នៅក្នុងការបង្ហោះសារមួយនៅលើបណ្តាញសង្គម អំពីការចំណាយពេលក្នុងថ្ងៃឈប់សម្រាកបុណ្យជាតិ លោកស្រីបានសរសេរថា រូបលោកស្រីអាចសម្រាកបាន ៥ម៉ោងពេញ ជាលើកដំបូងបំផុតក្នុងពេលដ៏យូរមកនេះ។ នេះគឺជារឿងប្រសើរជាងមុនឆ្ងាយណាស់ បើធៀបទៅនឹងការសម្រាន្តជាប្រចាំរបស់លោកស្រី ដែលមានត្រឹមតែ «ពី ០ ទៅ ៣ម៉ោង» ប៉ុណ្ណោះក្នុងមួយយប់។

លោកស្រីបានសរសេររៀបរាប់ថា «នៅថ្ងៃធ្វើការ ពេលដែលខ្ញុំត្រឡប់ទៅដល់គេហដ្ឋានវិញ ពេលវេលាផ្ទាល់ខ្លួនរបស់ខ្ញុំត្រូវបានប្រើប្រាស់អស់គ្មានសល់ ទៅលើតែការសម្អាតបន្ទប់ទឹក, ងូតទឹក, រៀបចំអាហារពេលល្ងាច,លាងចានឆ្នាំង, បោកគក់សម្លៀកបំពាក់, និងរៀបចំទុកដាក់របស់របរបន្តិចបន្តួច»។

នាយករដ្ឋមន្ត្រីវ័យ៦៥ឆ្នាំរូបនេះ បាននិយាយបន្ថែមទៀតថា «ដូច្នេះ ពេលវេលានៅពេលយប់ជ្រៅបន្ទាប់ពីនោះ រហូតទល់ភ្លឺ គឺត្រូវបានចំណាយទៅលើការអានឯកសារនានា ដែលយកមកពីការិយាល័យនាយករដ្ឋមន្ត្រី ឬការត្រៀមលក្ខណៈសម្រាប់ការឆ្លើយសំណួរនៅក្នុងសភា»។

លោកស្រី Takaichi បានលើកឡើងទៀតថា ពេលវេលាទំនេរដែលនៅសេសសល់តិចតួចរបស់លោកស្រី គឺត្រូវបានប្រើប្រាស់សម្រាប់អ៊ុតកន្សែងជូតមុខ ការបោកគក់ដែលនៅសេសសល់ និងការដេរប៉ាក់សម្លៀកបំពាក់តែប៉ុណ្ណោះ។

អ្វីដែលដំបូងឡើយហាក់បីដូចជាការបង្ហោះសារបែបលេងសើចស្រាលៗ អំពីសម្ពាធក្នុងនាមជាមេដឹកនាំជាតិ ប៉ុន្តែវាបែរជាធ្វើឲ្យពលរដ្ឋជប៉ុនមានការភ្ញាក់ផ្អើលយ៉ាងខ្លាំង និងបានបង្កើតឲ្យមានការជជែកដេញដោលទូទាំងប្រទេស អំពីហានិភ័យនៃការខ្វះការសម្រាករបស់បុគ្គលដែលកាន់តំណែងកំពូលរបស់ជាតិ។

ដោយឡែក លោក Yuichiro Tamaki មេដឹកនាំគណបក្សប្រជាធិបតេយ្យដើម្បីប្រជាជន បានថ្លែងនៅក្នុងសន្និសីទសារព័ត៌មានមួយថា «ខ្ញុំគិតថាលោកស្រីគួរតែសម្រាកឲ្យបានច្រើនជាងនេះ»។ លោកបានចោទសួរថា «ហេតុអ្វីបានជាក្រុមការងារជុំវិញខ្លួនរបស់លោកស្រី មិនផ្តល់ការគាំទ្របន្ថែម ដើម្បីបង្កើតបរិយាកាសមួយដែលលោកស្រី អាចធ្វើការសម្រេចចិត្តសំខាន់ៗ ដោយមានស្មារតីស្រឡះល្អ?»។

ទោះជាយ៉ាងណា សហការីមួយចំនួនរបស់លោកស្រី Takaichi បានចេញមុខមកការពារ ដោយលោកស្រី Ayano Kunimitsu អនុរដ្ឋមន្ត្រីការបរទេស បានសរសេរនៅលើបណ្តាញសង្គម X ថា «មនុស្សម្នាក់ៗមានកាលៈទេសៈផ្សេងៗគ្នា និងមានរឿងរ៉ាវនៅពីក្រោយខ្នងរៀងៗខ្លួន ហើយនៅលើមូលដ្ឋាននៃការបំពេញកាតព្វកិច្ចក្នុងមុខតំណែងសាធារណៈ ខ្ញុំពិតជាមានអំណរគុណណាស់ ប្រសិនបើអ្នកទាំងអស់គ្នាអាចយោគយល់»។

នេះក៏មិនមែនជាលើកទីមួយទេ ដែលលោកស្រីមានកាលវិភាគសម្រាកតិចបែបនេះ កន្លងមក លោកស្រី Takaichi ក៏ធ្លាប់រងការរិះគន់ផងដែរ ចំពោះការកោះហៅជំនួយការមកប្រជុំនៅម៉ោង ៣ទៀបភ្លឺ ហើយនៅពេលដែលលោកស្រីបានឡើងកាន់តំណែងជានាយករដ្ឋមន្ត្រី គាត់បានប្រកាសថា លោកស្រីនឹងលុបចោលតុល្យភាពរវាងការងារនិងជីវិតផ្ទាល់ខ្លួន ហើយប្តេជ្ញាថា «ធ្វើការ ធ្វើការ ធ្វើការ ធ្វើការ និងធ្វើការ» តែប៉ុណ្ណោះ៕

