អាជីវករផ្សារពហុកីឡាដ្ឋានក្រុង​តាខ្មៅ ១៨ នាក់ វិជ្ជមាន​កូវីដ១៩ មិនទាន់មានការបិទផ្សារនោះទេ

អភិបាលខេត្តកណ្តាល លោក គង់ សោភ័ណ្ឌ បានឱ្យដឹងថាអាជ្ញាធរបានរកឃើញអាជីវករក្នុងផ្សារពហុកីដ្ឋានក្រុងតាខ្មៅ ចំនួន ១៨ នាក់វិជ្ជមានជំងឺកូវីដ១៩ គិតត្រឹមម៉ោង១ រសៀលថ្ងៃទី ០៤ ខែឧសភានេះ ខណៈអាជ្ញាធរមិន​ទាន់​មានការបិទផ្សារនោះទេ។

លោក គង់ សោភ័ណ្ឌ បានចុះសួរសុខទុក្ខ បងប្អូនអាជីវករ ដែលកំពុងលក់ដូរក្នុងផ្សារកីឡាដ្ឋានក្រុងតាខ្មៅ និងណែនាំដល់បងប្អូនអាជីវករ ត្រូវមានការប្រុងប្រយ័ត្នខ្ពស់ ពាក់ម៉ាសជាប្រចាំ សំអាតដៃជាមួយអាកុល នៅពេលចាប់ឬកាន់របស់អ្វីមួយ ពិសេសនៅពេលទទួលប្រាក់ពីអ្នកទិញ។

ទន្ទឹមនឹងនោះ លោក ក៏បានណែនាំដល់ អាជ្ញាធរដែលកំពុងប្រចាំការនៅទីនោះ ត្រូវធ្វើការពិនិត្យកំដៅ បាញ់អាកុលជាប្រចាំ មុនពេលបងប្អូនប្រជាពលរដ្ឋចូលទិញម្ហូបអាហារនៅក្នុងផ្សារ។

អភិបាលរងខេត្តកណ្តាល លោក ម៉េង លាន ក៏អំពាវនាវឱ្យប្រជាពលរដ្ឋ នៅក្រុងតាខ្មៅ និងអាជីវករទាំងអស់ជ្រាបថា ផ្សារតារាងបាល់ ដែល​ជាផ្សារបណ្តោះអាសន្ន សម្រាប់ផ្គត់ផ្គង់បន្លែ ត្រី សាច់ ជូនដល់បងប្អូនប្រជាពលរដ្ឋ រស់នៅក្រុងតាខ្មៅ នឹងមិនមានការបិទផ្អាកដំណើរការនោះទេ ក្រោយពីរកឃើញមានករណីវិជ្ជមានលើអាជីវករ និងអ្នកអូសរទេះ។

លោកថាពួកគាត់ត្រូវបានក្រុមគ្រូពេទ្យ នាំយកទៅព្យាបាល រីឯអ្នកពាក់ព័ន្ធដោយផ្ទាល់ បានយកសំណាកធ្វើតេស្តរកមេរោគកូវីដ-១៩ និងអ្នកប្រយោលដាក់ឱ្យធ្វើចត្តាឡីស័កបានត្រឹមត្រូវ៕

អត្ថបទ៖ ឡេង ដេត