

នៅក្នុងការអនុវត្ត យុទ្ធសាស្ត្របញ្ចកោណ ដំណាក់កាល់ទី១ រាជរដ្ឋាភិបាលកម្ពុជាបានកំណត់យកអាទិភាពគន្លឹះ៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា”។ លោកស្រី សុវណ្ណ វណ្ណារតន៍ បន្តថា រាជរដ្ឋាភិបាលបានសម្រេចសមិទ្ធផលជាច្រើនក្នុងការលើកកម្ពស់សិទ្ធិកុមារ និងលុបបំបាត់ទម្រង់ធ្ងន់ធ្ងរបំផុតនៃពលកម្មកុមារ តាមរយៈការកាត់បន្ថយភាពក្រីក្រ ១% ជារៀងរាល់ឆ្នាំកំណើនសេដ្ឋកិច្ចប្រកបដោយនិរន្តរភាព ការបង្កើតការងារ ការលើកកម្ពស់សុខភាពបន្តពូជ ការផ្ដល់អាហារូបត្ថម្ភដល់កុមារ និងការកាត់បន្ថយមរណភាពមាតា ទារក និងកុមារ ។

ក្នុងន័យនេះ ការផ្តល់ឱកាសក្នុងការអប់រំ និងការកាត់បន្ថយភាពក្រីក្រដល់កុមារ នៅតែជាចំណុចអាទិភាពមួយក្នុងការឈានទៅ ការកាត់បន្ថយពលកម្មកុមារ និងលុបបុះបាត់ទម្រង់ធ្ងន់ធ្ងរនៃពលកម្មកុមារ។

លោកស្រី សុវណ្ណ វណ្ណារតន៍ រដ្ឋលេខាធិការប្រចាំការនៃក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍បន្ថែមថា យុទ្ធនាការនាពេលនេះ រៀបចំឡើងក្នុងគោលបំណងសំខាន់ៗ លើកកម្ពស់ការយល់ដឹង តាមរយៈការជំរុញការផ្សព្វផ្សាយដល់សាធារណជន មាតាបិតា អាណាព្យាបាល និយោជក និងសហគមន៍។

ជាពិសេស នៅក្នុងវិស័យសិប្បកម្មផលិតឥដ្ឋ ក្បឿង និងកសិ-ឧស្សាហកម្ម ឱ្យយល់ដឹងអំពីផលប៉ះពាល់ និងហានិភ័យនៃពលកម្មកុមារ និងការពារកុមារពីការកេងប្រវ័ញ្ចពលកម្ម -ជំរុញការការពារ និងលើកកម្ពស់សិទ្ធិកុមារ ដើម្បីឱ្យកុមារទទួលបានការអប់រំ បំណិនជីវិត ការថែទាំ និងការអភិវឌ្ឍសមត្ថភាពសមស្របទៅតាមវ័យ ព្រមទាំងការធានាបាននូវឧត្តមប្រយោជន៍សម្រាប់កុមារ -ជំរុញវិធានការអនុវត្តច្បាប់ និងបទប្បញ្ញត្តិពាក់ព័ន្ធ។

-បង្កើនការចូលរួមរបស់អាជ្ញាធរមាន សមត្ថកិច្ច និងមន្ត្រីអធិការកិច្ចពលកម្មកុមារនៅក្នុងការពង្រឹងការអនុវត្តច្បាប់ និងបង្កើនកិច្ច អន្តរាគមន៍ដល់មូលដ្ឋានសម្រាប់ការលុបបំបាត់ពលកម្មកុមារនៅតាមភូមិសាស្ត្រ និងវិស័យនានាដែលមានកុមារធ្វើការ -ពង្រឹង និងបង្កើនប្រសិទ្ធភាពនៃកិច្ចសហការពហុវិស័យ អន្តរក្រសួងស្ថាប័ន ត្រីភាគី សង្គម ស៊ីវិល និងដៃគូអភិវឌ្ឍនក្នុងការផ្ដល់នូវឧត្តមប្រយោជន៍ដល់កុមារ និងក្រុមគ្រួសារ ទទួលបាន នូវការអប់រំ បំណិនជីវិត ការបណ្តុះបណ្តាលជំនាញ និងការបង្កើតមុខរបរ។

