សំណល់ពីសង្គ្រាម ផ្ដាច់ជីវិតកសិករម្នាក់ពេលកំពុងភ្ជួរដីចម្ការ

គ្រាប់មីនតោនមួយគ្រាប់ដែលសល់ពីសង្គ្រាមបានផ្ដាច់ជីវិតបុរសជាកសិករម្នាក់ពេលបញ្ជូនដល់មន្ទីរពេទ្យ ខណៈជនរងគ្រោះកំពុងបើកត្រាទ័រភ្ជួរដីចម្ការរបស់ខ្លួន។

ករណីផ្ទុះមីនតោនបណ្ដាលឲ្យកសិករម្នាក់បាត់បង់ជីវិតនេះ បានកើតឡើងនៅល្ងាចថ្ងៃទី១៣​ ខែកក្កដា​ ឆ្នាំ២០២៥​ នៅចំណុចដីចម្ការមួយកន្លែងស្ថិតក្នុងភូមិរស្មីសង្ហារ​ ឃុំរស្មីសង្ហារ​ ស្រុករតនមណ្ឌល​ ខេត្តបាត់ដំបង​។

លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានឲ្យដឹងតាមរយៈទំព័រហ្វេសប៊ុកផ្ទាល់ខ្លួននៅព្រឹកថ្ងៃទី១៤កក្កដានេះថា ជនរងគ្រោះជាអ្នកបើកត្រាក់ទ័រភ្ជួរដីមានឈ្មោះ ផុន​ សុភី បានដាច់ជើងម្ខាង និងបានស្លាប់នៅមន្ទីរពេទ្យខេត្តបាត់ដំបង​ ចំណែកត្រាក់ទ័រភ្ជួរដីខូចខាតទាំងស្រុង។

លោក ហេង រតនា បញ្ជាក់ថា ករណីនេះ គឺជាករណីផ្ទុះមីនតោនសល់ពីសង្គ្រាមកេីតឡេីង​នៅពេលជនរងគ្រោះ​កំពុងភ្ជួរដីចម្ការរបស់គាត់។ លោកក៏សូមចូលរួមរំលែកទុក្ខដ៏ក្រៀមក្រំជាមួយគ្រួសារសព​ និងសូមវិញ្ញាណខន្តសពបានទៅកាន់ទីឋានបរមសុខកុំបីឃ្លៀងឃ្លាតឡេីយ៕