អត្ថបទ ៖ សាង ស្រីល័ក្ខ

The post នាយករដ្ឋមន្ត្រី ជប៉ុន ទម្លាយថា សម្រាកបានតែ​៣ម៉ោងប៉ុណ្ណោះ ក្នុងមួយយប់ ចាប់តាំងពីចូលកាន់​តំណែង​​ appeared first on Kampuchea Thmey Daily.

​តាមរយៈ​ការ​ផ្សព្វផ្សាយ​របស់​​​បណ្តាញ​​​ទំនាក់​ទំនង​​សង្គមហ្វេសប៊ុករបស់​ក្រសួង​ការបរទេ​សរុស្ស៊ី​ ​ការ​ពិភាក្សា​របស់​ប្រមុខ​ការ​ទូត​ទាំងពីរ បាន​ផ្តោតលើ​ការ​ផ្លាស់ប្តូរទស្សនៈយ៉ាងហ្មត់ចត់លើបញ្ហាទ្វេភាគី និងអន្តរជាតិជាច្រើន ដោយកសាងឡើងលើទំនាក់ទំនងកម្រិតខ្ពស់ថ្មីៗនេះ។

​ជុំវិញ​ជម្លោះ​ជាមួយ​អ៊ុយក្រែន រដ្ឋមន្ត្រី​ការបរទេស​រុស្ស៊ី លោក Sergey Lavrov បាន​ប្រាប់​សមភាគីអាមេរិកអំពី​​ភាពមិនអាចទទួលយកបាននៃការបំពាក់អាវុធបន្ថែមទៀតដល់​អ៊ុយក្រែន​ពីសំណាក់​ភាគី​អាមេរិក​​ និង​គោលនយោបាយបង្កអស្ថិរភាពជាទូទៅរបស់បណ្តាប្រទេសអឺរ៉ុប ដែលបន្តស្វែងរកការបរាជ័យជាយុទ្ធសាស្ត្រលើប្រទេសរុស្ស៊ី។

ចំពោះ​ការ​ចរចា​​រកដំណោះស្រាយ​សន្តិភាព​វិញ លោករដ្ឋមន្ត្រី Lavrov បានបញ្ជាក់ជាថ្មីអំពីការត្រៀមខ្លួនរបស់រុស្ស៊ីសម្រាប់ការដោះស្រាយជម្លោះនយោបាយ និងការទូត និងការប្តេជ្ញាចិត្តរបស់ខ្លួនចំពោះសំណើដែលដាក់ចេញដោយភាគីអាមេរិកនៅក្នុងកិច្ចប្រជុំរវាងប្រធានាធិបតី Vladimir Putin និងលោក Donald Trump នៅទីក្រុង Anchorage រដ្ឋ​អាឡាស្កា​​រ​កាល​ពី​ខែ​សីហាឆ្នាំ​​មុន​​ ដែលមេដឹកនាំរុស្ស៊ីបានយល់ព្រម។

​លើស​ពីនេះ​ទៀត ​​ភាគី​អាមេរិក​និង​រុស្ស៊ី បាន​ពិភាក្សា​ផ្តោត​លើ​​បញ្ហាតំបន់ និងអន្តរជាតិ រួមទាំងស្ថានភាពនៅឈូងសមុទ្រពែរ្ស ដែល​កំពុង​ឆាបឆេះ​សង្គ្រាម​បន្ទាប់​ពីសហរដ្ឋអាមេរិក​​បើក​ការ​វាយប្រហារ​​លើ​អ៊ីរ៉ង់​​ជាថ្មី​ឈាន​ដល់​ថ្ងៃទី​១២​ជាប់ៗគ្នា និង គ្មាន​សញ្ញា​ណា​មួយ​ដែល​ភាគី​ជម្លោះ​វិល​ទៅរក​ការ​ចរចា​​ក្នុងពេលឆាប់ៗនេះ​ទេ​​។

​ចំពោះ​​កិច្ចសហប្រតិបត្តិលើ​វិស័​យ​វិទ្យាសាស្រ្តនៃ​មហាអំណាច​ទាំងពីរ​ លោក Sergey Lavrov និងលោក Marco Rubio បានស្វាគមន៍ចំពោះការបន្តទំនាក់ទំនងពេញលេញរវាង​ភ្នាក់ងារ​អវកាស​រុស្ស៊ី Roscosmos និង NASA របស់​សហរដ្ឋអាមេរិក​ ហើយក៏បានសម្តែងការគាំទ្រចំពោះការអភិវឌ្ឍនៃការផ្លាស់ប្តូរអន្តរសភា និងទំនាក់ទំនងវប្បធម៌ផងដែរ។

