វប្បធម៌ ជំនឿ

ល្ខោននិយាយ “រឿងផ្កាស្រពោន” បានអង្រួនចិត្តទស្សនិកជន ដល់ ខេត្តព្រៃវែង

បានផុស

៦ ខែ មុន

នៅ

ថ្ងៃព្រហស្បតិ៍ ៨ កុម្ភៈ ២០២៤

ដោយ

បន្ទាប់ពីទទួលបានជោគជ័យហួសពីការនឹកស្មានលក់អស់សំបុត្រទាំង ៣ថ្ងៃ មុនការសម្ដែង នៅរាជធានីភ្នំពេញ ទស្សនីយភាពល្ខោននិយាយ រឿង ផ្កាស្រពោន បានអង្រួនខាបចិត្តទស្សនិជន ទៅដល់ ទីរួមស្រុកព្រះស្តេច ខេត្តព្រៃវែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានសិល្បៈទស្សនីយភាព នៃក្រសួងវប្បធម៌និងវិចិត្រសិល្បៈ បានឱ្យដឹង នៅថ្ងៃនេះថា នាថ្ងៃទី៧ ខែកុម្ភៈ ឆ្នាំ២០២៤ នេះ នាយកដ្ឋានសិល្បៈទស្សនីយភាព បាននាំយកនូវផ្ទាំងទស្សនីភាពល្ខោននិយាយ “រឿង ផ្កាស្រពោន” សម្តែងជូន ថ្នាក់ដឹកនាំក្រុមប្រឹក្សាស្រុក លោកអភិបាលនៃគណ:អភិបាលស្រុក ក្រុមប្រឹក្សាឃុំទាំង១១ មន្រ្តីរាជការ សហភាពសហព័ន្ធយុវជនកម្ពុជាស្រុកព្រះស្តេច លោកគ្រូ អ្នកគ្រូ និងសិស្សទាំង ៣ វិទ្យាល័យក្នុងស្រុកព្រះស្តេច ប្រមាណជាង ៦០០ នាក់។

ការបង្កើតឱ្យមាននូវព្រឹត្តិការណ៍វប្បធម៌នេះឡើង គឺដើម្បីផ្សព្វផ្សាយ នូវទម្រង់សិល្បៈល្ខោននិយាយ ជូនដល់ប្រជាពលរដ្ឋនៅថ្នាក់មូលដ្ឋានឱ្យបានស្គាល់នូវមត៌កវប្បធម៌ដ៏មានតម្លៃដែលមិនអាចកាត់ថ្លៃបានរបស់ជាតិ និងជាចំណីចក្ខុសម្រាប់ជាការកម្សាន្តផងដែរ។

ថ្នាក់ដឹកនាំ និងក្រុមការងារនាយកដ្ឋានសិល្ប:ទស្សនីយភាព នៃក្រសួងវប្បធម៌និងវិចិត្រសិល្ប: សូមថ្លែងអំណរគុណយ៉ាងជ្រាវជ្រៅចំពោះ លោក ភុន សម្ផស្ស អភិបាល នៃគណៈអភិបាលស្រុកព្រះស្តេច និងសហការី ដែលបានជួយសម្របសម្រួលធ្វើឱ្យការសម្តែងនេះប្រព្រឹត្តិទៅដោយរលូន និងទទួលជោគជ័យយ៉ាងត្រចះត្រចង់។

គួរបញ្ជាក់ថា ល្ខោននិយាយមានលំហូរចូលមកពីប្រទេសបារាំងនៅសម័យអាណានិគមបារាំងនៅចន្លោះឆ្នាំ១៩៤០ តាមរយៈជនជាតិបារាំងម្នាក់ ដោយជនជាតិបារាំងនោះបានបង្រៀននៅក្នុងសាលាគរុកោសល្យរបស់គ្រូដើម្បីជួយសម្ដែងរឿងខ្លីពាក់ព័ន្ធនឹងប្រទេសបារាំង។ បន្ទាប់មកបន្តិចម្ដងៗល្ខោននិយាយក៏បានអភិវឌ្ឍន៍ទៅមុខល្អប្រសើរ ទទួលការចាប់អារម្មណ៍ខ្លាំងពីប្រជាជននៅក្នុងសម័យសង្គមរាស្ត្រនិយម។ ល្ខោននិយាយមានការអភិវឌ្ឍជាខ្លាំង ដោយសារមានព្រឹទ្ធាចារ្យល្បីដូចជា ព្រឹទ្ធាចារ្យ ហុង គឹមហាក់ បានធ្វើការជាខ្លាំងទៅលើល្ខោននិយាយនេះ និងសម្ដេច សីហនុ ជាប្រមុខក៏បានគាំទ្រល្ខោននិយាយនេះខ្លាំងដែរ។

នៅក្នុងសម័យសារណៈរដ្ឋកម្ពុជាឆ្នាំ១៩៨០ និងឆ្នាំ១៩៨១ ក៏បានចាប់ផ្ដើមប្រមូលអ្នកចេះដឹងផ្នែកល្ខោននិយាយនេះ មកជុំគ្នាវិញ បន្ទាប់ពីសម័យខ្មែរក្រហមបានដួលរលំ ដោយក្នុងពេលនោះមានគ្នាតែ ៣ទៅ ៤នាក់ប៉ុណ្ណោះ។ ដូច្នោះនៅឆ្នាំ១៩៨១ ក៏ចាប់ផ្ដើមបើកសាលាថ្នាក់ល្ខោននៅក្នុងប្រទេសកម្ពុជាឡើងវិញ ដោយជ្រើសរើសសិស្សចូលរៀន ដែលមានលោកគ្រូ ហួត ស៊ីថន ជាសិស្សជំនាន់ទី១ ក្នុងសាលាល្ខោនប្រទេសកម្ពុជា។ ល្ខោននិយាយនៅក្នុងប្រទេសកម្ពុជាបច្ចុប្បន្ន មានសាលាមធ្យមវិចិត្រសិល្បៈ និងសាកលវិទ្យាល័យភូមិន្ទវិចិត្រសិល្បៈទទួលសិស្សរៀនជារៀងរាល់ឆ្នាំ៕