វប្បធម៌ ជំនឿ - Kampuchea Thmey Daily

បុរសជនជាតិអាមេរិកប្រាប់អព្ភូតហេតុ ប្រាសាទបុរាណខ្មែរហាក់មានថាមពលពិសេស អាចឆ្លងឆ្លើយទៅសាច់ញាតិនៅទីសែនឆ្ងាយ

Dy Bunnara — Tue, 09 Jun 2026 02:49:24 +0000

អ្នកទេសចរអាមេរិកដែលមករស់នៅប្រទេសកម្ពុជាអស់រយៈពេលជាច្រើនឆ្នាំ បានរៀបរាប់បទពិសោធន៍ដែលបានមកទស្សនានិងរស់នៅខេត្តសៀមរាប ខណៈដែលលោកជឿជាក់ ហាក់ទទួលបានអារម្មណ៍ពិសេសនៃព្រលឹងប្រាសាទបុរាណខ្មែរនៅតំបន់អង្គរ។

លោក Craig Dodeg បានមកទស្សនាខេត្តសៀមរាបជាលើកដំបូងនៅក្នុងឆ្នាំ ២០០៩។ ជិត ២០ ឆ្នាំ នេះ លោកបានផ្សារភ្ជាប់ក្តីស្រលាញ់ជាមួយវប្បធម៌ខ្មែរយ៉ាងជ្រាលជ្រៅ។

ក្នុងបទសម្ភាសន៍ជាមួយអ្នកសារព័ត៌មានកាលពីពេលថ្មីៗកន្លងទៅនេះ លោកបានប្រាប់ពីជំនឿមួយ ដែលប្រាសាទខ្មែរហាក់អាចឲ្យលោកផ្ញើសារឬជជែកទៅសាច់ញាតិនៅទីសែនឆ្ងាយបាន។

លោក Craig Dodeg ផ្តល់សម្ភាសន៍ដល់អ្នកសារព័ត៌មាន

លោក Craig Dodeg ប្រាប់ថា ទោះបីជាលោកមិនសូវដឹងច្បាស់អំពីប្រវត្តិសាស្ត្រ ប៉ុន្តែអ្វីដែលធ្វើឲ្យលោកចាប់អារម្មណ៍ខ្លាំងបំផុតគឺព្រលឹងនិងស្មារតី ដែលស្ថិតនៅក្នុងប្រាសាទបុរាណខ្មែរ។

លោកបានលើកយកទីតាំងចំនួនពីរដែលធ្វើឲ្យលោករំជួលចិត្តបំផុត គឺនៅពេលលោកបានទៅទស្សនានៅក្លោងទ្វារខ្មោចនៃប្រាសាទអង្គរធំ ដែលលោកបានរៀបរាប់ពីទិដ្ឋភាពនៅទីនោះមានភាពស្ងាត់ជ្រងំ ដែលធ្វើឲ្យលោកមានអារម្មណ៍ថាអាចទាក់ទងឬនិយាយជាមួយសាច់ញាតិនៅទីដ៏សែនឆ្ងាយ។

លោករៀបរាប់ដូច្នេះថា «កាលពីប៉ុន្មានឆ្នាំមុន ពេលដែលឪពុករបស់ខ្ញុំកំពុងឈឺធ្ងន់រៀបនឹងលាចាកលោកទៅនៅសហរដ្ឋអាមេរិក ខ្ញុំបានឡើងទៅលើភ្នំក្រោម ហើយនិយាយបណ្តែតតាមខ្យល់ប្រាប់ឪពុកថា បើដល់ពេលត្រូវទៅហើយ ពុកក៏ទៅចុះ។ ត្រឹមតែ ១៥ នាទីបន្ទាប់ពីខ្ញុំចុះមកដល់ផ្ទះវិញ ខ្ញុំទទួលបានទូរសព្ទប្រាប់ថាឪពុកខ្ញុំបានស្លាប់បាត់បង់ជីវិតមែន»។

លោកបានរំលឹកហេតុការណ៍នេះធ្វើឲ្យលោកជឿថា តំបន់អង្គរមានថាមពលពិសេសម្យ៉ាងដែលប៉ះពាល់ដល់ព្រលឹង និងអាចបញ្ជូនសាររបស់គាត់បាន។

លោកក៏បានលើកឡើងពីបទពិសោធន៍ពេលលោកមកទស្សនាតំបន់អង្គរជាលើកទីមួយជាមួយក្រុមទេសចរណ៍ លោកកត់សម្គាល់ឃើញថា ភ្ញៀវទេសចរភាគច្រើនចូលចិត្តដើរប្រញាប់ប្រញាល់ ដែលធ្វើឲ្យពួកគេរំលងតម្លៃពិតប្រាកដនៃតំបន់អង្គរ។

លោកប្រាប់ថា «ដើម្បីស្គាល់អង្គរឲ្យច្បាស់ គេមិនត្រូវដើរប្រញាប់ពេកទេ គឺត្រូវចំណាយពេលដើរយឺតៗ ស្ដាប់ភាពស្ងាត់ស្ងៀម និងសំឡេងធម្មជាតិដូចជាសំឡេងសត្វចាប ដើម្បីទទួលយកបរិយាកាស និងថាមពលផ្លូវចិត្តនៅទីនោះ»។

ការដើរទស្សនានៅតំបន់អង្គរ លោក Craig Dodeg ចូលចិត្តទៅកន្លែងដែលមិនសូវមានភ្ញៀវទេសចរទៅដល់ ដូចជាជិះកង់ឬដើរតាមផ្លូវដីក្នុងព្រៃដែលកើតចេញពីការដើរចុះឡើងរបស់អ្នកភូមិ ជាជាងការដើរតាមផ្លូវចាក់សាប ដោយវាផ្តល់នូវអារម្មណ៍រុករកពិតៗ ដូចជាការផុសចេញពីព្រៃមកប្រទះនឹងប្រាសាទតែម្ដង។

ពាក់ព័ន្ធសម្បត្តិវប្បធម៌ខ្មែរដែលបន្សល់ទុកនេះ បុរសជនជាតិអាមេរិករូបនេះមានការស្ញប់ស្ញែងចំពោះសមត្ថភាពរបស់បុព្វបុរសខ្មែរកាលជំនាន់មុន។ លោកស្ញប់ស្ញែងយ៉ាងខ្លាំងចំពោះឆន្ទៈ ភាពព្យាយាម និងសមត្ថភាពរបស់មនុស្សសម័យមុន ដែលអាចដឹកថ្មឡើងភ្នំ និងសាងសង់សំណង់ដ៏អស្ចារ្យនេះបាន។

លោកក៏លើកឡើងពីបាតុភូតសមរាត្រី (Equinox) ដែលព្រះអាទិត្យរះចំកណ្ដាលកំពូលប្រាសាទអង្គរវត្ត។

