ព័ត៌មានជាតិ

ក្រៅពីប្រាសាទ ទស្សនាសារមន្ទីរផ្តល់បទពិសោធន៍ថ្មីបន្ថែមទេសចរមកកម្សាន្តតំបន់អង្គរ

បានផុស

១ ខែ មុន

នៅ

ថ្ងៃសុក្រ ៥ មិថុនា ២០២៦

ដោយ

សារមន្ទីរដើរតួនាទីជាផលិតផលទេសចរណ៍ដ៏សំខាន់មួយ ដែលផ្តល់បទពិសោធន៍បន្ថែមសម្រាប់ទេសចរមកកម្សាន្តនៅតំបន់រមណីយដ្ឋានអង្គរ ក្រៅពីការទស្សនាតាមប្រាសាទនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទេស សុធី អនុប្រធាននាយកដ្ឋានអភិវឌ្ឍទេសចរណ៍ និងវប្បធម៌នៃអាជ្ញាធរជាតិអប្សរាបានឲ្យដឹងថា សារមន្ទីរដើរតួនាទីយ៉ាងសំខាន់ជាផ្នែកមួយនៃផលិតផលទេសចរណ៍ ដែលភ្ញៀវទេសចរគួរទៅទស្សនាសិក្សាមុន ឬក្រោយពេលទស្សនាប្រាសាទ ដើម្បីស្វែងយល់ជាមុននូវព័ត៌មានពាក់ព័ន្ធនានានៅតំបន់អង្គរ។

លោក ទេស សុធី បញ្ជាក់ថា «ក្រៅពីការទស្សនាតាមប្រាសាទ ភ្ញៀវទេសចរគួរចូលទៅទស្សនាតាមសារមន្ទីរមួយចំនួនដូចជា សារមន្ទីរសូត្រ សារមន្ទីរអង្គរ សារមន្ទីរ organic ដើម្បីទទួលបានចំណេះដឹងផ្សេងៗពីសិល្បៈបុរាណ ការកំណាយស្រាវជ្រាវ និងវត្ថុមានតម្លៃដ៏សម្បូរបែបនៅតំបន់អង្គរ»។

រមណីយដ្ឋានអង្គរមានសារមន្ទីរចំនួន ៣ ស្ថិតនៅក្រោមការគ្រប់គ្រងដោយអាជ្ញាធរជាតិអប្សរា។

សារមន្ទីរព្រះនរោត្តម សីហនុ-អង្គរ គឺជាសារមន្ទីរជាតិដ៏សំខាន់មួយនៅខេត្តសៀមរាប ដែលឧទ្ទិសដល់ការថែរក្សា និងដាក់តាំងបង្ហាញវត្ថុបុរាណ ព្រមទាំងប្រវត្តិសាស្ត្រនៃអរិយធម៌ខ្មែរ។ សារមន្ទីរនេះគឺជាឃ្លាំងស្តុកចំណេះដឹងបុរាណវិទ្យា ដែលប្រមូលផ្តុំវត្ថុមានតម្លៃជាច្រើនពីការធ្វើកំណាយស្រាវជ្រាវនានា។

សារមន្ទីរវាយនភណ្ឌប្រពៃណីអាស៊ី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប តាមបណ្តោយផ្លូវសម្តេចវិបុលបញ្ញា សុខ អាន ឬហៅថាផ្លូវ៦០ម៉ែត្រ កើតឡើងក្រោមកិច្ចសហប្រតិបត្តិការទន្លេមេគង្គ-ទន្លេគង្គា ដោយមានប្រទេសចំនួន ៦ ចូលរួមមាន ប្រទេសកម្ពុជា, ឥណ្ឌា, ឡាវ, មីយ៉ាន់ម៉ា, ថៃ និងប្រទេសវៀតណាម ដែលមានតាំងបង្ហាញនូវសមុច្ច័យសំខាន់ៗក្នុងសាលពិព័រណ៍ទាំង ៤ របស់សារមន្ទីរមានដូចជា សាលព័ត៌មានពិព័រណ៍ ,សាលពិព័រណ៍វត្ថុធាតុដើម ,សាលពិព័រណ៍វាយនភណ្ឌបុរាណ និងសាលពិព័រណ៍វាយនភណ្ឌសហសម័យ ដើម្បីថែរក្សា ប្រពៃណីនៃការផលិតវាយនភណ្ឌ ក៏ដូចជាបង្ហាញពីទំនាក់ទំនងរវាងអរិយធម៌ វប្បធម៌ និងពាណិជ្ជកម្មរបស់ប្រទេសជាសមាជិក ដែលមានរយៈពេលជាច្រើនសតវត្សរ៍មកហើយ។

ខណៈសារមន្ទីរកុលាលភាជន៍ឡតានី គឺជាសារមន្ទីរដំបូងគេ និងតែមួយគត់ក្នុងប្រទេសកម្ពុជាដែលសាងសង់ឡើងនៅលើទីតាំងស្ថានីយឡបុរាណផ្ទាល់ មានទីតាំងនៅក្នុងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប មានចម្ងាយប្រមាណ ៣២ គីឡូម៉ែត្រភាគឦសានក្រុងសៀមរាប។

សារមន្ទីរនេះ គឺជាមជ្ឈមណ្ឌលតាំងបង្ហាញកុលាលភាជន៍ច្រើនប្រភេទ ដែលអ្នកស្រាវជ្រាវផ្នែកបុរាណវិទ្យារកឃើញពីរណ្ដៅកំណាយបុរាណវិទ្យា ពីបណ្ដុំឡបុរាណនានាជុំវិញ និងក្នុងតំបន់អង្គរ។