ឆ្លងចរន្តទូ ATM ឆេះរាលដាលដល់ហាងពីរកន្លែងជាប់គ្នា​ជាប់គាំងមនុស្សពីរនាក់​ សមត្ថកិច្ចអន្តរាគមន៍ទាន់ពេល

មនុស្សចំនួន២នាក់បានជាប់គាំងនៅក្នុងហាងតែគុជមួយកន្លែង ខណៈដែលអគ្គិភ័យកំពុងឆាបឆេះហាងពីរជាប់គ្នាបណ្ដាលមកពីឆ្លងចរន្តអគ្គសនីចេញពីទូ ATM យ៉ាងសន្ធៅ កាលពីវេលាម៉ោង០១ យប់រំលងអាធ្រាត​ឈានចូល ថ្ងៃទី២៨ ខែកក្កដាឆ្នាំ ២០២១ នៅចំណុចផ្ទះហាងលក់តែគុជ និងហាងលក់នំ នៅតាមបណ្ដោយផ្លូវ ២៨៩ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

តាមប្រភពពីបុរសជាសន្តិសុខយាមនៅហាងកើតហេតុខាងលើបានប្រាប់ឱ្យដឹងថាមុនកើតហេតុរូបគាត់ឃើញមានឆ្លងចរន្តអគ្គិសនីចេញពីទូATM ដែលនៅចំណុចមុខហាងកើតហេតុខាងលើ រួចចេញជាអណ្តាតភ្លើងឆេះរាលដាលដល់ហាងលក់តែគុជនិងហាងលក់នំដែរនៅជាប់គ្នាយ៉ាងសន្ធោសន្ធៅ រួចរូបគាត់ក៏បានទំនាក់ទំនងទៅសមត្ថកិច្ចមូលដ្ឋានហៅរថយន្តពន្លត់អគ្គិភ័យជាច្រើនគ្រឿងចុះមកអន្តរាគមន៍បាញ់ពន្លត់ អស់ទឹកជាច្រើនឡាននិងប្រើពេលវេលាជិតមួយម៉ោងទើបបានរលត់ទៅវិញជាស្ថាពរ។

ក្រោយពីកម្លាំងសមត្ថកិច្ចនិងកម្លាំងពន្លត់អគ្គីភ័យបាញ់ពន្លត់រួចរាល់រួចហើយ បាននាំគ្នាកាត់សោរទ្វារហាង​តែគុជដើម្បីជួយសង្គ្រោះមនុស្សចំនួន២ នាក់ដែលបានជាប់គាំងនៅក្នុងហាងតែគុជឱ្យរួចផុតពីគ្រោះអគ្គីភ័យនេះ ដោយសំណាងល្អជនរងគ្រោះទាំងពីរនាក់មិនមានរងរបួសក្នុងករណីអគ្គីភ័យនេះឡើយ។

សមត្ថកិច្ចបានប្រាប់ថាករណីអគ្គិភ័យខាងលើនេះ ជំហានដំបូងសមត្ថកិច្ចសន្និដ្ឋានថាបណ្ដាលមកពីឆ្លងចរន្តអគ្គីសនី និងបណ្ដាលឱ្យរងការខូចខាតសម្ភារៈនិងទ្រព្យសម្បត្តិមួយចំនួន ចំណែកទូរATM ត្រូវបានរងការ​ខូចខាតស្ទើរទាំងស្រុង និងមនុស្ស ២នាក់ដែលជាប់គាំងនៅខាងក្នុងត្រូវសមត្ថកិច្ចជួយអន្តរាគមន៍ទាន់ពេល៕

ដោយៈ សុខា