ឯកឧត្តម ឌី វិជ្ជា៖ មន្ត្រីនគរបាល ត្រូវពង្រឹងសមត្ថភាព វិន័យ សេចក្តីថ្លៃថ្នូរ ក្រមសីលធម៌វិជ្ជាជីវៈ ក្នុងការប្រាស្រ័យទាក់ទង​ជាមួយប្រជាជន

ឯកឧត្តម ឧត្តមសេនីយឯក ឌី វិជ្ជា អគ្គស្នងការរង​នគរបាលជាតិ បានថ្លែងកោតសរសើរស្នាដៃមន្ត្រីនគរបាល នៃស្នងការដ្ឋាននគរបាលខេត្តព្រះសីហនុ បានបំពេញកន្លងមក ទទួលបានលទ្ធផលល្អ។ ឯកឧត្តម លើកឡើងបែបនេះ នៅក្នុងពិធីបិទសន្និបាតបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំឆ្នាំ២០២២ របស់ស្នងការដ្ឋាន​នគរបាលខេត្តព្រះសីហនុ កាលពីរសៀលថ្ងៃទី ២៧ មីនា។

ទោះយ៉ាងណា ឯកឧត្តម បានណែនាំដល់មន្រ្តីនគរបាល ត្រូវកែប្រែឥរិយាបថ និងទម្លាប់ក្នុងការបំពេញ​ការងារឱ្យស័ក្តិសមជាមន្ត្រីបម្រើប្រជាពលរដ្ឋ និងកែលម្អរបៀបគ្រប់គ្រងរបស់ខ្លួន ផ្អែកតាមគោលនយោបាយ​កំណែទម្រង់អភិបាលកិច្ចល្អរបស់រាជរដ្ឋាភិបាល គឺជាមធ្យោបាយឆ្ពោះទៅរកប្រសិទ្ធភាពក្នុងការគ្រប់គ្រង ចាត់ចែង និងការអនុវត្តការងារកាន់តែមានប្រសិទ្ធភាព និងប្រសិទ្ធផលនាពេលខាងមុខ។

ឯកឧត្តម បានស្នើសុំការបង្កើនការយកចិត្តទុកដាក់របស់កងកម្លាំង ដើម្បីការពារសន្តិសុខ សណ្តាប់ធ្នាប់សាធារណៈ​ក្នុងព្រឹត្តិការ​សំខាន់ៗ មានដូចជា ពិធីបុណ្យចូលឆ្នាំថ្មីប្រពៃណីខ្មែរ ការប្រកួតគីឡាស៊ីហ្គេមលើកទី៣២ និងប៉ារ៉ាហ្គេម​លើកទី១២ ឆ្នាំ២០២៣ ម្យ៉ាងទៀត រាជរដ្ឋាភិបាល បានជ្រើសរើសខេត្តព្រះសីហនុ​សម្រាប់ការប្រកួតកីឡា​ស៊ីហ្គេម​លើវិញ្ញាសារចំនួន៣ មានដូចជា កីឡាទូកក្តោង កីឡាម៉ូតូទឹកនិងបាល់ទះលើឆ្នេរខ្សាច់។

ជាមួយគ្នានេះ ឯកឧត្តម ឧត្តមសេនីយឯក ជំរុញដល់មន្រ្តីនគរបាល ត្រូវតាមដានប្រមូលព័ត៌មាននូវរាល់​សកម្មភាពទាក់​ទងការជួញដូរមនុស្សដោយខុសច្បាប់ ការជួញដូរកម្លាំងពលកម្ម ពង្រឹងសមត្ថភាពមន្ត្រីនគរបាល ពង្រឹងវិន័យ សេចក្តី​ថ្លៃថ្នូរ ក្រមសីលធម៌វិជ្ជាជីវៈ ក្នុងការប្រាស្រ័យទាក់ទងជាមួយប្រជាជន និងការបម្រើប្រជាជន​ដោយមិនត្រូវមាន​ការរើសអើងឡើយ។

លោក គួច ចំរើន អភិបាលខេត្តព្រះសីហនុ ធ្វើការកោតសរសើរ និងវាយតម្លៃខ្ពស់ចំពោះថ្នាក់ដឹកនាំកងកម្លាំង​ប្រដាប់អាវុធ នៃស្នងការដ្ឋាននគរបាលខេត្តព្រះសីហនុ បានខិតខំយកអស់កម្លាំងកាយ ចិត្ត ប្រាជ្ញាស្មារតី បំពេញតួនាទីភារកិច្ចបានល្អប្រសើរ ពិសេសចូលរួមសហការជាមួយគណៈបញ្ជាការឯកភាពរដ្ឋបាលខេត្ត ក្នុងការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ ការពារសន្តិសុខសម្រាប់​ពិធីបុណ្យសមុទ្រលើកទី៩ និងមហាសន្និបាទក្លឹបឆ្នេរសមុទ្រស្អាតបំផុតលើសកលលោកឆ្នាំ២០២២ ជាពិសេសការប្រយុទ្ធប្រឆាំងគ្រប់ទម្រង់ នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទ៕

បើតាមលោក គួច ចំរើន ខេត្តព្រះសីហនុ ត្រូវបានជ្រើសរើសធ្វើ​ជាម្ចាស់​ផ្ទះ​រៀបចំ​​កីឡាស៊ីហ្គេមលើកទិ៣២ និងប៉ារ៉ាហ្គេមទី១២ ក្នុងព្រឹត្តិការណ៍​​ស៊ី​ហ្គេម​ឆ្នាំ២០២៣ រួមមានកីឡាទូកក្កោង កីឡាម៉ូតូទឹក និងកីឡាបាល់ទះ​លើឆ្នេរខ្សាច់។ លោកបានធ្វើការផ្តាំផ្ញើ ដល់មន្រ្តីនគរបាលទាំងអស់ ត្រូវរួមសាមគ្គីគ្នា ដើម្បីការពារនូវសន្តិភាព ទោះបីជាត្រូវលះបង់ដោយតម្លៃណាក៏ដោយ ព្រោះថា យើងបានឆ្លងកាត់ការលំបាក និងពុះពារឧបសគ្គច្រើន​ណាស់ទម្រាំតែទទួលបានសន្តិភាពដូចសព្វថ្ងៃនេះ។ ត្រូវពង្រឹងខឿនសន្តិសុខជាតិ ឯករាជ្យ អធិបតេយ្យភាពជាតិ បូរណភាពទឹកដី ទប់ស្កាត់ និងបញ្ចៀសឱ្យបាននូវអំពើភេរវកម្ម វិច្ឆេទកម្ម និងបង្ការទប់ស្កាត់ បង្ក្រាបឱ្យបាន​ទាន់ពេលវេលានូវឧក្រិដ្ឋកម្មឆ្លងដែនគ្រប់ប្រភេទ៕