សារមន្ទីរសន្ដិភាពនឹងក្លាយជាមរតកជាតិមួយបង្ហាញពិភពលោកពីការតស៊ូរបស់សម្ដេចតេជោបញ្ចប់សង្គ្រាមនៅកម្ពុជា

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានឱ្យដឹងថា សារមន្ទីរសន្ដិភាពសកម្មភាពមីន ដែលគ្រោងនឹងសាងសង់នាពេលខាងមុខនេះ នឹងក្លាយជាមរតកជាតិមួយ ក្នុងការដាក់បង្ហាញមតិជាតិ និងអន្ដរជាតិ​ឱ្យកាន់តែយល់ច្បាស់ថែមទៀត នូវការខិតខំពុះពារប្ដូរផ្ដាច់របស់សម្ដេចតេជោ ហ៊ុន សែន នាយករដ្ឋមន្រ្តី ក្នុងការ​បញ្ចប់សង្គ្រាមនៅកម្ពុជា ។

ថ្លែងក្នុងពិធីចុះហត្ថលេខារវាងអង្គភាពCMAC និងក្រុមហ៊ុន OC GIOBALរបស់ជប៉ុន លើសេវាកម្មប្រឹក្សាសម្រាប់​គម្រោងសាងសង់មជ្ឈមណ្ឌលហ្វឹកហ្វឺន និងសារមន្ទីរ នៃមជ្ឈមណ្ឌលសកម្មភាពកំចាត់មីនកម្ពុជា កាលពីរសៀល​ថ្ងៃទី២៦ មករា នៅទីបញ្ជាការស៊ីម៉ាក់ភ្នំពេញ លោក ហេង រតនា បានបន្តថា រដ្ឋាភិបាលភិបាលជប៉ុន តាមរយៈអង្គការ JICAបានសម្រេចផ្ដល់ហិរញ្ញប្បទានឥតសំណងជូនអង្គភាពCMACសម្រាប់គម្រោងសាងសង់អាគារហ្វឹកហ្វឺន និងអាគារផ្សព្វផ្សាយអប់រំយល់ដឹងពីសង្គ្រាម ដែលមានទឹកប្រាក់សរុបចំនួន២.៤៥១លានយ៉េង ប្រមាណ១៧.៥​លានដុល្លារអាមេរិក។

លោកអគ្គនាយកស៊ីម៉ាក់បានបន្តទៀតថា ក្រោយពីការចុះហត្ថលេខានេះ ក្រុមការងារទីប្រឹក្សាជប៉ុននឹងចុះវាយ​តម្លៃលម្អិតអំពីប្លង់ទាំងពីរ និងពិនិត្យទីតាំងសាងសង់ជាក់ស្តែង។ 

លោកអគ្គនាយកស៊ីម៉ាក់បានបន្ថែមថា« ខ្ញុំមានជំនឿយ៉ាងមុតមាំថា សារមន្ទីរសន្ដិភាពសកម្មភាពមីននឹងក្លាយ​ជាមរតកជាតិមួយក្នុងការដាក់បង្ហាញមតិជាតិ និងអន្ដរជាតិឲ្យកាន់តែយល់ច្បាស់ថែមទៀត​នូវការខិតខំពុះ​ពារប្ដូរផ្ដាច់របស់សម្ដេចតេជោ ក្នុងការបញ្ចប់សង្គ្រាមនៅកម្ពុជា និងបានកសាងសន្ដិភាពយ៉ាង​ពេញលេញ​ពិតប្រាកដមួយសម្រាប់ប្រជាជននិងប្រទេសជាតិដ៏កំសត់នេះ»។

លើសពីនេះទៀត សារមន្ទីរសន្តិភាព​ ក៏នឹងក្លាយជាឃ្លាំងចំណេះដឹង​ និងព័ត៌មាន​ចងចាំពីទុក្ខសោក​វេទនារបស់​ប្រជាជន​កម្ពុជា ឆ្លងកាត់សង្គ្រាម និងសំណល់យុទ្ធភណ្ឌសង្គ្រាម​ ព្រមទាំងតម្កល់​តម្លៃសន្តិភាព​ជាមរតកដ៏មហាសាល។

លោកអគ្គនាយកស៊ីម៉ាក់បានឱ្យដឹងទៀតថា សារមន្ទីរសន្តិភាពនេះ​ ផ្តោតលើទស្សនសារមន្ទីរស៊ីវិលដូចជា សារមន្ទីរនៅ​ហ៊ីរ៉ូស៊ីម៉ា​ និងអូគីណាវ៉ានៃប្រទេសជប៉ុនអញ្ចឹងដែរ។  ខាងJICA ក៏បានគិតគូរ និងខិតខំកៀរគរអ្នកជំនាញ​មកពីហ៊ីរ៉ូស៊ី​ម៉ា​​និងអូគីណាវ៉ា​ មកសហការគាំទ្រដល់អង្គភាពស៊ីម៉ាក់​ ដើម្បីរៀបចំសារមន្ទីរសន្តិភាព​ឱ្យកាន់តែទំនើបទាំង​ប្រពន្ធ័គ្រប់​គ្រង​ និងសម្ភារបំពាក់ផងដែរ។

បើតាមលោក ហេង រតនា សារមន្ទីរសន្តិភាពសកម្មភាពមីននេះនឹងសាងសង់នៅលើផ្ទៃដី១២ហិចតានៅខេត្តសៀមរាប ដោយប្រើរយ:ពេលសាងសង់៣ឆ្នាំជាជំនួយហិរញ្ញប្បទានឥត​សំណងរបស់រដ្ឋាភិបាលជប៉ុន៕ អត្ថបទ៖ សំអឿន