ទៅដល់រដ្ឋ Florida ហើយ! កំពូលព្យុះ Milton ចាប់ផ្តើមសម្លាប់មនុស្សនិងបង្កការបំផ្លិចបំផ្លាញ

នៅថ្ងៃព្រហស្បតិ៍ទី១០ខែតុលាឆ្នាំ២០២៤ កំពូលព្យុះសង្ឃរា Milton បានទៅដល់ដីគោករដ្ឋ Florida ហើយ ដោយបង្កការបំផ្លិចបំផ្លាញធំធេង ខណៈក៏មានសេចក្តីរាយការណ៍អំពីមនុស្សបាត់បង់ជីវិតចំនួន២នាក់ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Aljazeera, ព្យុះកំណាច Milton បានទៅដល់រដ្ឋ Florida ក្នុងនាមព្យុះកម្រិតទី៣ ជាមួយកម្លាំងខ្យល់១៩៣គីឡូម៉ែត្រក្នុងមួយម៉ោង ហើយបង្កជាគ្រោះធម្មជាតិយ៉ាងកាចសាហាវវាយប្រហារទីក្រុងឆ្នេរសមុទ្រដូចជា Tampa, St. Petersburg, Sarasota និង Fort Myers ជាដើម។

មិនត្រឹមប៉ុណ្ណឹង វាបានបង្កើតឲ្យមានខ្យល់កួចដ៏គួរឲ្យរន្ធត់ជាច្រើននៅទូទាំងរដ្ឋ និងខ្យល់កន្ត្រាក់បោកផ្តួលដើមឈើ ផ្ទាំងប៉ាណូ ផ្លាកសញ្ញាចរាចរណ៍ និងបង្គោលភ្លើងតាមដងផ្លូវ ក៏ដូចជាកម្ទេចផ្ទះសម្បែងនិងបោកបំប៉ើងដំបូលកីឡដ្ឋាននានាផងដែរ។

លើសពីនេះ ព្យុះ Milton ថែមទាំងបណ្តាលឲ្យមានភ្លៀងធ្លាក់ក្នុងកម្រិតខ្ពស់បំផុតមិនធ្លាប់មានក្នុងប្រវត្តិសាស្រ្តរដ្ឋ បង្កជាទឹកជំនន់យ៉ាងធ្ងន់ធ្ងរទៀតផង។

ម្យ៉ាងវិញទៀត មនុស្សរាប់លាននាក់មិនមានអគ្គិសនីនិងទឹកស្អាតប្រើប្រាស់ទេ ដោយសារតែក្រុមហ៊ុនទាំងឡាយ សម្រេចចិត្តផ្អាកការផ្គត់ផ្គង់សិន រង់ចាំស្ថានភាពធូរស្រាល ទើបបើកដំណើរការឡើងវិញ។ រីឯក្រុមហ៊ុនអាកាសចរណ៍ ក៏សម្រេចចិត្តផ្អាកជើងហោះហើរដូចគ្នា ដើម្បីសុវត្ថិភាព។

តាមការបញ្ជាក់ពីមន្ត្រីអាមេរិក ឥទ្ធពិលរបស់ព្យុះ Milton បានបង្កជាក្តីព្រួយបារម្ភខ្លាំងមែនទែន ដោយមិនមែនតែចំពោះអាយុជីវិតមនុស្សប៉ុណ្ណោះទេ សូម្បីតែសេដ្ឋកិច្ចក៏ត្រូវបានគេប៉ាន់ស្មានថា អាចនឹងខាតបង់រាប់ពាន់លានដុល្លារផងដែរ៕

អត្ថបទ៖ សុខ សុវណ្ណ

ចុចអាន៖ រន្ធត់! ថតជាប់វីដេអូរលកយក្សក​ម្ពស់​​ជាង​៨​ម៉ែត្រ ​បោក​សំដៅ​ទៅរដ្ឋ Florida