ហ៊ិន ច័ន្ទនីរ័ត្ន ពោលរំភើបខ្លាំង ក្រោយបានថតរូបពពោះជុំនឹងស្វាមីពេញដោយអត្ថន័យ

ពិធីការិនីសម្បូរវោហាសព្ទ អ្នកនាង ហ៊ិន ច័ន្ទនីរ័ត្ន បង្ហាញពីក្តីរំភើបចិត្តជាខ្លាំង ខណ:ដែលនាងនិងស្វាមីបានសម្រេចនូវបំណងធំរបស់ខ្លួន ដោយទទួលបានចំណងដៃកូនដំបូងជាដំណក់ឈាមរួមគ្នា ក្រោយជីវិតអាពាហ៍ពិពាហ៍។ ជាងនេះទៅទៀត គឺការថតរូបជុំគ្រួសារពេញដោយអត្ថន័យ ក៏ព្រោះតែកន្លងមកច្រើនឆ្នាំ ខ្លួនធ្លាប់តែឃើញអ្នកផ្សេងថតបែបនេះ តែបច្ចុប្បន្នខ្លួនក៏ជាម្នាក់ក្នុងចំណោមនោះដែរ។

ជាមួយនឹងរូបថតប៉ុន្មានសន្លឹក ដែលបង្កប់នូវភាពផ្អែមល្ហែមនៃក្តីស្រលាញ់ អ្នកនាង ហ៊ិន ច័ន្ទនីរ័ត្ន រៀបរាប់ដូច្នេះថា “មិននឹកស្មានខ្លួននឹងមានរូបរាងបែបនេះទេ ធ្លាប់តែឃើញគេថត ពេលថតហើយក៏មានអារម្មណ៍មិនធ្លាប់មានពីមុន គឺក្តីស្រលាញ់ដ៏បរិសុទ្ធដែលកំពុងរង់ចាំជួបមុខកូននាពេលឆាប់ៗខាងមុខនេះ”។

ទន្ទឹមនេះ អ្នកនាងក៏ជូនពរអ្នកម្តាយគ្រប់រូបដែលកំពុងពពោះ មានសុខភាពល្អ ទាំងម្តាយនិងទារកក្នុងផ្ទៃ ហើយតាមរយ:សារនេះ ក៏មានការជូនពរជាច្រើនពីបណ្តាអ្នកគាំទ្រ និងមិត្តភក្តិរបស់នាងនៅក្នុងចង្កោមសិល្ប:ផងដែរ។

គួររម្លឹកថា គិតមកដល់ពេលនេះ អ្នកនាងហ៊ិន ច័ន្ទនីរ័ត្ន និងលោក ឌី ពេជ្រ បានចាប់ដៃគ្នាកសាងសុភមង្គលគ្រួសារជាង ជិត ២ឆ្នាំមកហើយ ដោយរាប់ចាប់ពីថ្ងៃទី២២ ខែធ្នូ ឆ្នាំ២០២៣ ខណៈបច្ចុប្បន្នកំពុងត្រៀមផ្តល់កំណើតកូនប្រុសឆាប់ៗខាងមុខនេះ៕ ចាន់រ៉ា