តាមការបញ្ជាក់ពី លោក គង់ គឹមនី អភិបាលរងខេត្តក្រចេះ បានឲ្យដឹងថា នៅក្នុងខេត្តក្រចេះ បច្ចុប្បន្នមានសហគ្រាសគ្រឹះស្ថានចំនួន ២៥១ មានកម្មករនិយោជិត សរុប ២៥.៦៥៥នាក់ ស្រី ៩.៣៨៩នាក់ ក្នុងនោះ មានសហគ្រាសរ៉ែ ចំនួន ២០សហគ្រាស កម្មករនិយោជិតសរុប ១.៤៨៩នាក់ ស្រី ១៣១នាក់, សហគ្រាសកសិ-ឧស្សាហកម្មចំនួន ៣៧ កម្មករនិយោជិតសរុប ១៦.៦២៨នាក់ ស្រី ៧.១៦៨នាក់, សិប្បកម្មផលិតសរុបចំនួន ២៤សិប្បកម្ម ដែលមានកម្មករ សរុបចំនួន ២៥៣នាក់ ស្រី ១១២នាក់ ស្មើនឹង ៦១គ្រួសារ ក្នុងនោះ កុមារងាយរងគ្រោះ មានចំនួន ១៨២នាក់ ជាកុមារី ៩៥នាក់ និងសហគ្រាស វិស័យផ្សេងៗចំនួន ១៧០ កម្មករនិយោជិត សរុប ៧.២៨៥នាក់ ស្រី ១.៩៧៨នាក់៕

អត្ថបទ៖ ប្រុញ វិធិន

The post លោកស្រី សុវណ្ណ វណ្ណារតន៍៖ កុមារ ជាធនធានមិនអាចខ្វះបានសម្រាប់ការអភិវឌ្ឍប្រទេសជាតិ appeared first on Kampuchea Thmey Daily.

ធុរជនអូទ្រីស ចាប់អារម្មណ៍លើសក្តានុពលវិនិយោគក្នុងវិស័យទេសចរណ៍កម្ពុជា

Din Thary — Wed, 18 Mar 2026 07:28:32 +0000

ក្នុងជំនួបជាមួយលោករដ្ឋមន្ត្រី ហួត ហាក់ នៅថ្ងៃទី១៧ ខែមិនា ឆ្នាំ២០២៦ នេះ ស្ថានទូតអូទ្រីសប្រចាំកម្ពុជា និងធុរជនពីប្រទេសអូទ្រីស បានបង្ហាញពីចំណាប់អារម្មណ៍របស់ខ្លួនលើសក្តានុពលទេសចរណ៍ និងកាលានុវត្តភាពវិនិយោគក្នុងវិស័យទេសចរណ៍កម្ពុជា ជាតារាទើបនឹងរះ។

តាមរយៈជំនួបពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍ក្នុងឱកាសនៃបេសកកម្មពាណិជ្ជកម្មមកប្រទេសកម្ពុជា ប្រតិភូអូទ្រី បានលើកឡើងពីបេសកកម្មពាណិជ្ជកម្មរបស់ស្ថានទូតដែលបានដឹកនាំក្រុមហ៊ុនធំៗ ពីប្រទេសអូទ្រីសជាច្រើនក្រុមហ៊ុនពីអាជីវកម្មផ្សេងៗ មកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គម កាលានុវត្តភាពវិនិយោគ ជាពិសេសលើវិស័យទេសចរណ៍។

ក្នុងជំនួបនេះដែរ តំណាងក្រុមហ៊ុនបានណែនាំអំពីសកម្មភាព និងបទពិសោធរបស់ក្រុមហ៊ុន លើការរៀបចំព្រឹត្តិការណ៍កីឡាកន្លងមក ដែលអាចរួមចំណែកជំរុញការផ្សព្វផ្សាយទេសចរណ៍កម្ពុជាទៅកាន់ទីផ្សារអន្តរជាតិ។