ក្រសួង​ការ​បរទេសរុស្ស៊ី ក៏បាន​លើក​ឡើង​ដែរ​ថា កិច្ច​ពិភាក្សា​របស់​​​ប្រមុ​ខ​ទូតទាំងពីរ ក៏បាន​ផ្តោត​ការយកចិត្តទុកដាក់ចំពោះការធ្វើឱ្យមុខងារនៃបេសកកម្មការទូតរវាងរុស្ស៊ី និងសហរដ្ឋអាមេរិកមានលក្ខណៈធម្មតា។ កិច្ចព្រមព្រៀងមួយត្រូវបាន​ព្រម​ព្រៀងគ្នា ដើម្បីបន្តទំនាក់ទំនងរវាងក្រសួងការបរទេស រួមទាំងតាមរយៈការចូលរួមរបស់ប្រទេសទាំងពីរនៅក្នុងអង្គការអន្តរជាតិ៕​

រ៉ាន់ រើយ​

The post រដ្ឋមន្ត្រីការបរទេស​រុស្ស៊ី​​ ប្រាប់សមភាគីអាមេរិក ​អំពី​ការ​មិនអាច​ទទួលយក​បាន​​ដែលអាមេរិក​បំពាក់​អាវុធ​ដល់​អ៊ុយក្រែន​ជាថ្មី​​ appeared first on Kampuchea Thmey Daily.

“តួអង្គសំខាន់ដែលនៅពីក្រោយភាពជោគជ័យរបស់ជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល គឺអាជ្ញាធរមូលដ្ឋាន។” នេះជាប្រសាសន៍លើកឡើងរបស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈគំរូថ្នាក់ជាតិ (គ.វ.ជ.) ក្នុងសិក្ខាសាលាចែករំលែកបទពិសោធស្តីពី «ការចូលរួមរបស់អាជ្ញាធរមូលដ្ឋានក្នុងការកសាងអង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល» នៅទីស្តីការក្រសួងមហាផ្ទៃ។

ថ្លែងក្នុងពិធីនេះ ឯកឧត្តមឧបនាយករដ្ឋមន្ត្រី បានគូសបញ្ជាក់បន្ថែមលើប្រសាសន៍ខាងលើថា អាជ្ញាធរមូលដ្ឋាន គឺជាតួអង្គមិនអាចខ្វះបានក្នុងជវភាពនៃប្រព័ន្ធតួអង្គតែមួយ និងជាតួអង្គដើរតួនាទីស្នូលក្នុងការសម្របសម្រួល តម្រង់ទិស ព្រមទាំងគាំទ្រយ៉ាងសកម្មដល់ការកសាង និងអភិវឌ្ឍអង្គភាពសាលារៀន និងមន្ទីរពេទ្យ ក៏ដូចជាការកែលម្អគុណភាព និងប្រសិទ្ធភាពនៃការផ្តល់សេវាទាំងពីរនេះ ជូនប្រជាពលរដ្ឋនៅតាមមូលដ្ឋានរបស់ខ្លួន។

ឯកឧត្តមឧបនាយករដ្ឋមន្ត្រី បានបញ្ជាក់ថា៖ “កន្លងមក ដើម្បីឱ្យអង្គភាពសាលារៀន និងមន្ទីរពេទ្យ ដែលមិនទាន់ទទួលបានជ័យលាភី បានជ្រួតជ្រាបអំពីទស្សនទាន និងបទពិសោធន៍នៃការគ្រប់គ្រង គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) បានរៀបចំសិក្ខាសាលាចែករំលែកបទពិសោធនេះជាច្រើនលើកច្រើនសារមកហើយ ក្នុងរូបភាពរវាងសាលារៀននិងសាលារៀន និងរវាងមន្ទីរពេទ្យនិងមន្ទីរពេទ្យ។”

ទាក់ទិននឹងការចែករំលែកបទពិសោធនេះ ឯកឧត្តម ហ៊ុន ម៉ានី បានរំលេចថា កន្លងមក គ.វ.ជ. ធ្លាប់បានរៀបចំសិក្ខាសាលាចែករំលែកបទពិសោធជាច្រើនលើកមកហើយ ក្នុងរូបភាពរវាងសាលារៀននិងសាលារៀន និងរវាងមន្ទីរពេទ្យនិងមន្ទីរពេទ្យ ដើម្បីផ្តល់ឱកាសឱ្យអង្គភាពដែលមិនទទួលបានជ័យលាភី បានស្វែងយល់ពីទស្សនទាន និងបទពិសោធនៃការគ្រប់គ្រងពីអង្គភាពជ័យលាភី។

ដោយឡែក សម្រាប់សិក្ខាសាលានាពេលនេះ ឯកឧត្តមឧបនាយករដ្ឋមន្ត្រី បានចាត់ទុកថាជាឱកាសដ៏វិសេសវិសាលបំផុត ដែលកើតចេញពីគំនិតផ្តួចផ្តើមរួមគ្នារវាងក្រសួងមុខងារសាធារណៈ គ.វ.ជ. និងក្រសួងមហាផ្ទៃ។ សិក្ខាសាលានេះ ធ្វើឡើងក្នុងគោលបំណងចែករំលែកបទពិសោធផ្ទាល់របស់អាជ្ញាធរមូលដ្ឋាន ក្នុងការកសាងអង្គភាពជ័យលាភី ជូនទៅដល់អាជ្ញាធរមូលដ្ឋានផ្សេងទៀតដែលមិនទាន់មានជ័យលាភីក្នុងមូលដ្ឋានរបស់ខ្លួន ឱ្យទទួលបានគន្លឹះ និងបទពិសោធល្អៗយកទៅអនុវត្តបន្ត៕

The post ឧបនាយករដ្ឋមន្ត្រី ហ៊ុន ម៉ានី៖ អាជ្ញាធរមូលដ្ឋាន ជាតួអង្គមិនអាចខ្វះបាននៅពីក្រោយភាពជោគជ័យ នៃអង្គភាពផ្តល់សេវាសាធារណៈគំរូ appeared first on Kampuchea Thmey Daily.

