ប្រទះឃើញគ្រាប់បែកមិនទាន់ផ្ទុះទម្ងន់ជិត១តោន ក្បែរសណ្ឋាគារសុខាភ្នំពេញ

កម្លាំងជំនាញគ្រាប់យុទ្ធភណ្ឌសង្គ្រាមរបស់អង្គភាពស៊ីម៉ាក់​ បានធ្វើការត្រួតពិនិត្យ និងបោសសំអាតគ្រាប់បែកទម្លាក់ពីយន្តហោះប្រភេទ​ AN-M66 (ឬAN-M34) ដែលមានទម្ងន់ជិត១០០០គីឡូក្រាម និងជាប្រភេទគ្រាប់បែកមានឋាមពលបង្កគ្រោះថ្នាក់ខ្ពស់។

យោងតាមហ្វេសប៊ុកផេកផ្លូវការបស់លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) ស៊ីម៉ាក់ បានឲ្យដឹងថា នៅថ្ងៃទី០៥​ ​ខែឧសភា​ ឆ្នាំ២០២២នេះ​ កម្លាំងជំនាញគ្រាប់យុទ្ធភណ្ឌសង្គ្រាមរបស់អង្គភាពស៊ីម៉ាក់​ បានធ្វើការត្រួតពិនិត្យ និងបោសសំអាតគ្រាប់បែកទម្លាក់ពីយន្តហោះប្រភេទ​ AN-M66 (ឬAN-M34) ដែលបាន​ប្រទះឃើញនៅពេលស្តារកាយល្បាប់បាតទន្លេ​ ស្ថិតនៅទន្លេបួនមុខ ក្បែរសណ្ឋាគារសុខាភ្នំពេញ និងទល់មុខព្រះបរមរាជវាំង​។

លោក ហេង រតនា បានបញ្ជាក់ថា គ្រាប់បែកទម្លាក់ពីយន្តហោះប្រភេទAN-M66 នេះ មានទម្ងន់ជិត១.០០០គីឡូក្រាម​ មានជាតិផ្ទុះជាង៥០០គីឡូក្រាម​ ដែលមានឋាមពលបង្កគ្រោះថ្នាក់ខ្ពស់​ ជាគ្រាប់បែកផលិតនៅសហរដ្ឋអាមេរិក ​និងជាសំណល់ពីសង្គ្រាម។ លោកបន្ថែមថា តាមទិន្នន័យព័ត៌មាន មានគ្រាប់បែកប្រភេទAN-M66 នេះចំនួន១១គ្រាប់​ ក្នុងចំណោមគ្រាប់រាប់លានគ្រាប់ ដែលបានទម្លាក់នៅកម្ពុជា។

ជាមួយគ្នានេះ​ លោកក៏សូមអរគុណឯកឧត្ដមអភិបាល នៃគណ:អភិបាលរាជធានីភ្នំពេញ​ ដែលបានសហការយ៉ាងជិតសិ្នទ្ធជាមួយកម្លាំងអង្គភាពស៊ីម៉ាក់​ ក្នុងការជម្លៀស​គ្រាប់បែកដ៍ធំមួយនេះ​ចេញពីទីតាំងរាជធានីភ្នំពេញ​ទៅរកកន្លែងសុវត្ថិភាពដើម្បីកម្លាំងជំនាញអង្គភាពស៊ីម៉ាក់ធ្វើការដោះបន្សាប​ ធានាសុខសុវត្ថិភាពជូនសង្គមជាតិ៕