លោកជឿជាក់ថា បុព្វបុរសខ្មែរសម័យមុនពូកែសង្កេតមើលផ្កាយ ព្រះអាទិត្យ និងគន្លងតារា ទើបអាចគណនាប្លង់សាងសង់បានយ៉ាងត្រឹមត្រូវបែបនេះ។ ក្រៅពីនេះ លោកក៏មានការកោតសរសើរយ៉ាងខ្លាំងចំពោះការរៀបចំប្រព័ន្ធទឹក និងធារាសាស្ត្ររបស់ដូនតាខ្មែរនាសម័យនោះផងដែរ។

បន្ថែមពីនេះ លើសពីការអភិរក្សប្រពៃណីវប្បធម៌បុរាណ លោកក៏ចង់ឲ្យពិភពលោកបានឃើញនិងផ្តល់តម្លៃដល់សិល្បៈបែបទំនើប ឬសហសម័យរបស់កម្ពុជាផងដែរ ដូចជា សិល្បៈសៀក តន្ត្រីករ អ្នកគូរគំនូរជីវចល និងអ្នកបង្កើតមាតិកាតាមប្រព័ន្ធអ៊ីនធឺណិត ដើម្បីបង្ហាញពីការវិវឌ្ឍចម្រុះនៃវប្បធម៌ខ្មែរនាពេលបច្ចុប្បន្ន៕

The post បុរសជនជាតិអាមេរិកប្រាប់អព្ភូតហេតុ ប្រាសាទបុរាណខ្មែរហាក់មានថាមពលពិសេស អាចឆ្លងឆ្លើយទៅសាច់ញាតិនៅទីសែនឆ្ងាយ appeared first on Kampuchea Thmey Daily.

ចម្លាក់វប្បធម៌ខ្មែរ អាយុកាលរាប់ពាន់ឆ្នាំ កំពុងអង្រួនចិត្តអ្នកទស្សនា ចិន យ៉ាងច្រើនកុះករ នៅសារមន្ទីរសានស៊ី

សាង ស្រីល័ក្ខ — Mon, 08 Jun 2026 06:46:39 +0000

ថ្មចម្លាក់តំណាងវប្បធម៌និងអរិយធម៌ខ្មែរបុរាណ បានក្លាយជាផ្ទាំងទស្សនីយភាពដ៏លេចធ្លោមួយ នៅសារមន្ទីរសានស៊ី (Shanxi Museum) ដោយបានទាក់ទាញការចាប់អារម្មណ៍យ៉ាងខ្លាំងពីសាធារណជន នៅក្នុងថ្ងៃបើកសម្ពោធ។ ចាប់តាំងពីផ្ទាំងចម្លាក់ថ្មរហូតដល់និមិត្តសញ្ញាពិសិដ្ឋៗ ប្រវត្តិសាស្ត្រដែលមានអាយុកាលជាង ១,០០០ ឆ្នាំ បានរស់រវើកឡើងវិញដោយស្ងប់ស្ងាត់។

ពិព័រណ៍ក្រោមប្រធានបទ «ទ្រព្យសម្បត្តិរាប់ពាន់ឆ្នាំនៃអរិយធម៌ខ្មែរបុរាណ» បានបើកទ្វារទទួលអ្នកទស្សនារយៈពេលជិតកន្លះឆ្នាំ (៥ខែ) ចាប់ពីថ្ងៃទី ៥ ខែមិថុនា ឆ្នាំ២០២៦ នេះ នៅសារមន្ទីរសានស៊ី ក្នុងទីក្រុងតៃយាន (Taiyuan) ដែលជាទីក្រុងនៃខេត្តសានស៊ី ហើយព្រឹត្តិការណ៍នេះនឹងបន្តរៀបចំរហូតដល់ថ្ងៃទី ៧ ខែតុលា ឆ្នាំ២០២៦។

រូបភាព៖Xinhua New

យោងតាមវីដេអូដែលផ្សព្វផ្សាយដោយសារព័ត៌មានរដ្ឋចិន CCTV បានបង្ហាញឲ្យឃើញពីទិដ្ឋភាពដ៏រស់រវើក នៃហ្វូងមនុស្សយ៉ាងច្រើនកុះករ ដែលបានសម្រុកទៅទស្សនា និងស្វែងយល់ពីត្បូងពេជ្រនៃសិល្បៈវប្បធម៌ខ្មែរ។ សារព័ត៌មាន CCTV បានលើកឡើងដោយកោតសរសើរថា «អរិយធម៌ខ្មែរបុរាណ បានលេចត្រដែតឡើងយ៉ាងត្រចះត្រចង់នៅសារមន្ទីរសានស៊ី និងបានទាក់ទាញការចាប់អារម្មណ៍យ៉ាងខ្លាំងភ្លាមៗ នៅក្នុងថ្ងៃបើកសម្ពោធ»។

សេចក្តីរាយការណ៍ដដែល បានបរិយាយបន្ថែមថា ចាប់តាំងពីផ្ទាំងចម្លាក់ថ្មរហូតដល់និមិត្តសញ្ញាពិសិដ្ឋៗផ្សេងទៀត ប្រវត្តិសាស្ត្រដ៏រុងរឿងដែលមានអាយុកាលជាង ១០០០ ឆ្នាំរបស់កម្ពុជា ហាក់បីដូចជាបានរស់រវើកឡើងវិញដោយស្ងប់ស្ងាត់នៅលើទឹកដីចិន។ ជាក់ស្ដែង នៅក្នុងពិព័រណ៍នេះ មានការដាក់តាំងបង្ហាញនូវព្រះពុទ្ធរូប ចម្លាក់ស្ថាបត្យកម្ម និងគ្រឿងភាជន៍បុរាណៗ ដែលមានអាយុកាលតាំងពីសម័យអាណាចក្រភ្នំ (ហ្វូណន) រហូតដល់សម័យអាណាចក្រអង្គរ។

ឯកឧត្តម លី វណ្ណា រដ្ឋលេខាធិការនៃក្រសួងវប្បធម៌ និងវិចិត្រសិល្បៈកម្ពុជា ដែលបានអញ្ជើញចូលរួមផ្ទាល់ បានលើកឡើងដោយធ្វើការវាយតម្លៃខ្ពស់នៅក្នុងព្រឹត្តិការណ៍នោះថា៖ «ប្រជាជនចិនភាគច្រើនគឺស្គាល់វប្បធម៌ខ្មែរយ៉ាងច្បាស់ ជាពិសេសគឺប្រាសាទអង្គរវត្ត។ ប៉ុន្តែការបានឃើញវត្ថុដ៏ស្រស់ស្អាតបែបនេះផ្ទាល់ភ្នែក ជាពិសេសស្នាដៃឯកផ្នែកចម្លាក់ដូចជាវត្ថុដែលនៅទីនោះ គឺពិតជាឱកាសដ៏កម្រខ្លាំងណាស់»។

