ភាពយន្តខ្លីខ្មែរនិងបរទេសសរុប ៧៧ រឿង ត្រៀមចាក់បញ្ចាំងនៅកម្ពុជាដើម្បីលើកកម្ពស់គុណភាពការផលិត

មហោស្រពភាពយន្តខ្លីចតុមុខ (Chaktomuk Short Film Festival/ CSFF) ដែលជាមហោស្រពភាពយន្តខ្លីដំបូងគេនិងមានតែមួយគត់នៅកម្ពុជា បានប្រកាសជាផ្លូវការនៃការចាក់បញ្ចាំងខ្សែភាពយន្តខ្លីប្រតិដ្ឋ និងភាពយន្តឯកសារសរុប ៧៧ រឿងមកពី ២២ ប្រទេស ដែលបានជ្រើសរើសចេញពីអ្នកដាក់ពាក្យចូលរួមប្រកួតចំនួន ១៩៦ ចំណងជើង។ ការចាក់បញ្ចាំង​នេះ នឹងរៀបចំឡើងរយៈពេល៤ថ្ងៃជាប់ៗគ្នា គឺចាប់ពីថ្ងៃទី១៧ ដល់ថ្ងៃទី២០ ខែតុលា នៅតាមរោងភាពយន្ត Legend, Exchange Squar, Fable Cinema, Meta House, និង French Institute of Cambodia។ នេះបើតាមសេចក្តីប្រកាសព័ត៌មាន។

លោក ស៊ុំ ស៊ីថែន ជាប្រធានមហោស្រពភាពយន្តឆ្នាំទី១៤ មានប្រសាសន៍ថា មហោស្រពភាពយន្តខ្លីចតុមុខមានសារៈសំខាន់ណាស់សម្រាប់ប្រទេសកម្ពុជាដើម្បី ជួយដល់ទស្សនិកជនរបស់យើងឱ្យទទួលបានបទពិសោធន៍ពីការស្រមើស្រមៃជាសកល និងគំនិតរបស់អ្នកផលិតភាពយន្តខ្មែរដែលនឹងជះឥទ្ធិពល មកលើប្រទេសរបស់យើង។ លោកថា៖« CSFF បានបង្កើតឡើងដោយក្រុមយុវជនស្ម័គ្រចិត្តខ្មែរ ដឹកនាំដោយ ក្រុមភាពយន្តឈូករ័ត្ន ហើយត្រូវបានទទួលស្គាល់ថា ជាមហោស្រពដែលលើកកម្ពស់ និងផ្ដល់រង្វាន់ដល់អ្នកផលិតភាពយន្តដែលមានទេពកោសល្យនៅកម្ពុជា ក៏ដូចជានៅ អាស៊ីអាគ្នេយ៍ ជារៀងរាល់ឆ្នាំចាប់តាំងពីឆ្នាំ ២០១២មក»។ 

លោក ហួយ សុជាតិ អនុប្រធាននាយកដ្ឋានយសិល្បៈភាពយន្ត និងផ្សព្វផ្សាយវប្បធម៌ និង លោក ទេព អស្នារិទ្ធអនុរដ្ឋលេខាធិការក្រសួងក្រសួងព័ត៌មាន សុទ្ធតែសម្តែងការគាំទ្រដល់មហោស្រពភាពយន្តខ្លីចតុមុខ CSFF និងស្នើឱ្យផ្តោតទៅលើយុវជនជំនាន់ថ្មីដើម្បីជួយបណ្តុះបណ្តាលធនធានមនុស្សក្នុងវិស័យនេះ។ 

លោក ទេព អស្នារិទ្ធ បានផ្តល់អនុសាសន៍ល្អៗមួយចំនួនដល់មហោស្រពសម្រាប់ពិចារណាបន្ថែមក្នុងការរៀបចំមហោស្រពក្នុងពេលខាងមុខដើម្បីឆ្លើយតបនឹងគោលនយោបាយរបស់រដ្ឋាភិបាលក្នុងចូលរួមដោះស្រាយបញ្ហាសង្គមដែលពាក់ពាក់ព័ន្ធនឹងយុវជន ជាពិសេសជួយទប់ស្កាត់នៃការរីករាលដាលព័ត៌មានក្លែងក្លាយ។ លោកមានប្រសាសន៍ថា ៖«សមិទ្ធិករភាពយន្តគួរផ្តោតលើប្រធានបទដែលទាក់នឹងបំនិនជីវិត អក្ខរកម្មឌីជីថល និងការគ្រប់គ្រងហិរញ្ញវត្ថុ ក៏ដូចជាសហគិ្រនភាព និងភាពជាអ្នកដឹកនាំផងដែរ។ ហើយការចូលរួមរបស់យុវជនយើងក្នុងការជួយផ្សព្វផ្សាយពីការពិតនៅកម្ពុជាពិតជាមានសារសំខាន់ណាស់»។ 

កន្លងមកក្រសួងព័ត៌មាន ក៏បានក្រើនរំលឹកស្ថានីយ៍ទូរទស្សន៍ ឬស្ថាប័នព័ត៌មានក្រោមឱវាទឱ្យរួមគ្នាជួយផ្សព្វផ្សាយស្នាដៃថ្មីៗរបស់យុវជន ដែលទាំងនេះសុទ្ធជាសកម្មភាពរួមចំណែកលើកស្ទួយដល់ការផ្សព្វផ្សាយស្នាដៃឱ្យរឹងរឹតតែសុសសាយដល់ប្រទេសជិតខាង។

