ព័ត៌មានជាតិ

ដកអាជ្ញាប័ណ្ណអាហារដ្ឋាន២កន្លែង ដែលល្មើសបម្រាមលួចបង្កប់ខារ៉ាអូខេ

បានផុស

៥ years មុន

នៅ

ថ្ងៃអាទិត្យ ៣ តុលា ២០២១

ដោយ

ថ្មីៗនេះ រដ្ឋបាលខេត្តបាត់ដំបង បានចេញសេចក្តីសម្រេចបិទទីតាំងអាហារដ្ឋានចំនួន២កន្លែង ដោយសារទីតាំងទាំងពីរនេះ បានបំពានទៅនឹងវិធានការរបស់រាជរដ្ឋាភិបាល និងបំពានទៅនឹងវិធានសុខាភិបាល យ៉ាងធ្ងន់ធ្ងរ ខណ:ដែលបច្ចុប្បន្នជំងឺកូវីដ-១៩ កំពុងរីករាលដាលនៅក្នុងសហគមន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយយោងទៅលើសេចក្តីជូនដំណឹងរបស់មន្ទីរទេសចរណ៍ ខេត្តបាត់ដំបង លេខ:១០៤ លស ចុះថ្ងៃទី២០ ខែកញ្ញា ឆ្នាំ២០២១ របស់លោក អ៊ុច អ៊ុំភីនីស្សារ៉ា បានបញ្ជាក់ថា អាហារដ្ឋានទាំងពីរនោះគឺ អាហារដ្ឋានម្លប់ដូង ដែលជារបស់លោកស្រី តាំង សុគន្ធា និងអាហារដ្ឋាន ហង្ស ៩៩៩៩ របស់លោក លីន វណ្ណា ដោយទីតាំងនេះស្ថិតនៅតាមបណ្តោយផ្លូវជាតិលេខ៥៧ ក្នុងភូមិវត្តគរ សង្កាត់វត្តគរ ក្រុងបាត់ដំបង។

សេចក្តីជូនដំណឹងបានបន្ថែមថា ការស្នើសុំអោយអាជ្ញាធរខេត្តដកអាជ្ញាប័ណ្ណទេសចរណ៍ មូលដ្ឋានអាជីវកម្ម ដោយសារតែទីតាំងនេះបើកលក់គ្រឿងស្រវឹង និងលួចបង្កប់បើកខារ៉ាអូខេ នៅខាងក្នុងទីតាំងផងដែរ ដែលជាបញ្ហាបំពានទៅនឹងវិធានការការពារការីករាលដាលនូវជំងឺកូវីដ-១៩ ។

ដោយសង្កេតឃើញបែបនេះ រដ្ឋបាលខេត្តបានសម្រេចប្រកាសដកអាជ្ញាប័ណ្ណទេសចរណ៍ សម្រាប់អាជីវកម្មចាប់ពីថ្ងៃជូនដំណឹងនេះតទៅ និងត្រូវទទួលរងនូវការផាកពិន័យ តាមគោលការណ៍ច្បាប់ជាធរមាន ដោយឡែកក៏មានអាហារដ្ឋាន និងភោជនីយដ្ឋានមួយចំនួនទៀតដែរ ដែលបានលួចលក់គ្រឿងស្រវឹង ប៉ុន្តែពួកគាត់បានចូលខ្លួនទៅធ្វើកិច្ចសន្យាហើយ នៅក្នុងមន្ទីរជំនាញ៕

អត្ថបទ៖ សោ និយមរ័ត្ន