ជូរី ល្អហួស ប្រតិកម្មចំពោះនារីម្នាក់រិះគន់តិះដៀលប្រមាថកិត្តិយស

ជូរី ល្អហួស ដែលជាម្ចាស់មកុដ Miss Preteen International Cambodia2023 បានបញ្ចេញប្រតិកម្មដោយបង្ហាញអារម្មណ៍មិនសប្បាយចិត្តបន្ទាប់ពីត្រូវបានស្រ្តីម្នាក់ធ្វើការរិះគន់ដៀលប្រមាថកិត្តិយសធ្ងន់ៗតាមរយ:បណ្តាញសង្គមហ្វេសប៊ុកបង្កការភ្ញាក់ផ្អើលដល់អ្នកគាំទ្រ។

ប្រតិកម្មរបស់ម្ចាស់មកុដ Miss Preteen International Cambodia2023 រូបនេះបានធ្វើឡើងក្រោយពេលឃើញនារីម្នាក់ដែលប្រើប្រាស់ទំព័រហ្វេសប៊ុកមានឈ្មោះ ChanBophaPhol បានស៊ែររូបភាពរបស់ ជូរី ល្អហួស ភ្ជាប់សំណេរតិះដៀលថា មិនខ្វះពេលស៊ិចស៊ីទេ ហើយអាយុប៉ុណ្ណឹងទើប១៤ប្រញ៉ាប់ពាក់វាលដោះម្លេះ មិចចង់បានប្តីមែន?។

នារីម្ចាស់Account Facebookដដែលនេះបានរិះគន់ទៀតថា មិនសមភ្នែកទេនាងអើយ អ៊ីចឹងពាក់អាវធ្វើអ្វីជាខ្មែរមិនមែនបរទេសទេ ហេតុអ្វីក៏មិនចេះបិទបាំងខ្លះទៅបើសម្រស់ស្អាតហើយអ៊ីចឹងចរិតមាយាទឲ្យល្អថ្លៃថ្នូរហើយនាងមិចអាងខ្លួនកូនអ្នកមានធ្វើអ្វីក៏បានតាមចិត្ត?។

ជាប្រតិកម្មឆ្លើយតបការរិះគន់ខាងលើ បវរបញ្ញាវ័យក្មេង ជូរី ល្អហួស បានបង្ហាញការហួសចិត្តដូច្នេះថា “នាង ខ្ញុំទើបតែបញ្ចប់ការងារបញ្ចូលសំឡេងហើយក៏ឃើញអ្នកមីងស៊ែរដៀលរូបនាងខ្ញុំ មើលងាយនាងខ្ញុំ គ្រប់បែបយ៉ាងតើនាងខ្ញុំខុសអ្វី? នាងខ្ញុំពិតជាពិបាកទទួលយកខ្លាំងណាស់”។ ដោយឃើញបែបនេះអ្នកនាង ដេននី ក្វាន់ដែលត្រូវជាម្តាយ ល្អហួស បានប្រតិកម្មដែរថា ចរិតអ៊ីចឹងៗទុកអោយម៉ែលេងវិញត្រៀមយប់នេះកូនអញហាមប៉ះ៕

អត្ថបទ៖ ចាន់រ៉ា