អ្នកឧកញ៉ា គិត ម៉េង បានលើកឡើងនៅក្នុងជំនួបពិភាក្សាការងារជាមួយលោកស្រី វីវៀន ឡូស សាន់ម៉ាទីន (Vivian Loss Sanmartin) ឯកអគ្គរដ្ឋទូតវិសាមញ្ញ និងពេញសមត្ថភាពនៃ​សាធារណរដ្ឋសហព័ន្ធប្រេស៊ីលប្រចាំកម្ពុជា នៅព្រឹកថ្ងៃទី ២៣ កក្កដា ២០២៦។

លោកស្រី វីវៀន ឡូស សាន់ម៉ាទី បានបង្ហាញនូវបំណងប្រាថ្នាយ៉ាងមុតមាំក្នុងការជំរុញកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅបន្ថែមទៀត តាមរយៈការលើកកម្ពស់​ទំនាក់ទំនងសេដ្ឋកិច្ច ពាណិជ្ជកម្ម និងជំរុញគណៈប្រតិភូធុរកិច្ចរវាងប្រទេសទាំងពីរ ដើម្បី​ពង្រីកឱកាសវិនិយោគថ្មីៗ និងនាំមកនូវប្រយោជន៍ទៅវិញទៅ​មក​សម្រាប់ប្រជាជាតិ​ទាំងពីរ និង​បានវាយតម្លៃខ្ពស់ចំពោះសក្តានុពលសេដ្ឋកិច្ចកម្ពុជា។

អ្នកឧកញ៉ា គិត ម៉េង អបអរសាទរចំពោះការ បង្កើតស្ថានទូតប្រេស៊ីលនៅរាជធានីភ្នំពេញ ក្នុងការបន្តពង្រឹងទំនាក់ទំនងការទូត និងសេដ្ឋកិច្ចរវាងប្រទេសទាំងពីរ។

រាជរដ្ឋាភិបាលកម្ពុជាបានបង្កើតក្របខ័ណ្ឌធុរកិច្ចដ៏ល្អប្រសើរ ដែលអនុញ្ញាតឱ្យវិនិយោគិន​បរទេសមានកម្ម​សិទ្ធិ ១០០% លើស្ទើរគ្រប់វិស័យ ដើម្បីទាក់ទាញ ការវិនិយោគផ្ទាល់ ព្រមទាំងការបង្កើតតំបន់សេដ្ឋកិច្ចពិសេស ក្នុងនោះរដ្ឋាភិបាលកម្ពុជាកំពុងការពារការ​វិនិយោគដែលមានស្រាប់ ទាក់ទាញធុរកិច្ចថ្មីៗ និងអនុវត្តការកែទម្រង់យ៉ាង​សកម្មដើម្បីគាំទ្រ​ដល់សហគ្រាសធុនតូច និងមធ្យម (SMEs)។

អ្នកឧកញ៉ា បានស្នើ​ លោកជំទាវ​ឯក​អគ្គរដ្ឋ​ទូត​ ជំរុញ​ដល់​រដ្ឋាភិបាល​ប្រទេស​ទាំងពីរ​៖ ១) ជំរុញ​កិច្ចព្រមព្រៀង​​ពាណិជ្ជកម្មសេរីទ្វេភាគី (FTA) ២)កិច្ចព្រមព្រៀងជំរុញ និងការពារការវិនិយោគ និង ៣) កិច្ចព្រមព្រៀងស្តីពីការចៀសវាងការយកពន្ធត្រួតគ្នា (DTA)។

អ្នក​ឧកញ៉ាជំរុញ​លើកកម្ពស់វិស័យទេសចរណ៍ និងលំហូរភ្ញៀវទេសចរ តាមរយៈការសិក្សាលើការបង្កើតជើងហោះហើរត្រង់ និងការសម្របសម្រួលទិដ្ឋាការទេសចរណ៍។

អ្នក​ឧកញ៉ា បន្ថែម​ថា កម្ពុជាមានទីតាំងយុទ្ធសាស្ត្រនៅចំកណ្តាលអាស៊ាន ដែលផ្តល់នូវច្រកចូលទីផ្សារតំបន់ដ៏ធំ​ ហើយ​អាស៊ាន​គឺ​ជា​តំបន់​ដែល​កំពុង​មាន​កំណើន​ខ្ពស់ ទោះបីជាមានបញ្ហាប្រឈម និងជម្លោះនៅមជ្ឈិមបូព៌ាក៏ដោយ។

ភាគីទាំងពីរបានឯកភាព​ជា​គោលការណ៍​ លើចំណុចដែល​បាន​ពិភាក្សា​ និងត្រៀមខ្លួនក្នុងការ​ស្វាគមន៍ដំណើរទស្សនកិច្ចរបស់គណៈប្រតិភូធុរកិច្ចប្រេស៊ីលមកកម្ពុជា និងពីកម្ពុជាទៅ​ប្រេស៊ីល​នាពេលអនាគត ដើម្បីទាក់​ទាញការវិនិយោគផ្ទាល់ និងពង្រឹងទំនាក់ទំនងការទូត និងសេដ្ឋកិច្ចនៃប្រទេសទាំងពីរ៕

The post កម្ពុជាស្នើឱ្យប្រេស៊ីល ជំរុញ​កិច្ចព្រមព្រៀងពាណិជ្ជកម្មសេរីទ្វេភាគី appeared first on Kampuchea Thmey Daily.

