ព័ត៌មានជាតិ

ជំនន់ទឹកភ្លៀងជន់លិចផ្លូវជាតិលេខ៤ នៅចំណុចព្រំប្រទល់ក្រុងច្បារមន និងស្រុកសំរោងទង

បានផុស

៥ years មុន

នៅ

ថ្ងៃពុធ ១ កញ្ញា ២០២១

ដោយ

បន្ទាប់ពីមានភ្លៀងធ្លាក់ជាប់ៗគ្នាជិតមួយសប្តាហ៍បានធ្វើឲ្យមានទឹកជំនន់ជន់លិចនិងហូរកាត់ផ្លូវជាតិលេខ៤ ប្រមាណ៣០០ម៉ែត្រ ស្ថិតនៅមុខបុរីសូវណ្ណ របស់លោកតុង សេង អភិបាលរង ខេត្តកំពង់ស្ពឺ បង្កឲ្យកកស្ទះចរាចរណ៍យ៉ាងខ្លាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី០១ ខែកញ្ញា ឆ្នាំ២០២១នេះ កម្លាំងនគរបាលក្រុងច្បារមន និងស្រុកសំរោងទងបានសហការគ្នាចុះរៀបចំសណ្តាប់ធ្នាប់ និងជួយសម្រួលចរាចរណ៍ដើម្បីបញ្ចៀសការកកស្ទះចរាចរណ៍លើផ្លូវជាតិលេខ៤ ចន្លោះគីឡូម៉ែត្រលេខ (៣២-៣៣) ក្នុងសង្កាត់សុព័រទេព ក្រុងច្បារមនជាប់ឃុំចំបក់ ស្រុកសំរោងទង ខេត្តកំពង់ស្ពឺ ។

អាជ្ញាធរបញ្ជាក់ថា ចំពោះមូលហេតុដែលបង្កឲ្យមានទឹកជន់លិច និងហូរកាត់ផ្លូវជាតិលេខ៤ ត្រង់ចំណុចមួយបូរីសូវណ្ណនេះ ដោយប៉ុន្មានថ្ងៃនេះ មានភ្លៀងធ្លាក់គ្រប់កន្លែងក្នុងភូមិសាស្ត្រខេត្តកំពង់ស្ពឺ ទើបបណ្តាលឲ្យទឹកហូរមិនទាន់ក៏ជន់លិច និងហូរលើផ្លូវជាតិបែបនេះ។ ករណីនេះ មិនប៉ះពាល់ដល់ការធ្វើចរាចរណ៍ទៅមកនោះទេ គ្រាន់តែស្ទះចរាចរណ៍បន្តិចបន្តួចប៉ុណ្ណោះ ។

សូមបញ្ជាក់ថា ផ្លូវជាតិលេខ៤ ត្រង់ចំណុចមុខបូរីសូវណ្ណ របស់លោក តុង សេង ព្រំប្រទល់ក្រុងច្បារមន និងស្រុកសំរោងទងនេះ មានមុខទឹកធំៗបុកមកពីតំបន់ខាងលើច្រើន ដូចជាទំនប់អូរខ្យា ទំនប់ក្រាំងចេក ទំនប់កំពិស និងប្រភពតូចៗជាច្រើនទៀត ក៏ហូរធ្លាក់មកកន្លែងនេះដែរ។ ប៉ុន្តែដោយសារតំបន់មានការអភិវឌ្ឍទៅរោងចក្រ បូរីផងនោះ បានធ្វើឲ្យប្រព័ន្ធប្រឡាយរំដោះទឹករួមតូច លូតូចធ្វើឲ្យចរន្តទឹកហូរមិនទាន់ទើបលិចបែបនេះ ។

សម្រាប់ការធ្វើចរាចរណ៍លើផ្លូវជាតិលេខ៤ អាចទៅមកជាធម្មតា ប៉ុន្តែមានការកកស្ទះចរាចរណ៍ខ្លះៗ ត្រង់ចំណុចទឹកហូរកាត់ ដូច្នោះការបើកបរសូមមេត្តាប្រុងប្រយ័ត្ន និងចេះយោបល់គ្នាដើម្បីកាត់បន្ថយការកកស្ទះនេះ ៕

អត្ថបទ៖ ភួង រដ្ឋា