ជាកិច្ចឆ្លើយតប លោករដ្ឋមន្រ្តី ហួត ហាក់ អរគុណដល់ស្ថានទូតអូទ្រីសប្រចាំកម្ពុជា និងធុរជនអូទ្រីសជាប្រតិភូដែលបានមកសិក្សាស្វែងយល់ពីសភាពការណ៍នយោបាយ សេដ្ឋកិច្ច សង្គមពិតជាក់ស្តែង ដែលកំពុងមានសុខសន្តិភាព និងការរីកចម្រើនលើគ្រប់វិស័យក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។

តាមរយៈកត្តាសុខសុវត្តិភាព និងស្ថិរភាពនយោបាយ បានផ្តល់នូវកាលានុវភាពវិនិយោគ និងសក្តានុពលទេសចរណ៍ដ៏ល្អប្រៀបដូចជាតារាទើបនឹងរះបង្ហាញដល់អ្នកវិនិយោគ និងភ្ញៀវទេសចរអន្តរជាតិ។

ក្នុងជំនួបប្រកបដោយផ្លែផ្កា គូភាគី បានបញ្ជាក់ពីការប្តេជ្ញាចិត្តក្នុងការបន្តពង្រឹង និងពង្រីកកិច្ចសហប្រតិបត្តិការក្នុងវិស័យទេសចរណ៍ឱ្យកាន់តែល្អ ដើម្បីអភិវឌ្ឍវិស័យទេសចរណ៍ និងឧស្សាហកម្មបដិសណ្ឋារកិច្ចឱ្យកាន់តែរីកចម្រើន ព្រមទាំងការពិនិត្យលទ្ធភាពជម្រុញឱ្យមានជើងហោះហើរត្រង់ពីទីក្រុង Vienna មកកាន់រាជធានីភ្នំពេញ ឬខេត្តសៀមរាប។

សូមបញ្ជាក់ថា កម្ពុជា និងអូទ្រីស មានទំនាក់ទំនងការទូតដ៏ល្អតាំងពីឆ្នាំ១៩៥៦ ហើយគិតត្រឹមឆ្នាំ២០២៦ នេះ គឺមានរយៈពេលប្រមាណ៧០ឆ្នាំមកហើយ ដែលមានកិច្ចសហប្រតិបត្តិការលើវិស័យនានា រួមទាំងវិស័យវិនិយោគ ទេសចរណ៍ផងដែរ។

ក្នុងដើមឆ្នាំ២០២៦ នេះ មានភ្ញៀវទេសចរអូទ្រីសច្រើនជាង ២.០០០នាក់ បានធ្វើដំណើរទេសចរណ៍មកលេងគ្រប់គោលដៅទេសចរណ៍កម្ពុជាទាំងអស់ប្រកបដោយសុខសុវត្តិភាព និងសោមន្សរីករាយ៕

The post ធុរជនអូទ្រីស ចាប់អារម្មណ៍លើសក្តានុពលវិនិយោគក្នុងវិស័យទេសចរណ៍កម្ពុជា appeared first on Kampuchea Thmey Daily.

ពន្ធដារ ដាស់តឿនឱ្យម្ចាស់អាជីវកម្ម រួសរាន់បង់ពន្ធលើប្រាក់ចំណូលប្រចាំឆ្នាំ ២០២៥ ឱ្យបានមុនដំណាច់ខែមីនានេះ

Din Thary — Wed, 18 Mar 2026 04:28:10 +0000

អគ្គនាយកដ្ឋានពន្ធដារ ក្រើនរំលឹកជាថ្មីដល់ម្ចាស់អាជីវកម្ម រួសរាន់ទៅបង់ពន្ធលើប្រាក់ចំណូលប្រចាំឆ្នាំ ២០២៥ យ៉ាងយូរត្រឹមថ្ងៃទី ៣១ ខែមីនា ឆ្នាំ ២០២៦ មុនពេលទទួលនូវទណ្ឌកម្មរដ្ឋបាល។

អគ្គនាយកដ្ឋានពន្ធដារ បានធ្វើការជូនដំណឹងដល់បណ្ណាធិការ ឬកម្មសិទ្ធិកររបស់សហគ្រាសដែលជាអ្នកជាប់ពន្ធ តាមរបបស្វ័យប្រកាសទាំងអស់ជ្រាបអំពីកាតព្វកិច្ច និងកាលបរិច្ឆេទកំណត់ដាក់លិខិតប្រកាស និងបង់ពន្ធលើប្រាក់ចំណូល ប្រចាំឆ្នាំ២០២៥។