មានភាពចម្រូងចម្រាស់ខ្លាំង ជុំវិញកញ្ចប់ថវិកាសម្រាប់យកទៅប្រើក្នុងសង្គ្រាមមជ្ឈិមបូព៌ា ខណៈសមាជិកសភាមួយចំនួន បានស្តីបន្ទោសចំៗ នៅចំពោះមុខរដ្ឋមន្ត្រីក្រសួងសង្គ្រាម Pete Hegseth ថា បានយកលុយទៅជះចោល និងចំណាយដោយគ្មានសមហេតុផល ទាល់តែសោះ។

ពីដំបូងឡើយ អ្នកជំនាញអន្តរជាតិ នាំគ្នាលើកឡើងដូចៗគ្នាថា បើសភាជាតិ មិនអនុម័តកញ្ចប់ថវិកាបន្ថែមទេនោះ អាមេរិកអាចច្បាំងជាមួយអ៊ីរ៉ង់ បានត្រឹមតែប៉ុន្មានសប្តាហ៍ទៀតប៉ុណ្ណោះ។

អ្នកជំនាញ បានលើកយកហេតុផលចំនួន២ ក្នុងចំណោមហេតុផលជាច្រើនទៀត មកបកស្រាយ ក្នុងនោះមានដូចជា ការអស់សាច់ប្រាក់សម្រាប់ប្រតិបត្តិការភ្លាមៗ និងសម្ពាធសេដ្ឋកិច្ច-នយោបាយក្នុងស្រុក។

មន្ត្រីជាន់ខ្ពស់មន្ទីរបញ្ចកោណ ព្រមានថា ថវិកាប្រតិបត្តិការស្នូលរបស់កងទ័ពអាមេរិក ប្រហែលអស់ត្រឹមចុងខែកក្កដានេះហើយ ដូច្នេះត្រូវមានលុយបង្វិលបន្ថែម។ ចំណែក បើនិយាយអំពីសម្ពាធសេដ្ឋកិច្ច និងនយោបាយវិញ, ការដែលអ៊ីរ៉ង់ បិទច្រក Hormuz បានរុញតម្លៃប្រេងនៅអាមេរិក ឲ្យហក់ឡើងខ្ពស់បំផុត។

ម្យ៉ាង ស្របពេលការបោះឆ្នោតពាក់កណ្តាលអាណត្តិ កាន់តែខិតជិតមកដល់ផងដែរនោះ ប្រជាជនអាមេរិក ចាប់ផ្តើមមិនពេញចិត្តនឹង សង្គ្រាមគ្មានថ្ងៃបញ្ចប់ នេះហើយ ដែលដាក់សម្ពាធកាន់តែធ្ងន់លើរដ្ឋបាលលោក ដូណាល់ ត្រាំ ឲ្យស្វែងរកផ្លូវចរចាបញ្ចប់សង្គ្រាម ដាច់ខាត។

ទោះបីជាយ៉ាងណាក៏ដោយ ឥឡូវ អ្វីៗបានប្រែប្រួលហើយ ដោយសភា​តំណាង​រាស្ត្រ​អាមេរិក ​បានអនុម័ត​ថវិកា​ចំនួន ​៩៥ប៊ីលានដុល្លារ​អាមេរិក នៅថ្ងៃ​ទី២២ ខែកក្កដា ដោយ​ថវិកា​ភាគ​ច្រើន​ត្រូវបានបម្រុងទុក​សម្រាប់មន្ទីរ​បញ្ចកោណ​ ដើម្បីផ្តល់មូលនិធិ​ដល់សង្គ្រាមប្រឆាំង​នឹងអ៊ីរ៉ង់។

ទីភ្នាក់​ងារសារព័ត៌មាន AFP ផ្សាយ​នៅ​ថ្ងៃ​ទី​២៣ ខែ​កក្កដា ឆ្នាំ ២០២៦ ថា វិធានការនេះ ​ត្រូវ​បានអនុម័ត​ដោយសំឡេងប្រកៀក​ប្រកិត​គ្នា ២១៦ ទល់​នឹង ២១៤ ក្នុងការ​បោះ​ឆ្នោត​ ​ហើយលទ្ធផល បានទៅដល់ដៃព្រឹទ្ធសភាហើយ។

ក្នុងនោះ ថវិកា ​៧៣ប៊ីលាន​ដុល្លារ នឹងបែងចែកទៅឲ្យ​ កងកម្លាំង​ប្រដាប់​អាវុធ និងទីភ្នាក់ងារចារកម្ម ជាពិសេស ​ដើម្បីផ្តល់មូលនិធិដល់​ប្រតិបត្តិការ ដែលទាក់ទងនឹងសង្គ្រាមប្រឆាំង​អ៊ីរ៉ង់ ខណៈ ១២ប៊ីលានដុល្លារ នឹងយកទៅជួយ អ្នកទាំងឡាយណា ​ដែលរងផលប៉ះពាល់​ដោយសង្គ្រាមពាណិជ្ជកម្ម របស់លោកត្រាំ ខណៈ ១០ប៊ីលានដុល្លារទៀត ​នឹងត្រូវប្រើប្រាស់សម្រាប់​កម្មវិធី ទាក់ទងការបោះឆ្នោត។

