តន្ត្រីករវីយូឡុងជើងចាស់ លោក ហេ ជុនសិ ទទួល​មរណភាព ក្រោយឆ្លងកូវីដ១៩

លោក ហេ ជុនសិ បានទទួលមរណភាពនៅម៉ោង ១២៖៤៥ នាទី ថ្ងៃទី ១០ ខែតុលានេះ នៅមណ្ឌលព្យាបាលជំងឺកូវីដ១៩ ស្តាតអូឡាំពិក។ នេះបើតាម លោក ម៉ៃ វឌ្ឍនា កវីនិពន្ធចម្រៀងជនបទបានឱ្យដឹងតាមរយៈបណ្តាញសង្គហ្វេសប៊ុកផេកផ្លូវការនាប៉ុន្មាននាទីមុននេះ។

លោក ហេង ជុនសិ មានវ័យ ៨២ ឆ្នាំ មានជំងឺប្រចាំកាយ កៀបសរសៃចង្កេះ។ កាលពីសប្ដាហ៍មុន លោកលែងទទួលទានអាហារកើត ក្រុមគ្រួសារក៏បានបញ្ជូនលោកទៅមន្ទីរពេទ្យ ជោរ៉ៃ (ច្បារអំពៅ) តែគេធ្វើរ៉ាប៉ីតតេស្ត ឃើញមានវិជ្ជមានកូវីដ គេក៏បញ្ជូនមកមណ្ឌលព្យាបាលកូវីដ នៅស្តាតអូឡាំពិក។

លោកគ្រូ ហេ ជុនសិ អតីតតន្ត្រីករវីយូឡុងជើងចាស់ និងជាជំនិតរបស់អធិរាជសំឡេងមាស ស៊ីន ស៊ីសាមុត ហើយជាម្ចាស់បទ «សោភីនីមាសស្នេហ៍»។

លោក ហេ ជុនសិ តន្រ្តីករវីយូឡុងជើងចាស់ ជាអ្មករត់​ការថតថាសចម្រៀង និងជាដៃឆ្វេងរបស់លោក ស៊ីន ស៊ីសាមុត​ ហើយលោកជាសាក្សីរស់ ជាឯក​សារ​រស់ដែលដឹងរឿងរ៉ាវបទចម្រៀង អ្នកចម្រៀង កវីនិពន្ធ​និងតន្រ្តីនានាស្ទើរតែទាំងអស់​កាលពីសម័យនោះ៕