ព័ត៌មានជាតិ

ការចិញ្ចឹមកណ្តូបជាមុខរបរខ្នាតតូច តែមានសក្តានុពលអាចរកចំណូលបន្ថែមពីការដាំដំណាំប្រចាំរដូវកាល

បានផុស

៤ ខែ មុន

នៅ

ថ្ងៃអង្គារ ១៧ មីនា ២០២៦

ដោយ

បច្ចុប្បន្ននៅតាមបណ្តាស្រុកមួយចំនួន កសិករនៅតែបន្តចិញ្ចឹមកណ្តូបដើម្បីរកចំណូលបន្ថែមពីមុខរបរកសិកម្មរបស់ពួកគេ ខណៈសត្វកណ្តូបក៏នៅតែពេញនិយមបរិភោគពីប្រជាពលរដ្ឋផងដែរ។ ជាក់ស្តែងដូចជា កសិករនៅក្នុងស្រុកបាណន់ នៅតែបន្តការចិញ្ចឹមកណ្តូបនេះ ដោយអាចរកចំណូលទ្រទ្រង់ជីវិភាពគ្រួសារបានយ៉ាងប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាកសិករម្នាក់រស់នៅ ភូមិទួល ឃុំចែងមាជ័យ ស្រុកបាណន់ ខេត្តបាត់ដំបង អ្នកស្រី ឃន សាឃឿន បានប្រាប់ «កម្ពុជាថ្មី» ថា អ្នកស្រីបានរកចំណូលពីការចិញ្ចឹមសត្វកណ្តូបខ្នាតតូច បើគិតត្រឹមពេលនេះជិតមួយឆ្នាំហើយ ដែលអ្នកស្រីបានគ្រប់គ្រងស្ថានភាព កម្រិតជីវភាពគ្រួសារ និងកូនរៀនសូត្របានល្អប្រសើ។

អ្នកស្រីបន្តថា តម្លៃកណ្តូបអ្នកស្រីអាចលក់បានក្នុងតម្លៃសមរម្យមិនកែប្រែទេ តែអ្នកស្រីលក់ត្រឹម ២៥០០០ រៀលប៉ុណ្ណោះ ក្នុងមួយគីឡូក្រាម ហើយតម្លៃនេះអ្នកស្រីមិនបានលក់លើទីផ្សារ ឬលក់ឱ្យម៉ូយណាម្នាក់នោះដែរ គឺសម្រាប់តែអ្នកភូមិមកទិញ រកតែកណ្តូបលក់មិនទាន់ផង ខណៈរយៈពេលចន្លោះពី ៤០ ទៅ ៤៥ ថ្ងៃ អ្នកស្រីប្រមូលបានចន្លោះពី ១៨ ទៅ ២០ គីឡូក្រាម។

បើតាមការបញ្ជាក់ពីអ្នកស្រី ឃន សាឃឿន ការចិញ្ចឹមកណ្តូប គឺជាមុខរបរកសិកម្មខ្នាតតូច តែមានសក្តានុពលខ្ពស់ក្នុងការរកចំណូលបន្ថែម ដោយសារការចិញ្ចឹមសត្វកណ្តូបនេះថ្លៃដើមទាប ហើយងាយស្រួលចិញ្ចឹម និងចំណាយពេលខ្លីក្នុងការប្រមូលផល។ អ្នកស្រីថា ការចិញ្ចឹមកណ្តូបអាចរកចំណូលបានចន្លោះពី ៤០ ទៅ ៥០ម៉ឺនរៀល ក្នុងរយៈពេល ៤០ ទៅ ៤៥ ថ្ងៃ នៅមិនទាន់គិតទៅ លើអ្នកដែលមកទិញ ១ ទៅ ២ គីឡូ ក្រាមស្ទើររាល់ថ្ងៃផង។

អ្នកស្រីថា ការចិញ្ចឹមដំបូង គឺអ្នកស្រីចិញ្ចឹមតែ ២ រោង ប៉ុណ្ណោះ តែមកដល់ពេលនេះអ្នកស្រីបានចិញ្ចឹមតែ ៤ រោង ព្រោះអ្នកស្រី សង្កេតឃើញថា ការចិញ្ចឹមកណ្តូបមិនលំបាកទេ គឺប្រើប្រាស់ចំណីធម្មជាតិ ស្មៅ និងបន្លែ និងត្រូវការទីធ្លាតិចតួចប៉ុណ្ណោះក្នុងការចិញ្ចឹមរកចំណូល៕

អត្ថបទ÷សៅ សារិទ្ធ