នគរបាលរាជធានី ស្រាវជ្រាវបង្ក្រាបជនជាតិចិន ០៦ នាក់ លួចផ្លាកលេខរថយន្ត និង កាន់កាប់អាវុធខុសច្បាប់ ប្រព្រឹត្តិនៅខេត្តព្រះសីហនុ

កាលពីយប់ថ្ងៃទី ២៤ ខែឧសភា ឆ្នាំ ២០២៦ កម្លាំងនគរបាលរាជធានីភ្នំពេញ បានបើកការស្រាវជ្រាវឈានទៅបង្ក្រាបជនសង្ស័យជាជនជាតិចិន ០៦ នាក់ ពាក់ព័ន្ធករណីលួចផ្លាកលេខរថយន្ត និង កាន់កាប់អាវុធដោយខុសច្បាប់ ប្រព្រឹត្តិទៅនៅខេត្តព្រះសីហនុ។

ការបង្ក្រាបនេះធ្វើឡើងក្រោមបទបញ្ជាផ្ទាល់ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខេត្តព្រះសីហនុ ដែលជាម្ចាស់ករណី បង្ក្រាបក្រុមជនសង្ស័យក្នុងទឹកដីភូមិសាស្ត្ររាជធានីភ្នំពេញ។

ជនសង្ស័យទាំង ០៦ នាក់ រួមមាន ៖ ០១.ឈ្មោះ WANG HU ភេទប្រុស អាយុ ៣៥ ឆ្នាំ , ០២.ឈ្មោះ LYU XIAN KUI ភេទប្រុស អាយុ ៤៧ ឆ្នាំ , ០៣.ឈ្មោះ PU XING WANG ភេទប្រុស អាយុ ៣៦ ឆ្នាំ , ០៤.ឈ្មោះ YINGLEł ភេទប្រុស អាយុ ៣៩ ឆ្នាំ , ០៥.ឈ្មោះ CHEN YIFING EI ភេទប្រុស អាយុ ២៤ ឆ្នាំ , ០៦.ឈ្មោះ WANG LING ភេទប្រុស អាយុ ៤៣ ឆ្នាំ។

ក្នុងការបង្ក្រាប កម្លាំងសមត្ថកិច្ច ដកហូតបានរថយន្តម៉ាក TOYOTA ALPHARD ០១ គ្រឿង ពណ៌ស ស៊េរីឆ្នាំ ២០១៥ ពាក់ផ្លាកលេខ កម្ពុជា H.DAV289 , អាវុធខ្លី ម៉ាក NP៤២ ០១ ដើម បង់ចំនួន ០១ និង គ្រាប់ចំនួន ១០ គ្រាប់ , ទូរសព្ទ័ដៃចំនួន ០៦ គ្រឿង និង វត្ថុតាងពាក់ព័ន្ធមួយចំនួនទៀត។

បច្ចុប្បន្ន ជនសង្ស័យ និង វត្ថុតាង ត្រូវបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុ ដើម្បីចាត់វិធានការទៅតាមផ្លូវច្បាប់៕
អត្ថបទ ៖ សុភា