Connect with us

ព័ត៌មានជាតិ

ជិត​២​ខែ មាន​ពលរដ្ឋ​នៅ​កោះកុង​មក​ចាក់​វ៉ាក់សាំង​ដូ​ស​ទី​៥​បានតែ​៣.៨២៩​នាក់

បានផុស

នៅ

កោះកុង​ ៖ ក្រុម​មន្ត្រី​ជំនាញ សមត្ថកិច្ច​ជួរមុខ និង​ប្រជាពលរដ្ឋ​នៅ​ខេត្ត​កោះ​កុន​តែ​៣.៨២៩​នាក់​ប៉ុណ្ណោះ​ដែល​បានមក​ទទួល​ថ្នាំ​វ៉ាក់សាំង​ដូ​ស​ទី​៥​បង្ការ​ការពារ​ជំងឺ​កូ​វីដ​១៩​នៅ​ខេត្តកោះកុង រយៈពេល​២​ខែ​មកនេះ គ្រា​ស្ថិតិ​ក្រុម​គោលដៅ​ជាង​១​ម៉ឺន​នាក់​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិត​ចាប់ពី​ថ្ងៃទី​៩ ខែមិថុនា មកដល់​ថ្ងៃទី​៥ ខែកក្កដា ឆ្នាំ​២០២២ មាន​រយៈពេល​ជិត​២​ខែ​ហើយ​នៃ​យុទ្ធនា​ការផ្តល់​ថ្នាំ​វ៉ាក់សាំង​ការពារ​ជំងឺ​កូ​វីដ​ដូ​ស​ទី​៥​ជូន​គ្រូពេទ្យ មន្ត្រីរាជការ កងកម្លាំងប្រដាប់អាវុធ​ជួរមុខ និង​ប្រជាពលរដ្ឋ​ដែល​ត្រូវ​ចាក់​វ៉ាក់សាំង​។

លោក​វេជ្ជបណ្ឌិត ទៅ ម៉ឹង ប្រធាន​មន្ទីរ​សុខាភិបាល បាន​ពន្យល់​នៅ​រសៀល​ថ្ងៃទី​៦ ខែកក្កដា ឆ្នាំ​២០២២​ថា ក្រុមគ្រូពេទ្យ​ដែល​ប្រចាំ​នៅតាម​ទីតាំង​មណ្ឌល​សុខភាព​ឃុំ​សង្កាត់​នីមួយៗ​ទូទាំង​ខេត្ត បានទទួល​ចាក់​វ៉ាក់សាំង​បានត្រឹមតែ​ចំនួន​៣.៨២៩​នាក់ ក្នុងចំណោម​ក្រុម​គោលដៅ​ដែល​នឹងត្រូវ​ចាក់​ជាង​១​ម៉ឺន​នាក់​។

លោក​វេជ្ជបណ្ឌិត​ប្រធាន​មន្ទីរ​សុខាភិបាល​ខេត្តកោះកុង បញ្ជាក់ទៀតថា ក្នុង​១​ថ្ងៃៗ​តាម​បណ្តា​មណ្ឌល​សុខភាព គឺមាន​មនុស្ស​តែ​២០​ទៅ​៣០​នាក់​បាន​ស្ម័គ្រចិត្ត​អញ្ជើញ​មក​ទទួល​វ៉ាក់សាំង​ដូ​ស​ទី​៥ ឬ​ដូ​ស​ទី​៤​។​ដូច្នេះ​ល្បឿន​អត្រា​អ្នកចូលរួម​ចាក់​វ៉ាក់សាំង​ពី​ក្រុម​គោលដៅ ហាក់​មាន​កម្រិត​មិនទាន់​បំពេញ​ទៅតាម​ស្ថិតិ​ដែល​គ្រោង​ក្នុង​ក្រុមមនុស្ស​គោលដៅ​។

លោក​វេជ្ជបណ្ឌិត ទៅ ម៉ឹង បន្ថែមថា មូល​ដែល​ល្បឿន​នៃ​ការចាក់​វ៉ាក់សាំង​ហាក់​យឺត​យ៉ាង​ដូច្នេះ ព្រោះ​តែមាន​យន្តការ​បើកទូលាយ​ជូន​មន្ត្រីរាជការ គ្រូពេទ្យ នគរបាល យោធា​ជួរមុខ ក៏ដូចជា​ប្រជាពលរដ្ឋ អាច​ស្វែងរក​ទីតាំង​ចាក់​វ៉ាក់សាំង​ណាមួយ​ដោយ​ខ្លួនឯង​មិន​ចំ​ចំពោះតែ​នៅក្នុង​ខេត្តកោះកុង​នោះទេ​។ ខ្លះ​មាន​ជំងឺ ឬ​មិនទាន់​ដល់ពេល​វេលា​មកចាក់ រីឯ​ខ្លះទៀត ហាក់​លែង​បារម្ភ​ពី​ជំងឺ​កូ​វីដ​១៩​។​

លោក​វេជ្ជបណ្ឌិត ទៅ ម៉ឹង អះអាង​ដែរ​ថា ទោះ​យ៉ាងនេះ​ក្តី ក៏​មន្ត្រី​សុខាភិបាល​របស់លោក នៅតែ​បន្ត​ត្រៀម​ផ្តល់​សេវា​សុខភាព​គ្រប់​ម៉ោង​ធ្វើការ​នៅតាម​មណ្ឌល​សុខភាព និង​នៅតាម​ទី​ស្នាក់​ប៉ុស្តិ៍​សុខភាព​ភូមិ ដើម្បី​ឆ្លើយតប​នឹង​គោលនយោបាយ​របស់​រាជ​រដ្ឋាភិបាល​ផ្តល់​វ៉ាក់សាំង​ការពារ​ជំងឺ​កូ​វីដ​១៩​។ ជាពិសេស​ផ្តល់​វ៉ាក់សាំង​មិន​ធ្វើ​ចំពោះតែ​ដូ​ស​ទី​៥​នោះទេ ដូ​ស​ទី​១​រហូតដល់​ដូ​ស​ទី​៤ ក៏​ទទួល​ផ្តល់​សេវា​ដែរ​។​

ពាក់ព័ន្ធ​នឹង​អត្រា​ចាក់​វ៉ាក់សាំង​នេះដែរ ថ្មីៗ​នេះ លោកស្រី មិថុនា ភូ​ថង អភិបាលខេត្ត​កោះកុង និង​អភិបាលរង​ខេត្ត អំឡុងពេល​ចុះ​ប្រកាស​សុ​ព​ភាព​សមាជិក​ក្រុមប្រឹក្សាឃុំ​សង្កាត់ អាណត្តិ​ទី​៥​តាម​សាលាឃុំ​សង្កាត់​នីមួយៗ បាន​ជំរុញ​ឱ្យ​មេឃុំ និង​ចៅសង្កាត់ ធ្វើយ៉ាងណា​បង្កើន​ការលើក​ចិត្ត​ដល់​ប្រជាពលរដ្ឋ​ដែល​មិនទាន់​ទទួល​វ៉ាក់សាំង​តាម​ការកំណត់​ត្រូវ​មក​ទទួល​ឱ្យបាន​គ្រប់ៗ​គ្នា ខណៈ​រាជរដ្ឋាភិបាល​បារម្ភ​ពី​ការរកឃើញ​អត្រា​អ្នក​ឆ្លង​ជំងឺ​កូ​វីដ​១៩​ឡើងវិញ​៕​

អត្ត​ប​ទ ៖ សិរី​វឌ្ឍនៈ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម