ព័ត៌មានអន្ដរជាតិ

ពូទីន នឹងមិនចូលរួមកិច្ចប្រជុំ BRICS នៅប្រេស៊ីល ព្រោះបារម្ភពីដីកាចាប់ខ្លួនរបស់ ICC

បានផុស

១៣ វិនាទី មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

Chheang

ប្រធានាធិបតីរុស្ស៊ីលោក វ៉្លាឌីមៀរ ពូទីន នឹងមិនចូលរួមកិច្ចប្រជុំកំពូល BRICS នៅទីក្រុង Rio de Janeiro នាថ្ងៃទី៦-៧ខែកក្កដាខាងមុខនោះទេ ព្រោះតែមានដីកាចាប់ខ្លួនរបស់តុលាការឧក្រិដ្ឋកម្មអន្តរជាតិ (ICC) ដែលធ្លាប់ចេញកាលពីខែមីនាឆ្នាំ២០២៣ ចោទពីបទឧក្រិដ្ឋកម្មសង្គ្រាមទាក់ទងនឹងការនិរទេសកុមារអ៊ុយក្រែនទាំងបង្ខំ។ នេះបើយោងតាមការឲ្យដឹងពីលោក Yuri Ushakov ជំនួយការគោលនយោបាយការបរទេសរបស់វិមានក្រឹមឡាំង កាលពីថ្ងៃពុធទី២៥ខែមិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ushakov បានពន្យល់ថា ប្រទេសប្រេស៊ីល ដែលជារដ្ឋសមាជិក ICC ជាប់នឹងលក្ខន្តិកៈទីក្រុងរ៉ូម មានកាតព្វកិច្ចស្របច្បាប់ក្នុងការចាប់ខ្លួនលោក ពូទីន ប្រសិនបើគាត់ចូលទឹកដីរបស់ប្រេស៊ីល។ ដោយហេតុថាប្រេស៊ីលមិនអាចធានាអភ័យឯកសិទ្ធិរបស់គាត់បាន លោក ពូទីន បានជ្រើសរើសចូលរួមពីចម្ងាយតាមរយៈវីដេអូខលជំនួសវិញ ខណៈលោករដ្ឋមន្ត្រីការបរទេស Sergei Lavrov នឹងចូលរួមដោយផ្ទាល់ ដើម្បីតំណាងឲ្យប្រទេសរុស្ស៊ីនៅក្នុងកិច្ចប្រជុំ BRICS។

រុស្ស៊ីបដិសេធការចោទប្រកាន់ពីបទឧក្រិដ្ឋកម្មសង្រ្គាម ហើយវិមានក្រឹមឡាំងដែលមិនបានចុះហត្ថលេខាលើសន្ធិសញ្ញាបង្កើត ICC បានច្រានចោលដីកានេះទុកជាមោឃៈ។

នេះមិនមែនជាលើកទីមួយទេ ដែលលោក ពូទីន ជៀសវាងការធ្វើដំណើរទៅកាន់ប្រទេសដែលជារដ្ឋសមាជិកនៃ ICC។ មេដឹកនាំរុស្ស៊ីធ្លាប់អវត្តមានពីកិច្ចប្រជុំ G20 នៅប្រេស៊ីលម្ដងរួចមកហើយក្នុងខែកញ្ញាឆ្នាំ២០២៣ ហើយថ្មីៗនេះពីកិច្ចប្រជុំកំពូលនៅអាហ្រ្វិកខាងត្បូង និងរដ្ឋជាហត្ថលេខីសន្ធិសញ្ញា ICC ផ្សេងៗទៀត។

យ៉ាងណាមិញ កាលពីឆ្នាំមុន លោក ពូទីន ត្រូវបានទទួលស្វាគមន៍លើកម្រាលព្រំក្រហមនៅម៉ុងហ្គោលី បើទោះបីជាប្រទេសមួយនេះជារដ្ឋសមាជិក ICC ក៏ដោយ។

ប៉ុន្តែពាក់ព័ន្ធនឹងកិច្ចប្រជុំ BRICS ឆ្នាំនេះនៅប្រេស៊ីល លោក Ushakov បាននិយាយថា «នេះគឺដោយសារតែការលំបាកមួយចំនួននៅក្នុងបរិបទនៃតម្រូវការរបស់ ICC។ នៅក្នុងបរិបទនោះ រដ្ឋាភិបាលប្រេស៊ីលមិនអាចប្រកាន់ជំហរច្បាស់លាស់ដែលនឹងអនុញ្ញាតឲ្យប្រធានាធិបតីរបស់យើងចូលរួមក្នុងកិច្ចប្រជុំនេះទេ»៕