ការអនុម័តនេះ បានន័យថា អាមេរិក រឹងដៃរឹងជើង អាចច្បាំងជាមួយអ៊ីរ៉ង់ តទៅរាប់ខែទៀត ឬអាចចូលដល់ជាងមួយឆ្នាំក៏ថាបាន អាស្រ័យលើទំហំនៃប្រតិបត្តិការ៕

អត្ថបទ៖ សុវណ្ណ

The post តើអាមេរិក អាចបន្តប្រតិបត្តិការ វាយប្រហារអ៊ីរ៉ង់ យូរប៉ុនណាទៀត? appeared first on Kampuchea Thmey Daily.

នៅក្នុងវគ្គបណ្តុះបណ្តាលដ៏មានសារៈសំខាន់នេះ គ្រូបង្គោលនៃមជ្ឈមណ្ឌលបណ្ដុះបណ្ដាលសុវត្ថិភាព និងសុខភាពការងារ នៃនាយកដ្ឋានពេទ្យការងារ បានធ្វើបទបង្ហាញជូនដល់សិក្ខាកាម អំពីឧបករណ៍សុវត្ថិភាពគ្រឿងម៉ាស៊ីនដែលមានហានិភ័យខ្ពស់ ប្រព័ន្ធសុវត្ថិភាពឡចំហាយ និងការប្រើប្រាស់បំពង់ពន្លត់អគ្គិភ័យជាដើម។

លើសពីនេះ សិក្ខាកាមបានពិនិត្យមើលជាក់ស្ដែងអំពីប្រសិទ្ធភាពនៃការប្រើប្រាស់សម្ភារៈការពារបុគ្គល​(PPE) ខ្សែក្រវាត់សុវត្ថិភាព មួកសុវត្ថិភាព ស្បែកជើងសុវត្ថិភាព ជាពិសេសបានពិសោធដោយផ្ទាល់ពីការធ្លាក់ពីទីខ្ពស់ និងការប្រើខ្សែក្រវាត់សុវត្ថិភាពពេញដងខ្លួន (Full Body Harness) សម្រាប់សុវត្ថិភាពការងារទីខ្ពស់ និងអនុវត្តការពិសោធអំពីការសង្គ្រោះផ្លូវដង្ហើម (CPR) ដែលដើរតួនាទីយ៉ាងសំខាន់ក្នុងការសង្គ្រោះកម្មករនិយោជិត និងលើកកម្ពស់សុវត្ថិភាព និងសុខភាពការងារ។ វគ្គបណ្តុះបណ្តាលនេះក៏បានផ្សារភ្ជាប់សិក្ខាកាម ជាមួយនឹងការវិវត្តនៃឌីជីថលភាវូបនីយកម្មលើការបណ្ដុះបណ្ដាលស្ដីពីសុវត្ថិភាព និងសុខភាពការងារនៅកម្ពុជាផងដែរ។

មជ្ឈមណ្ឌលបណ្តុះបណ្តាលសុវត្ថិភាព និងសុខភាពការងារ តែងតែបានបង្ហាញពីការយកចិត្តទុកដាក់ខ្ពស់ ក្នុងការពង្រឹងសមត្ថភាពដល់ភាគីពាក់ព័ន្ធលើផ្នែកសុវត្ថិភាព និងសុខភាពការងារ (OSH) តាមរយៈការបណ្ដុះបណ្ដាលប្រកបដោយគុណភាព និងប្រសិទ្ធភាពដោយរួមបញ្ជូលទាំងការសិក្សាផ្នែកទ្រឹស្ដី និងការអនុវត្តដោយផ្ទាល់ជាមួយបរិក្ខារបណ្ដុះបណ្ដាលទំនើបៗស្របតាមការវិវត្តនៃពិភពការងារ៕

The post បុគ្គលិក និងគ្រូពេទ្យប្រចាំសហគ្រាស ក្រុមហ៊ុន និងរោងចក្រ ពង្រឹងសមត្ថភាពបន្ថែមអំពី«មូលដ្ឋានគ្រឹះសុវត្ថិភាព និងសុខភាពការងារ» appeared first on Kampuchea Thmey Daily.

តំណាងពាណិជ្ជកម្មអាមេរិក (USTR) លោក Jamieson Greer បានបង្ហើបក្នុងបទសម្ភាសជាមួយ CNBC កាលពីថ្ងៃអង្គារ ក្រោយត្រូវបានចោទសួរពាក់ព័ន្ធនឹងពន្ធថ្មីថា៖ «យើងរំពឹងថានឹងមានវិធានការមួយចំនួនក្នុងពេលឆាប់ៗនេះ» ប៉ុន្តែលោកមិនអាចបញ្ជាក់ពេលវេលាច្បាស់លាស់បានទេ ដោយសារត្រូវជូនដំណឹងដល់សភា និងភាគីពាក់ព័ន្ធជាមុន។

ការប្រកាសនេះកើតឡើង​ប៉ុន្មានថ្ងៃប៉ុណ្ណោះ បន្ទាប់ពីរដ្ឋបាល ត្រាំ បានដាក់ពន្ធថ្មី ៥០% លើទំនិញពីកាណាដា និង ២៥% លើទំនិញនាំចូលពីប្រេស៊ីល ​ខណៈពន្ធបណ្តោះអាសន្នមួយទៀតរបស់អាមេរិក ​នឹងផុតកំណត់នៅថ្ងៃសុក្រនេះ។

ហេតុអ្វីអាមេរិក​ដាក់ពន្ធថ្មី?

