ព័ត៌មានអន្ដរជាតិ

អាមេរិកនិងNATO រកឃើញក្របខណ្ឌថ្មី ដើម្បីការពារតំបន់អាកទិកពីរុស្ស៊ី និងចិន

បានផុស

៤ ខែ មុន

នៅ

ថ្ងៃសុក្រ ២៣ មករា ២០២៦

ដោយ

ប្រធានាធិបតី សហរដ្ឋអាមេរិក លោក ដូណាល់ ត្រាំ បានប្រកាសពី «ក្របខ័ណ្ឌ»ថ្មីមួយស្តីពីកោះ Greenland ដោយត្រូវបានយល់ព្រមជាមួយអគ្គលេខាធិការអង្គការណាតូលោក Mark Rutte ដើម្បីការពារដែនដីនៅតំបន់អាកទិក។ លោក ដូណាល់ត្រាំ និងលោក Mark បានជជែកគ្នាលើរបៀបធ្វើការថ្មី បន្ទាប់ពីភាគីទាំងពីរ បានជួបពិភាក្សាគ្នាអំឡុងវេទិកាសេដ្ឋកិច្ចពិភពលោក នៅប្រទេសស្វីស។

លោក Mark Rutte ពិភាក្សាជាមួយលោក ត្រាំ នៅប្រទេសស្វីស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិភាក្សារវាងប្រមុខដឹកនាំដ៏មានអំណាចទាំងពីរ បានធ្វើឲ្យស្ថានភាពតានតឹងបានថមថយវិញ រវាងណាតូ និងសហរដ្ឋអាមេរិក ក៏ដូចជា រវាងអាមេរិកនិងសហភាពអឺរ៉ុបលើបញ្ហាពន្ធ និងជម្លោះកោះ Greenland។

លោក Rutte បានលើកឡើងថា៖«បញ្ហានោះមិនបានកើតឡើងទៀតទេ នៅក្នុងការសន្ទនារបស់ខ្ញុំជាមួយលោកប្រធានាធិបតីត្រាំ។ លោកត្រាំផ្តោតយ៉ាងខ្លាំងលើអ្វីដែលយើងត្រូវធ្វើ ដើម្បីប្រាកដថាតំបន់អាកទិកដ៏ធំនោះ ដែលជាកន្លែងមានការផ្លាស់ប្តូរកំពុងកើតឡើងនៅពេលនេះ និងជាកន្លែងដែលចិន និងរុស្ស៊ីចង់ធ្វើសកម្មភាពនានា»។

មិនតែប៉ុណ្ណោះ លោក ដូណាល់ ត្រាំ បានបន្ថែមថា កិច្ចព្រមព្រៀងនេះបណ្តាលឱ្យការសម្រេចចិត្តរបស់លោក មិនទាន់ដាក់ពន្ធថ្មី ដែលគ្រោងនឹងចូលជាធរមាននៅថ្ងៃទី១ ខែកុម្ភៈ។

លោក Rutte បន្តថា៖ «រឿងនេះជាអ្វី ដែលយើងគួរផ្តោតលើ យ៉ាងយកចិត្តទុកដាក់»។

ដោយឡែក លោក ត្រាំ បានប្រកាស «ក្របខ័ណ្ឌ» ថ្មីសម្រាប់កោះ Greenland នៅក្នុងការបង្ហោះនៅលើគេហទំព័រប្រព័ន្ធផ្សព្វផ្សាយសង្គម Truth Social របស់លោក នៅរសៀលថ្ងៃពុធកន្លងទៅ ខណៈដែលលោកនៅឯវេទិកាសេដ្ឋកិច្ចពិភពលោកក្នុងសប្តាហ៍នេះ។

លោកបន្តថា៖«ដោយផ្អែកលើកិច្ចប្រជុំដំណើរការដោយរលូន ដែលមានខ្ញុំ និងលោក Mark Rutte អគ្គលេខាធិការអង្គការ NATO។ យើងបានបង្កើតក្របខ័ណ្ឌនៃកិច្ចព្រមព្រៀងនាពេលអនាគតទាក់ទងនឹង Greenland ដើម្បីការពារដែនដីនេះ ជុំវិញតំបន់អាកទិកទាំងមូល»។

