សម្តេចតេជោ ហ៊ុន សែន ផ្ញើសាររំលែទុក្ខ​ជាមួយ​រាជរដ្ឋាភិបាលថៃ

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើសាររំលែកមរណទុក្ខ ជូនលោក ប្រាយុទ្ធ ចាន់អូចា នាយករដ្ឋមន្ត្រីថៃ ពាក់ព័ន្ធនឹងហេតុការណ៍បាញ់ប្រហារ នៅក្នុងប្រទេសថៃ បណ្តាលឲ្យមានមនុស្សស្លាប់​ជាច្រើននាក់។

តាមរយៈលិខិរបស់សម្តេចតេជោ មានខ្លឹមសារដូច្នេះថា« ខ្ញុំមានសេចក្តីតក់ស្លុត និងក្រៀមក្រំយ៉ាងខ្លាំង ដោយបានទទួល​ព័ត៌មានអំពីការបាញ់រះសម្លាប់រង្គាលនៅមជ្ឈមណ្ឌលថែទាំកុមារ ក្នុងខេត្តប៊ូឡាំភូ ភាគឦសាននៃប្រទេសថៃ កាលពីថ្ងៃទី ០៦ ខែតុលា ឆ្នាំ ២០២២ ដែលបានឆក់យកជីវិតមនុស្សជាច្រើន ភាគច្រើនជាកុមារ និងអ្នករបួសមួយចំនួន»។

នៅក្នុងខ្លឹមសារលិខិតដដែលបញ្ជាក់ថា ក្នុងនាមរាជរដ្ឋាភិបាល នៃប្រជាជនកម្ពុជា ខ្ញុំសូមសម្តែងនូវសមានចិត្តយ៉ាង​ជ្រាលជ្រៅ និងសូមចូលរួមរំលែកទុក្ខយ៉ាងក្រៀមក្រំបំផុត ជូនចំពោះរាជរដ្ឋាភិបាល និងប្រជាជនថៃ ជាពិសេសក្រុម​គ្រួសារ​នៃសព និងជនរងគ្រោះ។

កម្ពុជា ស្ថិតនៅជាមួយថៃក្នុងខណៈពេលដ៏សោកសង្រេងនៃឧប្បត្តិហេតុសម្លាប់រង្គាលនេះ និងសូមបួងសួងឱ្យអ្នក​ដែលទទួលរងគ្រោះឆាប់ជាសះស្បើយ៕