៣ប្រទេស នៅ​អាស៊ី មានច្បាប់កាតព្វកិច្ចយោធាតឹងរ៉ឹងបំផុត

បញ្ហាសន្តិសុខ និងភូមិសាស្ត្រនយោបាយ នៅក្នុងតំបន់អាស៊ី កំពុងតែឡើងកម្ដៅពីមួយថ្ងៃទៅមួយថ្ងៃ ដែលធ្វើឱ្យប្រទេសជាច្រើន ត្រូវពង្រឹងកម្លាំងការពារជាតិរបស់ខ្លួន។ ក្នុងនោះ របបកាតព្វកិច្ចយោធា ឬការកេណ្ឌប្រជាពលរដ្ឋឱ្យចូលបម្រើកងទ័ព បានក្លាយជាឧបករណ៍ដ៏សំខាន់មួយ។ ខណៈដែលប្រទេសកម្ពុជា ទើបតែប្រកាសអនុវត្តច្បាប់កាតព្វកិច្ចយោធាចាប់ពីឆ្នាំ២០២៦ នេះតទៅ យោងតាមការចុះផ្សាយរបស់សារព័ត៌មានជាតិ និងអន្តរជាតិ គេសង្កេតឃើញមានប្រទេសមួយចំនួនក្នុងទ្វីបអាស៊ី ដែលមានច្បាប់នេះតឹងរ៉ឹងបំផុត រហូតដល់ថ្នាក់គ្មានការលើកលែង សូម្បីតែតារាល្បីៗក៏ដោយ។

តើប្រទេសណាខ្លះ ដែលមានច្បាប់កាតព្វកិច្ចយោធាតឹងរ៉ឹងជាងគេ នៅអាស៊ី?

១. កូរ៉េខាងជើង៖ ប្រទេស ដែលមានរយៈពេលបំពេញកាតព្វកិច្ចយោធាយូរជាងគេលើលោក

បើនិយាយពីភាពតឹងរ៉ឹង និងរយៈពេលវែង គ្មានប្រទេសណាអាច​លើស​កូរ៉េខាងជើងនោះឡើយ។ យោងតាមទិន្នន័យស្រាវជ្រាវរបស់ស្ថាប័ន World Population Review កូរ៉េខាងជើង តម្រូវឱ្យបុរសទាំងអស់ ដែលមានអាយុចាប់ពី ១៧ ឆ្នាំឡើងទៅ ត្រូវចូលបម្រើកងទ័ព ក្នុងរយៈពេលរហូតដល់ទៅ ៨ឆ្នាំ ចំណែកឯស្ត្រីវិញ ក៏ត្រូវបំពេញកាតព្វកិច្ចយោធារយៈពេល ៥ឆ្នាំ ផងដែរ។ នេះ គឺជាច្បាប់ចាប់​បង្ខំដ៏មានឥទ្ធិពល និងស្ទើរតែគ្មានការលើកលែងឡើយ សម្រាប់ប្រជាពលរដ្ឋទូទៅ លើកលែងតែក្រុមគ្រួសារមន្ត្រីជាន់ខ្ពស់ ឬអ្នកមានឯកទេសវិទ្យាសាស្ត្រពិសេសប៉ុណ្ណោះ។

២. កូរ៉េខាងត្បូង៖ ច្បាប់តឹងរ៉ឹងបំផុត គ្មានការយោគយល់ សូម្បីតារា K-Pop

ទោះបីជាកូរ៉េខាងត្បូង ជាប្រទេសប្រជាធិបតេយ្យ និងមានសេដ្ឋកិច្ចជឿនលឿនក៏ដោយ ក៏​ដោយសារតែការគំរាមកំហែងឥតឈប់ឈរពីប្រទេសជិតខាង ច្បាប់កាតព្វកិច្ចយោធានៅទីនោះ គឺដាច់ខាតបំផុត។ បុរសកូរ៉េខាងត្បូង ដែលមានកាយសម្បទាមាំមួនទាំងអស់ ត្រូវតែចូលបម្រើកងទ័ពរយៈពេលពី ១៨ ទៅ ២១ខែ (អាស្រ័យលើប្រភេទកងទ័ពអាកាស ជើងទឹក ឬ​ជើងគោក) មុនពេលពួកគេឈានដល់អាយុ ២៨ឆ្នាំ។

ច្បាប់នេះតឹងរ៉ឹង រហូតដល់ថ្នាក់សូម្បីតែសមាជិកក្រុមចម្រៀងពិភពលោក BTS ឬតារាសម្ដែងល្បីៗ ក៏ត្រូវតែផ្អាកការងារសិល្បៈ ដើម្បីទៅកាន់កាំភ្លើងដែរ។ យោងតាមរបាយការណ៍របស់ស្ថាប័នវិភាគ Pacific Forum សង្គមកូរ៉េខាងត្បូង មានទស្សនៈតឹងរ៉ឹងខ្លាំង ចំពោះរឿងនេះ ដោយអ្នកដែលព្យាយាមគេចវេះពីកាតព្វកិច្ចយោធា នឹងត្រូវចាត់ទុកជា «មនុស្សកំសាក» និងរងការរើសអើងយ៉ាងធ្ងន់ធ្ងរពីសង្គមជាតិ។

៣. អ៊ីស្រាអែល៖ ច្បាប់ស្មើភាព រាប់បញ្ចូលទាំងស្ត្រី

នៅតំបន់អាស៊ីខាងលិច ប្រទេសអ៊ីស្រាអែល ត្រូវបានគេស្គាល់ថាមានប្រព័ន្ធកាតព្វកិច្ចយោធាដ៏រឹងមាំ និងសកម្មបំផុត។ ផ្អែកលើទិន្នន័យរបស់ World Population Review ច្បាប់សន្តិសុខជាតិរបស់អ៊ីស្រាអែល តម្រូវឱ្យទាំងបុរស និងស្ត្រី ដែលមានអាយុចាប់ពី ១៨ឆ្នាំឡើងទៅ ត្រូវតែចូលបម្រើកងទ័ព។ បុរសត្រូវបំពេញការងាររយៈពេល ៣២ខែ ចំណែកស្ត្រីត្រូវបំពេញការងាររយៈពេល ២៤ខែ។ ក្រោយបញ្ចប់កាតព្វកិច្ច ពួកគេនៅតែត្រូវស្ថិតក្នុងបញ្ជីកងទ័ពបម្រុង ដែលអាចហៅមកជួយសមរភូមិបានភ្លាមៗរហូតដល់អាយុជាង ៤០ឆ្នាំ៕

អត្ថបទ៖ ឈាង