ជីវិតកម្សាន្ដ

ផ្ទុះការរិះគន់ពេញបណ្តាញសង្គម ក្រោយឃើញការបង្ហាញឈុតល្បែងស៊ីសង ក្នុងកម្មវិធី Miss Grand Cambodia 2022

បានផុស

២ years មុន

នៅ

ថ្ងៃព្រហស្បតិ៍ ២៥ សីហា ២០២២

ដោយ

ទស្សនិកជន និងអ្នកប្រើប្រាស់បណ្តាញសង្គមហ្វេសប៊ុកជាច្រើន បានសម្តែងការមិនពេញចិត្ត និងផ្ទុះការរិះគន់ដោយមិនសំចៃមាត់ បន្ទាប់ពីឃើញការបង្ហាញឈុតល្បែងស៊ីសងក្នុងកម្មវិធី Miss Grand Cambodia 2022 ដែលប្រព្រឹត្តទៅកាលពីយប់ថ្ងៃទី ២៤ ខែសីហា ឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិតណាស់សម្រាប់កម្មវិធីប្រកួតសម្រស់ Miss Grand Cambodia 2022 កាលពីមិញ គឺបានឈានដល់វគ្គនៃការបង្ហាញឈុតតំណាងខេត្ត-ក្រុងចំនួន ៣៥ ដែលបង្ហាញដោយបេក្ខភាពទាំង ៣៥ នាក់។កត់សម្គាល់ក្នុងវគ្គនេះដែរ ចំពោះបេក្ខភាពទាំងអស់បាននាំយកឈុតដែលសម្គាល់នូវអត្តសញ្ញាណខេត្ត-ក្រុងនីមួយៗក្នុងប្រទេសកម្ពុជា ដើម្បីបង្ហាញនៅលើឆាកប្រកួតដល់ទស្សនិកជន និងអ្នកគាំទ្រ។

បេក្ខភាពមួយចំនួន តំណាងឲ្យខេត្ត-ក្រុងផ្សេងគ្នាភាគច្រើនសុទ្ធតែទទួលបានការគាំទ្រសរសើរនូវរូបសម្រស់ស្រស់ស្អាតជាមួយឈុតប្រណីត ដែលមានភាពទាក់ទាញភ្នែកជាមួយអត្ថន័យដ៏ល្អៗ។ ប៉ុន្តែផ្ទុយពីបេក្ខភាពដែលទទួលបានការគាំទ្រ និងសរសើរពីទស្សនិកជនក៏មានឈុតតំណាងក្រុងចំនួន ២ បានធ្វើឲ្យមហាជនសម្តែងការមិនពេញចិត្ត និងផ្ទុះការរិះគន់ពេញបណ្តាញសង្គម។

ឈុតទាំងពីរដែលផ្ទុះការរិះគន់ពីទស្សនិកជនរួមមាន ក្រុងបាវិត និងក្រុងប៉ោយប៉ែត ខណៈគេយល់ថាឈុតទាំងពីរនេះ មិនបានឆ្លុះបញ្ចាំងពីកិត្តិយសជាអត្តសញ្ញាណជាតិ និងតំណាងខេត្តឲ្យប្រជាជនកម្ពុជាទេ។

ជាក់ស្តែងនៅលើទំព័រហ្វេសប៊ុក “បុរាណាចារ្យ “បានសម្តែងការមិនពេញចិត្តដោយលើកឡើងថា យើងសូមសម្ដែងការមិនពេញចិត្តឈុតទាំង ២ នេះ ព្រះរាជាណាចក្រកម្ពុជាមិនបានរីកចម្រើនដោយសាល្បែងស៊ីសងទេ ហើយល្បែងស៊ីសងគ្មានកិត្តិយសជាអត្តសញ្ញាណតំណាងជាតិ តំណាងខេត្ត តំណាងឱ្យប្រជាជនកម្ពុជាទេ។ ល្បែងស៊ីសងមិនមែនជាមោទកភាពនៃប្រទេសកម្ពុជាយើងទេ។

ប្រភពបានលើកឡើងទៀតថា កុំថាឡើយអេតមីនដែលមិនពេញចិត្ត សូម្បីតែបារមីដូនតាបារមីជំនាងឆាកក៏មិនពេញចិត្តដែរ លោកបានប្រើឥទ្ធិឫទ្ធិផ្តាច់សំឡេងអត្ថាធិប្បាយ និងភ្លេងភ្លាមៗទាន់ហន់។ ក្នុងនាមយើងជាខ្មែរកាន់ព្រះពុទ្ធសាសនាយើង ឃើញរូបសន្លឹកបៀរ គ្រាប់អាប៉ោង ជាប់គ្នានឹងប្រាសាទអង្គរវត្តដូចនេះ តើយើងមានសេចក្តីអៀនខ្មាសដែរឬទេ? មានសេចក្តីខ្មាសអៀននូវអំពើបាបដែរឬទេ? ៕

អត្ថបទ៖ ចាន់រ៉ា