ការធ្លាក់ចុះគុណធម៌ សីលធម៌សង្គម ធ្វើឱ្យការ​អភិវឌ្ឍប្រទេសយឺតយ៉ាវ

រយៈពេល ៥ឆ្នាំចុងក្រោយនេះ ពលរដ្ឋខ្មែរសម្របខ្លួនយ៉ាងឆាប់រហ័សជាមួយបច្ចេកវិទ្យា និងវប្បធម៌ ដែលហូរ​ចូលពីបរទេស។

ស្របពេលដែលការហូរចូលនៃវប្បធម៌បរទេស និងភាពរីកចម្រើនលឿននៃបច្ចេកវិទ្យា ធ្វើឱ្យមនុស្សមួយ​ចំនួនមិនសូវ​ខ្វល់អំពីគុណធម៌ និងសីលធម៌សង្គម។ គុណធម៌ និងសីលធម៌សង្គម គឺជាផ្នែកមួយដ៏សំខាន់ក្នុងការ​អភិវឌ្ឍប្រទេស​ជាតិរីកចម្រើនលឿន។ នេះគឺជាការបញ្ជាក់រ​បស់លោកបណ្ឌិត ម៉ី កល្យាណ ទីប្រឹក្សា​ជាន់​ខ្ពស់​នៃ​ឧត្តម​ក្រុម​ប្រឹក្សា​សេដ្ឋកិច្ចជាតិ។ លោកបណ្ឌិត បានលើកឡើងថា« ​ទាក់ទងឬសគល់គុណធម៌-សីលធម៌នេះ ពលរដ្ឋកម្ពុជា មិនសូវយល់ដឹងខ្ពស់ប៉ុន្មានទេ ត្រូវតែនាំគ្នារៀនសូត្របន្ថែមទៀត ដើម្បីឱ្យប្រទេសបានរីកចម្រើនជឿនលឿន»។

 ​លោកបណ្ឌិត ម៉ី កល្យាណ បានបន្តថា ប្រសិនបើពលរដ្ឋខ្មែរ យកចិត្តទុកដាក់រៀបចំខ្លួនឱ្យមានគុណធម៌ និងសីលធម៌សង្គមខ្ពស់ នោះប្រទេសនឹងកាន់តែមានសន្តិភាព និងរីកចម្រើនកាន់តែលឿន។

លោកពន្យល់ដូច្នេះថា« បើពលរដ្ឋចេះដឹងអំពីគុណធម៌ សីលធម៌នេះ ភាពរីកចម្រើនកាន់តែល្អឡើង ព្រោះរដ្ឋាភិបាល​មិនចំណាយទៅលើការការពារសន្តិសុខ សណ្តាប់ធ្នាប់ មិនពិបាកក្នុងបង្រ្កាបបទល្មើសផ្សេងៗ ដែលកើតចេញអំពី​ការប្រព្រឹត្តដែលមិនយល់អំពីគុណធម៌ សីលធម៌នេះ»។

សីលធម៌​សម្គាល់​នូវ​ពាក្យ​ទូន្មាន​ទាំងឡាយណា​ដែល​ដឹក​នាំទៅរក​ផ្លូវ​ល្អ ​និងចៀសវាង​ផ្លូវ​អាក្រក់​សម្រាប់​ការរស់នៅ ។

កន្លងមក សម្តេចតេជោ ហ៊ុន សែន ​នាយករដ្ឋមន្ត្រី ក៏បានក្រើន​រំឮក​ដល់​ស្ថាប័ន​ពាក់ព័ន្ធ​ទាំងអស់​ត្រូវ​បណ្តុះ​ស្មារតី​សិស្ស​និស្សិត ឱ្យចេះ​គោរព​មនុស្សចាស់​ដើម្បី​រក្សា​នូវ​ប្រពៃណី​របស់​ជាតិ​ដែល​បាន​បន្សល់​ពីដូនតា​មក។ សម្តេចសង្កត់ធ្ងន់ថា បើ​សង្គម​ជាតិ​មួយ​ធ្លាក់​ចុះ​នូវ​គុណធម៌ ​និងសីលធម៌​ នឹង​ធ្វើឱ្យសង្គម​ជាតិ​ត្រូវ​ទទួល​រងនូវ​វិបត្តិ និង​មហន្តរាយ។

អ្នកជំនាញបានលើកឡើងថា កត្តាដែលបណ្តាលឱ្យគុណធម៌ សីលធម៌សង្គមធ្លាក់ចុះ មានដូចជា ការហូរចូលវប្បធម៌​បរទេស ការប្រើប្រាស់សម្ភារទំនើបៗ បំភ្លេចជាតិសាសន៍ខ្លួន វប្បធម៌ អរិយធម៌ខ្លូន មានចិត្តភ្លើតភ្លើន ឪពុកម្តាយ បងប្អូនខ្វះការអប់រំបន្ថែម ផ្តេកផ្តួលយកលេសលើការងារផ្ទាល់ខ្លូន កម្រិតជីវភាពគ្រួសារក្រីក្រ កម្រិតជីវភាពខ្ពស់ ហួសសីលធម៌ ជាដើម៕