ទន្ទឹមនេះលោក អ៊ុង ស៊ីវថុង ជាប្រធានក្រុមក៏បានបង្ហើបដែរថា CSFF ដើរតួនាទីយ៉ាងសំខាន់ក្នុងវិថីផលិតភាពយន្តរបស់លោកដោយក្នុងឆ្នាំ២០២២ បានចូលរួមជាប្រធានផ្នែកផលិត ហើយមានឱកាសដកពិសោធរៀបចំមហោស្រពពីក្រោយឆាក។ លោកថា៖«តួនាទីនេះនាំឱ្យខ្ញុំមើលឃើញទិដ្ឋភាពថ្មីមួយ ពីរបៀបរៀបចំមហោស្រព និងសារៈសំខាន់របស់មហោស្រព។ រួចមក ក្នុងឆ្នាំ២០២៤ ខ្ញុំបានដាក់ភាពយន្តខ្លី ដែលខ្ញុំសហដឹកនាំ «ស្នេហ៍គ្មានស្តង់ដារ» ហើយក៏បានជាប់ក្នុងការចាក់បង្ហាញ»។ សម្រាប់ឆ្នាំនេះ លោកបានត្រឡប់មកវិញ ដោយសារចង់រៀនបន្ថែម និងជំរុញខ្លួនឱ្យកាន់តែច្នៃប្រតិដ្ឋ និងបន្តលូតលាស់ជំនាញតាមរយៈសហគមន៍មួយនេះ ពីព្រោះCSFF មិនត្រឹមតែជាមហោស្រពទេ តែជាថ្នាលបណ្តុះយុវសមិទ្ធិករ និងជួយឱ្យពួកយើងមានការទទួលស្គាល់ទៀតលើឆាកអន្តរជាតិទៀត។

ជាមួយគ្នានេះ កញ្ញា Julia Russell បវរកញ្ញាពិភពលោកនៃប្រទេសកម្ពុជាឆ្នាំ២០២៥ ដែលចូលរួមធ្វើជាទូតសុឆន្ទៈ របស់ CSFF​ ២០២៥ បានសម្តែងចំណាប់អារម្មណ៍ថា ការគាំទ្រ CSFF ២០២៥ គឺដើម្បីផ្តល់ការគាំទ្រដល់ផលិតករភាពយន្តជំនាន់ក្រោយរបស់ប្រទេសកម្ពុជា។ 

ចំណែកលោក​ សុខ​ ច័ន្ទវាសនា ប្រធានផ្នែកក្រោយផលិតរបស់ CBS និងជាមេប្រយោគក្នុងស្រុកបានកត់សម្គាល់ ការរីកចម្រើនរបស់ភាពយន្តខ្មែរតាមរយៈតួនាទីរបស់លោកក្នុងមហោស្រពនេះថា៖ «សមត្ថភាពរបស់អ្នកផលិតភាពយន្តក្នុងជំនាន់នេះគឺកាន់តែប្រសើរឡើង ដោយសារតែកផលិតករភាពយន្តជំនាន់មុនបានជួយ បណ្តុះបណ្តាលផលិតភាពយន្តជំនាន់ថ្មីដែលនេះឆ្លុះបញ្ចាំងពីភាពវិជ្ជមាន និងភាពធននៃកសាងធនធានមនុស្សយើងក្នុងវិស័យនេះ»។

បន្ទាប់ពីការខិតខំប្រឹងប្រែងអស់រយៈពេល ១៤ឆ្នាំ CSFF មិនត្រឹមតែជាវេទិកាមួយដ៏សំខាន់សម្រាប់នាំយកភាពយន្តខ្លីអន្តរជាតិល្អៗមកកាន់កម្ពុជាដើម្បីតភ្ជាប់កម្ពុជាទៅកាន់ពិភពលោកប៉ុណ្ណោះនោះទេ CSFFក៏ជាកន្លែងបង្ហាញទេពកោសល្យរបស់អ្នកផលិតភាពយន្តរបស់កម្ពុជាទៅកាន់ពិភពលោកផងដែរ ។

ជាក់ស្តែងកាលពីឆ្នាំ២០២៣កន្លង ភាពយន្តខ្មែរចំនួន ២ត្រូវបានយកទៅចាក់បញ្ចាំងមហោស្រពភាពយន្ត Asia-Pacific Youth Micro Movie Festival នៅទីក្រុងហុងកុងតួរយ៉ាងគឺរឿង «ស្នេហ៍ឆ្លងវេលា» និង «កញ្ញា អតិថិជន» ទៅដាក់ប្រកួតលើឆាកអន្តរជាតិ ដែលនេះគឺជាការបន្តបេសកកម្មដ៏ចាំបាច់របស់ CSFF ដើម្បីចូលរួមបង្ហាញភាពរឹងមាំរបស់កម្ពុជាក្នុងការចូលរួមយ៉ាងសកម្មជាអន្តរជាតិដើម្បីអភិវឌ្ឍភាពយន្តកម្ពុជា និងក្នុងតំបន់អាស៊ីអាគ្នេយ៍៕