ព្រឹត្តិការណ៍ពិព័រណ៍នេះ គឺជាដំណើរឆ្លងកាត់ប្រវត្តិសាស្ត្រសិល្បៈខ្មែររាប់ពាន់ឆ្នាំ ក៏ដូចជាការបង្ហាញពីការផ្លាស់ប្តូរវប្បធម៌ដ៏យូរលង់រវាងកម្ពុជា និងចិន។ ឯកឧត្តម លី វណ្ណា បានបន្ថែមថា៖ «ឱកាសនេះផ្តល់ឲ្យប្រជាជនចិននូវលទ្ធភាពកាន់តែច្រើនក្នុងការសិក្សា និងសង្កេតមើលអរិយធម៌ខ្មែរ ហើយថែមទាំងរំលឹកឡើងវិញនូវទំនាក់ទំនងជាប្រវត្តិសាស្ត្ររវាងប្រទេសទាំងពីរផងដែរ»។

គួររំលឹកផងដែរថា ចំណងមិត្តភាពរវាងចិន និងកម្ពុជា មានប្រវត្តិសាស្ត្រតាំងពីជិត ២,០០០ ឆ្នាំមុនមកម្ល៉េះ។ ក្នុងរយៈពេលប៉ុន្មានទសវត្សរ៍ចុងក្រោយនេះ ប្រទេសចិនបានដើរតួជាអ្នកគាំទ្រយ៉ាងសកម្មលើការអភិរក្សបេតិកភណ្ឌវប្បធម៌របស់កម្ពុជា តាមរយៈការផ្តល់បច្ចេកវិទ្យា និងអ្នកជំនាញ។ ខាងភាគីសារមន្ទីរបានបញ្ជាក់ថា ពិព័រណ៍នេះគឺជាឧទាហរណ៍ដ៏រស់រវើកមួយ នៃការរីកចម្រើននៃកិច្ចសហប្រតិបត្តិការវប្បធម៌រវាងប្រទេសទាំងពីរ៕

ឯកឧត្តម លី វណ្ណា រដ្ឋលេខាធិការនៃក្រសួងវប្បធម៌ និងវិចិត្រសិល្បៈកម្ពុជា

រូបភាព៖Xinhua New

អត្ថបទ ៖ សាង ស្រីល័ក្ខ

The post ចម្លាក់វប្បធម៌ខ្មែរ អាយុកាលរាប់ពាន់ឆ្នាំ កំពុងអង្រួនចិត្តអ្នកទស្សនា ចិន យ៉ាងច្រើនកុះករ នៅសារមន្ទីរសានស៊ី appeared first on Kampuchea Thmey Daily.

ក្រៅពីប្រាសាទ ទស្សនាសារមន្ទីរផ្តល់បទពិសោធន៍ថ្មីបន្ថែមទេសចរមកកម្សាន្តតំបន់អង្គរ

Dy Bunnara — Fri, 05 Jun 2026 03:59:41 +0000

សារមន្ទីរដើរតួនាទីជាផលិតផលទេសចរណ៍ដ៏សំខាន់មួយ ដែលផ្តល់បទពិសោធន៍បន្ថែមសម្រាប់ទេសចរមកកម្សាន្តនៅតំបន់រមណីយដ្ឋានអង្គរ ក្រៅពីការទស្សនាតាមប្រាសាទនានា។

លោក ទេស សុធី អនុប្រធាននាយកដ្ឋានអភិវឌ្ឍទេសចរណ៍ និងវប្បធម៌នៃអាជ្ញាធរជាតិអប្សរាបានឲ្យដឹងថា សារមន្ទីរដើរតួនាទីយ៉ាងសំខាន់ជាផ្នែកមួយនៃផលិតផលទេសចរណ៍ ដែលភ្ញៀវទេសចរអាចចូលទៅទស្សនាសារមន្ទីរទាំងនេះមុន ឬក្រោយពេលទស្សនាប្រាសាទ ដើម្បីស្វែងយល់ជាមុននូវព័ត៌មានពាក់ព័ន្ធនានា។

លោក ទេស សុធី បញ្ជាក់ថា «ក្រៅពីការទស្សនាតាមប្រាសាទ ភ្ញៀវទេសចរគួរចូលទៅទស្សនាតាមសារមន្ទីរមួយចំនួនដូចជា សារមន្ទីរសូត្រ សារមន្ទីរអង្គរ សារមន្ទីរ organic ដើម្បីទទួលបានចំណេះដឹងផ្សេងៗសិល្បៈបុរាណ កំណាយស្រាវជ្រាវ និងវត្ថុមានតម្លៃផ្សេងៗដ៏សម្បូរបែប»។

រមណីយដ្ឋានអង្គរមានសារមន្ទីរចំនួន ៣ ស្ថិតនៅក្រោមការគ្រប់គ្រងដោយអាជ្ញាធរជាតិអប្សរា។

សារមន្ទីរព្រះនរោត្តម សីហនុ-អង្គរ គឺជាសារមន្ទីរជាតិដ៏សំខាន់មួយនៅខេត្តសៀមរាប ដែលឧទ្ទិសដល់ការថែរក្សា និងដាក់តាំងបង្ហាញវត្ថុបុរាណ ព្រមទាំងប្រវត្តិសាស្ត្រនៃអរិយធម៌ខ្មែរ។ សារមន្ទីរនេះគឺជាឃ្លាំងស្តុកចំណេះដឹងបុរាណវិទ្យា ដែលប្រមូលផ្តុំវត្ថុមានតម្លៃជាច្រើនពីការធ្វើកំណាយស្រាវជ្រាវនានា។

សារមន្ទីរវាយនភណ្ឌប្រពៃណីអាស៊ី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប តាមបណ្តោយផ្លូវសម្តេចវិបុលបញ្ញា សុខ អាន ឬហៅថាផ្លូវ៦០ម៉ែត្រ កើតឡើងក្រោមកិច្ចសហប្រតិបត្តិការទន្លេមេគង្គ-ទន្លេគង្គា ដោយមានប្រទេសចំនួន ៦ ចូលរួមមាន ប្រទេសកម្ពុជា, ឥណ្ឌា, ឡាវ, មីយ៉ាន់ម៉ា, ថៃ និងប្រទេសវៀតណាម ដែលមានតាំងបង្ហាញនូវសមុច្ច័យសំខាន់ៗក្នុងសាលពិព័រណ៍ទាំង ៤ របស់សារមន្ទីរមានដូចជា សាលព័ត៌មានពិព័រណ៍ ,សាលពិព័រណ៍វត្ថុធាតុដើម ,សាលពិព័រណ៍វាយនភណ្ឌបុរាណ និងសាលពិព័រណ៍វាយនភណ្ឌសហសម័យ ដើម្បីថែរក្សា ប្រពៃណីនៃការផលិតវាយនភណ្ឌ ក៏ដូចជាបង្ហាញពីទំនាក់ទំនងរវាងអរិយធម៌ វប្បធម៌ និងពាណិជ្ជកម្មរបស់ប្រទេសជាសមាជិក ដែលមានរយៈពេលជាច្រើនសតវត្សរ៍មកហើយ។

