នាយ ពាង ត្រៀមវះកាត់ដុំសាច់កាចអណ្តាតខាងឆ្វេងឆាប់ៗនេះ ខណៈកំពុងសម្រាកតាមដាននៅមន្ទីរពេទ្យ

ដូចទស្សនិកជនដឹងហើយតារាសម្តែង និងកំប្លែងនាយពាង ថ្មីៗនេះបានធ្វើឱ្យមហាជនអ្នកគាំទ្រមានការភ្ញាក់ផ្អើលនិងបារម្ភផងដែរ ខណ:ដែលតារាកំប្លែងជើងចាស់រូបនេះ បានប្រកាសសុំការបរិច្ចាគឈាមចំនួន ៤សាក់បន្ទាន់ ដើម្បីវះកាត់ព្យាបាលជំងឺប៉ុន្តែពុំបានបញ្ជាក់លម្អិតថាជាជំងឺអ្វីឡើយ។

តាមរយៈការផ្តល់សម្ភាសជាមួយ កម្ពុជាថ្មី នាយ ពាង បានបញ្ជាក់ថា បច្ចុប្បន្ននាយមានជំងឺដុះសាច់ត្រង់គល់អណ្តាតខាងឆ្វេងទើបត្រូវវះកាត់ដើម្បីយកសាច់នោះចេញ ព្រោះបើទុកវាដុះកាន់តែធំ ឬធ្ងន់ធ្ងរជាងនេះ។ តួយ៉ាង លោកកំពុងសម្រាកត្រៀមវះកាត់ក្នុងពេលឆាប់ៗ នៅមន្ទីរពេទ្យព្រះអង្គឌួង ។

នាយ ពាង បានបន្តថា លោកកំពុងស្ថិតក្នុងដំណាក់កាលព្យាបាល ដោយក្រុមគ្រូពេទ្យតម្រូវឱ្យលេបថ្នាំបញ្ចុះជាតិស្ករសិន ខណៈត្រៀមចូលវះកាត់នៅសប្តាហ៍ក្រោយនេះហើយ។ លោកគូសបញ្ជាក់ដែរថា អ្វីដែលធ្វើលោកបារម្ភបំផុតក្នុងដំណាក់កាលព្យាបាលនេះ គឺដោយសារតែសាច់ដែលត្រូវវះកាត់ចេញនោះ ជាសាច់កាច ។

ខណៈកំពុងស្ថិតក្នុងដំណាក់ព្យាបាលនិងតាមដានដែរនោះ នាយ ពាង ក៏បានអំពាវនាយដល់សប្បុរសជន ជួយបរិច្ចាគឈាម និងថវិកាដល់ខ្លួន ដើម្បីដោះស្រាយព្យាបាលជំងឺ។

ជាមួយគ្នានៃដំណឹងខាងលើនេះ ក៏មានមហាជន និងអ្នកគាំទ្របានជូនពរឱ្យតារាកំប្លែងរូបនេះ វះកាត់ដោយជោគជ័យហើយឆាប់ជាសះស្បើយពីជំងឺ៕ អត្ថបទ៖ ចាន់រ៉ា