អគ្គនាយកដ្ឋានពន្ធដារសង្កេតឃើញថា មានសហគ្រាសមួយចំនួនបានបំពេញកាតព្វកិច្ចរួចរាល់ហើយ ប៉ុន្តែនៅមានសហគ្រាសមួយចំនួនទៀត មិនទាន់បានបំពេញកាតព្វកិច្ចនៅឡើយ។

អគ្គនាយកដ្ឋានពន្ធដារសូមក្រើនរំលឹក និងបញ្ជាក់ជូនថា ចំពោះការខកខាន និងមិនបានដាក់លិខិតប្រកាស និងបង់ពន្ធលើប្រាក់ចំណូលជូនរដ្ឋបាលសារពើពន្ធបានទាន់ពេលកំណត់ បណ្ណាធិការ ឬកម្មសិទ្ធិកររបស់សហគ្រាសត្រូវទទួលរងនូវទណ្ឌកម្មរដ្ឋបាល ដូចមានចែងក្នុងច្បាប់នឹងលិខិតបទដ្ឋានគតិយុត្តស្តីពីពន្ធដារជាធរមាន។

ដើម្បីចៀសវាងការទទួលរងនូវទណ្ឌកម្ម រដ្ឋបាលនានាដូចបានរៀបរាប់ខាងលើ បណ្ណាធិការ ឬកម្មសិទ្ធិកររបស់សហគ្រាស រួសរាន់បំពេញកាតព្វកិច្ចដាក់លិខិតប្រកាស និងបង់ពន្ធលើប្រាក់ចំណូលប្រចាំឆ្នាំ២០២៥ យ៉ាងយឺតបំផុតត្រឹមថ្ងៃទី៣១ ខែមីនា ឆ្នាំ២០២៦៕

The post ពន្ធដារ ដាស់តឿនឱ្យម្ចាស់អាជីវកម្ម រួសរាន់បង់ពន្ធលើប្រាក់ចំណូលប្រចាំឆ្នាំ ២០២៥ ឱ្យបានមុនដំណាច់ខែមីនានេះ appeared first on Kampuchea Thmey Daily.

ការចិញ្ចឹមកណ្តូបជាមុខរបរខ្នាតតូច តែមានសក្តានុពលអាចរកចំណូលបន្ថែមពីការដាំដំណាំប្រចាំរដូវកាល

Din Thary — Tue, 17 Mar 2026 09:23:12 +0000

បច្ចុប្បន្ននៅតាមបណ្តាស្រុកមួយចំនួន កសិករនៅតែបន្តចិញ្ចឹមកណ្តូបដើម្បីរកចំណូលបន្ថែមពីមុខរបរកសិកម្មរបស់ពួកគេ ខណៈសត្វកណ្តូបក៏នៅតែពេញនិយមបរិភោគពីប្រជាពលរដ្ឋផងដែរ។ ជាក់ស្តែងដូចជា កសិករនៅក្នុងស្រុកបាណន់ នៅតែបន្តការចិញ្ចឹមកណ្តូបនេះ ដោយអាចរកចំណូលទ្រទ្រង់ជីវិភាពគ្រួសារបានយ៉ាងប្រសើរ។

ប្រជាកសិករម្នាក់រស់នៅ ភូមិទួល ឃុំចែងមាជ័យ ស្រុកបាណន់ ខេត្តបាត់ដំបង អ្នកស្រី ឃន សាឃឿន បានប្រាប់ «កម្ពុជាថ្មី» ថា អ្នកស្រីបានរកចំណូលពីការចិញ្ចឹមសត្វកណ្តូបខ្នាតតូច បើគិតត្រឹមពេលនេះជិតមួយឆ្នាំហើយ ដែលអ្នកស្រីបានគ្រប់គ្រងស្ថានភាព កម្រិតជីវភាពគ្រួសារ និងកូនរៀនសូត្របានល្អប្រសើ។