ខណៈសារមន្ទីរកុលាលភាជន៍ឡតានី គឺជាសារមន្ទីរដំបូងគេ និងតែមួយគត់ក្នុងប្រទេសកម្ពុជាដែលសាងសង់ឡើងនៅលើទីតាំងស្ថានីយឡបុរាណផ្ទាល់ មានទីតាំងនៅក្នុងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប មានចម្ងាយប្រមាណ ៣២ គីឡូម៉ែត្រភាគឦសានក្រុងសៀមរាប។

សារមន្ទីរនេះ គឺជាមជ្ឈមណ្ឌលតាំងបង្ហាញកុលាលភាជន៍ច្រើនប្រភេទ ដែលអ្នកស្រាវជ្រាវផ្នែកបុរាណវិទ្យារកឃើញពីរណ្ដៅកំណាយបុរាណវិទ្យា ពីបណ្ដុំឡបុរាណនានាជុំវិញ និងក្នុងតំបន់អង្គរ។

ក្រៅពីសារមន្ទីរទាំងបីនេះ ក្នុងក្រុងសៀមរាបក៏មានសារមន្ទីរជាតិអង្គរដ៏ធំមួយ ដែលជាទីតាំងតាំងពិព័រណ៍វត្ថុបុរាណសម័យអង្គរ៕

The post ក្រៅពីប្រាសាទ ទស្សនាសារមន្ទីរផ្តល់បទពិសោធន៍ថ្មីបន្ថែមទេសចរមកកម្សាន្តតំបន់អង្គរ appeared first on Kampuchea Thmey Daily.

បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ

Dy Bunnara — Wed, 03 Jun 2026 01:59:08 +0000

ចំណុចលេចធ្លោមួយដែលទាក់ទាញទេសចរចូលចិត្តទៅទស្សនា និងថតរូបថ្ងៃលិចនៅប្រាសាទនាគព័ន្ធ ក្រៅពីមានទីធ្លាស្រឡះល្អដែលផ្តល់អារម្មណ៍ស្រស់ស្រាយគឺទីនោះបង្កប់តម្លៃប្រវត្តិសាស្រ្តដែលផ្សារភ្ជាប់អតីតរាជធានីក្នុងរាជ្យព្រះបាទជ័យវរ្ម័នទី៧។ នេះបើតាមលោក ជា សារិទ្ធ បុរាណវិទូ និងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរា។

ប្លែកពីប្រាសាទដទៃទៀតដូចជា អង្គរវត្ត ភ្នំបាខែង ភ្នំក្រោម ឬប្រែរូបជាដើម លោក ជា សារិទ្ធ មន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានបញ្ជាក់ថា ទីតាំងប្រាសាទនាគព័ន្ធទទួលបានការពេញនិយមខ្លាំងសម្រាប់អ្នកទេសចរមកទស្សនាថ្ងៃលិច ខណៈទីតាំងក៏ផ្សារភ្ជាប់ទៅកាន់ប្រវត្តិសាស្ត្រកាលពីជាង ១ ពាន់ឆ្នាំមុន។

«នៅទីនោះប្រៀបបាននឹងគោលនៃរាជធានីមួយ ដែលស្ថិតនៅលើកោះកណ្តាលបារាយណ៍ ដោយមានប្រាសាទតាសោមនៅទិសខាងកើត និងប្រាសាទព្រះខ័ននៅទិសខាងលិច។ នៅពេលដែលយើងទស្សនាថ្ងៃលិច ដោយបែរមុខទៅទិសខាងលិច យើងអាចស្រមៃទៅដល់ប្រាសាទព្រះខ័ន ដែលធ្លាប់ជានគរនិងជារាជវាំងបណ្តោះអាសន្នរបស់ព្រះបាទជ័យវរ្ម័នទី៧»។

លោកបានរំលឹកពីដំណើរប្រវត្តិសាស្ត្រនៅពីក្រោយប្រាសាទព្រះខ័ន ដែលក្រោយព្រះបាទជ័យវរ្ម័នទី ៧ ទទួលបានជ័យជម្នះក្នុងសង្គ្រាម ព្រះអង្គបានគង់នៅនគរជ័យស្រី (ប្រាសាទព្រះខ័ន) ដើម្បីរៀបចំស្តារនិងជួសជុលរាជវាំងនៅអង្គរធំ (យសោធរបុរៈ) ឡើងវិញ បន្ទាប់ពីត្រូវបានពួកចាមវាយបំផ្លាញខ្ទេចខ្ទី។

ក្រោយពីរៀបចំនគរនៅអង្គរធំរួចរាល់ ព្រះអង្គបានយាងចេញពីទីនោះទៅគង់នៅអង្គរធំវិញ ហើយបានកែប្រែប្រាសាទព្រះខ័នឲ្យក្លាយជាប្រាសាទសម្រាប់ឧទ្ទិសថ្វាយដល់ព្រះបិតារបស់ព្រះអង្គ។

បើតាមលោក ជា សារិទ្ធ រចនាសម្ព័ន្ធនៃប្រាសាទទាំងបី (ប្រាសាទនាគព័ន្ធ តាសោម និងព្រះខ័ន) សុទ្ធសឹងតែជាផ្នែកមួយដ៏មានសារៈសំខាន់បំផុតនៃនគរជ័យស្រីក្នុងរាជ្យព្រះបាទព្រះបាទជ័យវរ្ម័នទី ៧៕

The post បង្កប់តម្លៃប្រវត្តិសាស្រ្ត ១ ពាន់ឆ្នាំមុន ជាហេតុផលទេសចរចូលចិត្តទៅថតរូបថ្ងៃលិចនៅប្រាសាទនាគព័ន្ធ appeared first on Kampuchea Thmey Daily.

