អតីតតន្ត្រីករវីយូឡុងជំនិតអធិរាជសំឡេងមាស ស៊ីនស៊ីសាមុត លោក ហេ ជុនសិ ឆ្លងជំងឺកូវីដ១៩ កំពុងស្ថិតក្នុងដំណាក់កាលចុងក្រោយ

លោកគ្រូ ហេ ជុនសិ អតីតតន្ត្រីករវីយូឡុងជើងចាស់ និងជាជំនិតរបស់អធិរាជសំឡេងមាស ស៊ីន ស៊ីសាមុត ហើយជាម្ចាស់បទ «សោភីនីមាសស្នេហ៍» កំពុងស្ថិតក្នុងស្ថានភាព ពិបាកវិលត្រឡប់។ នេះបើតាម ការឱ្យដឹង ពីលោក ម៉ៃ វឌ្ឍនា កវីនិពន្ធចម្រៀងជនបទ បានបង្ហោះនៅលើបណ្ដាញសង្គមប៉ុន្មាននាទី មុននេះ។

លោក ហេង ជុនសិ មានវ័យ ៨២ ឆ្នាំ មានជំងឺប្រចាំកាយ កៀបសរសៃចង្កេះ។ កាលពីសប្ដាហ៍មុន លោកលែងទទួលទានអាហារកើត ក្រុមគ្រួសារក៏បានបញ្ជូនលោកទៅមន្ទីរពេទ្យ ជោរ៉ៃ(ច្បារអំពៅ) តែគេធ្វើរ៉ាប៉ីតតេស្ត ឃើញមានវិជ្ជមានកូវីដ គេក៏បញ្ជូនមកមណ្ឌលព្យាបាលកូវីដ នៅស្តាតអូឡាំពិក។ មកដល់វេលានេះលោកលែងដឹងខ្លួន មានតែដង្ហើមដែលមានអ៊ុកស៊ីហ្សែនជំនួយប៉ុណ្ណោះ។

បើតាមលោក សេង តារា បានឱ្យដឹងដែរថា លោក ហេ ជុនសិ តន្រ្តីករវីយូឡុងជើងចាស់ ជាអ្មករត់​ការថតថាសចម្រៀង និងជាដៃឆ្វេងរបស់លោក ស៊ីន ស៊ីសាមុត​ ហើយលោកជាសាក្សីរស់ ជាឯក​សារ​រស់ដែលដឹងរឿងរ៉ាវបទចម្រៀង អ្នកចម្រៀង កវីនិពន្ធ​និងតន្រ្តីនានាស្ទើរតែទាំងអស់​កាលពីសម័យនោះ៕