អ្នកស្រីបន្តថា តម្លៃកណ្តូបអ្នកស្រីអាចលក់បានក្នុងតម្លៃសមរម្យមិនកែប្រែទេ តែអ្នកស្រីលក់ត្រឹម ២៥០០០ រៀលប៉ុណ្ណោះ ក្នុងមួយគីឡូក្រាម ហើយតម្លៃនេះអ្នកស្រីមិនបានលក់លើទីផ្សារ ឬលក់ឱ្យម៉ូយណាម្នាក់នោះដែរ គឺសម្រាប់តែអ្នកភូមិមកទិញ រកតែកណ្តូបលក់មិនទាន់ផង ខណៈរយៈពេលចន្លោះពី ៤០ ទៅ ៤៥ ថ្ងៃ អ្នកស្រីប្រមូលបានចន្លោះពី ១៨ ទៅ ២០ គីឡូក្រាម។

បើតាមការបញ្ជាក់ពីអ្នកស្រី ឃន សាឃឿន ការចិញ្ចឹមកណ្តូប គឺជាមុខរបរកសិកម្មខ្នាតតូច តែមានសក្តានុពលខ្ពស់ក្នុងការរកចំណូលបន្ថែម ដោយសារការចិញ្ចឹមសត្វកណ្តូបនេះថ្លៃដើមទាប ហើយងាយស្រួលចិញ្ចឹម និងចំណាយពេលខ្លីក្នុងការប្រមូលផល។ អ្នកស្រីថា ការចិញ្ចឹមកណ្តូបអាចរកចំណូលបានចន្លោះពី ៤០ ទៅ ៥០ម៉ឺនរៀល ក្នុងរយៈពេល ៤០ ទៅ ៤៥ ថ្ងៃ នៅមិនទាន់គិតទៅ លើអ្នកដែលមកទិញ ១ ទៅ ២ គីឡូ ក្រាមស្ទើររាល់ថ្ងៃផង។

អ្នកស្រីថា ការចិញ្ចឹមដំបូង គឺអ្នកស្រីចិញ្ចឹមតែ ២ រោង ប៉ុណ្ណោះ តែមកដល់ពេលនេះអ្នកស្រីបានចិញ្ចឹមតែ ៤ រោង ព្រោះអ្នកស្រី សង្កេតឃើញថា ការចិញ្ចឹមកណ្តូបមិនលំបាកទេ គឺប្រើប្រាស់ចំណីធម្មជាតិ ស្មៅ និងបន្លែ និងត្រូវការទីធ្លាតិចតួចប៉ុណ្ណោះក្នុងការចិញ្ចឹមរកចំណូល៕

អត្ថបទ÷សៅ សារិទ្ធ

The post ការចិញ្ចឹមកណ្តូបជាមុខរបរខ្នាតតូច តែមានសក្តានុពលអាចរកចំណូលបន្ថែមពីការដាំដំណាំប្រចាំរដូវកាល appeared first on Kampuchea Thmey Daily.

មុខរបរជាអ្នកដាំពោតក្រហម សល់ពេលដើរទិញអេតចាយ មួយខែចំណេញ ១ លានរៀល

Din Thary — Tue, 17 Mar 2026 07:08:57 +0000

ជាកសិករមួយរូបប្រកបរបរដាំពោតក្រហម និងម្ទេស រស់នៅក្នុងភូមិទួល ឃុំចែងមាជ័យ ស្រុកបាណន់ ខេត្តបាត់ដំបង ទំនេរពីការដាំដុះដំណាំកសិកម្ម បានសម្រេចដើរទិញអេតចាយ រកចំណូលបន្ថែមពីលើរបរកសិកម្ម ដើម្បីផ្គត់ផ្គង់ជីវភាពប្រចាំថ្ងៃបានយ៉ាងប្រសើរ ដោយអាចទទួលបានប្រាក់ចំណេញក្នុងមួយខែ ១ លានរៀល។

លោក ជិន គ្រក់ បានឱ្យដឹងថា ដោយសារតែផលដំណាំបានប្រឈមនឹងការខូចខាតពីអាកាសធាតុជាញឹកញ៉ាប់ ហើយមិនសូវបានផលចំណេញ លោកក៏បានសាកល្បងដើរទិញអេតចាយតាមភូមិក្រែងបានទប់ទល់ជីវភាពក្នុងគ្រួសារ។

