ព័ត៌មានជាតិ

គណបក្សប្រជាជនកម្ពុជា ប្រកាសផ្អាកប្រារព្ធទិវាជាតិ នៃការចងចាំ ថ្ងៃទី២០ ខែឧសភា ដោយសារការរីករាលដាល នៃជំងឺកូវីដ-១៩

បានផុស

៤ years មុន

នៅ

ថ្ងៃសៅរ៍ ១៥ ឧសភា ២០២១

ដោយ

គណបក្សប្រជាជនកម្ពុជា បានចេញលិខិតមួយជម្រាបជូនប្រធានគណៈកម្មាធិការគណបក្សរាជធានី-ខេត្ត ឲ្យផ្អាកការធ្វើពិធីរំលឹកវិញ្ញាណក្ខន្ធ ថ្ងៃទី២០ ខែឧសភា ឆ្នាំ២០២១ ដោយសារការរីករាលដាល នៃជំងឺកូវីដ-១៩ នេះបើយោងតាមលិខិតផ្លូវការរបស់គណៈកម្មាធិការកណ្តាល គណបក្សប្រជាជនកម្ពុជា ចុះហត្ថលេខាដោយសម្តេចវិបុលសេនាភក្តី សាយ ឈុំ កាលពីថ្ងៃទី១៤ ខែឧសភា ម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិវាជាតិនៃការចងចាំ ឬទិវាចងកំហឹង ២០ ឧសភា ត្រូវបានរាជរដ្ឋាភិបាលកម្ពុជា ប្រារព្ធឡើងនៅតាមរាជធានី ខេត្ត ផ្សេងៗ ដែលមានសារមន្ទីរប្រល័យពូជសាសន៍។ ចំណែកនៅភ្នពេញ ត្រូវបានរៀបចំធ្វើនៅសារមន្ទីរប្រល័យពូជសាសន៍ជើងឯក ស្ថិតនៅក្នុងខណ្ឌដង្កោ ជាយទីក្រុងភ្នំពេញ ជារៀងរាល់ឆ្នាំ។ ទិវានេះត្រូវបានប្រារព្ធឡើង ដើម្បីរំលឹកដល់វិញ្ញាណក្ខន្ធជនរងគ្រោះជាង៣ លាននាក់ ដែលបានស្លាប់បាត់បង់ជីវិត នៅក្នុងរបបប្រល័យពូជសាសន៍ប៉ុលពត។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ធ្លាប់បានមានប្រសាសន៍ថា ថ្ងៃទី២០ ឧសភា គឺជាការរំលឹកឡើងវិញ ដល់ការឈឺចាប់ពីឧក្រិដ្ឋកម្ម ដែលបានកើតឡើងក្នុងរបបប្រល័យពូជសាសន៍ប៉ុលពត (១៧ មេសា ១៩៧៥-៦ មករា ១៩៧៩)។ បើតាមសម្តេចនាយករដ្ឋមន្ត្រី ប្រជាពលរដ្ឋកម្ពុជាភាគច្រើនលើសលុប បានដឹង និងបានយល់ច្បាស់ អំពីរឿងរ៉ាវសោកនាដកម្មដ៏ជូរចត់ ដែលប្រជាពលរដ្ឋខ្មែរបានឆ្លងកាត់ជិត៣ទសវត្សរ៍ ក្នុងភ្នក់ភ្លើងសង្គ្រាមនិងទឹកភ្នែក ការកាប់សម្លាប់ ការបំផ្លិចបំផ្លាញ ការជម្លៀសចេញពីទីលំនៅរបស់ខ្លួនដោយបង្ខំ និងការបង្ខំឱ្យធ្វើការដូចសត្វធាតុជាដើម។ មិនតែប៉ុណ្ណោះ ប្រជាពលរដ្ឋកម្ពុជា ត្រូវស្លាប់ដោយគ្មានថ្នាំសង្កូវព្យាបាល គ្មានអាហារបរិភោគគ្រប់គ្រាន់ គ្មានសិទ្ធិសេរីភាព គ្មានលទ្ធិប្រជាធិបតេយ្យ ហើយសូម្បីតែសិទ្ធិរស់រានមានជីវិតដែលជាសិទ្ធិមូលដ្ឋានមានពីកំណើតរបស់មនុស្សក៏គ្មានដែរ។

ទន្ទឹមនឹងការលើកឡើងខាងលើនេះ សម្តេចតេជោ ហ៊ុន សែន ក៏បានអំពាវនាវឲ្យប្រជាពលរដ្ឋកម្ពុជា ចូលរួមថែរក្សាការពារសន្តិភាព ឱ្យបានគង់វង្សជារៀងរហូត។ សម្តេចនាយករដ្ឋមន្ត្រីបានអះអាងថា សន្តិភាពបានផ្តល់ឱកាសគ្រប់យ៉ាង ដល់ប្រជាពលរដ្ឋ ក្នុងការកសាងសង្គមគ្រួសារ សហគមន៍ និងប្រទេសជាតិ ឱ្យកាន់តែរីកចម្រើនឡើង៕

ដោយ ៖ កោះកែវ