«កិច្ចសំពះផ្ទឹមចងដៃ» របស់ខ្មែរ គ្មានក្នុងពិធីភ្ជាប់ពាក្យទេ និងត្រូវក្រាបផ្ទឹម មិនមែនអង្គុយលើកៅអីផ្ទឹមចងដៃឡើយ

Chan Sotheavy — Tue, 02 Jun 2026 10:04:50 +0000

ប៉ុន្មានឆ្នាំចុងក្រោយនេះ គ្រួសារមួយចំនួនបានរៀបចំ «កិច្ចសំពះផ្ទឹមចងដៃ ឬក្រាបផ្ទឹមចងដៃ» ប្រាសចាកពីក្បួនខ្នាតដើមក្នុងមង្គលការខ្មែរ ដោយខ្លះបានប្តូរពីការក្រាបសំពះផ្ទឹមចងដៃ ទៅជាអង្គុយលើកៅអីផ្ទឹមចងដៃវិញ ក្រោមហេតុផល តម្រូវតាមស្ថានភាពមនុស្សចាស់ ដែលលោកពិបាកអង្គុយឱនចងដៃកូនក្រមុំកូនកំលោះ។ ទន្ទឹមនឹងនេះ ក៏មានគ្រួសារមួយចំនួនបានបញ្ចូល «ពិធីសំពះផ្ទឹមចងដៃ» ក្នុងពិធីភ្ជាប់ពាក្យជាដើម។

យោងតាមក្រសួងវប្បធម៌ និងវិចិត្រ សិល្បៈ និងក្រសួងធម្មការនិងសាសនា ពន្យល់ថា «ពិធីភ្ជាប់ពាក្យ» ឬ «ស្តីដណ្តឹង» គឺគ្រាន់តែជាដំណាក់កាល នៃការព្រមព្រៀងរវាងគ្រួសារទាំងសងខាង ដើម្បីភ្ជាប់សាច់ភ្ជាប់ឈាមកូនចៅឱ្យក្លាយជាគូស្រករនាពេលអនាគតប៉ុណ្ណោះ។ ដូច្នេះ ក្នុងពិធីនេះមានត្រឹមតែកិច្ចចែចូវស្តីដណ្តឹង ការបំពាក់ចិញ្ចៀន និងពិសារស្លាភ្ជាប់ពាក្យ ខណៈសាមុីខ្លួនប្រុសស្រីមិនទាន់ក្លាយជាប្តីប្រពន្ធពេញលក្ខណៈតាមច្បាប់ និងប្រពៃណីនៅឡើយទេ។

ឯកិច្ចសំពះផ្ទឹមចងដៃ ត្រូវបានរៀបចំឡើងតែក្នុងថ្ងៃមង្គលការប៉ុណ្ណោះ ព្រោះជាពិធីសំខាន់ដែលបង្ហាញពីការផ្សំផ្គុំសាមីខ្លួនប្រុសស្រីឱ្យក្លាយជាប្តីប្រពន្ធស្របតាមប្រពៃណី ដោយមានការទទួលស្គាល់ និងប្រសិទ្ធពរជ័យពីញាតិមិត្តទាំងសងខាង។

ដោយឡែក ទាក់ទងនឹងការកែសម្រួលទម្រង់នៃ «កិច្ចសំពះផ្ទឹមចងដៃ» ពីការក្រាបផ្ទឹមទៅជាការអង្គុយលើកៅអីផ្ទឹម ដើម្បីសម្របតាមស្ថានភាពមនុស្សចាស់ពិបាកក្នុងការអង្គុយឱនចងដៃនោះ លោកស្រី ឡុងឌី សាន់ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ ក្នុងឱកាសសិក្ខាសាលា ស្តីពី «រួមគ្នាលើកកម្ពស់សីលធម៌ តាមរយៈការផ្សព្វផ្សាយ» នាព្រឹកថ្ងៃទី២០ ខែឧសភា ឆ្នាំ២០២៦ បានបង្ហាញទស្សនៈគាំទ្រចំពោះការកែសម្រួលដែលសមស្របនឹងបរិបទសង្គម ប៉ុន្តែជំរុញឱ្យរក្សាតម្លៃដើមនៃប្រពៃណីមង្គលការខ្មែរជាដាច់ខាត។

លោកស្រី គូសបញ្ជាក់ថា ដោយផ្អែកលើការគិតគូរ និងតាមការណែនាំ មន្ត្រីជាន់ខ្ពស់ក្រសួងបានផ្តួចផ្តើមការក្រាបសំពះផ្ទឹមចងដៃនៅលើគ្រែ ជំនួសការក្រាបផ្ទាល់លើកម្រាលដី។ វិធីសាស្ត្រនេះ មិនត្រឹមតែអាចជួយសម្រួលដល់មនុស្សចាស់ ដែលលោកពិបាកអង្គុយឱនចងដៃប៉ុណ្ណោះទេ តែក៏រក្សាបាននូវទម្រង់ និងអត្ថន័យដើមនៃពិធីសំពះផ្ទឹមតាមប្រពៃណីខ្មែរផងដែរ។

តួយ៉ាង ការផ្តួចផ្តើមនេះ ត្រូវបានចាត់ទុកថា ជាគំរូមួយនៃការអភិរក្ស និងអភិវឌ្ឍវប្បធម៌ជាតិ ស្របតាមគោលការណ៍ «រក្សាចាស់ បង្កើតថ្មី» ដែលផ្តោតលើការថែរក្សាមរតកដូនតា ព្រមទាំងបង្កើតនូវដំណោះស្រាយថ្មីៗ ដើម្បីឱ្យប្រពៃណីខ្មែរបន្តរស់រវើក និងស្ថិតស្ថេរតទៅមុខ និងអំពាវនាវឱ្យចូលរួមថែរក្សា និងលើកតម្កើងក្បួនខ្នាតប្រពៃណីមង្គលការខ្មែរឱ្យបានគង់វង្ស។ សូមស្តាប់វីដេអូលម្អិត៖

អាស្រ័យហេតុនេះ ក្រសួងពាក់ព័ន្ធ និងមន្ត្រីផ្នែកវប្បធម៌ បានអំពាវនាវឱ្យសាធារណជនយល់ដឹង និងគោរពតាមទម្រង់ដើមនៃពិធីអាពាហ៍ពិពាហ៍ខ្មែរ ដែលដូនតាបានបន្សល់ទុកជាមរតកវប្បធម៌ដ៏មានតម្លៃសម្រាប់កូនចៅជំនាន់ក្រោយ។

គួរបញ្ជាក់ថា ថ្មីៗនេះ មានការកែប្រែមួយចំនួន កំពុងកើតមានក្នុងពិធីមង្គលការខ្មែរជាបន្តបន្ទាប់ ដោយមានប្រជាពលរដ្ឋខ្លះបានបញ្ចូល «កិច្ចសំពះផ្ទឹមចងដៃ» ទៅក្នុងពិធីភ្ជាប់ពាក្យ និងមានករណីមួយចំនួនទៀតប្រើប្រាស់ឯកសណ្ឋានមន្ត្រីរាជការ សញ្ញាស័ក្តិ ឬរូបសញ្ញារដ្ឋបាល ក្នុងកម្មវិធីមង្គលការជាដើម។