កាលពីខែកុម្ភៈ តុលាការកំពូលអាមេរិកបានសម្រេចថា ពន្ធគយបដិការ​ ឬ ​«Reciprocal Tariffs» ដែលលោក ត្រាំ ប្រកាសឡើងកាលពីឆ្នាំ ២០២៥ ថាខុសច្បាប់ និងត្រូវលុបចោល។ តុលាការបានសម្រេចថា ច្បាប់​​ស្តីពីអំណាចសេដ្ឋកិច្ច​ក្នុងគ្រាអាសន្នអន្តរជាតិ (IEEPA) ដែលរដ្ឋបាល ត្រាំ បានប្រើប្រាស់ គឺមិនបានផ្តល់សិទ្ធិគ្រប់គ្រាន់សម្រាប់ការដាក់ពន្ធ​នោះទេ។

​ក្រោយការសម្រេចនេះ រដ្ឋបាល ត្រាំ បានស្វែងរកមូលដ្ឋានច្បាប់ផ្សេងទៀត ដើម្បីបន្តយុទ្ធសាស្ត្រពន្ធរបស់ខ្លួន។ ពន្ធថ្មី​រដ្ឋបាលគ្រោងប្រកាសឡើងនោះ នឹងប្រើប្រាស់មាត្រា ៣០១ នៃច្បាប់ពាណិជ្ជកម្មឆ្នាំ១៩៧៤ ដែលអនុញ្ញាតឱ្យអាមេរិកចាត់វិធានការលើប្រទេសដែលខ្លួនចោទថាមានការអនុវត្តពាណិជ្ជកម្មមិនយុត្តិធម៌ ដែលរួមបញ្ជូលទាំងបញ្ហា​កម្លាំងពលកម្មដោយបង្ខំ។

លោក Greer បាននិយាយថា ការស៊ើបអង្កេតថ្មីផ្តោតលើបញ្ហាពលកម្មដោយបង្ខំ ដោយបញ្ជាក់ថា៖ «សហរដ្ឋអាមេរិកមានច្បាប់ហាមឃាត់ការជួញដូរទំនិញដែលផលិតដោយពលកម្មដោយបង្ខំ។ ប្រទេសផ្សេងៗជាច្រើនមិនមានច្បាប់បែបនេះ ឬមិនបាន​អនុវត្តវា​ឱ្យ​មានប្រសិទ្ធភាព»។

គួរកត់សម្គាល់ថា មុន​ដាក់វិធានការថ្មី រដ្ឋបាល ត្រាំ ក៏បានប្រើពន្ធបណ្តោះអាសន្នតាមមាត្រា ១២២ នៃច្បាប់ពាណិជ្ជកម្មឆ្នាំ១៩៧៤ ដែលដាក់ពន្ធ ១០% លើការនាំចូលទូទៅ។ ពន្ធនេះត្រូវផុតកំណត់នៅថ្ងៃសុក្រ ប្រសិនបើសភាមិនចាត់វិធានការបន្ត។

ដើម្បីបន្តគោលនយោបាយពន្ធ រដ្ឋបាលអាមេរិកកំពុងប្តូរទៅប្រើមាត្រា ៣០១ ដែលអ្នកជំនាញមួយចំនួនមើលឃើញថាអាចមានភាពរឹងមាំជាងផ្នែកច្បាប់។

កម្ពុជានិងប្រទេសអាស៊ីក្នុងបញ្ជី

យោងតាម USTR ប្រទេសប្រមាណ ៦០ រួមទាំងសហភាពអឺរ៉ុប និងសម្ព័ន្ធមិត្តជាច្រើន ត្រូវបានស៊ើបអង្កេតពាក់ព័ន្ធនឹងពលកម្មដោយបង្ខំ និងបញ្ហាពាណិជ្ជកម្ម រួមទាំងផលិតកម្មលើសលុប។

កម្ពុជាស្ថិតក្នុងក្រុមប្រទេសដែលអាចទទួលរងអត្រាពន្ធ ១០% ដោយសារតែ​មាន​កិច្ចព្រមព្រៀងពាណិជ្ជកម្មបដិការជាមួយអាមេរិក ដែលចែកអំពីការប្ដេជ្ញាចិត្តលើដំណោះស្រាយបញ្ហាកម្លាំងពលកម្មដោយបង្ខំ។ ប្រទេស ឬដែនដីក្នុងតំបន់ដែលប្រឈមនឹងពន្ធក្នុងអត្រាដូចគ្នារួមមាន​បង់ក្លាដែស ឥណ្ឌូណេស៊ី ម៉ាឡេស៊ី និងតៃវ៉ាន់ជាដើម។

