សម្ដេចតេជោ ផ្ដាំទៅអ្នកវិភាគមួយរូបថា «បើគ្រួសាររបស់លោកអញ្ចឹង លោកកុំគិតថា គ្រួសាររបស់ខ្ញុំដូចគ្រួសារលោក»

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្ដាំត្រឡប់ទៅអ្នកវិភាគមួយរូបនៅក្រៅប្រទេសថា កូនៗរបស់សម្ដេច មានការគោរពស្រលាញ់គ្នាណាស់ ហើយក៏គ្មានការដណ្ដើមគ្នាធ្វើជានាយករដ្ឋមន្ត្រីនាពេលអនាគត ដែរ។  

សម្ដេចតេជោ ហ៊ុន សែន បានថ្លែងក្នុងពិធីបើកការដ្ឋានសាងសង់ស្ពានអាកាស ក្នុងរាជធានីភ្នំពេញចំនួន ២បន្ថែមទៀត នាព្រឹកថ្ងៃទី ៣១ ខែសីហានេះថា ជារឿងគាប់ជួនមួយ ដែលលោក ឆាយ សុផល បានសរសេរសៀវភៅមួយក្បាល មានចំណងជើងថា «កូនប្រុសច្បងនាយករដ្ឋមន្ត្រី ដំណើរឆ្ពោះទៅបន្តវេន ហ៊ុន ម៉ាណែត» និងលោក​ លាង ​ឌឺលុច បានសរសេរសៀវភៅមួយក្បាលដែរ មានចំណងជើងថា «ក្ដីសង្ឃឹម ហ៊ុន ម៉ានី» តែបែរជាអ្នកវិភាគយកទៅវិភាគក្នុងបណ្ដាញផ្សព្វផ្សាយថា កូនប្រុសរបស់សម្ដេចទាំងពីរ កំពុងប្រជែងគ្នាធ្វើជានាយករដ្ឋមន្ត្រីនាពេលអនាគត ដែលត្រូវឲ្យសម្ដេចចេញមុខសម្រួលទៅវិញ។

សម្ដេចតេជោ ហ៊ុន សែន បានផ្ដាំទៅអ្នកវិភាគរូបនោះថា «បើគ្រួសាររបស់លោកអញ្ចឹង លោកកុំគិតថា គ្រួសាររបស់ខ្ញុំដូចគ្រួសារលោក ព្រោះលោក គ្រាន់តែប្រពន្ធរបស់លោក ក៏លែងលះគ្នាដែរ បានជាលោកទៅពរកូនទៅ​ ប្រពន្ធនៅក្នុងប្រទេស សូម្បីតែប្រពន្ធរបស់លោក លោកមិននឹងត្រូវផង តើលោករឿងអីត្រូវជាមួយខ្ញុំ»។

សម្ដេចតេជោនាយករដ្ឋមន្ត្រី បានបន្ថែមទៀតថា កូនៗរបស់សម្ដេច មានការគោរពស្រលាញ់ និងស្ដាប់គ្នាទៅវិញទៅមកណាស់ ហើយក៏គ្មានការប្រជែងគ្នាធ្វើជានាយករដ្ឋមន្ត្រី នាពេលអនាគតដែរ។ សម្ដេចតេជោ ហ៊ុន សែន បានថ្លែងថា «បងប្អូនគេ គេមានឋានានុក្រមរបស់គេ គេស្ដាប់បងរបស់គេណាស់ គេគ្មានមហិច្ឆតា​ ដើម្បីធ្វើជានាយករដ្ឋមន្ត្រីជំនួសបងរបស់គេ ដណ្ដើម វាទៅជាវិភាគ ដំបូងវិភាគត្រឹមតែគណបក្សប្រជាជនទេ គណបក្សប្រជាជនអត់ឯកភាពទេ ក្នុងការលើក ហ៊ុន ម៉ាណែត ឥឡូវដល់ទៅ ហ៊ុន ម៉ាណែត និង ហ៊ុន ម៉ានី ដណ្ដើមគ្នាធ្វើនាយករដ្ឋមន្ត្រី ជំលោះធ្ងន់ធ្ងរក្នុងគ្រួសារ ត្រូវតម្រូវឲ្យលោក ហ៊ុន សែន ចេញមកសម្របសម្រួល»។

សម្ដេចតេជោ ហ៊ុន សែន បានថ្លែងបញ្ជាក់ទៀតថា «អត់ចាំបាច់សម្របសម្រួលទេ កូនរបស់ខ្ញុំ គេស្គាល់គ្នាណាស់ ហើយគេគោរពបងរបស់គេណាស់….សូមផ្ដាំត្រឡប់ទៅវិញ បើលោកមិនចេះគ្រប់គ្រងគ្រួសារទេ រហូតត្រឹមតែប្រពន្ធមួយលោកលែងលះគ្នា ចែកកូន ចែកចៅគ្នា និងរឿងរបស់លោក តែរឿងរបស់ខ្ញុំ គឺខ្ញុំអប់រំកូន និងចៅរបស់ខ្ញុំបានល្អណាស់»៕​

អត្ថបទ៖ ឃួន សុភ័ក្រ