អ៊ីស្រាអែល វាយប្រហារទ្រង់ទ្រាយធំលើ ហ្គាហ្សា! ស្លាប់មនុស្ស៣៣០នាក់ ក្នុងនោះមានកុមារ៥០នាក់ និងស្រ្តី២៨នាក់

យោងតាមតួលេខពីក្រសួងសុខាភិបាលដែលគ្រប់គ្រងដោយក្រុមហាម៉ាសនៅហ្គាហ្សា, មនុស្សស្លាប់ក្នុងការវាយប្រហារអាកាសរបស់អ៊ីស្រាអែលក្នុងតំបន់នេះ បានផ្តាច់ជីវិតមនុស្សជាង ៣៣០នាក់ និងរបួសជាង ២៥០នាក់ហើយនេះគឺជាការវាយប្រហារទ្រង់ទ្រាយធំបំផុត ចាប់តាំងពីមានបទឈប់បាញ់ថ្ងៃទី១៩ខែមករាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

BBC ចុះផ្សាយថា អ៊ីស្រាអែលបានវាយប្រហារកណ្តាលអាធ្រាត្រ កំណត់គោលដៅលើទីតាំងជាច្រើននៅទូទាំងតំបន់ ហើយក្នុងចំណោមមនុស្សស្លាប់ ក៏មានកុមារ៥០នាក់និងស្រ្តី២៨នាក់ ផងដែរ។  

ស្របពេលជាមួយគ្នានោះ មន្ទីរពេទ្យក្នុងតំបន់បានព្រមានថា តួលេខមនុស្សស្លាប់អាចកើនឡើងលើសនេះទៀតព្រោះថា អ្នករបួសមួយចំនួនកំពុងស្ថិតក្នុងស្ថានភាពធ្ងន់ធ្ងរ។

ជុំវិញការវាយប្រហារនេះដែរ អ៊ីស្រាអែល អះអាងថា ខ្លួនកំណត់គោលដៅលើមូលដ្ឋានយោធារបស់ក្រុមហាម៉ាស ហើយថែមទាំងបានសម្លាប់មេសន្តិសុខក្រុមហាម៉ាស និងឥស្សរជននយោបាយមួយចំនួនថែមទៀតផង ជាពិសេសលោក Mahmoud Abu Wafah ដែលជាឧបនាយករដ្ឋមន្ត្រីក្រសួងមហាផ្ទៃក្នុងតំបន់ហ្គាហ្សា។

តាមសេចក្តីថ្លែងការណ៍ពីការិយាល័យនាយករដ្ឋមន្ត្រីអ៊ីស្រាអែល Benjamin Netanyahu, ការវាយប្រហារនេះគឺធ្វើឡើងដោយសារតែក្រុមហាម៉ាស មិនព្រមដោះលែងចំណាប់ខ្មាំងនិងបដិសេធសំណើរបស់បេសកជនប្រធានាធិបតីអាមេរិក ដូណាល់ ត្រាំ គឺលោក Steve Witkoff និងសំណើពីអ្នកសម្របសម្រួលផ្សេងទៀត។ ចាប់ពីពេលនេះទៅ អ៊ីស្រាអែល នឹងប្រើធម៌ក្តៅលើក្រុមហាម៉ាស មិនបន្ធូរដៃឡើយ។

សូមជម្រាបថា បទឈប់បាញ់ដែលបច្ចុប្បន្នបានដួលរលំទៅហើយនោះ គឺកើតចេញពី​ខែមករាឆ្នាំ​២០២៥ ក្រោយមានការចរចាដែលពាក់ព័ន្ធនឹងបេសកជនអាមេរិកលោក Brett McGurk និង​លោក Steve Witkoff រួមជាមួយនាយករដ្ឋមន្ត្រីកាតាព្រះអង្គម្ចាស់ Sheikh Mohammed bin Abdulrahman Al Thani។

ដំបូងឡើយ បទឈប់បាញ់នេះ បានសម្របសម្រួលការដោះដូរចំណាប់ខ្មាំងជាង ៣០​នាក់ដែលក្រុមហាម៉ាសបានឃុំខ្លួន ជាមួយអ្នកទោសប៉ាឡេស្ទីនប្រហែល២ ០០០​នាក់ និងអនុញ្ញាត​ឲ្យ​មានការកើនឡើងនៃជំនួយមនុស្សធម៌ទៅកាន់តំបន់ហ្គាហ្សា ប៉ុន្តែឥឡូវបទឈប់បាញ់នេះបានរលាយសាបសូន្យទៅហើយ៕

អត្ថបទ៖ សុខ សុវណ្ណ

ចុចអាន៖ ចំណាប់ខ្មាំង​អ៊ីស្រាអែល៖ ហាម៉ាសបន្ត​​ជីក​រូង​ក្រោម​ដីមិន​លោះ​សូម្បីតែ​មួយ​ថ្ងៃ