លោកថា «ការទិញអេតចាយនេះ ក្នុងមួយខែទើបលក់ចេញម្តង ហើយប្រាក់ចំណេញក្នុងមួយខែ អាចរកបានចន្លោះពី ១ លានរៀល ដល់ ១ លាន ២០ ម៉ឺនរៀល គ្រាន់បានទ្រទ្រង់ជីវភាពប្រចាំថ្ងៃបានប្រសើរជាងគ្រាកន្លងទៅ»។

បើតាមលោក ជិន គ្រក់ មុខរបរថ្មីនេះ លោកទើបតែចាប់ផ្តើមបានប្រហែល ៥ ខែ ប៉ុណ្ណោះ តែលោកក៏មិនបញ្ចប់វាដែរ ដោយសង្ឃឹមថានឹងអាចរកប្រាក់ចំណេញច្រើនជាងនេះនៅពេលខាងមុខ ខណៈលោកបានដាក់ទីតាំងអេតចាយមួយកន្លែងទៀតនៅខេត្តប៉ៃលិន ហើយកន្លែងទទួលទិញនៅខេត្តបាត់ដំបង ក្នុងនោះការដឹងជញ្ជូនក៏ខាងស្តង់ទទួលទិញយករថយន្តមកដឹងផ្ទាល់ផងដែរ ដោយមិនពិបាកចំណាយថ្លៃដឹកនោះទេ៕

អត្ថបទ÷សៅ សារិទ្ធ

The post មុខរបរជាអ្នកដាំពោតក្រហម សល់ពេលដើរទិញអេតចាយ មួយខែចំណេញ ១ លានរៀល appeared first on Kampuchea Thmey Daily.

រដ្ឋ ពង្រឹងការប្រមូលពន្ធផ្លូវ ចំពោះម្ចាស់រថយន្តមិនទាន់បង់ពន្ធ

Din Thary — Tue, 17 Mar 2026 04:44:01 +0000

ក្រោយសង្កេតឃើញថា មានការលើកឡើងដោយម្ចាស់យានយន្ត ចំពោះការចេញលិខិតជូនដំណឹងស្តីពីការខកខានមិនទាន់បានបង់ពន្ធលើមធ្យោបាយដឹកជញ្ជូន (ពន្ធផ្លូវ) ដល់លំនៅឋានម្ចាស់យានយន្ត អគ្គនាយកដ្ឋានពន្ធដារ បានចេញមកគូសបញ្ជាក់ពីការពង្រឹងការប្រមូលពន្ធលើមធ្យោបាយដឹកជញ្ជូន ចំពោះម្ចាស់យានយន្តដែលមិនទាន់បានបង់ពន្ធ។

កាលពីពេលថ្មីៗនេះ អគ្គនាយកដ្ឋានពន្ធដារសង្កេតឃើញថា មានការលើកឡើងដោយម្ចាស់យានយន្ត ឬអ្នក តំណាង ចំពោះការចេញលិខិតជូនដំណឹងស្តីពីការខកខានមិនទាន់បានបង់ពន្ធលើមធ្យោបាយដឹកជញ្ជូន (ពន្ធផ្លូវ) ដល់លំនៅឋានម្ចាស់យានយន្ត ដូចជា ការជូនដំណឹងប៉ះចំលើ ១. កម្មសិទ្ធិករដើមដែលបានផ្ទេរឬលក់យានយន្តដោយពុំបាន បំពេញនីតិវិធីផ្ទេរកម្មសិទ្ធិយានយន្តស្របតាមច្បាប់និងលិខិតបទដ្ឋានគតិយុត្តជាធរមាន, ២. អ្នកតំណាងដែលបានឈរ ឈ្មោះចុះបញ្ជីប្រកាសបង់ពន្ធជំនួសឱ្យម្ចាស់យានយន្តពិតប្រាកដ, ៣.ម្ចាស់យានយន្តដែលមានយានយន្តខូចប្រើប្រាស់ លែងបានហើយត្រូវបានបំបែកជាគ្រឿងបន្លាស់ដោយមិនបានផ្តល់ព័ត៌មានមករដ្ឋបាលសារពើពន្ធ និង៤.ម្ចាស់យានយន្ត ដែលមានការផ្លាស់ប្តូរ ឬកែប្រែទិន្នន័យយានយន្ត ដូចជា លេខតួ លេខម៉ាស៊ីន ផ្លាកលេខ។ ដោយមិនបានមកធ្វើ បច្ចុប្បន្នភាពនៅរដ្ឋបាលសារពើពន្ធ ឬនៅមន្ទីរសាធារណការនិងដឹកជញ្ជូន។

