អាមេរិកប្រកាស​អាសន្ន​​ឲ្យពលរដ្ឋខ្លួនចេញពីអ៊ីរ៉ាក់ជាបន្ទាន់

ស្ថានទូតសហរដ្ឋអាមេរិកប្រចាំទីក្រុងបាកដាដ ទើបតែបានបញ្ចេញសារព្រមានកម្រិតធ្ងន់បំផុតមួយ ដោយបង្គាប់​ឲ្យ​ពលរដ្ឋអាមេរិកាំងទាំងអស់ដែលកំពុងស្នាក់នៅក្នុងប្រទេសអ៊ីរ៉ាក់ ត្រូវតែចាកចេញពីទីនោះ​ឲ្យ​បានឆាប់តាមដែលអាចធ្វើទៅបាន។

តាម​ការ​ផ្សាយ​របស់ Newsmax កាល​ពី​ថ្ងៃទី​២​ខែ​មេសា​ឆ្នាំ​២០២៦ ការប្រកាសអាសន្ននេះធ្វើឡើងបន្ទាប់ពីមានព័ត៌មានសម្ងាត់ដ៏គួរ​ឲ្យ​ជឿជាក់ថា ក្រុមខ្មាន់កាំភ្លើងដែលគាំទ្រដោយប្រទេសអ៊ីរ៉ង់ កំពុងរៀបចំផែនការវាយប្រហារទ្រង់ទ្រាយធំនៅក្នុងតំបន់កណ្តាលទីក្រុងបាកដាដ ក្នុងរយៈពេល២៤ទៅ៤៨ម៉ោងខាងមុខនេះ។

ស្ថានទូតបានបញ្ជាក់ថា ក្រុមសកម្មប្រយុទ្ធទាំងនេះអាចនឹងប្រើល្បិចបន្លំខ្លួនធ្វើជាមន្ត្រីរាជការ ដើម្បីចូលទៅជិតគោលដៅក្នុងបំណងវាយប្រហារ ឬចាប់ជំរិតយកតែម្តង។ កន្លងមកថ្មីៗនេះ អ្នកកាសែតអាមេរិកាំងម្នាក់ឈ្មោះ Shelly Kittleson ក៏ត្រូវបានគេចាប់ជំរិតបាត់ខ្លួន ដែលគេជឿជាក់ថាជាស្នាដៃរបស់ក្រុមសកម្មប្រយុទ្ធ Kataib Hezbollah ដែលមានអ៊ីរ៉ង់នៅពីក្រោយខ្នង។

បច្ចុប្បន្ន ស្ថានភាពនៅក្នុងប្រទេសអ៊ីរ៉ាក់គឺស្ថិតក្នុងកម្រិតគ្រោះថ្នាក់បំផុត ដែលក្រសួងការបរទេសអាមេរិកដាក់ចំណាត់ថ្នាក់លេខ៤ គឺ «ហាមធ្វើដំណើរទៅដាច់ខាត»។ ស្ថានទូតបានណែនាំ​ឲ្យពលរដ្ឋខ្លួនធ្វើដំណើរចាកចេញតាមផ្លូវគោកវិញ ព្រោះផ្លូវអាកាសកំពុងមានការរឹតត្បិតខ្លាំង។ អាជ្ញាធរអាមេរិកបានសង្កត់ធ្ងន់ថា អ្នកដែលសម្រេចចិត្តបន្តស្នាក់នៅ គឺកំពុងប្រឈមនឹងគ្រោះថ្នាក់ដល់ជីវិតខ្លាំងណាស់ ព្រោះក្រុមខ្មាន់កាំភ្លើងទាំងនេះធ្លាប់​មានប្រវត្តិវាយប្រហារសាហាវៗពាសពេញផ្ទៃប្រទេស៕

ប្រែសម្រួល៖ ឈាង