ព័ត៌មានជាតិ

រកឃើញក្រុមបាតុករអតីតបុគ្គលិកណាហ្គាវើលដ៏១៦នាក់ទៀតវិជ្ជមានកូវីដ-១៩

បានផុស

៤ years មុន

នៅ

ថ្ងៃព្រហស្បតិ៍ ១៧ កុម្ភៈ ២០២២

ដោយ

មន្ទីរសុខាភិបាលនៃរដ្ឋបាលរាជធានីភ្នំពេញ បានប្រកាសរកឃើញក្រុមបាតុករអតីតបុគ្គលិក និងបុគ្គលិកក្រុមហ៊ុនណាហ្គាវើលដ៏ចំនួន១៦នាក់ទៀតមានផ្ទុកមេរោគកូវីដ-១៩ ក្រោយយកសំណាកជាលើកទី២។

បើតាមលោក បណ្ឌិត ងី មានហង ប្រធានមន្ទីរសុខាភិបាលនៃរដ្ឋបាលរាជធានីភ្នំពេញបានឱ្យដឹងនៅក្នុងសេចក្តីជូនដំណឹងចុះកាលពីយប់ថ្ងៃទី១៦កុម្ភៈថា កាលពីថ្ងៃទី១៦ ខែកុម្ភៈ ឆ្នាំ២០២២ ក្រុម គ្រូពេទ្យមន្ទីរសុខាភិបាលនៃរដ្ឋបាលរាជធានីភ្នំពេញបានធ្វើតេស្តយកសំណាកដើម្បីស្វែងរកមេរោគកូវីដ-១៩លើក្រុមបាតុករអតីតបុគ្គលិក និងបុគ្គលិកក្រុមហ៊ុនណាហ្គាវើលដ៏ លើកទី២ ចំនួន១៦៣នាក់ ក្នុងចំណោមក្រុមបាតុករដែលបានមកយកសំណាកចាប់ពីថ្ងៃទី០៥ ដល់ថ្ងៃទី០៧ ខែកុម្ភៈ ឆ្នាំ២០២២ សរុបចំនួន៨៧៩នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិតបានបន្តថា ជាលទ្ធផលគិតត្រឹមម៉ោង១៧និង០០នាទីនៅល្ងាចថ្ងៃដដែលនេះ មានមនុស្សចំនួន១៦នាក់ត្រូវបានរកឃើញថា មានផ្ទុកមេរោគកូវីដ-១៩វិជ្ជមាន ។ លោកបណ្ឌិតបានបន្តទៀតថា មន្ទីរសុខាភិបាលនៃរដ្ឋបាលរាជធានីភ្នំពេញ ណែនាំក្រុមបាតុករ និងអ្នកពាក់ព័ន្ធទាំងអស់ដែលជាអ្នកប៉ះពាល់ផ្ទាល់ជាមួយអ្នកវិជ្ជមានកូវីដ-១៩ចំនួន១៦នាក់ខាងលើ ត្រូវធ្វើចត្តាឡីស័ករយៈពេល០៧ថ្ងៃ ដោយគោរពឱ្យបានម៉ឺងម៉ាត់បំផុតតាមវិធានសុខាភិបាល។

សូមបញ្ជាក់ថា ក្រសួងសុខាភិបាលបានប្រកាសរកឃើញក្រុមបាតុករអតីតបុគ្គលិកណាហ្គាវើលដ៍ឆ្លងជំងឺកូវីដ១៩ប្រភេទអូមីក្រុងជាលើកដំបូងកាលពីថ្ងៃទី០៤ កុម្ភៈឆ្នាំ២០២២ទៅលើស្ត្រីមានផ្ទៃពោះម្នាក់ក្រោយពីស្ត្រីនោះទៅពិនិត្យផ្ទៃពោះកាលពីថ្ងៃទី២៨ ខែមករា ឆ្នាំ២០២២ ។

ក្រោយមកមន្ទីរសុខាភិបាលនៃរដ្ឋបាលរាជធានីភ្នំពេញបានបន្តរកឃើញក្រុមបាតុករអតីតបុគ្គលិកណាហ្គាវើលដ៍ឆ្លងជំងឺកូវីដ១៩ចំនួន៣៣នាក់បន្ថែមទៀត ក្នុងនោះ០៤នាក់រកឃើញនៅថ្ងៃទី០៥កុម្ភៈ

និង២៩នាក់រកឃើញនៅថ្ងៃទី០៦កុម្ភៈឆ្នាំ២០២២៕

អត្ថបទ៖ សំអឿន