តើមាតាគួរធ្វើបែបណាដើម្បីកុំឱ្យកូនឈ្លក់ទឹកដោះពេលបំបៅ?

ការបំបៅ គឺជាមធ្យោបាយតែមួយគត់សម្រាប់ផ្តល់អាហារដល់ទារកទើបតែកើត ហើយទារកអាចនឹងប្រឈមការឈ្លក់ទឹកដោះ មិនថាជាទឹកដោះម្តាយ ឬ ទឹកដោះគោទេ ប្រសិនជាម្តាយមិនបានបំបៅកូនឱ្យបានត្រឹមត្រូវ។ តើម្តាយគឺបំបៅកូនបែបណាដើម្បីកុំឱ្យទារកឈ្លក់ទឹកដោះ?

បើតាមមន្ទីរពេទ្យកាល់ម៉ែតបានផ្សព្វផ្សាយថា ការឈ្លក់ទឹកដោះ គឺជាការលេបទឹកដោះចូលដោយចៃដន្យទៅក្នុងសួត។ ការឈ្លក់នេះ ក៏អាចបង្កអោយមានផលប៉ះពាល់ដល់សុខភាពទារកយ៉ាងខ្លាំង។ ចំណែកទារកដែលប្រឈមនឹងការឈ្លក់ទឹកដោះ ជាទារកដែលកើតមិនគ្រប់ខែ ឬទម្ងន់មិនគ្រប់, ទារកដែលមានបញ្ហាបេះដូង, ទារកដែលមានភាពមិនប្រក្រតីពីកំណើតដូចជាឆែបមាត់ ឬក្រអូមមាត់ ទារកដែលក្អែរញឹកញាប់ ក្រៅពីនេះក៏មានការរៀបចំស្ថានភាពទារកឱ្យបៅ ឬការបំបៅមិនបានត្រឹមត្រូវ។

វេជ្ជបណ្ឌិតពេទ្យកាល់ម៉ែត បញ្ជាក់ទៀតថា ការឈ្លក់ដែលប្រឈមនឹងគ្រោះថ្នាក់ គឺភាគច្រើនដោយសារការបំបៅទឹកដោះគោ។ ដូចនេះ ម្តាយត្រូវប្រយ័ត្ន ត្រូវបំបៅទារកដោយដាក់មាត់ទារកអោយស៊ប់នឹងក្បាលដោះ។ រៀបចំស្ថានភាពទារកឱ្យបានត្រឹមត្រូវដោយលើកទារកបញ្ឆិតឱ្យបានប្រហែល ៣០ដឺក្រេពីផ្ទៃរាប រាល់ពេលបំបៅ។ ក្រោយពេលបំបៅ លើកទារកផ្អោបលើខ្លួន និងស្មា ដោយអង្អែលខ្នងតិចៗឱ្យបានយ៉ាងតិច៣០ទៅ៦០នាទី មុននឹងដាក់ឱ្យទារកគេងលើផ្ទៃរាបស្មើវិញ។ប្រសិនបើទារកក្អែរញឹកញាប់ សូមព្យាយាមបំបៅទារកតិចៗ តែញយដង។

ប្រភពដដែរលើកឡើងថា ប្រសិនបើទារកឈ្លក់ទឹកដោះអាចបង្កឱ្យមានរលាកផ្លូវដង្ហើម ឬរលាកសាច់សួតពីស្រាលដល់ធ្ងន់ធ្ងរ រហូតដល់បាត់បង់ជីវិតក៏មាន។ ទារកអាចមានបញ្ហាកង្វះជាតិទឹក ឬអាហារូបត្ថម្ភ បន្ថែមពីនេះ ទារកអាចនឹងមិនសូវឡើងទម្ងន់ដូចគ្នា។

គ្រូពេទ្យបញ្ជាក់ថា រោគសញ្ញានៃការឈ្លក់ទឹកដោះនេះ ជាទូទៅស្តែងចេញទៅតាមភាពញឹកញាប់នៃការឈ្លក់ និងបរិមាណ ឬប្រភេទទឹកដោះដែលបានឈ្លក់។ នៅពេលឈ្លក់ ទារកនឹងបង្ហាញរោគសញ្ញាដូចជា លែងចង់បៅ ឬងាកចេញ, ប្តូរពណ៌សម្បុរពីក្រហម ទៅជាស្វាយ ឬខ្មៅ, ពិបាកដកដង្ហើម ដង្ហក់ ឬឈប់ដកដង្ហើម, ក្អក ពេលកំពុងបៅ ឬក្រោយបៅ ក្រៅពីនេះអាចមានជារលាកសួតរ៉ាំរ៉ៃ ឬញឹកញាប់ផងដែរ៕