ហេតុនេះ ក្រសួងវប្បធម៌និងវិចិត្រសិល្បៈ និងក្រសួងធម្មការនិងសាសនា មានក្តីព្រួយបារម្ភយ៉ាងខ្លាំងចំពោះការបាត់បង់តម្លៃដើមនៃប្រពៃណីខ្មែរ និងបានអំពាវនាវដល់ប្រជាពលរដ្ឋទូទាំងប្រទេស ឱ្យចូលរួមថែរក្សា អភិរក្ស និងគោរពតាមក្បួនខ្នាតដើមនៃពិធីអាពាហ៍ពិពាហ៍ខ្មែរ ដើម្បីរួមចំណែកការពារអត្តសញ្ញាណជាតិ និងបន្តលើកតម្កើងគុណតម្លៃវប្បធម៌ដ៏ថ្លៃថ្លារបស់ខ្មែរឱ្យស្ថិតស្ថេរគង់វង្សតទៅមុខ៕

The post «កិច្ចសំពះផ្ទឹមចងដៃ» របស់ខ្មែរ គ្មានក្នុងពិធីភ្ជាប់ពាក្យទេ និងត្រូវក្រាបផ្ទឹម មិនមែនអង្គុយលើកៅអីផ្ទឹមចងដៃឡើយ appeared first on Kampuchea Thmey Daily.

ជំនឿស្រោចទឹកលើករាសី មានប្រភពមកពីប្រាសាទនាគព័ន្ធ

Dy Bunnara — Tue, 02 Jun 2026 08:14:25 +0000

ប្រាសាទនាគព័ន្ធ ត្រូវបានគេជឿជាក់ថាជាកន្លែងលាងបាបកាលពីសម័យបុរាណ តាមរយៈភស្តុតាងបង្ហាញនៅក្នុងសិលាចារឹក។

បុរាណវិទូនៃអាជ្ញាធរជាតិអប្សរាបានបញ្ជាក់ថា ពិធីលាងបាបនៅប្រាសាទនាគព័ន្ធ នៅតែមានឥទ្ធិពលបន្តរហូតមកដល់សព្វថ្ងៃ ប៉ុន្តែបានផ្លាស់ប្តូរទម្រង់នៃការៀបចំពិធីមួយចំនួន។

លោក ជា សារិទ្ធ បុរាណវិទូនៃអាជ្ញាធរជាតិអប្សរា

លោក ជា សារិទ្ធ បុរាណវិទូ និងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានឲ្យដឹងថា កាលពីសម័យបុរាណ ការលាងបាបនៅប្រាសាទនាគព័ន្ធត្រូវនិមន្តព្រះសង្ឃឬអាចារ្យមកធ្វើកិច្ចពិធី។

លោកថា ការរៀបចំកិច្ចពិធីលាងបាប គឹតាមរយៈស្រះទាំង ៥ ដែលមានទំនាក់ទំនងគ្នាភ្ជាប់ពីស្រះកណ្តាលទៅស្រះតូចទាំង ៤ ដែលមានដំបូលនិងទរបង្ហូរទឹកមួយ។

ក្នុងកិច្ចដំណើរការពិធីគឺព្រះសង្ឃឬអាចារ្យ នឹងធ្វើនៅលើជណ្ដើរស្រះធំដែលមានមាត់ទរមួយលម្អជាទេវរូបភេទស្រី (នៅសល់នៅទរខាងកើត)។ ពេលធ្វើពិធីរួច គេដួសទឹកចាក់តាមទរ ហើយយើងចូលទៅត្រងទឹកចេញពីមាត់ដំរី មនុស្ស សឹង្ហ និងមាត់សេះ យកមកលាងជម្រះកាយ។

លោកប្រៀបធៀបបច្ចុប្បន្ននេះមានកែប្រែការធ្វើពិធីមួយចំនួន ដោយគេច្រើនតែនាំគ្នាដងទឹកពីក្នុងស្រះទៅប្រគេនព្រះសង្ឃ ដើម្បីឱ្យលោកធ្វើកិច្ចប្រសិទ្ធីដើម្បីលាងជម្រះ។

ពិធីលាងបាបកាលពីសម័យបុរាណបានក្លាយមកជាការ “ស្រោចទឹកលើករាសី” តាមបែបអ្នកអង្គរ ឬ “ការរំដោះគ្រោះ” តាមបែបអ្នកភ្នំពេញ នៅពេលដែលជួបគ្រោះថ្នាក់ ធ្វើការមិនសូវរលូន ឬមានរឿងដាក់ខ្លួនជាដើម។

ពាក់ព័ន្ធជំនឿនេះមានភាពស័ក្តិសិទ្ធិកម្រិតណា លោក ជា សារិទ្ធ បញ្ជាក់ថាគឺអាស្រ័យទៅលើការជឿជាក់របស់បុគ្គលម្នាក់ៗ។ យ៉ាងណា សម័យបុរាណ ជំនឿនិងសាសនាមានភាពជឿជាក់មុតមាំខ្លាំងក្លាណាស់។

«ភស្តុតាងគឺបើគ្មានជំនឿមុតមាំទេ ដូនតាយើងក៏មិនចំណាយពេលរាប់សិបឆ្នាំ កម្លាំងពលកម្ម និងការផ្គត់ផ្គង់អាហារដ៏មហាសាល ដើម្បីសាងសង់ប្រាសាទធំៗដូចជា នាគព័ន្ធ អង្គរវត្ត ឬបាយ័ននោះឡើយ»។ លោក ជា សារិទ្ធ បញ្ជាក់។

ប្រាសាទនាគព័ន្ធ ក្រៅតែជាទីតាំងស័ក្កសិទ្ធសម្រាប់ការរៀបចំពិធីលាងបាបលើករាសីកាលពីបុរាណ អ្នកស្រុកក៏មានជំនឿមួយទៀតគឺពិធីសុំទឹកភ្លៀង នៅពេលស្រុកទេសជួបប្រទះគ្រោះរាំងស្ងួតខុសពីធម្មតា ដែលអ្នកស្រុកតែងតែប្រមូលផ្ដុំគ្នាធ្វើពិធីតាមបែបជំនឿបែបជីវចលដោយមានការលេងភ្លេង និងសូត្រមន្ត។

ពិធីសុំទឹកភ្លៀងនេះអ្នកស្រុកហៅថា “ចាក់ត្រពោករាហូ” ដែលតែងធ្វើឡើងក្រោយរដូវចូលឆ្នាំ ឬក្រោយពិធីឆ្លងចេត្រ ដោយមានការចូលរួមពីអ្នកភូមិជុំវិញដូចជា ភូមិលាងដៃ ភូមិភ្លង់ និងភូមិតាប្រុក ដោយមានរៀបចំកិច្ចពិធីបែបសាសនាផងដែរ។

ប្រាសាទនាគព័ន្ធត្រូវបានសាងសង់ឡើងនៅរាជ្យព្រះបាទជ័យវរ្ម័នទី៧ ក្នុងអំឡុងឆ្នាំ ១១៩១ ដើម្បីឧទ្ទិសថ្វាយព្រះពុទ្ធសាសនាមហាយាន។

