ស្ត្រីនៅសៀមរាប ចេញរោគសញ្ញាឡើងកន្ទួល មិនមែនកើតអុតស្វាទេ

សមត្ថកិច្ចបានឲ្យដឹងនៅរសៀលថ្ងៃទី ២៦ ខែកក្កដា ឆ្នាំ២០២២នេះថា ក្រុមការងារបានចុះពិនិត្យមើលស្ត្រីមានផ្ទៃពោះ ៨ខែម្នាក់មានជំងឺអុតស្វាយ កំពុងព្យាបាលនៅមន្ទីរពេទ្យបង្អែកខេត្តសៀមរាប។

អ្នកជំងឺឈ្មោះ រ៉េណ ម៉ា អាយុ ២៣ឆ្នាំ មានផ្ទៃពោះ ៨ខែ រស់នៅភូមិទ្រាំង សង្កាត់ ស្លក្រាម ក្រុងសៀមរាប មានប្តីឈ្មោះថា ប៊ុន ម៉ៅ អាយុ ២៨ឆ្នាំ មុខរបរអ្នកលក់បារីចល័តក្នុងខេត្តសៀមរាប។

អ្នកជំងឺចេញរោគសញ្ញានៅថ្ងៃសៅរទី ២៣ ខែ កក្កដា ឆ្នាំ២០២២ មានក្តៅខ្លួន ចេញមុន កន្ទួលក្រហម ពងទឹក និងមានខ្ទុះ លើពងខ្លះ ចេញនៅលើមុខ ដើមទ្រូង ក្បាល រួចចេញពេញខ្លួនតែម្តង។

សមត្ថកិច្ចបញ្ជាក់ថា ក្រុមការងារបានយកសំណាក ច្រម៉ុះ បំពង់ករ យកឈាមដាក់ក្រហម យកទឹករងៃ និងខ្ទុះ នៅលើដំបៅទៅពិនត្យផងដែរ។

​ពាក់ព័ន្ធនឹងករណីនេះដែរ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍ឲ្យដឹងថា ករណីស្រ្តីឆ្លងជំងឺអុតស្វាយខាងលើ បានធូរស្រាលហើយកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។

លោកបន្ថែមថា ជំងឺនេះអុតស្វាយនេះជាជំងឺឆ្លងធម្មតា ដែលភាគច្រើនកើតមានចំពោះក្មេងៗ តែជំងឺអ៊ុតស្វា មានភាពស្រដៀងគ្នា ដោយសារការឆ្លងមានភាពលឿនជាងជំងឺអុតស្វាយ។ លោកបញ្ជាក់ថា ករណីនេះមិនមានឆ្លងរាលដាលទៅអ្នកដ៏ទៃទៀតនោះទេគឺឆ្លងតែស្ត្រីពោះធំខាងលើតែប៉ុណ្ណោះ៕

អត្ថបទ៖ កុសល