​ដោយឡែក​ប្រទេសដូចជា ថៃ ហ្វីលីពីន ចិន ជប៉ុន និងកូរ៉េខាងត្បូង អាចប្រឈមអត្រាពន្ធប្រហែល ១២,៥% ដោយសារ​​​បរាជ័យ «ក្នុងការអនុវត្តការហាមឃាត់ការនាំចូលកម្លាំងពលកម្មដោយបង្ខំប្រកបដោយប្រសិទ្ធភាព»។

ផលប៉ះពាល់លើពាណិជ្ជកម្មពិភពលោក

អ្នកជំនាញពាណិជ្ជកម្មបានព្រមានថា ពន្ធថ្មីអាចបង្កើនភាពមិនប្រាកដប្រជាសម្រាប់ខ្សែច្រវ៉ាក់ផ្គត់ផ្គង់ពិភពលោក ខណៈប្រទេសនាំចេញនៅអាស៊ី អាចរងសម្ពាធពីការកើនឡើងថ្លៃដើម និងការផ្លាស់ប្តូរទិសដៅវិនិយោគ។

លោក Blake Harden អ្នកជំនាញគោលនយោបាយពាណិជ្ជកម្ម បាននិយាយប្រាប់ CNBC ថា រដ្ឋបាល ត្រាំ កំពុងព្យាយាម «បង្កើតឡើងវិញ» នូវយុទ្ធសាស្ត្រពន្ធសកល តាមរយៈឧបករណ៍ច្បាប់ផ្សេងទៀត។

ការផ្លាស់ប្តូរនេះបង្ហាញថា សង្គ្រាមពាណិជ្ជកម្មរបស់អាមេរិកអាចបន្តជាបញ្ហាសំខាន់សម្រាប់សេដ្ឋកិច្ចពិភពលោក ក្នុងពេលដែលប្រទេសនាំចេញកំពុងតាមដានយ៉ាងជិតស្និទ្ធនូវវិធានការថ្មីពីទីក្រុងវ៉ាស៊ីនតោន៕

The post ពិភពលោកប្រឈមនឹងពន្ធអាមេរិកថ្មី ដោយរដ្ឋបាល ត្រាំ គ្រោងប្រកាសពន្ធពលកម្មដោយបង្ខំ ហើយប៉ះទាំងកម្ពុជា appeared first on Kampuchea Thmey Daily.

លោក ហួត សេងទ្រី

នេះ​បើ​តាម​ការ​បញ្ជាក់​ពី​លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡា ​ថា​ ការ​ប្រកួត​កីឡា​ជាតិ​លើកទី៥​ និង​កីឡាជនពិការ​ លើកទី៣​ ឆ្នាំ២០២៦ នឹង​ប្រព្រឹត្ត​ទៅ​ចាប់​ពី​ថ្ងៃទី៥​ រហូតដល់ថ្ងៃទី១៣​ ខែវិច្ឆិកា​ ឆ្នាំ២០២៦​ នៅរាជធានីភ្នំពេញ ខេត្តកែប ស្វាយរៀង និងខេកំពង់ឆ្នាំង ។

ពិធីបើកការប្រកួតជាផ្លូវការធ្វើ​នៅថ្ងៃទី៧ ខែវិច្ឆិកា ឆ្នាំ២០២៦ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុង​ពហុកីឡដ្ឋានជាតិអូឡាំពិក។ ចំណែក​ពិធី​បិទ​នឹង​ធ្វើ​ឡើង​នៅថ្ងៃទី១៣ ខែវិច្ឆិកា ឆ្នាំ២០២៦ ក្រោមអធិបតីលោក​ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា តំណាងដ៏ខ្ពង់ខ្ពស់នាយករដ្ឋមន្ត្រី នៃព្រះរាជាណាចក្រកម្ពុជា។​

ទិដ្ឋភាព​កីឡាជាតិ​កន្លងទៅ

បញ្ជាក់​ដែរ​ថា​ កម្ពុជា​បាន​រៀបចំ​ព្រឹត្តិការណ៍​កីឡា​ជាតិ​នេះ​ចំនួន ​៤លើក​រួច​មក​ហើយ។ ព្រឹត្តិការណ៍​នេះ​រៀបចំ​ឡើង​ក្នុង​ការ​វាស់ស្ទង់​ និង​វាយ​តម្លៃ​សមត្ថភាព​កីឡាករ​ កីឡាការិនី​ និង​សហព័ន្ធ​កីឡា​ជាតិ​ផ្សេងៗ​មុន​ត្រៀម​ចូលរួម​ការ​ប្រកួត​កម្រិត​អន្តរជាតិ​ដូច​ជា​ស៊ីហ្គេម​ជា​ដើម។​ កីឡា​ជាតិ​ឆ្នាំ​នេះ​នឹង​មាន​ ៣២​ប្រភេទ​កីឡា​ចូលរួម​ប្រកួតប្រជែង​ និង​ផ្នែក​ប៉ារ៉ាឡាំពិក នឹង​មាន​ ៧​ប្រភេទ​កីឡា​ផង​ដែរ៕​

ទិដ្ឋភាព​កីឡាជាតិ​កន្លងទៅ

អត្ថបទដោយ៖ នួន ស៊ីណា​

The post កម្ពុជា​ នឹង​រៀបចំ​ការ​ប្រកួត​កីឡា​ជាតិ​លើក​ទី៥​ អំឡុង​ខែ​វិច្ឆិកា​ ឆ្នាំ​២០២៦​ appeared first on Kampuchea Thmey Daily.