សាងសង់ឡើងនៅចំកណ្តាលបារាយណ៍ «ជ័យតដាក» ឬវាលរាជដាក (បារាយណ៍ខាងជើង ឬបារាយណ៍នាគព័ន្ធ) ភ្ញៀវទេសចរជាតិនិងអន្តរជាតិ អាចធ្វើដំណើរទៅទស្សនាប្រាសាទនាគព័ន្ធ ដោយដើរឆ្លងកាត់ស្ពានឈើដែលមានប្រវែងជិត ២០០ ម៉ែត្រ។

ការដើរកាត់ស្ពានឈើមកទស្សនាប្រាសាទនាគព័ន្ធ ភ្ញៀវទេសចរអាចគយគន់ផ្ទៃទឹកដែលមានផ្កាឈូក រុក្ខវារីជាតិផ្សេងៗ ហើយមិនអាចភ្លេចបានគឺមកថតថ្ងៃលិចឆ្លុះជាមួយស្ពានសាងសង់កាត់បារាយណ៍ហុំព័ទ្ធដោយលំហទឹកល្ហរល្ហេវ៕

The post ជំនឿស្រោចទឹកលើករាសី មានប្រភពមកពីប្រាសាទនាគព័ន្ធ appeared first on Kampuchea Thmey Daily.

គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥%

Dy Bunnara — Mon, 01 Jun 2026 07:33:03 +0000

ប្រាសាទបុរាណនៅតំបន់អង្គរដែលមានអាយុកាលរាប់ពាន់ឆ្នាំ បានរងការសឹករិចរិលនិងទ្រុឌទ្រោមជារៀងរាល់ថ្ងៃ ដែលតម្រូវឲ្យមានការជួសជុលថែទាំជាប្រចាំ។

យ៉ាងណាមិញ មុនអនុវត្តកិច្ចការជួសជុលក៏ត្រូវឆ្លងកាត់ការពិនិត្យ និងការវាយតម្លៃពីផលប៉ះពាល់យ៉ាងហ្មត់ចត់ពីមន្រ្តីជំនាញរបស់អង្គការយូណេស្កូ។

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យា

លោក សោម សុផារ៉ាត់ ប្រធាននាយកដ្ឋានអភិរក្ស និងបុរាណវិទ្យានៃអាជ្ញាធរជាតិអប្សរាបានគូសបញ្ជាក់ថា រាល់ការជួសជុលប្រាសាទនៅតំបន់រមណីយដ្ឋានអង្គរ ត្រូវតែគោរពយ៉ាងតឹងរ៉ឹងតាមលក្ខខណ្ឌនៃធម្មនុញ្ញអង្គរ។

តាមរយៈគណៈកម្មាធិការសម្របសម្រួលអន្តរជាតិ ដើម្បីការការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ហៅកាត់ថា ICC-Angkor) គោលការណ៍គ្រឹះនៃធម្មនុញ្ញអង្គរ គឺរាល់ការជួសជុលប្រាសាទទាំងអស់ដាច់ខាតត្រូវតែគោរព និងអនុវត្តតាមលក្ខខណ្ឌបច្ចេកទេសដែលបានកំណត់ក្នុងធម្មនុញ្ញនេះ ដោយមិនអាចធ្វើតាមតែអំពើចិត្តបានឡើយ។

«ក្នុងធម្មនុញ្ញអង្គរបានកំណត់ភាគរយច្បាស់លាស់ណាស់ ដោយមិនអនុញ្ញាតិឱ្យប្រើប្រាស់ថ្មថ្មីលើសពី ២៥% នៃការជួសជុលនោះទេ»។ សោម សុផារ៉ាត់ បញ្ជាក់ មុនលោកបន្តថា «បើសិនថ្មចាស់ខូចគុណភាពបាក់បែកខ្លាំងមិនអាចទ្រទ្រង់ទម្ងន់បានតទៅទៀត នោះគេអាចប្រើថ្មថ្មីជំនួស ឬបើថ្មចាស់បាត់បង់រកមិនឃើញ ហើយទីតាំងត្រូវជួសជុលចាំបាច់ត្រូវមានថ្មថ្មីជំនួស ដើម្បីបង្គុំឱ្យទៅជារចនាសម្ព័ន្ធពេញលេញ»។

«បើថ្មចាស់នៅមានគុណភាពអាចប្រើប្រាស់បាន មានសភាពបាក់បែកបន្តិចបន្តួច គេនឹងមិនបោះបង់ចោលទេគឺយកមកតភ្ជាប់ប្រើប្រាស់ឡើងវិញ»។ លោក សោម សុផារ៉ាត់ បន្ថែម។

ពាក់ព័ន្ធការងារជួសជុលប្រាសាទបុរាណ លោក សោម សុផារ៉ាត់ មើលឃើញមានភាពខុសគ្នាស្រឡះពីការសាងសង់សំណង់សម័យទំនើប។

មន្រ្តីជំនាញអាជ្ញាធរជាតិអប្សរារូបនេះ លើកឡើងពីភាពស្មុគស្មាញក្នុងកិច្ចការងារជួសជុលសំណង់ប្រាសាទបុរាណក្នុងតំបន់អង្គរ ដោយសារតែដុំថ្មប្រាសាទនីមួយៗមានទម្ងន់ធ្ងន់ ដែលការជួសជុលតម្រូវឱ្យមានការប្រុងប្រយ័ត្នខ្ពស់ ដោយត្រូវប្រើប្រាស់ឡានស្ទូច ដើម្បីងាយស្រួលក្នុងការផ្លាស់ទី។ ក្នុងករណីទីតាំងចង្អៀតដែលឡានស្ទូចចូលមិនដល់ មន្រ្តីជំនាញត្រូវប្រើបច្ចេកទេសតម្លើងរន្ទា និងកៅលាក់ដើម្បីអូសឬយោងថ្ម។

លោកប្រៀបធៀបការជួសជុលប្រាសាទបុរាណ មិនងាយស្រួលដូចការសាងសង់សំណង់សម័យថ្មីនោះទេ។ ការជួសជុលថ្មបុរាណទាមទារការរើ រៀប និងពង្រឹងគ្រឹះយ៉ាងសម្រិតសម្រាំង។ បន្ថែមពីនេះ ការជួសជុលក៏ត្រូវចំណាយពេលយូរ ដោយសារថ្មប្រាសាទមានល្បាក់មិនស្មើគ្នាមានទាបមានខ្ពស់ ដូច្នេះដើម្បីដាក់ថ្មមួយដុំឲ្យចូលស៊ីគ្នា អ្នកបច្ចេកទេសត្រូវរើរៀបនិងកែតម្រូវជាច្រើនដង ទើបធ្វើឱ្យការជួសជុលប្រាសាទមួយៗត្រូវចំណាយពេលយូររាប់ឆ្នាំ។

