G-Devith រាយការណ៍ពីជំនួយទៅកាន់គោលដៅសំខាន់ៗ នៃមូលនិធិអ្នកចម្បាំងឈាមខ្មែរ ខណៈទើបចប់បេសកកម្ម ៣ថ្ងៃ

G-Devith និងសមាជិកក្រុម បានបំពេញបេសកកម្ម « មូលនិធិអ្នកចម្បាំងឈាមខ្មែរ – KHMER WARRIORS » ក្នុងរយៈពេលបីថ្ងៃជាប់គ្នា ពោល គឺចាប់ពីថ្ងៃទី០២ ដល់ថ្ងៃទី ០៤ខែសីហា ដោយបាននាំយកជំនួយជាស្បៀង សម្ភារៈចាំបាច់ ​ព្រមនិងថវិកាផងដែរ។

ក្នុងដំណើរនាំយកការឧបត្ថម្ភជូនវីរកងទ័ពនេះ​ លោកនិងក្រុមការងារបេសកកម្ម បានសួរសុខទុក្ខនិងប្រគល់ថវិកាដល់អ្នកកំពុងសម្រាកព្យាបាលធ្ងន់ស្រាលជាង ១២០នាក់ ព្រមទាំងទឹកប្រាក់ឧបត្ថម្ភមួយចំនួនដល់មន្ទីពេទ្យផងដែរ។

ដោយឡែក តាមរយៈមូលនិធិអ្នកចម្បាំងឈាមខ្មែរ លោក ងូន ចាន់ដាវិត បានបញ្ជាក់លម្អិតផងដែរនូវជំនួយដែលលោកនិងក្រុមការងារបេសកកម្មបាននាំយកទៅកាន់តំបន់ដែលត្រូវការជាចាំបាច់ ដែលរួមមានដូចជា៖
១. ស្បៀងមួយឡាន ២តោនកន្លះ ( សាច់​ស្ងួត​ ,​ ស្ករ​គ្រាប់​ ,​ អង្ករ​ ,​ សាប៊ូ​ និង​ របស់របរ​ចាំបាច់​ )​។
២. ចុះជួបនិង​ឧបត្តម្ភ​ដល់គ្រួសារ​វីរជន​ពលី​ ៨គ្រួសារ​ និង​ ទាហានអង្គភាពដែលបានចូលរួម​ចំនួន ៥០នាក់។
៣. ចុះ​សួរ​សុខទុក្ខ​និង​ឧបត្តម្ភ​ដល់បងប្អូនសម្រាក​ព្យាបាល​នៅ​មន្ទីរពេទ្យ​ធំៗចំនួនពីរទីតាំងនៃភូ​មិភាគ​ឧត្តរ។
៤. ឧបត្តម្ភ​ឧបករណ៍​ប្រេីប្រាស់ចាំបាច់ដល់កង​ទ័ព​ដូចជា អាយកូម , សូឡា , ទូរស័ព្ទ​ ,​ Computer ( Laptop ) , ម៉ាសុីន Printer , Tablet , PowerBank , Power Station, និង ឧបករណ៍​ប្រើប្រាស់​ចាំបាច់មួយចំនួន។
៥. ឧបត្តម្ភ​គាំទ្រដល់កងទ័ព​បានចំនួន៦​ទិសដៅ​ ភូមិភាគ​ ឧត្តរ​ និង​ ពាយ័ព្យ​។
៦. ឧបត្តម្ភ​ទៅកាន់គោលដៅតាក្របី​ អាយកូម​ ១០គ្រឿង​ ,​Power Box ៣គ្រឿង​ ,​ powerbank ១០ដុំ​ និង ចង្រ្កានហ្គាស​ ៧​ ។

បេសកកម្ម​​ដែលបានសម្រេចខាងលេីនេះ​ G-Devith ក្នុងនាមជាអ្នកតំណាងនៃបេសកកម្មមូលនិធិនេះ បានបួងសួងឱ្យទឹកចិត្តនៃសប្បុរជនចូលរួមដ៏ថ្លាថ្លៃនេះ សម្រេចផលដល់ល្អប្រសេីរ​ដល់​ប្រទេស​ជាតិ​ និង​បានដល់អ្នកចូលរួម​ឧបត្តម្ភ​គាំទ្រឱ្យបានសេចក្តីសុខ។

លោកថា “យេីងខ្ញុំជាអ្នកតំណាង​មូលនិធិ​នេះបានខិត​ខំប្រឹងសម្រេចឱ្យបាន​នូវ​សេចក្ដី​ទុកចិត្ត​ និង​ ការចែករំលែក​បាន​នូវក្តីស្រលាញ់​និង​ការ​យកចិត្តទុកដាក់​ខ្ពស់​បំផុត​ចំពោះ​វីរជន​យេីង”​។ ខណៈសកម្មភាពនៃទឹកចិត្តសប្បុរស​នេះ​ ត្រូវបានមហាជន​ពិសេស​កងកម្លាំងឈរជើងនៅតាមបន្ទាត់ព្រំដែនកម្ពុជា​ សម្តែងការអរគុណ និងជូនពរផងដែរ។

គួរជម្រាបថា​ នេះពុំមែនជាលើកទី១សម្រាប់ដំណើរបេសកកម្មនាំយកទឹកចិត្តសប្បុរសជន​ ទៅកាន់វីរកងទ័ពដែលកំពុងបំពេញភារកិច្ចការពារអធិបតេយ្យភាពកម្ពុជា៕