ដូចនេះ ដើម្បីចៀសវាងបញ្ហាប្រឈមខាងលើ អគ្គនាយកដ្ឋានពន្ធដារសូមស្នើដល់ម្ចាស់យានយន្ត ឬអ្នកតំណាង ទាំងអស់ចូលរួមសហការរាល់ករណី ដូចជា ១. ការផ្ទេរកម្មសិទ្ធិយានយន្ត(ទិញ-លក់)ពីបុគ្គលមួយទៅបុគ្គលមួយទៀត កន្លងមកក៏ដូចជាតទៅមុខទៀត ត្រូវបំពេញនីតិវិធីផ្ទេរកម្មសិទ្ធិយានយន្តនៅតាមមន្ទីរសាធារណការ និងដឹកជញ្ជូនរាជធានី-ខេត្ត និងបំពេញកាតព្វកិច្ចសារពើពន្ធនៅអគ្គនាយកដ្ឋានពន្ធដារឬសាខាពន្ធដារខេត្ត។ ២. ការចុះបញ្ជីប្រកាសបង់ពន្ធ លើមធ្យោបាយដឹកជញ្ជូនលើកដំបូងកន្លងមក ដែលមានអ្នកតំណាងឈរឈ្មោះជំនួស ត្រូវមកស្នើសុំធ្វើបច្ចុប្បន្នភាពទៅ ឈ្មោះម្ចាស់យានយន្តពិតប្រាកដនៅរដ្ឋបាលសារពើពន្ធ ឬនៅមន្ទីរសាធារណការ និងដឹកជញ្ជូន, ៣.យានយន្តខូចប្រើ ប្រាស់លែងបានហើយត្រូវបានបំបែកជាគ្រឿងបន្លាស់ ត្រូវផ្តល់ព័ត៌មានជាលាយលក្ខណ៍អក្សរមករដ្ឋបាលសារពើពន្ធ ដោយភ្ជាប់មកជាមួយនូវលិខិតបញ្ជាក់ពីស្ថាប័នសាធារណការ និងដឹកជញ្ជូន ដើម្បីអគ្គនាយកដ្ឋានពន្ធដារលុបទិន្នន័យ ចេញពីប្រព័ន្ធគ្រប់គ្រងពន្ធលើមធ្យោបាយដឹកជញ្ជូន និង៤.យានយន្តដែលមានការផ្លាស់ប្តូរ ឬកែប្រែទិន្នន័យ ដូចជា លេខតួ លេខម៉ាស៊ីន ផ្លាកលេខ។ ត្រូវមកស្នើសុំធ្វើបច្ចុប្បន្នភាពនៅរដ្ឋបាលសារពើពន្ធ។

ក្នុងករណីដែលមានបញ្ហាដូចខាងលើ ម្ចាស់យានយន្ត ឬអ្នកតំណាងដែលបានចុះបញ្ជីនៅក្នុងប្រព័ន្ធ លើមធ្យោបាយដឹកជញ្ជូនកន្លងមកមិនបានចូលរួមសហការជាមួយរដ្ឋបាលសារពើពន្ធ ត្រូវទទួលបន្ទុកបំពេញកាតព្វកិច្ចបង់ ពន្ធ និងពន្ធបន្ថែមអំពីពន្ធលើមធ្យោបាយដឹកជញ្ជូន តាមច្បាប់ និងលិខិតបទដ្ឋានគតិយុត្តជាធរមាន៕

The post រដ្ឋ ពង្រឹងការប្រមូលពន្ធផ្លូវ ចំពោះម្ចាស់រថយន្តមិនទាន់បង់ពន្ធ appeared first on Kampuchea Thmey Daily.