បើតាមលោក សោម សុផារ៉ាត់ ថ្មប្រាសាទបុរាណជាទូទៅប្រើប្រាស់សម្ភារៈ ៣ ប្រភេទគឺ ឥដ្ឋ ថ្មភក់ និងថ្មបាយក្រៀម។ ចំពោះរចនាសម្ព័ន្ធប្រាសាទធំៗ គេច្រើនជួបប្រទះថ្ម ២ ប្រភេទ ដែលផ្នែកខាងក្រៅគឺជាថ្មភក់ ដែលមើលឃើញពីខាងក្រៅទៅមានសោភ័ណភាព និងមានក្បូរក្បាច់រចនាស្អាត ប៉ុន្តែផ្នែកខាងក្នុងគឺសុទ្ធតែជាថ្មបាយក្រៀម។

លោកលើកឡើងឧទាហរណ៍ជាក់ស្តែងប្រាសាទអង្គរវត្ត គឺមានការប្រើប្រាស់ថ្មពីរបញ្ចូលគ្នា ដោយសំបកខាងក្រៅជាថ្មភក់ រីឯរចនាសម្ព័ន្ធផ្នែកខាងក្នុង និងគ្រឹះប្រាសាទគឺជាថ្មបាយក្រៀម៕

The post គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥% appeared first on Kampuchea Thmey Daily.

ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ

Dy Bunnara — Mon, 01 Jun 2026 00:35:00 +0000

ខុសពីប្រាសាទមួយចំនួននៅតំបន់អង្គរដូចជាប្រាសាទលលៃ ដែលព្រះមហាក្សត្រកសាងឡើងដើម្បីឧទ្ទិសដល់បុព្វការីជន ប្រាសាទនាគព័ន្ធដែលកសាងនៅកណ្តាលបារាយដូចគ្នា សាងសង់ឡើងមានគោលដៅដើម្បីឧទ្ទិសដល់ព្រះពោធិសត្វនិងជានិមិត្តរូបនៃទន្លេអនោតត្តស្រះ។

លើសពីនេះទៅទៀត ពីបុរាណមកប្រាសាទនេះក៏អ្នកស្រុកអង្គរ មានជំនឿយ៉ាងជ្រាលជ្រៅទាក់ទងការលាងជម្រះបាប និងការព្យាបាលរោគ ដែលបន្តមានឥទ្ធិពលតាំងពីសម័យបុរាណរហូតមកដល់បច្ចុប្បន្ន។

លោក ជា សារិទ្ធ បុរាណវិទូនិងជាមន្រ្តីផ្នែកអភិរក្សប្រាសាទនៃអាជ្ញាធរជាតិអប្សរាបានឲ្យដឹងថា អ្នកស្រុកនៅក្នុងសហគមន៍ក្នុងតំបន់អង្គរតាំងពីដើមមកតែងតែនាំគ្នាចូលមកបោចវល្លិ និងរើសសំបកឈើនៅប្រាសាទនាគព័ន្ធ ដើម្បីយកទៅផ្សំជាឱសថបុរាណ ខណៈដែលភ្ញៀវទេសចរក៏តែងតែយកដបឬធុងមកដួសទឹកពីស្រះយកទៅលុបមុខ ឬលាងជម្រះរាងកាយដើម្បីបណ្ដេញឧបទ្រពចង្រៃ និងព្យាបាលជំងឺ។

លោក ជា សារិទ្ធ បានអះអាងថា ជំនឿនៃការយកទឹកមកលាងជម្រះបាបនៅប្រាសាទនាគព័ន្ធ ក៏ជាប្រភពដើមនៃទំនៀមទម្លាប់ “ចាក់ទឹកលើករាសី” ឬពិធីស្រោចទឹកដោយព្រះសង្ឃក្នុងពិធីព្រះពុទ្ធសាសនាថេរវាទនាសម័យបច្ចុប្បន្ននេះដែរ នៅពេលដែលមនុស្សមានរាសីធ្លាក់ចុះ។

ពាក់ព័ន្ធប្រាសាទនាគព័ន្ធនេះដែរ លោកលើកឡើងពីជំនឿដ៏មុតមាំមួយទៀតគឺការសុំទឹកភ្លៀង នៅពេលស្រុកទេសជួបប្រទះគ្រោះរាំងស្ងួតខុសពីធម្មតា ដែលអ្នកស្រុកតែងតែប្រមូលផ្ដុំគ្នាធ្វើពិធីតាមបែបជំនឿបែបជីវចលដោយមានការលេងភ្លេង និងសូត្រមន្ត។

នៅក្នុងពិធីនោះ គេដងទឹកពីស្រះយកមកស្រោចឬបាចដាក់គ្នា និងចាក់ទឹកលើទរបង្ហូរទៅស្រះចេញតាមមាត់ដំរី មាត់មនុស្ស មាត់សិង្ហ និងសេះ ដើម្បីបួងសួងសុំទឹកភ្លៀង ហើយជាទូទៅភ្លៀងតែងតែធ្លាក់មកមែន ក្នុងរយៈពេលមិនយូរប៉ុន្មានក្រោយពីបញ្ចប់ពិធីរួច៕

The post ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ appeared first on Kampuchea Thmey Daily.

វប្បធម៌ ជំនឿ - Kampuchea Thmey Daily

ក្រៅ​ពី​ប្រាសាទ ទស្សនា​សារមន្ទីរ​ផ្តល់​បទ​ពិសោធន៍​ថ្មី​បន្ថែម​ទេសចរ​មក​កម្សាន្ត​តំបន់​​អង្គរ

ជំនឿស្រោចទឹកលើករាសី មានប្រភពមកពីប្រាសាទនាគព័ន្ធ

គោលការណ៍​ធម្មនុញ្ញ​អង្គរ ការ​ជួសជុល​ប្រាសាទ​បុរាណមិន​ឲ្យ​ប្រើ​ថ្ម​ថ្មី​លើ​សពី ២៥%​

ប្រាសាទ​នាគព័ន្ធ​មាន​ប្រវត្តិ និង​ជំនឿ​​ទាក់ទង​ការ​លាង​បាប និង​កន្លែង​​ព្យាបាល​រោគ

ក្រៅពីប្រាសាទ ទស្សនាសារមន្ទីរផ្តល់បទពិសោធន៍ថ្មីបន្ថែមទេសចរមកកម្សាន្តតំបន់អង្គរ

គោលការណ៍ធម្មនុញ្ញអង្គរ ការជួសជុលប្រាសាទបុរាណមិនឲ្យប្រើថ្មថ្មីលើសពី ២៥%

ប្រាសាទនាគព័ន្ធមានប្រវត្តិ និងជំនឿទាក់ទងការលាងបាប និងកន្លែងព្យាបាលរោគ