នៅក្នុងឆ្នាំ ២០២២ កម្ពុជា សម្រេចបានសមិទ្ធផលជាច្រើន សម្រាប់ជាតិ និងប្រជាពលរដ្ឋ។ នេះជាការបញ្ជាក់​របស់លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី ថ្លែងនៅក្នុងពិធីបើកការដ្ឋាន​សាង​សង់ព្រះពុទ្ធប្បដិមា កម្ពុជា ១០៨ ម៉ែត្រ នៅលើខ្នងភ្នំបូកគោ កាលពីថ្ងៃទី ០៤ មករា។

លោក ជា សុផារ៉ា បានលើកឡើងថា រាជរដ្ឋាភិបាល បានសម្រេចនូវសមិទ្ធផលថ្មីៗជាច្រើន មានដូចជា ធានាបាន​ស្ថិរភាពនយោបាយ និងសណ្តាប់ធ្នាប់សង្គម នាំមកនូវការអភិវឌ្ឍ ពិសេសក្នុងដំណាក់កាលកូវីដ-១៩។

ជាក់ស្តែងលោកបញ្ជាក់ថា កម្ពុជា សម្រេចបាននូវគម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ គម្រោងសាង​សង់ស្ពានមិត្តភាពកម្ពុជាកូរ៉េ ផ្សារចាស់ជ្រោយចង្វារ ជ្រោយចង្វារអរិយក្សត្រ គម្រោងជំរុញសមត្ថភាព​ប្រព័ន្ធបណ្តាញ​បញ្ជូនអគ្គិសនីនៅខេត្តព្រះសីហនុ និងបណ្តាការដ្ឋានសាងសង់ផ្លូវជាតិ ផ្លូវខេត្ត ផ្លូវជនបទ ស្ពានធំៗ រួមទាំងសំណង់ ប្រព័ន្ធស្រោចស្រព ខ្សែបណ្តាញអគ្គិសនី នៅទូទាំងប្រទេស។

ជាមួយគ្នានេះ កម្ពុជា ក៏ជោគជ័យលើការបោះឆ្នោតឃុំសង្កាត់ ជោគជ័យនៃកិច្ចប្រជុំកំពូលអាស៊ានលើកទី ៤០ទី៤១ និងកិច្ចប្រជុំពាក់ព័ន្ធ ក្នុងឋានៈកម្ពុជាជាប្រធានអាស៊ាន។ ជោគជ័យនៃការរៀបចំមហាសន្និបាតលើកទី១៦ នៃក្លិប​ឆ្នេរសមុទ្រ ដែលស្អាតបំផុតនៅលើពិភពលោក។ លើសពីនេះទៀត កំណើនសេដ្ឋកិច្ចប៉ាន់ស្មានប្រមាណ ៥,៥ភាគរយ នៅក្នុងឆ្នាំ ២០២២។

ក្រៅពីនេះ កម្ពុជា បាននិងកំពុងមានទំនាក់ទំនងល្អជាមួយបណ្តាប្រទេសនៅក្នុងតំបន់អាស៊ាន និងពិភពលោក លើគ្រប់វិស័យ។​

កម្ពុជា បានស្រូបទាញចំណូលតាមរយៈការធ្វើពាណិជ្ជកម្មនាំចេញនាំចូលជាមួយបរទេសរាប់ពាន់លានដុល្លារ យកមក​អភិ​វឌ្ឍប្រទេស ឱ្យរីកចម្រើនជាបន្តបន្ទាប់ពីមួយឆ្នាំទៅមួយឆ្នាំ។ ទន្ទឹមនឹងនេះ ការអភិវឌ្ឍលើវិស័យទេសចរណ៍ ក៏បានដើរតួនាទីសំខាន់ ក្នុងការទាក់ទាញទេសចរឱ្យចូលមកកម្សាន្តនៅក្នុងប្រទេសកម្ពុជា ដើម្បីបង្កើន​ចំណូលចូល​សេដ្ឋកិច្ចជាតិផងដែរ៕