លោក ហ៊ុន ម៉ានី​ បង្ហាញ​គន្លឹះ​ក្នុងការ​ដឹកនាំ​យុវជន​ទាមទារ​ឱ្យ​ចេះក្ដាប់​ស្ថានការណ៍​ និងវាយ​តម្លៃទាន់​ពេលវេលា

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅថ្ងៃទី១២ ខែឧសភា ឆ្នាំ២០២២ បាន​ថ្លែង​ចែករំលែកអំពីបទពិសោធន៍​ របស់លោក ក្នុងការដឹកនាំស្ថាប័នយុវជន ដោយលោក​បញ្ជាក់​ថា តួនាទីជាអ្នកដឹកនាំ ត្រូវចេះក្ដាប់ស្ថានការណ៍ និងចេះ​វាយតម្លៃទាន់ពេលវេលា។

ក្នុងនាមជាថ្នាក់ដឹកនាំយុវជន តើការងារអ្វីដែលលំបាកជាងគេ? នេះជាសំណួររបស់និស្សិតម្នាក់ ដែលបានសួរទៅកាន់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅថ្ងៃទី១២ ខែឧសភា ឆ្នាំ២០២២ ក្នុងពិធីសំណេះ​សំណាលជាមួយថ្នាក់ដឹកនាំ សមាជិក សមាជិកា ស.ស.យ.ក ប្រចាំសាកលវិទ្យាល័យជាតិគ្រប់គ្រង។

ឆ្លើយតបសំណួរនេះ លោក ហ៊ុន ម៉ានី លើកឡើងថា លោកមិនទាន់អាចឆ្លើយក្នុងនាមជាថ្នាក់ ដឹកនាំយុវជនបានឡើយ ប៉ុន្តែលោកសូមឆ្លើយក្នុងតួនាទីជាថ្នាក់ដឹកនាំស្ថាប័នយុវជន។ លោក បញ្ជាក់ថា ការអនុវត្តការងារសុទ្ធតែហត់មិនថាការងារតូច ឬធំ ខណៈស្ថិតក្នុងតួនាទីកាន់តែខ្ពស់ ការប្រឈម និងការដោះស្រាយបញ្ហាក៏កាន់តែពិបាក។

បើតាមលោក ហ៊ុន ម៉ានី តួនាទីជាថ្នាក់ដឹកនាំស្ថាប័នយុវជនទាមទារឲ្យម្នាក់ៗត្រូវចេះស្គាល់ ​និង ក្តាប់ស្ថានការណ៍ ចេះវាយតម្លៃស្ថានភាពឲ្យបានទាន់ពេលវេលា ព្រមទាំងចេះប្រើប្រាស់យន្តការ ដែលមានក្នុងដៃឲ្យអស់ពីសមត្ថភាព ដើម្បីកំណត់ជាដំណោះស្រាយណាមួយដែលឆ្លើយតបទៅ នឹងតម្រូវការជាក់ស្តែង។

បន្ថែមលើការអនុវត្តភាពជាអ្នកដឹកនាំរបស់ខ្លួននេះលោក ហ៊ុន ម៉ានី សង្កត់ធ្ងន់ថា សមត្ថភាពនៃ ការចេះសម្របសម្រួល ក៏ជាការសំខាន់មិនអាចកាត់ផ្ដាច់បានផងដែរ ព្រោះថាវាជាមូលដ្ឋានក្នុង ការឈានដល់ការសម្រេចចិត្តណាមួយ។

ជាក់ស្ដែងបទពិសោធក្នុងការដឹកនាំស.ស.យ.ក លោកចាត់ទុកថា សិល្បៈនៃការដឹកនាំ គឺសំខាន់ តែការចេះដឹកនាំសម្របសម្រួលប្រកបដោយចក្ខុវិស័យ ទស្សនៈទាន និងភាពម៉ត់ចត់តែទន់ភ្លន់ក្នុងការរក្សាទំនាក់ទំនង គឺកាន់តែសំខាន់ថែមទៀត ដើម្បីធានាបាននូវការរួមគ្នាសម្រេចគោលដៅឈានឆ្ពោះទៅមុខបានវែងឆ្ងាយ និងយូរអង្វែង៕

អត្ថបទ៖ ធឿន វ៉ាន់សុង