លោកបានបន្ថែមទៀតថា៖«ផ្អែកលើការយល់ព្រមនេះ ខ្ញុំនឹងមិនដាក់ពន្ធគយដែលគ្រោងនឹងចូលជាធរមាននៅថ្ងៃទី១ ខែកុម្ភៈទេ។ ចំណែកការពិភាក្សាបន្ថែមកំពុងត្រូវបានធ្វើឡើងក្នុងការបារម្ភពីកម្មវិធីការពារកាំជ្រួច [The Golden Dome] ទាក់ទងនឹង Greenland, ហើយព័ត៌មានបន្ថែមនឹងពិភាក្សាបន្តទៀត»។

ចំណែកការពិភាក្សានេះ លោក ត្រាំ ឱ្យតែមនុស្សជំនិតរបស់លោកជាអ្នកដឹកនាំប៉ុណ្ណោះ។ ក្នុងនោះមានលោក អនុប្រធានាធិបតី JD Vance ក្រសួងការបរទេស លោក Marco Rubio និងបេសកជនពិសេស លោក Steve Witkoff ជាអ្នកដឹកនាំ «ការចរចា» ពិសេសរាយការណ៍ដោយផ្ទាល់ទៅលោក ដូណាល់ ត្រាំ។

លោកត្រាំ បានថ្លែងនៅក្នុងវេទិការសេដ្ឋកិច្ចពិភពលោកថា៖ «យើងប្រហែលជាមិនទទួលបានអ្វីទេ លុះត្រាតែខ្ញុំសម្រេចចិត្តប្រើកម្លាំងបាយ និងកម្លាំងលើសលប់ទៅកន្លែងដែលយើងនឹងចង់នៅ ដោយមិនឈប់។ ប៉ុន្តែខ្ញុំនឹងមិនធ្វើដូច្នេះទេ»។

លោកបន្ថែមទៀតថា៖ «ហើយពេលនេះ អ្នកគ្រប់គ្នាមកសរសេរខ្ញុំ ថាខ្ញុំនឹងធ្វើបានល្អណាស់។ នោះប្រហែលជាការលើកឡើងដ៏ធំបំផុតដែលខ្ញុំបានធ្វើ ដោយសារតែមនុស្សគិតថាខ្ញុំនឹងប្រើកម្លាំងបាយ។ ខ្ញុំមិនចាំបាច់ប្រើកម្លាំងទេ។ ខ្ញុំមិនចង់ប្រើទេ ហើយក៏ខ្ញុំនឹងមិនប្រើកម្លាំងបាយដែរ»។

មិនតែមិនប៉ុណ្ណោះ អំឡុងពេលកិច្ចពិភាក្សារបស់ លោក Rutte បានសរសើរលោកត្រាំថាពិតជាមានប្រសាសន៍ត្រឹមត្រូវ អំពីតម្រូវការពង្រឹងសន្តិសុខក្នុងតំបន់អាកទិក ដោយសន្មត់ថា ថ្មីៗនេះឱកាសដែលរុស្ស៊ី និងចិនក្លាយជាការគំរាមកំហែងនៅក្នុងតំបន់នោះកំពុងកើនឡើងជារៀងរាល់ថ្ងៃ។

អគ្គលេខាធិការអង្គការណាតូរូបនេះក៏បានសរសើរដល់ការដឹកនាំរបស់ លោក ដូណាល់ ត្រាំ ក្នុងការធ្វើឱ្យប្រទេសផ្សេងទៀតរបស់អង្គការណាតូ មានសុវត្ថិភាព ជាពិសេសលោកជំរុញឱ្យអាមេរិក ចំណាយប្រាក់បន្ថែមទៀតសម្រាប់ការពារតំបន់នានារបស់សម្ព័ន្ធមិត្ត៕

ប្រែសម្រួល៖ ណឺ មិនា