សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឲ្យសប្បុរសជនចូលរួមនៅក្នុងការលើកសាង «អន្តេរវាសិកដ្ឋាន» សម្រាប់សិស្ស-និស្សិត ជាស្រ្ដី ទាំងនៅរាជធានីភ្នំពេញ និងតាមបណ្ដាខេត្តនានា។

នៅក្នុងពិធីអបអរសាទរទិវា​អន្តរជាតិ​នារី ៨ មីនា ខួបលើកទី ១១២ នាព្រឹកថ្ងៃទី ៧ ខែមីនានេះ សម្តេចតេជោ ហ៊ុន សែន បានថ្លែងថា នៅក្នុងកិច្ចប្រជុំក្រុមប្រឹក្សាជាតិដើម្បីស្ត្រី កាលពីពេលថ្មីៗនេះ សម្ដេច បានដាក់ចេញនូវទិសដៅ នៃការយកចិត្តទុកដាក់ទៅលើកសាង «អន្តេរវាសិកដ្ឋាន» សម្រាប់សិស្ស-និស្សិត ជាស្រ្ដី ទាំងនៅរាជធានីភ្នំពេញ និងនៅតាមបណ្ដាខេត្តនានា ផងដែរ។

សម្ដេចតេជោ ហ៊ុន សែន បានអំពាវនាវដល់សប្បុរសជន ចូលរួមនៅក្នុងការលើកសាង «អន្តេរវាសិកដ្ឋាន» សម្រាប់សិស្ស-និស្សិត ជាស្រ្ដី នៅតាមវិទ្យាល័យនានា។ សម្ដេចតេជោ ហ៊ុន សែន បានថ្លែងបែបនេះថា «ដូច្នេះជាមួយនឹងថវិការបស់រដ្ឋ យើងក៏អំពាវនាវចំពោះសប្បុរសជន នៅតាមទីកន្លែងនានា ចូលរួមក្នុងការធ្វើ «អន្តេរវាសិកដ្ឋាន» សម្រាប់សិស្សជាស្ត្រី នៅជនបទរបស់យើង ដើម្បីកាត់បន្ថយគម្លាតរវាងទីក្រុង និងជនបទ សម្រាប់ស្រ្ដីរបស់យើង»៕