ពលរដ្ឋ៣ភូមិផ្ដិតមេដៃសុំអន្តរាគមន៍ទៅថ្នាក់ដឹកនាំ ករណីមេភូមិ និងមេឃុំ ចុះហត្ថលេខាទិញលក់ដីសារធារណៈ

ពលរដុ្ឋនៅក្នុងភូមិចំនួនបី គឺភូមិរំចេកខាងកើត ភូមិរំចេកកណ្ដាល និងរំចេកលិច មានការមិនសប្បាយចិត្ដ និងសម្ដែងការហួសចិត្ដ បាននាំគ្នាផ្ដិតមេដៃសុំអន្តរាគមន៍ទៅថ្នាក់ដឹកនាំ ខណះដីចំណីអូរមួយកន្លែងស្ថិតនៅក្នុងអនុក្រិត្យក្រសួងធនធានទឹក ដែលមានទំហ៊ុំ២០គុណ៧០ម៉ែត្រ ជាប់នឹងទំនប់អាងទឹករំចេក និងកសាងសំណង់របស់ក្រសួងធនធានទឹកនិងឧតុនិយមខេត្ត ស្ថិតនៅក្នុងភូមិរំចេក ឃុំអន្លង់វែង ស្រុកអន្លង់វែង ខេត្តឧត្ដរមានជ័យ ដែលត្រូវបានលោក យ៉េ អ៊ុន មេភូមិរំចេកលិច និងលោក វង្ស ភក្រ្ដ មេឃុំអន្លង់វែង ចុះហត្ថលេខាលើលិខិត ប្រវត្ដដី អោយទៅឈ្មោះ លឹម ជា ភេទប្រុសអាយុអាយុ៥៣ រស់នៅភូមិច្រាំងចំរេះ ខណ្ឌឫស្សីកែវ ក្រុងភ្នំពេញ និងប្រពន្ធឈ្មោះ ហេង សុគន្ធា ។

នៅថ្ងៃទី២៦ ខែមេសា ឆ្នាំ២០២២ អាជ្ញាធរស្រុកអន្លង់វែង ដឹកនាំដោយលោក ងួន លីន នាយករដ្ឋបាលសាលាស្រុកអន្លង់វែង បានដឹកនាំកងកម្លាំងសមត្ថកិច្ចចម្រុះ និងមន្រ្ដីជំនាញចុះទៅរុះរើបង្គោលរបងតាមបទបញ្ជារបស់លោកអភិបាលស្រុកអន្លង់វែង តែត្រូវបានបរាជ័យ។អាជ្ញាធរ និងមន្ត្រីជំនាញបានអះអាងថា ទីតាំងដីនោះពិតជាដីសាធារណះរបស់រដ្ឋពិតប្រាកដមែន ដោយពុំមានបុគ្គលណាម្នាក់មានសិទ្ធ កាន់កាប់នៅលើទីតាំងដីនេះបានឡើយ តែត្រូវបុគ្គលឈ្មោះ អួន វិបុល ភេទប្រុស អាយុ៥២ ចេញមុខរារាំងអាជ្ញាធរ និងសមត្ថកិច្ចមិនអោយ​​ធ្វើការរុះរើបានឡើយ ដោយអះអាងថា ខ្លួនបានលក់អោយគេទៅហើយមានបណ្ណ័កម្មសិទ្ធ ដែលចុះហត្ថលេខាដោយលោក យេ អ៊ុន មេភូមិរំចកលិច និងលោក វង្ស ភក្រ្ដ មេឃុំអន្លង់វែង៕

អត្ថបទ៖ ចាន់ ធី